සෝදිසියෙන් ඉන්න!
පාසැල් කලඹන වෙඩි තැබීම් - ඒ ගැන බයිබලයේ කියන්නේ මොකක්ද?
2022 මැයි 24වෙනිදා ඇමරිකාවේ ටෙක්සාස් ප්‍රාන්තයේ යුවල්ඩී කියන පුංචි ටවුමේ සිද්ධ වුණ දෙයක් එක පුවත්පතක මෙහෙම වාර්තා කරලා තිබුණා. “තුවක්කුකරුවෙක් රොබ් කියන ප්‍රාථමික පාසැලේ පුංචි දරුවන් 19දෙනෙක්ව සහ ගුරුවරුන් දෙන්නෙක්ව අමු අමුවේ ඝාතනය කළා.”—The New York Times.
දැන් දැන් ඒ වගේ ඛේදනීය සිද්ධීන් ඉස්සරටත් වඩා අහන්න දකින්න ලැබෙනවා. ‘USA ටුඩේ’ කියන පුවත්පතේ මෙහෙම කියනවා. “ගිය අවුරුද්දේ එක්සත් ජනපදයේ පාසැල්වල විතරක් මේ වගේ ම්ලේච්ඡ වෙඩි තැබීම් 249ක් වෙලා තියෙනවා. 1970 ඉඳන් ඒ වගේ සිද්ධීන් වැඩියෙන්ම වාර්තා වෙලා තියෙන්නේ පහුගිය අවුරුද්දේ.”
මේ වගේ සැහැසික අපරාධ සිද්ධ වෙන්නේ ඇයි? හිතක් පපුවක් නැතුව කරන මේ වගේ දේවල් දරාගන්නේ කොහොමද? අපරාධ නැති කාලයක් කවදා හරි එයිද? ඒ ප්‍රශ්නවලට බයිබලේ තියෙන උත්තර දැනගන්න එක ඔයාට ලොකු සහනයක් වෙයි.
ඇයි මෙච්චර අපරාධ?
අපි ජීවත් වෙන මේ “අවසාන කාලයේ” හුඟක් මිනිස්සු ‘තමන්ගේම අය කෙරෙහිවත් කිසි සෙනෙහසක් නැති, දරුණු’ අය වෙනවා කියලා බයිබලේ කියනවා. ඒ නිසයි මිනිස්සු හිත් පිත් නැතුව මෙච්චර අපරාධ කරන්නේ. ඒ විතරක් නෙවෙයි එයාලා “තව තවත් නරක අතට හැරෙනවා” කියලත් බයිබලේ කියනවා. (2 තිමෝති 3:1-5, 13) ඒ ගැන තවත් විස්තර දැනගන්න “මේ කාලේ මිනිස්සු ගැන බයිබලේ කියලා තියෙනවාද?” කියන ලිපිය බලන්න.
හුඟක් අය කල්පනා කරනවා ‘මේ වගේ අපරාධ සිද්ධ වෙන කල් ඇයි දෙවියන් ඇස් කන් පියාගෙන බලන් ඉන්නේ’ කියලා. ඒ ගැන බයිබලේ කියන දේ දැනගන්න “හොඳ මිනිසුන්ට නරක දේවල් වෙන්නේ ඇයි?” කියන ලිපිය බලන්න.
මේ දේවලට මුහුණ දෙන්නේ කොහොමද?
‘අතීතයේ ශුද්ධ ලියවිලිවල එසේ ලියා තිබෙන සෑම දෙයකින්ම අපට යමක් ඉගෙනගත හැක. එලෙසම ශුද්ධ ලියවිල්ලෙන් සැනසිල්ලද අද්දකින්නෙමු. ඒ දේවල් බලාපොරොත්තුවක් ඇතුව සිටීමට අපට උපකාරවත් වෙයි.’—රෝම 15:4.
මේ වගේ ප්‍රචණ්ඩකාරී දේවල් වෙද්දී ඒවාට මුහුණ දෙන්න බයිබලේ තියෙන මඟ පෙන්වීම් උදව් වෙනවා. ඒ ගැන තවත් තොරතුරු දැනගන්න “ඇයි මෙතරම් අපරාධ සිදු වන්නේ?” කියන ‘පිබිදෙව්!’ සඟරාව බලන්න.
හිත් කලඹන පුවත් ඇහෙද්දී දකිද්දී අනවශ්‍ය විදිහට කලබල වෙන්නේ නැතුව ඉන්න දරුවන්ට උදව් කරන්න දෙමාපියන්ට පුළුවන්. ඒක කරන විදිහ ගැන දැනගන්න “පුංචි සිත් කලඹන පුවත්” කියන ලිපිය බලන්න.
අපරාධ නැති හෙටක්!
‘පීඩාවලින්ද සැහැසික ක්‍රියාවලින්ද දෙවියන් ඔවුන්ව මුදවාගන්නේය.’—ගීතාවලිය 72:14.
“ඔවුහු තමුන්ගේ කඩුවලින් නගුල්ද හෙල්ලවලින් දෑකැතිද සාදාගන්නෝය. ඒ සෙනඟ තවදුරටත් එකිනෙකාට විරුද්ධව කඩු ඔසවන්නේවත් යුද්ධයට පුහුණු වන්නේවත් නැත.”—මීකා 4:3.
මිනිස්සුන්ට කරන්න බැරි වුණ දේ දෙවියන් කරන්න යනවා. අනිත් අයට හානියක් වෙන හැම ආයුධයක්ම, හැම අපරාධයක්ම ඔහු නැත්තටම නැති කරනවා. ඔහු ඒක කරන්නේ ස්වර්ගයේ පිහිටුවලා තියෙන ඔහුගේ ආණ්ඩුව මාර්ගයෙන්. එදාට මොන වගේ කාලයක් උදා වෙයිද කියලා දැනගන්න “දෙවියන්ගේ රාජ්‍යය යටතේ ‘බොහෝ සමාදානය තිබෙන්නේය’” කියන ලිපිය බලන්න.