යෙහෝවා දෙවිගේ සාක්ෂිකරුවන් ගැන ඔයා දන්නවාද?
ඔයා අපිව පාරෙදි නැත්නම් වෙනත් තැනකදී දැකලා ඇති. සමහරවිට අපි ගැන පත්තරවලින් කියවලා ඇති. එහෙමත් නැත්නම් කවුරු හරි අපි ගැන කියපු දෙයක් අහලා ඇති. ඒත් ඇත්තටම යෙහෝවා දෙවිගේ සාක්ෂිකරුවන් කියන්නේ කාටද කියලා ඔයා දන්නවද?
දැනුම මැනලා බලන්න
මේ අදහස් හරිද? වැරදිද?
හරි වැරදි
යෙහෝවා දෙවිගේ සාක්ෂිකරුවන් ක්‍රිස්තියානීන්.
යෙහෝවා දෙවිගේ සාක්ෂිකරුවන් මැවුම්වාදීන්.
යෙහෝවා දෙවිගේ සාක්ෂිකරුවන් ලෙඩ වුණාම බෙහෙත් ගන්නේ නැහැ.
යෙහෝවා දෙවිගේ සාක්ෂිකරුවන් මුළු බයිබලයම විශ්වාස කරනවා.
සාක්ෂිකරුවන් පාවිච්චි කරන්නේ එයාලගේ බයිබලය විතරයි.
සාක්ෂිකරුවන් එයාලට ඕන විදිහට බයිබලය වෙනස් කරලා තියෙනවා.
එයාලා මිනිසුන්ට යහපතක් වෙන වැඩවලට හවුල් වෙන්නේ නැහැ.
සාක්ෂිකරුවන් අනිත් ආගම්වල අයට ගරු කරන්නේ නැහැ.
උත්තර දැනගන්න ඊළඟ පිටු බලන්න.
1 හරි. යේසුස් ක්‍රිස්තුස්ගේ ඉගැන්වීම් සහ ආදර්ශය පිළිපදින්න අපි අපේ උපරිමය කරනවා. (1 පේතෘස් 2:21) ඒත් ක්‍රිස්තියානීන් කියලා කියන අනික් අයට වඩා අපි හුඟක් පැතිවලින් වෙනස්. උදාහරණයකට බයිබලයේ කියන්නේ යේසුස් දෙවිගේ පුත්‍රයා කියලයි. (මාක් 12:29) ඒ නිසා ඔහු ත්‍රිත්වයේ කොටසක් කියලා අපි විශ්වාස කරන්නේ නැහැ. ඒ වගේම මිනිසුන්ට අමරණීය ආත්මයක් තියෙනවා කියලාවත් දෙවි දුෂ්ට මිනිසුන්ව අපායකට දානවා කියලවත් අපි විශ්වාස කරන්නේ නැහැ. සභාවේ මූලිකත්වය අරන් වැඩ කරන අය අනිත් අයට වඩා උසස් කියලා පෙන්වන ගෞරව නාම පාවිච්චි කරන්න ඕනේ කියලා අපි හිතන්නෙත් නැහැ.—දේශනාකාරයා 9:5; මතෙව් 23:8-10.
2 වැරදියි. දෙවියන් හැම දේම නිර්මාණය කළා කියලා අපි විශ්වාස කරනවා. හැබැයි අපි මැවුම්වාදීන් නෙමෙයි. මොකද මැවුම්වාදීන් කියන හුඟක් දේවල් බයිබලයට එකඟ නැහැ. උදාහරණයකට මැවුම්වාදීන් විශ්වාස කරන්නේ හැම දේම නිර්මාණය කරන්න ගත වුණු දවස් හය පැය 24ක දවස් හයක් කියලයි. ඒත් බයිබලයේ “දවස” කියලා සඳහන් වෙන වචනයට දීර්ඝ කාල පරිච්ඡේදයක් කියන අදහස ඇතුළත්. (උත්පත්ති 2:4; ගීතාවලිය 90:4) ඒ වගේම පෘථිවිය මවලා අවුරුදු 10,000ක්වත් ගත වෙලා නැහැ කියලයි මැවුම්වාදීන් කියන්නේ. ඒත් දෙවියන් පෘථිවියේ තියෙන දේවල් නිර්මාණය කරපු දවස් හයට සෑහෙන කාලයකට කලින් විශ්වය හා පෘථිවිය නිර්මාණය කරලා තිබුණා කියලා බයිබලයේ කියනවා.1—උත්පත්ති 1:1.
3 වැරදියි. අපි බෙහෙත් ගන්නවා. පළවෙනි සියවසේ හිටපු යේසුස්ගේ නියෝජිතයෙක් වුණු ලූක් වෛද්‍යවරයෙක්. (කොලොස්සි 4:14) ඒ වගේ අද ඉන්න සමහර යෙහෝවා දෙවිගේ සාක්ෂිකරුවනුත් වෛද්‍යවරු. ඒත් සමහර ප්‍රතිකාර ක්‍රම බයිබල් ප්‍රතිපත්තිවලට පටහැනි නිසා අපි ඒවා පිළිගන්නේ නැහැ. උදාහරණයකට ලේවලින් වළකින්න කියලා බයිබලේ කියන නිසා අපි ලේ ගන්නේ නැහැ.—ක්‍රියා 15:20, 28, 29.
අපි නිතරම උත්සාහ කරන්නේ අපිටත් අපේ පවුල්වල අයටත් හොඳම වෛද්‍ය ප්‍රතිකාර ලබාගන්නයි. රුධිර ප්‍රවේශනය වෙනුවට සාක්ෂිකරුවන් ලබාගන්නා වෙනත් ප්‍රතිකාර ක්‍රම හුඟක් සාර්ථකයි. ඒ නිසා වෙන අයටත් ඒ ප්‍රතිකාර ලබා දෙන්න වෛද්‍යවරුන්ට හැකි වෙලා තියෙනවා. රුධිරය මගින් සමහර රෝග වැලඳෙන්න ඉඩ තියෙනවා. ඒ වගේම ශරීරයට ඇතුල් කරන රුධිරය ප්‍රතිශක්තිකරණ පද්ධතියට ඔරොත්තු නොදෙන්නත් පුළුවන්. රුධිරය ලබා දෙද්දී සිද්ධ වෙන්න පුළුවන් අත්වැරදි නිසාත් රෝගියෙකුට ඒක අහිතකර විදිහට බලපාන්න පුළුවන්. ඒ වගේ හේතු නිසා සමහර රටවල්වල රුධිර ප්‍රවේශනය ප්‍රතික්ෂේප කිරීමේ අයිතිය රෝගීන්ට දීලා තියෙනවා.
4 හරි. මුළු බයිබලයම ලියලා තියෙන්නේ ‘දෙවිගේ මඟ පෙන්වීමෙන්’ කියලා අපි විශ්වාස කරනවා. (2 තිමෝති 3:16) ඒකට අලුත් ගිවිසුමයි පරණ ගිවිසුමයි දෙකම ඇතුළත්. හැබැයි පරණ හා අලුත් කියන වචනවලින් ඒ කොටස් දෙක හඳුන්වනවා වෙනුවට අපි ඒවා හඳුන්වන්නේ හෙබ්‍රෙව් ශුද්ධ ලියවිල්ල හා ග්‍රීක ශුද්ධ ලියවිල්ල කියලයි. ඒකට හේතුව පරණ ගිවිසුම කියලා හැඳින්නුවොත් ඒක පරණ නිසා අදට ගැළපෙන්නේ නැහැ කියලා සමහරු හිතන්න පුළුවන්. ඒත් එහෙම හිතනවාට අපි කැමති නැහැ.
5 වැරදියි. අපි බයිබලය ගැන අධ්‍යයනය කරන්න හුඟක් බයිබල් පරිවර්තන යොදාගන්නවා. ඒත් දැන් ‘ශුද්ධ බයිබලය - නව ලොව පරිවර්තනය’ කියන බයිබලය හුඟක් භාෂාවලින් තියෙනවා. ඒකෙ දෙවියන්ගේ නම සඳහන් වීම, නිවැරදිභාවය හා පැහැදිලිකම නිසා අපි ඒ බයිබලය ගොඩක් අගය කරනවා. උදාහරණයකට දෙවියන්ගේ නම සඳහන් කිරීම ගැන ටිකක් හිතන්න. එක බයිබල් පරිවර්තනයක හැඳින්වීමේ, ඒ බයිබලය පළ කරන්න සුළු වශයෙන් හෝ දායක වුණ 79කගේ නම් සඳහන් කරලා තිබුණා. ඒත් බයිබලයේ කර්තෘ වන යෙහෝවා දෙවියන්ගේ නම ඒකෙන් සම්පූර්ණයෙන්ම අයින් කරලා. ‘නව ලොව පරිවර්තනය’ ඊට හාත්පසින්ම වෙනස්. ඒක පරිවර්තනය කරපු අය බයිබලයේ මුල් පිටපත්වල දෙවියන්ගේ නම තිබුණු තැන් දහස් ගණනක දෙවියන්ගේ නම සඳහන් කරලා තියෙනවා.2
6 වැරදියි. අපි එහෙම දෙයක් කරලා නැහැ. අපි විශ්වාස කරපු දේවල් බයිබලයට එකඟ නැහැ කියලා දැනගත්තාම බයිබලය වෙනස් කරනවා වෙනුවට අපි විශ්වාස කරන දේවල් බයිබලයට එකඟව වෙනස් කරගත්තා. 1950දී ‘ශුද්ධ බයිබලය - නව ලොව පරිවර්තනය’ මුදාහරින්න කලින් ඉඳලම බයිබලයේ තියෙන දේවල් දැනගන්න අපි විවිධ බයිබල් පරිවර්තන පාවිච්චි කළා. ඊටපස්සේ අපේ විශ්වාසයන් බයිබලයට එකඟව නිවැරදි කරගත්තා.
7 වැරදියි. සමාජයට අපෙන් ලොකු යහපතක් වෙනවා. උදාහරණයකට අපි කරන සේවයෙන් අපිට පුළුවන් වෙලා තියෙනවා මත්ද්‍රව්‍ය හා මත්පැන්වලට ඇබ්බැහි වෙලා හිටපු අයට ඒවායින් ගැලවෙන්න උදව් කරන්න. කියවන්න, ලියන්න බැරි හුඟක් අයට අපි වෙනම පන්ති තියලා භාෂාව කියලා දෙනවා. හදිසි විපතකදී අපි අපේ ආගමේ ඉන්න අයට විතරක් නෙමෙයි විපතට පත් වෙලා ඉන්න වෙනත් ආගම්වල අයටත් උදව් කරනවා. ඒ වගේ වෙලාවට බයිබලයේ තියෙන සැනසීම ගෙන දෙන වදන්වලිනුත් ඒ අයට සහනයක් ලබා දෙන්න අපි උත්සාහ කරනවා.3
8 වැරදියි. “සෑම තරාතිරමකම සිටින මිනිසුන්ට ගෞරව කරන්න” කියන බයිබල් උපදෙස අපි පිළිපදිනවා. (1 පේතෘස් 2:17) ඒ නිසා අනිත් ආගම්වල අයට අපි ගරු කරනවා. උදාරහණයකට සමහර රටවල්වල යෙහෝවා දෙවිගේ සාක්ෂිකරුවන් ලක්ෂ ගණනක් ඉන්නවා. ඒත් අනිත් ආගම් තහනම් කරන්න කියලා අපි ආණ්ඩුවට බල කරන්නේ නැහැ. අපි විශ්වාස කරන දේවල් අනික් අය විශ්වාස කරන්න ඕන, අපි පිළිපදින සදාචාර ප්‍රමිති අනිත් අය පිළිපදින්න ඕන කියලා නීති දාන්න අපි උද්ඝෝෂණ කරන්නෙත් නැහැ. අපි අනිත් අයගේ ආගමික නිදහසට ගරු කරනවා. ඒ වගේම ඒ අයත් අපේ ආගමික නිදහසට ගරු කරනවාට අපි කැමතියි.—මතෙව් 7:12.
මේ ලිපියේ තියෙන්නේ www.pr418.com/si කියන අපේ වෙබ් අඩවියෙන් ගත්ත තොරතුරු. වැඩි විස්තර දැනගන්න අපි ගැන > නිතර අසන ප්‍රශ්න යටතේ බලන්න.
^ 1. පොළොව අවුරුදු බිලියන ගාණක් පරණයි කියලා කියන්න විද්‍යාඥයන් ඉදිරිපත් කරන තොරතුරුවලට අපි විරුද්ධ නැහැ.
^ 2. තවත් විශේෂ දෙයක් නිසා ‘නව ලොව පරිවර්තනය’ අනිත් පරිවර්තනවලට වඩා විශිෂ්ටයි. ඒ, කිසිම අය කිරීමකින් තොරව ඒක බෙදාහරින නිසයි. ප්‍රතිඵලයක් හැටියට මිලියන ගණනකට තමන්ගේම භාෂාවෙන් බයිබලය කියවන්න පුළුවන් වෙලා තියෙනවා. දැන් ‘නව ලොව පරිවර්තනය’ භාෂා 130කින් විතර ලබාගන්න පුළුවන්. ඒක www.pr418.com/si වෙබ් අඩවියෙන් කියවන්නත් පුළුවන්.
^ 3. යෙහෝවා දෙවිගේ සාක්ෂිකරුවන්ගේ ශාඛා කාර්යාලවලට ලැබෙන සම්මාදම් විපතට පත් වෙලා ඉන්න අයට උදව් කරන්නත් යොදාගන්නවා. (ක්‍රියා 11:27-30) සහන සේවා සපයද්දී සාක්ෂිකරුවන් වැඩ කරන්නේ වැටුපකට නෙමෙයි. ඒ නිසා ඒ සම්මාදම් වෙන කිසිම දේකට පාවිච්චි කරන්නේ නැහැ.