Jw බ්‍රෝඩ්කාස්ටිං එක නිසා අපේ විශ්වාසය තවත් ශක්තිමත් වෙලා!

JW බ්‍රෝඩ්කාස්ටිං රූපවාහිනී සේවය ආරම්භ කළේ 2014 වසරේදී. ලෝකේ පුරා ඉන්න හැම කෙනෙක්ටම දෙවිට කිට්ටු වෙන්න ඒ සේවය ගොඩක් උදව් වෙලා තියෙනවා. මේ රූපවාහිනී සේවය දැන් භාෂා 90කටත් වඩා වැඩියෙන් නරඹන්න පුළුවන්. උදාහරණයකට බෙනින්, අයිවරි කෝස්ට්, ඝානාව සහ ටෝගෝවල ඉන්න අපේ සහෝදරයන් 1,30,000කට වඩා වැඩිදෙනෙක්ට ඊව්, ගා සහ ට්වී (ඉහළ පින්තූරයේ) කියන භාෂාවලින් JW බ්‍රෝඩ්කාස්ටිං නරඹන්න අවස්ථාව ලැබිලා තියෙනවා. එයාලා ඒ ගැන හුඟක් සතුටු වෙනවා.a

ඝානාවේ අගතා කියන සහෝදරිය මෙහෙම කියනවා. “පාලක මණ්ඩලයේ සහෝදරයන් සහ එයාලාට උපකාර කරන අය කියන දේවල් බ්‍රෝඩ්කාස්ටිං එක හරහා අහන් ඉන්නකොට මට දැනෙන්නේ හරියට යෙහෝවා දෙවිම මට කතා කරනවා වගේ. ලෝකේ පුරාම ඉන්න සහෝදර සහෝදරියන්ට දැන් මං ගොඩක් කිට්ටු වෙලා.”

සැම්බියාවේ සහෝදරයන් මෙහෙම ලියලා එව්වා. “මෙහේ සභාවල ඉන්න අය හරිම දුප්පත්. ඒත් එයාලා JW බ්‍රෝඩ්කාස්ටිං සේවයෙන් උපරිම ප්‍රයෝජන ගන්න ගොඩක් මහන්සි වෙනවා. උදාහරණයකට මිසාකෝ කියන සභාව තියෙන්නේ නගරයට කිලෝමීටර් 50ක් විතර ඈතින්. ගොඩක් අය ජීවත් වෙන්නේ ගොවිතැන් කරලා.” සයිමන් කියන්නේ වැඩි අවශ්‍යතාවයක් තියෙන ඒ ප්‍රදේශයේ සේවය කරන්න ආපු සහායක සේවකයෙක්. එයා මෙහෙම කියනවා. “හැම මාසෙම සභාවේ කෙනෙක් පැය දෙකක් විතර දුර මහපාරට පයින් ගිහින් එතනින් මොකක් හරි වාහනයක නැගලා ටවුමට යනවා. එහෙට ගිහින් තමයි බ්‍රෝඩ්කාස්ටිං වීඩියෝ එක ඩවුන්ලෝඩ් කරගන්නේ. මේ වගේ පිටිසර ගමක වීඩියෝ පෙන්නනවා කියලා ආරංචි වුණ අවුරුදු 70ක පුද්ගලයෙක් පුතාලා දෙන්නාත් එක්ක රැස්වීම් එන්න පටන්ගත්තා.”

රුසියාවෙන් ලැබුණු ලියුමක මෙහෙම සඳහන් වුණා. “අපි දැන් අවුරුද්දක් තිස්සේ JW බ්‍රෝඩ්කාස්ටිං වැඩසටහන බලනවා. ඒක බලපු පළවෙනි පාරම ලෝකේ පුරාම ඉන්න අපේ සහෝදර පවුලට අපි තවත් කිට්ටු වුණා කියලා දැනුණා. පාලක මණ්ඩලයේ සහෝදරයන්වත් දැකගන්න පුළුවන් වෙන එක ගැන අපිට හරිම සතුටුයි. නියම වෙලාවට අපිට ආහාර දෙන්න එයාලා වෙහෙසෙනවා කියලා නම් හොඳටම පැහැදිලියි. ලෝකේ කොහේ හිටියත් අපි හැමෝටම ඒ ආහාර ලබාගන්න පුළුවන්. හැම මාසෙකම බ්‍රෝඩ්කාස්ටිං වැඩසටහන එන කල් අපි බලාගෙන ඉන්නවා. අපි යෙහෝවා දෙවිගේ සාක්ෂිකරුවන් කියලා හරිම ආඩම්බරයෙන් අපිට කියන්න පුළුවන්. යෙහෝවා දෙවිටත් යේසුස්ටත් මේ හැම දෙයක් වෙනුවෙන්ම අපි ස්තුති කරනවා. JW බ්‍රෝඩ්කාස්ටිං සේවයෙන් අපි ගොඩක් ශක්තිමත් වෙනවා වගේම දිගටම දෙවිට සේවය කරන්න අපිට නව පණක් ලැබෙනවා.”

හෝස්ට් සහ හෙල්ගා කියන්නේ ජර්මනියේ ඉන්න මහලු යුවළක්. එයාලා ටික කාලයක ඉඳලා අසනීපෙන් ඉන්නේ. එයාලා මෙහෙම ලිව්වා. “JW බ්‍රෝඩ්කාස්ටිං සේවය අපි හරිම ආසාවෙන් බලනවා. විශේෂයෙන්ම ආබාධිත සහෝදර සහෝදරියන්ගේ අද්දැකීම් අපිට ලොකු ශක්තියක් වෙලා තියෙනවා. කකුල් දෙකම පණ නැති වුණත් වැඩිමහල්ලෙක් විදිහට සේවය කරන සහෝදරයෙක් ගැන අපි JW බ්‍රෝඩ්කාස්ටිං එකෙන් දැක්කා. මොන අසනීපයක් තිබුණත් දිගටම දෙවිට සේවය කරන්න ඒ වගේ අද්දැකීම් අපිට ලොකු හයියක්. දෙවි ඉදිරියේ අපිත් වටිනවා කියලා අපිට දැනෙනවා. මේ වගේ වැඩසටහනක් අපි වෙනුවෙන් දීලා තියෙන එක ගැන අපි යෙහෝවා දෙවිට ස්තුති කරනවා.”

වයස අවුරුදු අටේදී බව්තීස්ම වුණු එංගලන්තයේ ඉන්න කෝඩි මෙහෙම කියනවා. “JW බ්‍රෝඩ්කාස්ටිං එකටයි, jw.org වෙබ් අඩවියටයි, දුලේන්ගේ සහ නෙත්මිගේ වීඩියෝවලටයි ස්තුතියි. බයිබලයේ තියෙන දේවල් ලේසියෙන් තේරුම්ගන්න ඒ දේවල් මට උදව් වුණා. මට දැන් වයස අවුරුදු නමයයි. ලොකු වුණාම මං ආසයි නමස්කාර මධ්‍යස්ථාන හදන්න උදව් වෙන්න. බෙතෙල් එකේ වැඩ කරන්නත් ආසයි.”

එංගලන්තයේ ඉන්න ඇරබෙලාට වයස අවුරුදු අටයි. එයා මෙහෙම ලියලා එව්වා. “අපේ වෙබ් අඩවියේ තියෙන වීඩියෝවලටයි, ක්‍රියාකාරකම්වලටයි ගොඩක් ස්තුතියි. යෙහෝවා දෙවි ගැන තව තවත් ඉගෙනගන්න ඒවා උදව් වෙලා තියෙනවා. ක්‍රියාකාරකම් පිටු නම් නියමයි. මං හරි ආසයි ඒවා කරන්න. ඔයාලා හදන සිංදුත් ලේසියෙන්ම මතක හිටිනවා. දුලේන්ගේ නෙත්මිගේ වීඩියෝවලටත් මං හරි ආසයි. ඔයාලා වෙන මහන්සියට ස්තුතියි.”