හුඟක් අයට ජීවිතේ එන ප්‍රශ්න ගැටලුවලට මුහුණ දෙන්න එයාලගේ ආගම්වලින් හරි මඟ පෙන්වීම් ලැබෙන්නේ නැහැ. එයාලා ආගමික වතාවත්වලට, මෙහෙයන්වලට ගියත් කිසි සහනයක් අද්දකින්නේ නැහැ. අපේ රැස්වීම්වලට ගියාමත් වෙන්නේ ඒ ටිකමද? ඒක දැනගන්න ඔයාම අපේ රැස්වීමකට ඇවිත් බලන්න.

ඔයා ගැන හුඟක් සැලකිලිමත්, ඔයාට ඇත්තටම ආදරේ කරන අය එතැන ඉන්නවා කියලා ඔයාට දැනෙයි. ක්‍රිස්තු වර්ෂ පළමුවෙනි සියවසේ හිටපු ක්‍රිස්තියානීන් එක එක ප්‍රදේශවල විසිරිලා හිටියා. ඒත් ඒ අය කණ්ඩායම් විදිහට ඒ කියන්නේ සභාවන් හැටියට රැස් වෙලා දෙවිට නමස්කාර කළා. ශුද්ධ ලියවිල්ලේ තියෙන දේවල් හොයලා බැලුවා. එකිනෙකාව දිරිගැන්නුවා. (හෙබ්‍රෙව් 10:24, 25) ඒ විදිහට රැස් වෙද්දී ඒගොල්ලන්ට දැනුණේ එයාලට ඇත්තටම ආදරේ කරන, එයාලා ගැන සැලකිලිමත් සහෝදර සහෝදරියන් අතරේ එයාලා ඉන්නවා කියලයි. (2 තෙසලෝනික 1:3; 3 යොහන් 14) අද අපිත් එයාලව ආදර්ශයට ගන්න නිසා රැස්වීම්වලට ගියාම ඒගොල්ලෝ අද්දැක්ක සතුට අද්දකිනවා.

රැස්වීම්වලට ගියාම බයිබලේ තියෙන මඟ පෙන්වීම් අදාළ කරගන්නේ කොහොමද කියලා දැනගන්න පුළුවන්. එදා දෙවිට නමස්කාර කරපු පුරුෂයන්, ස්ත්‍රීන් හා දරුවන් එකට රැස් වෙලා දෙවි ගැන ඉගෙනගත්තා. අදත් අපි වයස් භේදයක් නැතුව දෙවි ගැන ඉගෙනගන්න එකට රැස් වෙනවා. ඒ රැස්වීම්වලදී සමහර සහෝදරයන් බයිබලේ තියෙන මඟ පෙන්වීම් ජීවිතයට අදාළ කරගන්න පුළුවන් විදිහ ගැන අපිට කියලා දෙනවා. (ද්විතීය කතාව 31:12; නෙහෙමියා 8:8) රැස්වීම්වලදී අපි හැමෝටම අපේ අදහස් කියන්නත් ගීතිකා ගායනා කරලා දෙවිට ප්‍රශංසා කරන්නත් අවස්ථාව තියෙනවා. ඒකෙන් අපිට පුළුවන් වෙනවා අපිට තියෙන බලාපොරොත්තුව ගැන හැමෝම ඉදිරියේ කියන්න.—හෙබ්‍රෙව් 10:23.

දෙවි ගැන තියෙන විශ්වාසය තවත් වැඩි කරගන්න පුළුවන්. යේසුස්ගේ අනුගාමිකයෙක් වුණු පාවුල් මෙහෙම කිව්වා. ‘ඇත්තෙන්ම ඔබව දැකගැනීමට මා තුළ තිබෙන්නේ දැඩි ආශාවකි. එමගින් අපට එකිනෙකාව දිරිගැන්වීමට හැකියාව ලැබේ. එවිට ඔබ මාගේ විශ්වාසයෙනුත් මා ඔබේ විශ්වාසයෙනුත් දිරිගැන්වීමක් ලබනු ඇත.’ (රෝම 1:11, 12) ඒ වගේ අපි රැස්වීම්වලට ගිහින් අනිත් අයව ආශ්‍රය කරද්දී අපේ විශ්වාසය ශක්තිමත් වෙනවා. යේසුස් දීලා තියෙන මඟ පෙන්වීම්වලට එකඟව ජීවත් වෙන්නත් ඒකෙන් අපි පෙලඹෙනවා.

අපේ ආරාධනය පිළි අරගෙන අපේ රැස්වීමකට ඔයා ආවොත් ඒ දේවල් අද්දකින්න ඔයාට පුළුවන් වෙයි. ඔයාව අපි සාදරෙන් පිළිගන්නවා. රැස්වීම්වලට එන අයගෙන් අපි සල්ලි අය කරන්නෙවත් එකතු කරන්නෙවත් නැහැ.

• රැස්වීම් පවත්වන විදිහෙන් අපි ආදර්ශයට ගන්නේ කාවද?

• රැස්වීම්වලට යන එක අපිට ප්‍රයෝජනවත් වෙන්නේ කොහොමද?

ගන කැලෑවල් මැදින් යන්න සිද්ධ වුණත් කාලගුණය කොච්චර අයහපත් වුණත් අපි නිතිපතා රැස්වීම්වලට යනවා. කොච්චර අමාරුකම් තිබුණත් වැඩ නිසා ලොකු වෙහෙසක් දැනුණත් අපි රැස්වීම් අතපසු කරන්නේ නැහැ. සතිපතා තියෙන රැස්වීම්වලට හවුල් වෙන්න යෙහෝවා දෙවිගේ සාක්ෂිකරුවන් එච්චර වෙහෙසක් ගන්නේ ඇයි?

ප්‍රශ්න ගැටලුවලට මුහුණ දෙන්න ශක්තියක් ලැබෙනවා. අපිත් එක්ක එකතු වෙලා දෙවිට නමස්කාර කරන අය ගැන “උනන්දුවක් හා සැලකිල්ලක්” පෙන්නන්න කියලා බයිබලේ කියලා තියෙනවා. (හෙබ්‍රෙව් 10:24) එහෙම කරන්න නම් අපි සභාවේ ඉන්න අයව හොඳට අඳුනගන්න ඕනේ. එතකොට අපිට තේරෙයි අපි මුහුණ දෙන ප්‍රශ්න ගැටලුවලට ඒගොල්ලන්ගෙන් සමහරදෙනෙකුත් මුහුණ දීලා තියෙනවා කියලා. ඒවා ජය අරගෙන තියෙන විදිහ ගැනත් අපිට එයාලගෙන් දැනගන්න පුළුවන්. එයාලගේ අද්දැකීම් අපිට වටිනා පාඩම්.

ශක්තිමත් මිතුදම් ඇති කරගන්න පුළුවන් වෙනවා. සතිපතා රැස්වීම්වලදී හම්බ වෙන අය අපේ කිට්ටු යාළුවෝ. සමහර වෙලාවලදී අපි එකතු වෙලා විනෝද වෙනවා. අපි එකට කාලය ගත කරන නිසා අනිත් අයව හොඳට තේරුම්ගන්න පුළුවන්. ඒකෙන් එයාලා ගැන අපිට තියෙන අගය තව වැඩි වෙනවා. ඒ නිසා අපි අතරේ තියෙන බැඳීම හුඟක් ශක්තිමත්. ඒ වගේ කිට්ටු බැඳීමක් අපි අතරේ තියෙන නිසා අපෙන් කාට හරි දුකක් කරදරයක් වුණ වෙලාවලදී ඒගොල්ලන්ට ඉක්මනින්ම අපි උදව් කරන්න පෙලඹෙනවා. (හිතෝපදේශ 17:17) සභාවේ ඉන්න හැම කෙනෙක්වම අපි ආශ්‍රය කරන එකෙන් පෙන්නන්නේ අපි හැමෝටම එක විදිහට සලකනවා කියලයි.—1 කොරින්ති 12:25, 26.

යෙහෝවා දෙවිට ආදරේ කරන අයව ඔයාගේ යාළුවන් විදිහට තෝරගන්න. ඒ වගේ අයව යෙහෝවා දෙවිගේ සාක්ෂිකරුවන් අතරින් හොයාගන්න පුළුවන්. ඒ නිසා අපේ රැස්වීම්වලට ඇවිල්ලා අපිව ආශ්‍රය කරන එකෙන් ඔයාව වළක්වන්න කිසිම දේකටවත් කිසිම කෙනෙකුටවත් ඉඩ දෙන්න එපා.

• රැස්වීම්වලට යන එකෙන් අපිට තියෙන ප්‍රයෝජන මොනවාද?

• ඔයා අපේ රැස්වීමකට එන්නේ කවද්ද?

මුල් ක්‍රිස්තියානීන් දෙවිට නමස්කාර කරන්න එකට රැස් වුණාම ඒගොල්ලෝ දෙවිට ප්‍රශංසා ගී ගායනා කළා. යාච්ඤා කළා. ශුද්ධ ලියවිලි කියවලා ඒ ගැන සාකච්ඡා කළා. (1 කොරින්ති 14:26) අපේ රැස්වීම්වලදී අපි කරන්නෙත් ඒවාමයි.

අපි තොරතුරු ඉගෙනගන්නේ බයිබලෙන්. සති අන්තවල සාක්ෂිකරුවන්ගේ හැම සභාවකම විනාඩි 30ක බයිබල් දේශනයක් තියෙනවා. බයිබලේ තියෙන මඟ පෙන්වීම් අපිට අදාළ කරගන්න පුළුවන් විදිහ ගැනත් අපි ජීවත් වෙන මේ කාලේ ගැන බයිබලේ තියෙන දේවල් ගැනත් ඒ දේශනවලින් ඉගෙනගන්න පුළුවන්. දේශනය දෙන සහෝදරයා බයිබල් පද කියවද්දී අපිත් අපේ බයිබලෙන් ඒ පද බලනවා. දේශනයට පස්සේ පැයකට මුරටැඹ පාඩම තියෙනවා. ඒකේදී මුරටැඹ පාඩම් කලාපයෙන් ලිපියක් සාකච්ඡා කරනවා. සභාවේ ඉන්න ඕනම කෙනෙකුට ඒ ලිපියේ තියෙන ප්‍රශ්නවලට එයාලගේ අදහස් දෙන්න පුළුවන්. බයිබලේ තියෙන මඟ පෙන්වීම් අපේ ජීවිතේට අදාළ කරගන්න පුළුවන් පැති ගැන මුරටැඹ පාඩමෙන් අපි ඉගෙනගන්නවා. ලෝකේ පුරා තියෙන 1,10,000කට වඩා වැඩි අපේ හැම සභාවකම එක සතියක සාකච්ඡා කරන්නේ එකම ලිපියයි.

බයිබලේ තියෙන ඉගැන්වීම් අනිත් අයට හොඳින් කියලා දෙන්න අපිට පුහුණුවක් ලැබෙනවා. සතියේ දවසක හවස් වරුවේ අපිට තව රැස්වීමක් තියෙනවා. ඒ රැස්වීමට අංග තුනක් තියෙනවා. කොටස් තුනකට බෙදලා තියෙන ඒ රැස්වීම හඳුන්වන්නේ ක්‍රිස්තියානි ජීවිතය සහ දේවසේවය කියලයි. ඒකේදී සාකච්ඡා කරන්නේ මාසේට අදාළ ‘ක්‍රිස්තියානි ජීවිතය සහ දේවසේවය වැඩපොතේ’ තියෙන තොරතුරු. මුලින්ම තියෙන්නේ දේවවචනය නිධානයක් කියන කොටසයි. සතියට කියවන්න දිරිගන්වලා තියෙන බයිබල් කොටසේ තියෙන තොරතුරු හොඳට තේරුම්ගන්න ඒකේදී උදව් කරනවා. ඊළඟට තියෙන්නේ සේවය හොඳින් කරන්න ඉගෙනගනිමු කියන කොටසයි. බයිබලේ තියෙන දේවල් අනිත් අයට කියලා දෙන්නේ කොහොමද කියලා ඒ කොටසේදී බලනවා. ඒකට නිරූපන ඇතුළත්. ඒවා කරන අයට තව හදාගන්න පුළුවන් පැති සහෝදරයෙක් පෙන්නලා දෙන නිසා සේවය හොඳින් කරන්න අපිට පුහුණුවක් ලැබෙනවා. (1 තිමෝති 4:13) අන්තිම කොටස වන යහපත් ක්‍රිස්තියානීන් වෙමු කියන කොටසේදී බයිබල් ප්‍රතිපත්ති අපේ ජීවිතේට අදාළ කරගන්න පුළුවන් විදිහ ගැන බලනවා. ඒකට ප්‍රශ්න උත්තර සාකච්ඡාවකුත් ඇතුළත්.

ඔයා අපේ රැස්වීම්වලට ආවොත් එතැනදී ඔයාට බයිබලෙන් ඉගෙනගන්න ලැබෙන වටිනා දේවල් ගැන ඔයා පුදුම වෙයි.—යෙසායා 54:13.

• සාක්ෂිකරුවන්ගේ රැස්වීම්වලට ගියොත් ඔයාට මොන වගේ තොරතුරු අහන්න ලැබෙයිද?

• ඔයා එන්න කැමති මොන රැස්වීමටද?