බයිබල් ශිෂ්‍යයන්ව දේවසේවය සඳහා සූදානම් කරවන්න
1 බයිබල් පාඩම් පැවැත්වීමේ ඉලක්කය වන්නේ අලුත් ගෝලයන් සෑදීමයි. අන් අයට ඉගැන්වීමේදී අප සමඟ ඔවුන්ද එක් වෙනවා. (මතෙ. 28:19, 20) එනිසා පාඩම් පැවැත්වීමේ අරමුණ නිකම්ම දැනුම ලබා දීම නොවෙයි. අපේ ශිෂ්‍යයන්ගේ හදවත් තුළ ගැඹුරට මුල්බැස ගත් ඇදහිල්ලක් ඇති කර, අන් අය සමඟ තමන්ගේ බලාපොරොත්තුව බෙදාගැනීමට ඔවුන්ව සූදානම් කරවීමට අප ඔවුන්ට ලබා දෙන දැනුම සමත් විය යුතුයි. (2 කොරි. 4:13) සුදුසුකම් ලත් ගුරුවරුන් වීමට ඔවුන්ට උපකාර කළ හැකි ප්‍රායෝගික ක්‍රම මොනවාද?—2 තිමෝ. 2:2.
2 දේවසේවය ඉලක්කයක් ලෙස තබන්න: “ගැළවීම සඳහා ප්‍රසිද්ධියේ ප්‍රකාශ කිරීම” සැබෑ නමස්කාරයට අයත් වන දෙයක් බව පාඩම පටන්ගත් මුල් කාලයේදීම පැහැදිලි කරන්න. (රෝම 10:10, NW) යෙහෝවාගේ සාක්ෂිකරුවන් යන අපේ නමින්ම අඟවන්නේ අප අනිත් අයට කතා කළ යුතු බවයි. ඔවුන්ට දෙවිගේ වචනයේ තිබෙන දේවල් උගන්වන්නේ තමන්ගේම ගැළවීම සඳහා පමණක් නොවන බව තේරුම්ගන්න ඔවුන්ට උපකාර කරන්න. ඔවුන් ගුරුවරුන් ලෙස සුදුසුකම් ලබා අන් අයට සාක්ෂි දරද්දී, ඔවුන්ට සවන් දෙන අයටද ගැළවීම සඳහා ප්‍රස්තාව විවෘත වෙනවා. —1 තිමෝ. 4:16.
3 ඉගෙනගත් දේවල් පුනරීක්ෂණය කරන්න: ඉගෙනගත් දේවල් කලින් කලට පුනරීක්ෂණය කිරීම ඉගැන්වීමේදී යොදාගන්න වටිනා ආධාරකයක්. මෙසේ කිරීම ශිෂ්‍යයාගේ ආත්මික වර්ධනයට හේතු වන්නේ අලුතින් ඉගෙනගත් සත්‍යයන් ඔහුගේ මනසේ හා හදවතේ හොඳින් තැන්පත් වන නිසායි. මුරටැඹ පාඩමේ තිබෙන පුනරීක්ෂණ ප්‍රශ්නවලට උත්තර දෙද්දී අපත් එය අද්දකිනවා. ඔබේ ශිෂ්‍යයාට ඔහුගේම වචනවලින් උත්තර දිය හැකි සරල හා ඍජු ප්‍රශ්න සූදානම් කරගන්න.
4 ඔබ කරන පුනරීක්ෂණය, ක්ෂේත්‍ර සේවයේදී ගෙවැසියෙකු සමඟ කරන සාකච්ඡාවකට සමාන වෙනවා නම් හොඳයි. ප්‍රශ්නයක් නඟන්න. නැත්නම් සාක්ෂි දරද්දී බොහෝ අවස්ථාවලදී උද්ගත වන තත්වයක් විස්තර කරන්න. ඔබ ගෙවැසියා ලෙස සිටිමින්, ශිෂ්‍යයා පවසන්න යන දේවල් නිරූපණය කරන්න ඉඩහරින්න. ඔහු හොඳින් කළ දේවලට ප්‍රශංසා කරන්න. ඊළඟ වතාවේදී මීටත් වැඩියෙන් බලපෑමෙන් යුක්තව කිරීමට උපකාරවත් වන ප්‍රායෝගික යෝජනා ඉදිරිපත් කරන්න. තමන් ඉගෙනගත් දේවල් ක්‍රියාත්මක කරන්නේ කොහොමද කියා මේ පුහුණුවෙන් ඔහුට ඉගෙනගන්න පුළුවන්. ඒ වගේම බයිබලය පාවිච්චි කිරීමේ ඔහුගේ හැකියාවද එයින් වර්ධනය වෙනවා.
5 රැස්වීම්වල වැදගත්කම අවධාරණය කරන්න: සභා රැස්වීම්, විශේෂයෙන්ම සේවා රැස්වීම හා දිව්‍යාණ්ඩු සේවා පාසැල සැලසුම් කර තිබෙන්නේ ක්ෂේත්‍ර සේවය සඳහා අපව සූදානම් කරවීමටයි. බලපෑමෙන් යුක්තව සාක්ෂි දැරීම සඳහා අවශ්‍ය කරන මූලික දේවල් සෑම එකක්ම අද්දැකීම් ලත් දක්ෂ ගුරුවරුන් විසින් සලකා බලා නිරූපණය කරනු ලබනවා. රැස්වීම්වල වැදගත්කම අවධාරණය කරන්න. රැස්වීම්වලට පැමිණෙන්න ශිෂ්‍යයාට උපකාර කිරීම සඳහා ඔබට කළ හැකි දේවල් කරන්න. ඔබේ ශිෂ්‍යයා නිතිපතාම රැස්වීම්වලට පැමිණෙනවා නම් යේසුස්ගේ සැබෑ ගෝලයෙකු වීමට ඔහුට අවශ්‍ය පෙලඹවීම ඒවායින් ලැබෙනවා.
6 මෙහිදී ඔබේ පෞද්ගලික ආදර්ශය සුළු කොට තැකිය නොහැකියි. සත්‍යය සඳහා ඔබේ අගය කොතරම් ගැඹුරුද කියා පෙනෙන්නේ දේශනා සේවයේ හවුල් වීමට ඔබට තිබෙන කැමැත්ත හා නිතිපතා හවුල් වීම මගිනුයි. ඔබ මෙසේ කරද්දී තමන්ගේ ඇදහිල්ල ක්‍රියාවලින් පෙන්වීමට ඔබේ ශිෂ්‍යයා දිරිගැන්වෙනවා. (ලූක් 6:40) දේවසේවය වරප්‍රසාදයක් බවත් එහි හවුල් වෙන්න තමන්ට ලැබුණු ප්‍රස්තාව අගය කළ යුතු බවත් තේරුම්ගැනීමට මේ සෑම දෙයක්ම නවකයෙකුට උපකාරවත් විය හැකියි.—1 තිමෝ. 1:12.