Anna Moneymaker/Getty Images
සෝදිසියෙන් ඉන්න!
ඩූම්ස්ඩේ ඔරලෝසුවේ කටු තවත් ඉස්සරහට! - ඒ ගැන බයිබලයේ කියන්නේ මොකක්ද?
2023 ජනවාරි 24වෙනිදා විද්‍යාඥයන් ඩූම්ස්ඩේ ඔරලෝසුවේa කටු මධ්‍යම රාත්‍රියට තවත් ළං කළා. ඒකෙන් පෙන්නන්නේ ලෝක විනාශයට අපි තවත් කිට්ටු වුණා කියන එකයි.
“අඟහරුවාදා ‘ඩූම්ස්ඩේ’ ඔරලෝසුවේ කටු මධ්‍යම රාත්‍රියට තවත් ළං කළා. මුළු මිනිස් සංහතියම ලොකු විනාශකට ඇද වැටෙන්නයි යන්නේ. යුක්රේන යුද්ධය, න්‍යෂ්ටික යුද්ධයක අවදානම සහ භයානක විදිහට දේශගුණයේ සිද්ධ වෙන වෙනස්කම් ඒකට බලපාලා තියෙනවා.”—AFP International Text Wire.
“විද්‍යාඥයන් කියනවා අඟහරුවාදායින් පස්සේ ‘ඩූම්ස්ඩේ’ ඔරලෝසුවේ කටු මධ්‍යම රාත්‍රියට ළං වෙන්න තියෙන්නේ තව තත්පර 90ක් විතරයි කියලා. ඉතිහාසයේ වෙන කවදාවත් අපි හර්–මගෙදොන්වලට මෙච්චර කිට්ටු වෙලා නැහැ.”—ABC News.
“ඉහළ පෙළේ විද්‍යාඥයන් කණ්ඩායමක් කියනවා වෙන කවදාටත් වඩා දැන් මිනිස්සු ඉන්නේ ලොකු අනතුරක කියලා.”—The Guardian.
ඇත්තටම මිනිස්සු එක්කම මේ පොළොව සම්පූර්ණයෙන්ම විනාශ වෙලා යයිද? අනාගතය ගැන කිසි බලාපොරොත්තුවක් තියාගන්න බැරිද? බයිබලයේ ඒ ගැන කියන්නේ මොනවාද?
ඉස්සරහට මොනවා වෙයිද?
“පොළොව සදහටම පවතිනවා” කියලත් මිනිස්සු “එහි සදාකල් ජීවත් වෙනවා” කියලත් බයිබලයේ කියනවා. (දේශනාකාරයා 1:4; ගීතාවලිය 37:29) ඒකෙන් පැහැදිලි වෙනවා හැම මනුෂ්‍යයෙක්ම විනාශ වෙලා යන්නෙවත් පොළොව මිනිස්සුන්ට ජීවත් වෙන්න බැරි තැනක් වෙන්නෙවත් නැහැ කියලා.
හැබැයි බයිබලෙත් විනාශයක් ගැන කතා කරලා තියෙනවා. උදාහරණෙකට බයිබලයේ කියනවා ‘මේ ලෝකය නැති වී යනවා’ කියලා.—1 යොහන් 2:17.
ඒ ගැන තව විස්තර දැනගන්න “ළඟදීම ලෝකය විනාශ වෙයිද?” කියන ලිපිය බලන්න.
ලෝක විනාශය සිද්ධ වෙන කාලය ගැන බයිබලයේ කියන දේ දැනගන්න “ලෝක විනාශය සිද්ධ වෙන්නේ කවදාද?” කියන ලිපිය බලන්න.
ශුභවාදීව හිතන්න
මේ ලෝකේ කොච්චර ප්‍රශ්න තිබ්බත් ශුභවාදීව හිතන්න බයිබලය අපිට උදව් කරනවා. ඒ කොහොමද?
බයිබලයේ ගොඩක් හොඳ මඟ පෙන්වීම් තියෙනවා. (2 තිමෝති 3:16, 17) උදාහරණෙකට, අභියෝග මැද වුණත් සතුටින් ඉන්න පුළුවන් විදිහ ගැන බයිබලයේ කියන දේ දැනගන්න “හිතේ බර සැහැල්ලු කරගන්න” කියන ලිපිය බලන්න.
බයිබලයේ අපේ අනාගතය ගැන ලස්සන බලාපොරොත්තුවකුත් දීලා තියෙනවා. (රෝම 15:4) දැන් වගේම ඉස්සරහටත් වෙන්නේ මොනවාද කියලා බයිබලයේ පැහැදිලිව කියලා තියෙන නිසා මොන දේ වුණත් බය නැතුව ඒවාට මුහුණ දෙන්න අපිට පුළුවන්.
බයිබලය ගැන තවත් තොරතුරු දැනගන්න නොමිලේ පවත්වන බයිබල් සාකච්ඡාවක් පටන්ගන්න කියලා අපි ඔයාට ආරාධනා කරනවා.
a “‘ඩූම්ස්ඩේ ඔරලෝසුව’ කියන්නේ සංකේතවත් ඔරලෝසුවක්. මිනිස්සු තාක්ෂණය හානිකර විදිහට පාවිච්චි කරන නිසා අපි විනාශයට කොච්චර ළඟයිද කියලා පෙන්නන්නයි විද්‍යාඥයන් ඒක හදලා තියෙන්නේ. මේ පොළොවේ දිගටම ජීවය පවතින්න නම් පොළොවට තර්ජනයක් වෙන හැම දේටම ඉක්මනින්ම විසඳුමක් හොයාගන්න ඕනේ.”—Bulletin of the Atomic Scientists.