117වෙනි පරිච්ඡේදය

උයනේදී ඉමහත් වේදනාවක් විඳිමින්

යාච්ඤා කිරීමෙන් අනතුරුව යේසුස් හා ඔහුගේ විශ්වාසවන්ත ප්‍රේරිතයන් 11දෙනා යෙහෝවාට ප්‍රශංසා ගී ගයනවා. ඉන්පසු, ඔවුන් උඩුමහල් කාමරයෙන් බැස පිටතට එද්දී රාත්‍රිය එළඹී ඇති අතර, එය ඉතා ශීත මෙන්ම අඳුරු රාත්‍රියක්. ඔවුන් තම ගමන අරඹා ආපසු කිද්‍රොන් මිටියාවත හරහා පියමං කරන්නේ බෙතානිය වෙතටයි. ගමන අතරතුරේදී ඔවුන්ගේ ප්‍රියතම තැනක් වන ගෙත්සෙමන උයනේදී ඔවුන් නතර වෙනවා. මෙය තිබෙන්නේ ඔලීව කන්ද මත හෝ ඒ අවට ප්‍රදේශයකයි. යේසුස් බොහෝ වරක් මෙහි ඔලීව ගස් යටදී තම ප්‍රේරිතයන්ව හමු වී තිබෙනවා.

ඔහු ප්‍රේරිතයන් අටදෙනෙකුට උපදෙස් දෙන්නේ, “මා අතනට ගොස් යාච්ඤා කරන තුරු, මෙහි ඉඳගෙන සිටින්න” කියායි. සමහරවිට, ඔහු ප්‍රේරිතයන් අටදෙනාව දමා යන්නේ උයනට ඇතුල් වන ස්ථානයේදී විය හැකියි. ඉන්පසු, පේතෘස්, යාකොබ් හා යොහන් වන අනිත් ප්‍රේරිතයන් තුන්දෙනා සමඟ ඔහු උයනේ තවත් ඇතුළට ගමන් කරනවා. යේසුස් අතිශයින් ශෝකයට පත් වී ඔවුන්ට මෙසේ පවසනවා. “මැරෙන තරමටම මම අතිශයින් ශෝකව සිටිමි. ඔබ මෙහි නැවතී මා සමඟ සෝදිසියෙන් සිටින්න.”

යේසුස් ටික දුරක් ඉදිරියට ගොස්, මුණින් වැටී ඉතා හැඟීම්බරව මෙසේ යාච්ඤා කරනවා. “මාගේ පියාණෙනි, පුළුවන් නම් මේ කුසලානය මා කෙරෙන් පහවීමට ඉඩහරින්න. නමුත් මාගේ කැමැත්ත නොව, ඔබේ කැමැත්ත ලෙස වේවා.” ඔහු ඉන් අදහස් කරන්නේ කුමක්ද? ඔහු ‘මැරෙන තරමටම අතිශයින් ශෝකව සිටින්නේ’ ඇයි? දිවි පුදමින් මිදීමේ මිලය ගෙවීමට ඔහු ගත් තීරණය ගැන ඔහු දැන් පසුතැවෙනවාද? එය මඟහරින්න තැත් කරනවාද?

කොහෙත්ම නැහැ! යේසුස් ඉල්ලා සිටින්නේ තමාව මරණයෙන් ගලවන්න කියා නොවෙයි. යේසුස්ට තම යාගික මරණය මඟහැරිය හැකියයි පේතෘස් වරක් ඇඟවූ විට යේසුස්ගේ ප්‍රතිචාරයෙන් පැහැදිලි වූයේ එම අදහසට පවා ඔහු පිළිකුල් කරන බවයි. ළඟදීම නින්දිත අපරාධකරුවෙකු ලෙස ඔහුට මැරෙන්න සිදු වෙනවා. ඉතිං, ඔහු මිය යන ආකාරයෙන් පියාගේ නාමයට ලොකු කැලලක් ඇති විය හැකියි. ඔහුට දැඩි වේදනාවක් දැනෙන්නේ ඒ නිසයි. තව පැය කිහිපයකින් පහත්ම පහත් අපරාධකරුවෙකු ලෙස, එනම් දෙවිට අපහාස කරන්නෙකු වශයෙන් ඔහුව වධකණුවක ඇණ ගසා මරා දමනු ලබන බව යේසුස් දන්නවා! ඔහු දැඩි සේ කැලඹෙන්නේ ඒ නිසයි.

සෑහෙන වේලාවක් යාච්ඤා කළ පසු යේසුස් නැවත වරක් ප්‍රේරිතයන් තුන්දෙනා සිටින තැනට යනවා. එතැනට යද්දී තුන්දෙනාම නිදාගෙනයි සිටින්නේ. පේතෘස්ව අමතමින් යේසුස් මෙසේ පවසනවා. “ඔබට එක පැයක්වත් මා සමඟ සෝදිසියෙන් සිටින්න බැරි වුණාද? ඔබ වරදට නොපෙලඹෙන පිණිස සෝදිසියෙන් සිට නොකඩවා යාච්ඤා කරන්න.” ඒ කොහොම වුණත්, ඔවුන් දැඩි මානසික පීඩනයක් යටතේ සිටින බවත් බොහෝ සෙයින් රෑ බෝ වී ඇති බවත් පිළිගනිමින් ඔහු මෙසේ පවසනවා. “සිත නම් කැමතිය, නමුත් මාංසය දුර්වලය.”

යේසුස් දෙවන වතාවටත් එතැනින් අහකට ගොස් ඉල්ලා සිටින්නේ, “මේ කුසලානය” හෙවත් ඔහු විසින් ඉටු කළ යුතුව තිබෙන යෙහෝවාගේ අරමුණ හෝ වැඩ කොටස තමා වෙතින් ඉවත් කරන ලෙසයි. ඔහු ආපසු ප්‍රේරිතයන් සිටින තැනට යනවා. මේ වතාවේදීත් ඔවුන් නිදා සිටින බව පෙනේ. ඇත්තෙන්ම මෙවැනි අවස්ථාවකදී ඔවුන් පරීක්ෂාවට නොපැමිණෙන පිණිස යාච්ඤා කරමින් සිටිය යුතුයි. යේසුස් ඔවුන්ට කතා කරද්දී ඔහුට කෙසේ පිළිතුරු දෙන්නද කියා ඔවුන් දන්නේ නැහැ.

අන්තිමට තුන්වන වතාවටත් යේසුස් මදක් ඈතට ගොස්, දණින් වැටී ඉතාමත් හැඟීම්බරව හඬ නඟමින් හා කඳුළු සලමින් මෙසේ යාච්ඤා කරනවා. “පියාණෙනි, ඔබ කැමති නම්, මේ කුසලානය මා වෙතින් ඉවත් කරන්න.” අපරාධකරුවෙකු ලෙස මිය යෑමේදී තම පියාගේ නමට ඇති වන නින්දාව ගැන යේසුස්ට දැඩි වේදනාවක් දැනෙන බව පැහැදිලියි. දෙවිට අපහාස කරන්නෙකු හෙවත් ශාප කරන්නෙකු ලෙස චෝදනා කරනු ලැබීම ඔහුට දරාගත නොහැකි තරම්!

එහෙත්, “මාගේ කැමැත්ත නොව ඔබේ කැමැත්ත වේවා” කිය යේසුස් තවදුරටත් යාච්ඤා කරනවා. යේසුස් කීකරුව දෙවිගේ කැමැත්තට යටත් වෙනවා. මේ අවස්ථාවේදී, ස්වර්ගයෙන් දේවදූතයෙක් ඇවිත් දිරිගන්වනසුලු වචනවලින් ඔහුව ශක්තිමත් කරනවා. සමහරවිට, දේවදූතයා යේසුස්ට පවසන්නේ ඔහු තම පියාව සතුටට පත් කර ඔහුගේ අනුමැතිය දිනාගෙන සිටින බව වෙන්න ඇති.

යේසුස්ට පවරා ඇති වගකීම මොන තරම් භාරදූර එකක්ද කියා සිතා බලන්න! ඔහුට මෙන්ම මුළු මිනිස් සංහතියටම සදාකල් ජීවත් වීමට ඇති ප්‍රස්තාව පවතින්නේ අවදානම් තත්වයකයි. ඔහුට දැනෙන මානසික පීඩනය ඉමහත්. ඒ නිසා, යේසුස් වඩාත් හැඟීම්බරව නොනවත්වාම යාච්ඤා කරනවා. ඔහුගේ දහඩිය ලේ බිඳු මෙන් බිමට වැටෙනවා. “මෙය ඉතාමත් කලාතුරකින් සිදු වන දෙයක් වුවත්, දැඩි චිත්ත පීඩාවකින් පෙළෙන අවස්ථාවලදී . . . දහඩිය ලේ සමඟ පිට විය හැකි” බව එක්තරා වෛද්‍ය සඟරාවක (The Journal of the American Medical Association) සඳහන් කරනවා.

ඉන්පසු, යේසුස් තුන්වන වතාවටත් ප්‍රේරිතයන් වෙතට යද්දී, ඔවුන් නිදා සිටින බව ඔහු දකිනවා. අධික ශෝකයෙන් සිටින නිසා ඔවුන් ශාරීරිකවත් හෙම්බත් වෙලයි ඉන්නේ. ඔහු මහත් හැඟීමකින් මෙසේ පවසනවා. “මෙවැනි වෙලාවකත් ඔබ නිදාගෙන විවේක ගන්නවාද! ඉතින් ඇති! පැය පැමිණ තිබේ! මෙන්න! මනුෂ්‍ය පුත්‍රයාව පව්කාරයන්ගේ අත්වලට පාවා දෙනු ලබන්නේය. නැඟිටින්න, අපි යමු. මෙන්න! මා පාවා දෙන්නා ළඟටම ඇවිත් ඇත.”

ඔහු කතා කරමින් සිටියදීම, යූදස් ඉස්කාරියොත් සමඟ පහන්ද පන්දම්ද ආයුධද අතැති විශාල සමූහයක් පැමිණෙනවා. මතෙව් 26:30, 36-47; 16:21-23; මාක් 14:26, 32-43; ලූක් 22:39-47; යොහන් 18:1-3; හෙබ්‍රෙව් 5:7; NW.

▪ උඩුමහල් කාමරයෙන් පිටත්ව යෑමෙන් පසු, යේසුස් ප්‍රේරිතයන්ව කොතැනකට ගෙන යයිද? ඔහු එතැනදී කරන්නේ කුමක්ද?

▪ යේසුස් යාච්ඤා කරමින් සිටින අතරේදී, ප්‍රේරිතයන් කරමින් සිටින්නේ කුමක්ද?

▪ යේසුස් දැඩි වේදනාවක් දැනෙන්නේ කුමක් නිසාද? ඔහු දෙවිගෙන් ඉල්ලන්නේ කුමක්ද?

▪ යේසුස්ගේ දහඩිය ලේ බිඳු බවට පත්වීමෙන් පෙන්වන්නේ කුමක්ද?

118වෙනි පරිච්ඡේදය

පාවා දුන් පසු අත්අඩංගුවට ගනී

යූදස් දැන් හේවායන්, නායක පූජකයන්, පරිසිවරුන් හා වෙනත් අයගෙන් යුත් විශාල සමූහයක් සමඟ ගෙත්සෙමන උයනට එනවා. මේ වන විට, මැදියම් රාත්‍රියත් පහු වෙලා. ඔවුන්ට යේසුස්ව පාවා දුන්නොත් රිදී කාසි 30ක් ගෙවන බවට පූජකයන් යූදස්ට පොරොන්දු වී තිබුණා.

යේසුස් පාස්කු භෝජනය අතරතුරේදී යූදස්ව පිටත් කර යැවූ පසු ඔහු කෙළින්ම නායක පූජකයන් වෙතට ගිය බව පැහැදිලියි. මොවුන් හැකි ඉක්මනින් නිලධාරීන්ව හා හේවා කණ්ඩායමක් එක්රැස් කරගත්තා. සමහරවිට, යූදස් ඔවුන්ව මුලින්ම ගෙන යන්න ඇත්තේ යේසුස් හා ඔහුගේ ප්‍රේරිතයන් පාස්කුව පවත්වමින් සිටි ස්ථානයට විය හැකියි. ඔවුන් එතැන නොසිටින නිසා, ආයුධ, පහන් සහ පන්දම් අතැතිව යූදස් පසුපස ගමන් කරන විශාල පිරිස යෙරුසලමෙන් පිට වී කිද්‍රොන් මිටියාවත හරහා ගමන් කරනවා.

සමූහයට ඉදිරියෙන් ඔලීව කන්ද උඩට පියමං කරද්දී යූදස්ට නිසැකයි පහසුවෙන්ම යේසුස් සිටින තැන තමාට සොයාගත හැකි බව. පසුගිය සතියේදී බෙතානිය හා යෙරුසලම අතර ගමන් කරද්දී, යේසුස් තම ප්‍රේරිතයන් සමඟ කිහිප වතාවක්ම ගෙත්සෙමන උයනේ නතර වී තිබුණා. ඔවුන් එසේ නතර වුණේ ගිමන් හැරීමට හා කතාබහ කිරීමටයි. දැන් යේසුස් සිටින්නේ ඔලීව ගස් යට විය හැකියි. ඉතිං, රාත්‍රියේ ඝන අන්ධකාරය නිසා හේවායන්ට ඔහුව නොපෙනෙන්න ඉඩ තිබෙනවා. එහෙමනම්, ඔහුව හඳුනාගන්නේ කොහොමද? ඔවුන් යේසුස්ව මීට පෙර කවදාවත් දැක නැතුව ඇති. ඒ නිසා, යූදස් ඔවුන්ට සංඥාවක් දෙනවා. “මා යමෙකුව සිඹගන්නේද, ඒ ඔහුය. ඔහුව අත්අඩංගුවට ගෙන පරෙස්සමෙන් ගෙන යන්න.”

යූදස් මහත් සමූහය උයන වෙතට රැගෙන යනවා. යේසුස් තම ප්‍රේරිතයන් සමඟ සිටිනවා දකිද්දී කෙළින්ම ඔහු වෙතට ගොස්, “රබ්බි, සුබ දවසක් වේවා” යනුවෙන් පවසා ඔහු ඉතා මෘදු ලෙස යේසුස්ව සිඹගන්නවා.

එවිට යේසුස් මෙසේ අසනවා. “යහළුව, ඔබ පැමිණ සිටින්නේ කුමක් සඳහාද?” ඊළඟට යේසුස්ම තම ප්‍රශ්නයට මෙසේ පිළිතුරු දෙනවා. “යූදස්, ඔබ සිඹීමකින් මනුෂ්‍ය පුත්‍රයාව පාවා දෙනවාද?” එහෙත් දැන් ඔහුගේ ද්‍රෝහියා සමඟ කතා කිරීමෙන් පලක් නැහැ! යේසුස් පන්දම් එළිය දෙසට අඩි තබමින් “ඔබ සොයන්නේ කාවද” යනුවෙන් හේවායන්ගෙන් අසනවා.

“නාසරිය යේසුස්ව” කියා ඔවුන් පිළිතුරු දෙනවා.

යේසුස් ඔවුන් සියල්ලන් ඉදිරියෙහි නිර්භීතව සිට, “ඒ මමය” කියා පවසනවා. ඔහුගේ නිර්භීතකමෙන් පුදුමයට පත් වන සෙනඟ කලබල වී පස්සෙන් පස්සට ගොස් බිම වැටෙනවා.

ඉන්පසු යේසුස් ඉතා සන්සුන්ව පවසන්නේ මෙසේයි. “ඒ මමයයි ඔබට කීවෙමි. ඔබ සොයන්නේ මාව නම්, මොවුන්ට යන්න හරින්න.” මීට ටික වේලාවකට කලින් උඩුමහල් කාමරයේදී, “විනාශයේ පුත්‍රයා හැර” ඔහුගේ විශ්වාසවන්ත ප්‍රේරිතයන්ගෙන් එක් කෙනෙක්වත් නැති වුණේ නැහැ කියා යේසුස් තම පියාට යාච්ඤා කළා. ඉතිං, ඔහු පැවසූ එම දේ ඉටු වන පිණිස, ඔහු ඉල්ලා සිටින්නේ තම අනුගාමිකයන්ට යන්න හරින්න කියායි.

කලබලයට පත් වී සිටි හේවායන් දැන් සන්සුන් වී සිටගන්නවා. ඔවුන් යේසුස්ගේ අත් දෙක බඳින විට සිදුවීමට යන්නේ කුමක්ද කියා ප්‍රේරිතයන් වටහාගන්නවා. ඉතිං ඔවුන් මෙසේ අසනවා. “ස්වාමිනි, අප කඩුවෙන් පහර දෙන්නද?” එහෙත් යේසුස් පිළිතුරු දීමටත් කලින් පේතෘස් ප්‍රේරිතයන් ළඟ තිබෙන කඩු දෙකෙන් එකක් අතට ගෙන උත්තම පූජකයාගේ දාසයෙකු වන මැල්කස්ට පහර දෙනවා. පේතෘස් එල්ල කරන පහර දාසයාගේ හිසට වදින්නේ නැහැ. එහෙත් ඔහුගේ දකුණු කන වෙන් වන සේ කැපී යනවා.

යේසුස් මැදිහත් වී පවසන්නේ “නතර කරන්න” කියායි. ඔහු මැල්කස්ගේ කන ස්පර්ශ කර එය සුව කරනවා. ඊළඟට ඔහු වැදගත් පාඩමක් උගන්වමින් පේතෘස්ට අණ කරන්නේ මෙසේයි. “ඔබේ කඩුව තිබුණ තැනට ආපසු දමන්න. මන්ද කඩුව ගන්න සෑම කෙනෙක්ම කඩුවෙන්ම නසින්නෝය. මේ මොහොතේදී, දේවදූත සේනාංක දොළොසකට වඩා මට එවන ලෙස මාගේ පියාණන්ගෙන් ඉල්ලන්ට මට නොහැකියි කියා ඔබ සිතනවාද?”

යේසුස් තමාව අත්අඩංගුවට ගැනීමට කැමැත්තෙන්ම ඉඩහරිනවා. ඊට හේතුව ඔහු මෙසේ පැහැදිලි කරනවා. “එය මේ ආකාරයෙන් සිදු විය යුතුයි [කියා පැවසූ] ශුද්ධ ලියවිලි ඉටු වන්නේ කෙසේද?” ඔහු මෙසේද ප්‍රකාශ කරනවා. “පියාණන් මට දී තිබෙන කුසලානෙන් මා බිව යුතුම නොවේද?” දෙවි තමා වෙනුවෙන් නියම කර ඇති දෙයට යේසුස් මුළු හදින්ම එකඟ වෙනවා!

ඉන් අනතුරුව යේසුස් සමූහය අමතමින් පවසන්නේ, “කොල්ලකරුවෙකුට විරුද්ධව එන්නාක් මෙන් කඩු මුගුරු රැගෙන මා අත්අඩංගුවට ගැනීමට ආවේද? මම දවස්පතා දේවමාලිගාවේ ඉඳගෙන උගන්වමින් සිටියෙමි. එහෙත් ඔබ මා අත්අඩංගුවට ගත්තේ නැත. නමුත් මේ සියල්ල සිදු වී තිබෙන්නේ අනාගතවක්තෘවරුන්ගේ ලියවිලි ඉටු වන පිණිසය.”

එවිට හේවා කණ්ඩායමත් හමුදාපතිත් යුදෙව්වන්ගේ නිලධාරීනුත් යේසුස්ව අල්ලා බඳිනවා. මෙය දකින විට ප්‍රේරිතයන් යේසුස්ව අත්හැර පලා යනවා. එහෙත් එක්තරා තරුණයෙක් සමූහය අතරෙහි රැඳී සිටිනවා. ඔහු යේසුස්ගේ ගෝලයෙකු වන මාක් වෙන්න ඇති. ඔහු සමහරවිට යේසුස් පාස්කුව පැවැත්වූ නිවසේ සිටින්න ඇති. පසුව, මේ සමූහය සමඟ මෙතැනට ආවා විය හැකියි. එහෙත් දැන් සමූහයා ඔහුව හඳුනාගන්නා අතර ඔහුව අල්ලාගැනීමට වෑයම් කරනවා. එහෙත් ඔහු තමාගේ හණ වස්ත්‍රය අත්හැර පලා යනවා. මතෙව් 26:47-56; මාක් 14:43-52; ලූක් 22:47-53; යොහන් 17:12; 18:3-12; NW.

▪ යේසුස් ගෙත්සෙමන උයනේ සිටිනු ඇතැයි කියා යූදස්ට නිසැකකමක් තිබෙන්නේ මන්ද?

▪ යේසුස් තම ප්‍රේරිතයන් කෙරෙහි සැලකිල්ල දක්වන්නේ කෙසේද?

▪ යේසුස්ව ආරක්ෂා කිරීමට පේතෘස් ගන්නා පියවර කුමක්ද? එහෙත් යේසුස් පේතෘස්ට ඒ ගැන පවසන්නේ කුමක්ද?

▪ දෙවි තමා වෙනුවෙන් නියම කර ඇති දෙයට යේසුස් මුළුමනින්ම එකඟ වන බව පෙන්නුම් කරන්නේ කෙසේද?

▪ ප්‍රේරිතයන් යේසුස් අත්හැර යන විට එතැන රැඳී සිටින්නේ කවුද? ඔහුට කුමක් සිදු වෙනවාද?

119වෙනි පරිච්ඡේදය

මුලින්ම අන්නස් වෙත ඉන්පසු කායෆස් වෙතට

පහත් අපරාධකාරයෙකු වශයෙන් අත්අඩංගුවට ගෙන බැඳ දමා සිටින යේසුස්ව අන්නස් ළඟට ගෙන යනවා. කලින් උත්තම පූජකයාව සිටි අන්නස්ට තවමත් සෑහෙන බලතල තිබෙන බව පැහැදිලියි. යේසුස් අවුරුදු දොළහක් වන විට දේවමාලිගාවේ රබ්බි ගුරුවරුන්ව පුදුමයට පත් කළ අවස්ථාවේදී උත්තම පූජකයාව සිටියේ අන්නස්. පසු කලෙක අන්නස්ගේ පුතුන් කිහිපදෙනෙක්ම උත්තම පූජක තනතුර දැරුවා. දැන් එම තනතුර දරන්නේ ඔහුගේ බෑනා වන කායෆස්.

යේසුස්ව මුලින්ම ගෙන යන්නේ නායක පූජක අන්නස්ගේ නිවසටයි. අන්නස් සෑහෙන කාලයක් පුරා යුදෙව් ආගමික ක්ෂේත්‍රයෙහි ප්‍රසිද්ධියක් උසුලමින් සිටිනවා. ඔහුව එතැනට රැගෙන යන්නේ ඒ නිසා විය හැකියි. ඔවුන් අන්නස්ගේ නිවසට යන නිසා උත්තම පූජක කායෆස්ට හැකියාවක් ලැබෙනවා සාමාජිකයන් 71දෙනෙකුගෙන් යුත් යුදෙව් මහාධිකරණය වන සැන්හෙඩ්‍රිනය එක්රැස් කිරීමට හා බොරු සාක්ෂිකරුවන්ව සෙවීමට.

දැන් නායක පූජක අන්නස් යේසුස්ගෙන් ඔහුගේ ගෝලයන් පිළිබඳවත් ඔහුගේ ඉගැන්වීම් පිළිබඳවත් ප්‍රශ්න කරන්න පටන්ගන්නවා. එහෙත් යේසුස් ඔහුට උත්තර දෙන්නේ මෙසේයි. “මම ලෝකයට ප්‍රසිද්ධියේම කතා කළෙමි. මා නිතරම ඉගැන්වූයේ යුදෙව්වරුන් සියලුදෙනා එක්රැස් වන සිනගෝගයකදීත් දේවමාලිගාවේදීත්ය. මා කිසිවක් රහසින් කතා කළේ නැත. ඔබ මගෙන් ප්‍රශ්න කරන්නේ මන්ද? මා කී දේ ඇසූ අයගෙන් මා ඔවුන්ට කීවේ කුමක්දැයි ප්‍රශ්න කරන්න. බලන්න! මා පැවසූ දේ මොවුහු දනිති.”

එවිට යේසුස් ළඟින් සිටගෙන සිටින නිලධාරියෙක් ඔහුට කම්මුල් පහරක් දෙමින් මෙසේ අසනවා. “ඔබ නායක පූජකයාට පිළිතුරු දෙන්නේ මෙහෙමද?”

“මා කී දේ වැරදි නම්, ඒ වරද ගැන සාක්ෂි දෙන්න. නමුත් මා කී දේ හරි නම්, ඔබ මට පහර දෙන්නේ ඇයි” කියා යේසුස් පිළිතුරු දෙනවා. මෙම දෙබසින් පසුව අන්නස් බැඳ දමා සිටින යේසුස්ව කායෆස් වෙතට යවනවා.

මේ වන විට, නායක පූජකයන්, වැඩිමහල්ලන් හා ලියන්නන් සියලුදෙනාම, එනම් මුළු සැන්හෙඩ්‍රිනය රැස් වෙන්න පටන්ගන්නවා. පෙනෙන ආකාරයට, ඔවුන් රැස් වෙන්නේ කායෆස්ගේ නිවසෙයි. පාස්කු දින රාත්‍රියකදී එවැනි නඩු විභාගයක් පැවැත්වීම යුදෙව් නීතියට මුළුමනින්ම පටහැනියි. එහෙත් ආගමික නායකයන් මෙය බාධාවක් කර නොගනිමින් දිගටම තමන්ගේ නපුරු චේතනා ඉටු කරගැනීමට කටයුතු කරනවා.

සති කිහිපයකට කලින් යේසුස් ලාසරුස්ව නැවත නැඟිටෙවූ අවස්ථාවේදී ඔහුව මරා දැමිය යුතු බව සැන්හෙඩ්‍රිනය තීරණය කළා. ඒ වගේම දෙදවසකට කලින්, එනම් බදාදා, ප්‍රයෝගකාරී ලෙස යේසුස්ව අල්ලා මරා දැමීමට ආගමික නායකයන් ඔවුනොවුන් අතරේ කුමන්ත්‍රණය කර තිබුණා. ටිකක් සිතා බලන්න. ඔහු වරදකරුවෙකු බව තීන්දු කර තිබුණේ ඔහුගේ නඩු විභාගයටත් කලිනුයි!

යේසුස්ට විරුද්ධව සාක්ෂි ගොනු කිරීම සඳහා බොරු සාක්ෂි සැපයීමට එකඟ වන අයව සෙවීමට දැන් උත්සාහ දරනවා. එහෙත් එකිනෙකට ගැළපෙන ආකාරයෙන් සාක්ෂි ඉදිරිපත් කරන අයව සොයාගත නොහැකියි. අන්තිමේදී දෙදෙනෙක් ඉදිරියට පැමිණ මෙසේ චෝදනා කරනවා. “‘අතින් සෑදූ මෙම දේවමාලිගාව කඩා දමා, අතින් නොසෑදූ වෙනෙකක් දවස් තුනකින් මම ගොඩනඟන්නෙමි’ කියා මොහු කියනවා අපට ඇසුණි.”

එවිට කායෆස් අසන්නේ මෙසේයි. “ඔබ කිසි උත්තරයක් දෙන්නේ නැද්ද? මොවුන් ඔබට විරුද්ධව දෙන මේ සාක්ෂි මොනවාද?” එහෙත් යේසුස් නිහඬව සිටිනවා. එම බොරු සාක්ෂි ඉදිරිපත් කිරීමේදී පවා සාක්ෂිකරුවන්ගේ චෝදනා පරස්පර විරෝධීයි. සැන්හෙඩ්‍රිනයට මොන තරම් නින්දාවක්ද! දැන් උත්තම පූජකයා වෙනත් උපක්‍රමයක් යොදාගන්නවා.

යමෙකු තමා දෙවිගේ පුත්‍රයායයි කියා සිටින විට යුදෙව්වන්ට මොන තරම් කෝපයක් දැනෙනවාද කියා කායෆස් දන්නවා. මීට කලින් දෙවතාවකදී, වග විභාගයකින් තොරව ඔවුන් යේසුස්ව හංවඩු ගසා තිබුණේ දෙවිට අපහාස කරන, මරණය ලැබිය යුතු කෙනෙකු ලෙසයි. ඉන් එක් වතාවකදී ඔහු තමා දෙවිට සමානයයි ප්‍රකාශ කළ බව ඔවුන් වරදවා වටහාගත්තා. කායෆස් දැන් කපටි උපායකින් මෙසේ බල කර සිටිනවා. “ඔබ දෙවිගේ පුත්‍රයා වන ක්‍රිස්තුස්ද කියා අපට කියන ලෙස ජීවමාන දෙවිගේ නාමයෙන් මම ඔබව දිවුරුවමි!”

යුදෙව්වරුන් මොනවා සිතුවත් යේසුස් ඇත්තටම දෙවිගේ පුත්‍රයායි. ඔහු නිහඬව සිටියොත් ඔහු ක්‍රිස්තුස් නොවන බවක් ඉන් ඇඟවිය හැකියි. ඉතිං යේසුස් නිර්භීතව පිළිතුරු දෙන්නේ මෙසේයි. “මම ඔහුය. තවද, මනුෂ්‍ය පුත්‍රයා බලවත් තැනැත්තාගේ දකුණු පැත්තේ ඉඳගෙන සිටිනවාත්, ආකාශයේ වලාකුළු සහිතව එනවාත් ඔබ දකින්නහුය.”

එවිට කායෆස්, සියල්ලන්ට පෙනෙන සේ තම වස්ත්‍ර ඉරාගෙන මෙසේ කෑ ගසනවා. “ඔහු දැන් කළේ දේවඅපහාසයකි! අපට තව සාක්ෂිකාරයන් කුමටද? බලන්න! දේවඅපහාසය ඔබට දැන් ඇසිණ. ඔබ සිතන්නේ කුමක්ද?”

සැන්හෙඩ්‍රිනය ප්‍රකාශ කරන්නේ, “ඔහු මරණයට සුදුසුය” කියායි. ඉන්පසු ඔවුන් ඔහුට කවටකම් කරමින් ඔහුට බොහෝ සෙයින් අපහාස කරනවා. ඔහුගේ මුහුණට පහර දී කෙළ ගසනවා. තවත් අය ඔහුගේ මුහුණ සම්පූර්ණයෙන්ම වසා, අත මිට මොළවා ඔහුට පහර දෙන අතර උපහාසාත්මක ලෙස පවසන්නේ මෙසේයි. “ක්‍රිස්තුස්නි, ඔබට පහර දුන්නේ කවුද කියා අපට දිවැසින් කියන්න.” මෙම නින්දිත මෙන්ම නීති විරෝධී හැසිරීම සිදු වන්නේ රාත්‍රි කාලයේ පැවැත්වූ නඩු විභාගයේදීයි. මතෙව් 26:57-68; 26:3, 4; මාක් 14:53-65; ලූක් 22:54, 63-65; යොහන් 18:13-24; 11:45-53; 10:31-39; 5:16-18; NW.

▪ යේසුස්ව මුලින්ම ගෙන යන්නේ කොතැනටද? එහිදී ඔහුට සිදු වන්නේ කුමක්ද?

▪ ඊළඟට යේසුස්ව ගෙන යන්නේ කොතැනටද? කිනම් අරමුණක් සඳහාද?

▪ යේසුස් මරණයට සුදුස්සෙක් බව ප්‍රකාශ කිරීමට කායෆස් සැන්හෙඩ්‍රිනය පොලඹවන්නේ කෙසේද?

▪ නඩු විභාගයේදී දක්නට ලැබෙන නින්දිත, නීති විරෝධී හැසිරීම කුමක්ද?

120වෙනි පරිච්ඡේදය

ඇතුල් මළුවේදී නාඳුනන බව කීම

ගෙත්සෙමන උයනේදී යේසුස්ව අත්හැර අනිකුත් ප්‍රේරිතයන් සමඟ බියෙන් පලා ගිය පේතෘස් හා යොහන් මද දුරක් ගොස් නතර වෙනවා. ඔවුන් නැවතත් යේසුස් සිටින තැනට ළඟා වන්නේ ඔහුව අන්නස්ගේ නිවසට රැගෙන යද්දී විය හැකියි. අන්නස් යේසුස්ව උත්තම පූජක කායෆස් වෙතට යවද්දී, පේතෘස් හා යොහන් ටිකක් ඈතින් ඔවුන් පසුපසින් යනවා. පෙනෙන ආකාරයට, තමන්ගේ ජීවිත අවදානමට ලක් වී තිබීම ගැන බියෙන් පසු වන ඔවුන් තමන්ගේ ස්වාමීන්ට සිදු වන්නේ කුමක්ද යන්න ගැනද ගැඹුරු සැලකිල්ලක් දක්වනවා.

ඔවුන් කායෆස්ගේ සුවිසල් මන්දිරයට පැමිණෙද්දී, උත්තම පූජකයාව අඳුනන යොහන්ට ඇතුල් මළුවට යන්න අවසර ලැබෙනවා. පේතෘස් පිටත දොරටුව අසල සිටගෙන සිටිනවා. සුළු මොහොතකට පසු, යොහන් දොරටුපාලිය සමඟ කතා කර පේතෘස්ට ඇතුල් වීමට අවසර ලබාගන්නවා.

දැන් ශීතල දැනෙන නිසා, උත්තම පූජකයාගේ නිවසේ සේවකයන් හා නිලධාරීන් අඟුරු දල්වා ගිනි තපිමින් සිටිනවා. යේසුස්ගේ නඩු තීන්දුව ලැබෙන තුරු පේතෘස්ද ඔවුන් ළඟට යනවා. ගිනි මැලයේ දීප්තිය නිසා පේතෘස්ට ඇතුල් වීමට අවසර දුන් දොරටුපාලියට හැකි වෙනවා ඔහුව වඩාත් හොඳින් දැකගැනීමට. එවිට, “ඔබත් ගලීලයේ යේසුස් සමඟ සිටියේය” කියා ඇය කෑගසනවා.

ඔහුව හඳුනාගත් නිසා කලබලයට පත් වන පේතෘස්, සියල්ලන් ඉදිරියේ පවසන්නේ තමා යේසුස්ව කොහෙත්ම නාඳුනන බවයි. ඔහු පවසන්නේ, “මා ඔහුව හඳුනන්නේවත් ඔබ කියන්නේ කුමක්දැයි මට තේරෙන්නේවත් නැත” කියායි.

එසේ පැවසූ පසු පේතෘස් පිටතට ගොස් දොරටුව ළඟ රැඳී සිටිනවා. එතැනදී තවත් තරුණියක් ඔහුව දැක, එහි සිටින අයට පවසන්නේ මෙසේයි. “මේ මිනිසා නාසරිය යේසුස් සමඟ සිටියේය.” නැවත වරක් පේතෘස් එය ප්‍රතික්ෂේප කරමින් “මම ඒ මිනිසාව නාඳුනමි!” කියා දිවුරනවා.

පේතෘස් ඇතුල් මළුවේ රැඳී සිටින අතරතුර හැකි තාක් දුරට සැඟවී සිටින්නයි වෑයම් කරන්නේ. ඔහු සමහරවිට මේ මොහොතේදී, හිමිදිරි පාන්දර හඬලන කුකුළෙකුගේ හඬට තිගැස්සෙන්නත් ඇති. මේ අතරතුර යේසුස්ගේ නඩු විභාගය පැවැත්වෙනවා. පෙනෙන ආකාරයට, එය පැවැත්වෙන්නේ ඇතුල් මළුවට ඉහළින් පිහිටි යම් ස්ථානයකයි. ඊට පහළින් බලා සිටින පේතෘස්ට හා අනෙකුත් අයට සාක්ෂි දීම සඳහා එතැනට යන එන අයව හොඳින් පෙනෙන බව නිසැකයි.

යේසුස්ගේ ආශ්‍රිතයෙකු වශයෙන් පේතෘස්ව හඳුනාගෙන දැන් පැයක් පමණ ගත වෙලා. දැන් අවට සිටින කිහිපදෙනෙකුම ඔහුට මෙසේ පවසනවා. “සැබවින්ම ඔබත් ඔවුන්ගෙන් එක් කෙනෙක්ය. මන්ද ඒ බව ඔබේ කතා විලාසයෙන් පෙනේ.” ඔවුන් අතරේ සිටින එක් කෙනෙක් පේතෘස් කන කැපූ මැල්කස්ගේ ඥාතියෙක්. “ඔබ ඔහු සමඟ උයනේ සිටිනවා මා දුටුවා නොවේද” යනුවෙන් ඔහු අසනවා.

එහෙත් පේතෘස් තරයේම කියා සිටින්නේ “මම ඒ මිනිසාව නාඳුනමි” කියායි. ඔවුන්ට වැරදී ඇතැයි කියා ඔවුන්ට ඒත්තුගැන්වීම සඳහා තමා බොරුවක් කියනවා නම් තමා පිට ශාප පැමිණේවායයි කියන්නාක් මෙන් ඔහු ශාප කරන්න හා දිවුරන්න පවා පටන්ගන්නවා.

මෙලෙස, පේතෘස් තුන්වන වරටත් යේසුස්ව නාඳුනන බව කියද්දී කුකුළෙක් හඬලනවා. ඒ මොහොතේදී, ඇතුල් මළුවට ඉහළින් ඇති සඳලුතලයට පැමිණ සිටින යේසුස් ඔහු දෙස හැරී බලනවා. එවිට පේතෘස්ට විගස මතක් වන්නේ පැය කීපයකට කලින් උඩුමහල් කාමරයේ සිටි විට යේසුස් ඔහුට පැවසූ දෙයයි. “කුකුළෙකු දෙවතාවක් හඬලන්න කලින්, ඔබ පවා මා හඳුනන්නේ නැතැයි තුන් වතාවක් කියන්නේය.” ඔහුගේ පාපය කොයි තරම් බරපතළද කියා වටහාගනිමින් පේතෘස් අතිශයින් ශෝකයට පත් වී පිටතට ගොස් දරාගත නොහැකි වේදනාවකින් හඬනවා.

මෙවැනි දෙයක් සිදු වුණේ ඇයි? තම ආත්මිකත්වය ගැන එතරම්ම නිසැකකමකින් සිටි පේතෘස් තුන් වරක්ම තම ස්වාමියාව නාඳුනන බව ප්‍රකාශ කරන තත්වයට පත් වුණේ කොහොමද? සෑම දෙයක්ම සිදු වන්නේ පේතෘස් බලාපොරොත්තු නොවන ආකාරයටයි. සත්‍යය විකෘති කර තිබෙනවා. ජනයාට ප්‍රකාශ කර තිබෙන්නේ යේසුස් දුෂ්ට අපරාධකරුවෙක් කියායි. හරි දේ වැරදි බවත් නිර්දෝෂ තැනැත්තා වරදකරුවෙකු බවත් පෙන්වා තිබෙනවා. මෙවැනි පීඩනයක් යටතේ පේතෘස්ගේ ස්ථාවරය බිඳී යනවා. පක්ෂපාතකම දැක්විය යුත්තේ කාටද යන්න පිළිබඳව ඔහුට තිබූ නිවැරදි දෘෂ්ටිය බොඳ වී යනවා. මනුෂ්‍යයන්ට භය වන ඔහු පසුව ඒ ගැන බොහෝ සෙයින් දුකට පත් වෙනවා. එවැනි දෙයක් කිසිවිටෙක අපට සිදු නොවන බවට අපි වගබලා ගනිමු! මතෙව් 26:57, 58, 69-75; මාක් 14:30, 53, 54, 66-72; ලූක් 22:54-62; යොහන් 18:15-18, 25-27; NW.

▪ උත්තම පූජකයාගේ ඇතුල් මළුවට යෑමට පේතෘස්ට හා යොහන්ට අවසර ලැබෙන්නේ කොහොමද?

▪ පේතෘස් හා යොහන් ඇතුල් මළුවේ සිටින විට නිවස තුළ සිදු වන්නේ කුමක්ද?

▪ කුකුළා කී වරක් හඬලනවාද? ක්‍රිස්තුස්ව නාඳුනන බව පේතෘස් කී වරක් කියා සිටිනවාද?

▪ පේතෘස් ශාප කරනවා හා දිවුරනවා යන්නෙන් අදහස් කරන්නේ කුමක්ද?

▪ යේසුස්ව නාඳුනන බව කීමට පේතෘස් පෙලඹෙන්නේ ඇයි?