ඔබගේ විශ්වාසවන්තකම දෙවිගේ සිත සතුටු කරයි
“මාගේ පුත්‍රය, මට නින්දා කරන්නාට මා උත්තර දෙන පිණිස ඔබ ප්‍රඥාවන්තව ක්‍රියා කර, මාගේ සිත සතුටු කරන්න.”—හිතෝ. 27:11, නව ලොව පරිවර්තනය, NW.
1, 2. (අ) යෝබ් පොතේ විස්තර කර තිබෙන්නේ සාතන් කළ කුමන චෝදනාවද? (ආ) යෝබ්ගේ කාලයෙන් පසුවත් සාතන් දෙවිට චෝදනා කරමින් සිටින බව අප දන්නේ කෙසේද?
යෝබ්ගේ විශ්වාසවන්තකම පරීක්ෂා කිරීමට දෙවි, සාතන්ට ඉඩහැරියා. ඒ නිසා ඔහුට ඔහුගේ එළු බැටළු රැළවල් හා දරුවන් අහිමි වුණා පමණක් නොව දරුණු අසනීපයකට මුහුණ දීමටත් සිදු වුණා. සාතන්, යෝබ් ගැන දෙවිට චෝදනා කරද්දී දෙවිට විශ්වාසවන්තව සිටින අනෙකුත් සියලුදෙනා ගැනත් ඔහුගේ මනසේ තිබුණා. ඔහු පැවසූ මේ දෙයින් ඒ බව පැහැදිලියි. “මිනිසෙකු තම ජීවිතය බේරාගන්න මොනවාද නොකරන්නේ? ඔහු තමා සතු සියල්ල වුවත් ඒ වෙනුවෙන් පරිත්‍යාග කරයි. ඔහු තම ජීවිතය රැකගන්න වෙනත් ජීවිතයක් වුණත් දෙන්න සූදානම්.” ඔව්, ඔහුගේ එම චෝදනාවට තවත් බොහෝදෙනෙක්ද ඇතුළත්.—යෝබ් 2:4, NW.
2 සාතන්, යෝබ්ව පරීක්ෂා කර වසර 600කට පමණ පසු මෙවන් දෙයක් වාර්තා කිරීමට දෙවි සලමොන්ව පෙලඹෙව්වා. “මාගේ පුත්‍රය, මට නින්දා කරන්නාට මා උත්තර දෙන පිණිස ඔබ ප්‍රඥාවන්තව ක්‍රියා කර, මාගේ සිත සතුටු කරන්න.” (හිතෝ. 27:11, NW) ඉන් පෙනී යන්නේ ඒ කාලයේදීත් සාතන්, යෙහෝවා දෙවිට චෝදනා කරමින් සිටි බවයි. පසු කාලයකදී යොහන්, සාතන්ව පොළොවට හෙළන දර්ශනයක් දුටුවා. එහිදීත් සාතන්ව හඳුන්වා ඇත්තේ දෙවිගේ සේවකයන්ට චෝදනා කරන තැනැත්තා හැටියටයි. එය සිදු වුණේ 1914දී දේවරාජ්‍ය පිහිටු වීමෙන් පසුවයි. එදා සිට මෙම දුෂ්ට සමාජයේ අවසාන දවස් දක්වා සාතන්, දෙවිගේ සේවකයන් දෙවිට දක්වන විශ්වාසවන්තකම අභියෝගයට ලක් කරමින් සිටිනවා.—එළි. 12:10.
3. අපට යෝබ් පොතෙන් ඉගෙනගත හැකි වටිනා පාඩම් මොනවාද?
3 යෝබ් පොතෙන් වැදගත් පාඩම් තුනක් අපට ඉගෙනගත හැකියි. පළමුවැන්න නම් මිනිස් වර්ගයාගේ සතුරා මෙන්ම දෙවිගේ සෙනඟට පීඩා කරන්නා වන්නේ සාතන් වන යක්ෂයා බවයි. දෙවැන්න නම් අපට දෙවි සමඟ කිට්ටු මිත්‍රත්වයක් තිබෙනවා නම් ඕනෑම තත්වයක් යටතේ දෙවිට විශ්වාසවන්තව සිටිය හැකි බවයි. තුන්වැන්න නම් අප පීඩාවලට මුහුණ දෙන විට දෙවි, යෝබ්ට මෙන් අපටත් උපකාර කරන බවයි. ඔහු එසේ කරන්නේ ඔහුගේ වචනය වන බයිබලය, ඔහුගේ සංවිධානය හා ඔහුගේ බලය මාර්ගයෙනුයි.
අපගේ සතුරා ගැන අවදියෙන් සිටිමු
4. අද පවතින තත්වයට වග කිව යුත්තේ කවුද?
4 අද ලෝකයේ සිදු වන දුෂ්ට දේවල් ගැන බොහෝදෙනා දැන සිටියත් ඒවාට හේතුව ඔවුන් දන්නේ නැහැ. සාතන් කියා පුද්ගලයෙක් සිටින බව ඔවුන් විශ්වාස නොකිරීම ඊට හේතුවයි. මිනිසුන් විඳින දුක් වේදනාවලට වැඩි හරියක් මිනිසුන්ද වග කිව යුතුයි. මුලින්ම එය ආරම්භ වුණේ ආදම් සහ ඒව දෙවිගෙන් වෙන්ව කටයුතු කිරීමට පටන්ගැනීමත් සමගයි. ඉන්පසු ඔවුන්ගෙන් පැවත එන අයද එම අඥාන ක්‍රියා මාර්ගයම අනුගමනය කළා. ඒ කෙසේවෙතත් ඒවව දෙවිට විරුද්ධ වීමට පෙලඹෙව්වේ සාතන් නමැති යක්ෂයායි. ඉන්පසු අසම්පූර්ණ මිනිසුන්ව තම පාලනයට නතු කරගැනීම සඳහා සුදුසු තත්වයක් සාතන් ඇති කළා. සාතන් මේ දුෂ්ට “සමාජ ක්‍රමයේ දෙවි” නිසා බොහෝ මිනිසුන්ට ඇත්තේද ඔහුගේ ගතිගුණයි. ඒවා අතරට උඩඟුකම, විවාදශීලීකම, ඊර්ෂ්‍යාව, කෑදරකම, රැවටිලිකාරකම හා කැරලිකාරකම ඇතුළත්. (2 කොරි. 4:4; 1 තිමෝ. 2:14; 3:6; යාකොබ් 3:14, 15 කියවන්න.) එවන් ගතිලක්ෂණ ආගමික හා දේශපාලන ගැටුම්වලට මඟ පාදා තිබෙනවා. එමෙන්ම වෛරය, දූෂණය හා වියවුල්සහගතකම නිසා මිනිසාගේ දුක්ඛිත තත්වය වඩාත් උග්‍ර අතට හැරී තිබෙනවා.
5. අප සතු දැනුම අපව පෙලඹවිය යුත්තේ කුමක් කිරීමටද?
5 යෙහෝවා දෙවිගේ සාක්ෂිකරුවන් හැටියට අපිට තිබෙන දැනුම මොන තරම් වටිනවාද! අද පවතින ලෝක තත්වයට වග කිව යුත්තේ කවුද කියා අපි දන්නවා. එමනිසා ශුභාරංචිය ප්‍රකාශ කිරීමේ හවුල් වීමෙන් මේ සියලු ගැටලුවලට හේතුව කවුද කියා ජනයාට පෙන්වා දීමට අප පෙලඹෙන්නේ නැද්ද? එමෙන්ම සැබෑ දෙවි යෙහෝවාට පක්ෂව සිටිමින් සාතන්ව හා සියලුම දුෂ්ටකම් ඉවත් කරන්නේ කෙසේද කියා ජනයාට පැවසීම අපට ප්‍රීතියක් නොවෙයිද?
6, 7. (අ) දෙවිගේ සේවකයන් මුහුණ දෙන විරුද්ධවාදීකම්වලට වග කිව යුත්තේ කවුද? (ආ) අපට එලිහුව ආදර්ශයට ගත හැක්කේ කෙසේද?
6 සාතන් වග කිව යුත්තේ අද පවතින දුෂ්ටකම්වලට පමණක් නොවෙයි. දෙවිගේ සේවකයන් මුහුණ දෙන විරුද්ධවාදීකම්වලටද ඔහු වග කිව යුතුයි. ඔහු නිතරම බලා සිටින්නේ අපට පීඩා කර අප දෙවිට දක්වන විශ්වාසවන්තකම පරීක්ෂා කිරීමටයි. ඒ බව යේසුස්, පේතෘස්ට පැවසූ මේ වචනවලින් පැහැදිලියි. “සීමොන්, සීමොන්, බලන්න! තිරිඟු පොළන්නාක් මෙන් පොළන පිණිස සාතන් ඔබ සියල්ලන්ව ඉල්ලා ඇත.” (ලූක් 22:31) ඒ හා සමානව යේසුස්ව අනුගමනය කරන අපි සැමදෙනාටම කුමනාකාරයෙන් හෝ යම් පීඩා පරීක්ෂාවන්ට මුහුණ දීමට සිදු වෙනවා. පේතෘස් පැවසුවේ සාතන් “ගොරවන සිංහයෙකු මෙන්, කවරෙකුව හෝ ගිල දමන්න සොයමින්” සිටින බවයි. ඒ වගේම පාවුල්ද පැවසුවේ “ක්‍රිස්තුස් යේසුස් තුළ දේවභක්තික ජීවිතයක් ගත කරන්න කැමති සියල්ලෝද පීඩා විඳින්නෝය” කියායි.—1 පේතෘ. 5:8; 2 තිමෝ. 3:12.
7 ඒ නිසා අපගේ සෙසු නමස්කාරකයෙක් යම් පීඩාවකට මුහුණ දෙන අවස්ථාවකදී අපිට කටයුතු කළ හැක්කේ කෙසේද? එම සහෝදරයාව තනි නොකර අපි ඔහුට එලිහු මෙන් සැබෑ මිතුරෙකු විය යුතුයි. එමෙන්ම අප ඒ සහෝදරයා සමඟ සිට සාතන්ට විරුද්ධ වීමට ඔහුට උපකාර කරමු. (හිතෝ. 3:27; 1 තෙස. 5:25) ඔහුට කුමන උපකාරයක් ලබා දීමට අපට සිදු වුවත් මෙහිදී අපගේ මූලික අරමුණ වන්නේ දෙවිට විශ්වාසවන්තව සිට, දෙවිගේ සිත සතුටු කිරීමට ඔහුට උපකාර කිරීමයි.
8. දෙවිට ප්‍රශංසා කිරීමෙන් යෝබ්ව වළක්වන්න සාතන්ට නොහැකි වූ බව පෙනෙන්නේ කුමකින්ද?
8 සාතන් මුලින්ම යෝබ්ට පීඩා කළේ ඔහුගේ එළු බැටළු රැළවල් ඔහුට අහිමි කිරීමෙනුයි. ඔහුගේ ප්‍රධාන වත්කම් මාර්ගය වී තිබුණේද එයයි. දෙවිට නමස්කාර කිරීමේදීද ඔහු එම සතුන්ව යොදා ගත්තා. ඒ බව අපට මෙයින් පැහැදිලියි. “ඔහු සිරිත් පරිදි හිමිදිරියේම නැඟිට දරුවන්ගේ ගණනට අනුව දවන පූජා ඔප්පු කළේය. ඔහු එසේ කළේ, ‘සමහරවිට මගේ පුත්‍රයන් තම සිතින් දෙවිට දොස් නඟා වරදක් කරන්න ඇති’ කියා සිතූ නිසාය. යෝබ් සැමවිටම ක්‍රියා කළේ එලෙසයි.” (යෝබ් 1:4, 5, NW) යෝබ් නිතිපතා යෙහෝවා දෙවිට සතුන්ව පූජා කළා. නමුත් ඔහුට පැමිණි ඒ පීඩාව නිසා තවදුරටත් සතුන්ව පූජා කිරීමට හැකි වුණේ නැහැ. ඔව්, දෙවි වෙත ගෙන ඒම සඳහා යෝබ්ට “වටිනා දේවල්” තිබුණේ නැහැ. (හිතෝ. 3:9, NW) ඒ වුණත් තම තොල්වලින් දෙවිට ප්‍රශංසා කිරීමට ඔහුට හැකියාව තිබූ අතර ඔහු එසේ කළා.
දෙවි සමඟ කිට්ටු මිත්‍රත්වයක් ඇති කරගන්න
9. අප සතු වටිනාම දෙය කුමක්ද?
9 අපි දුප්පත් වුවත් පොහොසත් වුවත් තරුණ හෝ මහලු වුවත් අපගේ සෞඛ්‍යය තත්වය කුමක් වුවත් අප සියල්ලන්ටම දෙවි සමඟ කිට්ටු මිත්‍රත්වයක් වර්ධනය කරගත හැකියි. අප සතු වටිනාම දෙය වන්නේද එයයි. එමෙන්ම අප මුහුණ දෙන පීඩාව කුමක් වුවත් දෙවිට විශ්වාසවන්තව සිටීමට හා ඔහුගේ සිත සතුටු කිරීමට එම මිත්‍රත්වය අපට උපකාර කරනවා. දෙවි ගැන එතරම්ම දැනුමක් නොතිබූ අය පවා පීඩා හමුවේ ඔහුට විශ්වාසවන්තව සිට තිබෙනවා.
10, 11. (අ) එක් සහෝදරියක් දෙවිට විශ්වාසවන්තව සිටියේ කෙසේද? (ආ) ඇය සාතන්ට දුන් පිළිතුර කුමක්ද?
10 රුසියාවේ සිටි බොහෝ සහෝදර සහෝදරියන්ද යෝබ් මෙන් දැඩි පීඩා හමුවේ දෙවිට විශ්වාසවන්තව සිටියා. සහෝදරී වැලන්ටීනා ගාර්නොෆ්ස්කියා ඉන් එක්කෙනෙක්. වර්ෂ 1945දී අවුරුදු 20ක් පමණ වූ ඇයට එක් සහෝදරයෙක් සාක්ෂි දැරුවා. ඔහු ඇයව නැවත හමු වීමට පැමිණියේ දෙවතාවයි. ඉන්පසු ඇය ඒ සහෝදරයාව නැවත දුටුවේ නැහැ. ඒ වුණත් ඇය තම අසල්වාසින්ට සාක්ෂි දරන්න පටන්ගත්තා. ඒ නිසා ඇයව අත්අඩංගුවට ගත් අතර අවුරුදු අටක සිර දඬුවමක්ද නියම කළා. නමුත් 1953දී ඇය නිදහස් වීමත් සමඟම නැවතත් සාක්ෂි දරන්න පටන්ගත්තා. ඒ නිසා නැවතත් ඇයව අවුරුදු දහයකට සිරගත කළා. සිර ගෙදර අවුරුදු කිහිපයක් ගත කළායින් පසුව ඇයව තවත් සිර කඳවුරකට මාරු කළා. එහි තවත් සහෝදරියන් කිහිපදෙනෙක් සිටි අතර ඔවුන් ළඟ බයිබලයකුත් තිබුණා. දිනක් ඔවුන් වැලන්ටීනාට ඒ බයිබලය පෙන්නුවා. ඒ අවස්ථාව ඇයට මොන තරම් ප්‍රීතියක් ගෙන දුන්නාද! ඇය මෙතෙක් දැක තිබුණේ 1945දී ඇයට සාක්ෂි දැරූ සහෝදරයා ළඟ තිබූ බයිබලය පමණයි.
11 ඉන්පසු 1967දී ඇයව නිදහස් කළ අතර දෙවිට කැප වී බව්තීස්ම වීමට ඇයට අවස්ථාව ලැබුණා. මෙසේ ඇයට ලැබූ නිදහසින් උපරිම ප්‍රයෝජනය ගත් ඇය 1969 වන තෙක් උද්‍යෝගයෙන් සාක්ෂි දැරුවා. කෙසේනමුත් එම වසරේදීම ඇයව නැවතත් අත්අඩංගුවට ගත් අතර අවුරුදු තුනක සිර දඬුවමක් නියම වුණා. ඒ වුණත් ඇය දිගටම සාක්ෂි දැරුවා. වර්ෂ 2001දී ඇය මිය යන තෙක් 44දෙනෙකුට සත්‍යය ඉගෙනගැනීමට උපකාර කර තිබෙනවා. ඇය සිර ගෙදර ගත කළ මුළු කාලය අවුරුදු 21ක්. එමෙන්ම සහෝදරී වැලන්ටීනා දෙවිට විශ්වාසවන්තව සිටීම සඳහා තමන් සතු නිදහස ඇතුළු සියල්ලක්ම කැමැත්තෙන් පරිත්‍යාග කළා. ඇයගේ ජීවිතයේ අවසන් දවස්වලදී ඇය මෙසේ පැවසුවා. “කවදාවත් මටම කියලා තැනක් තිබුණේ නැහැ. මට මගේ කියලා තිබුණේ සූට්කේස් එකකට දාන්න පුළුවන් තරම් බඩු විතරයි. ඒ වුණත් මම හිටියේ හරිම ප්‍රීතියෙන්. යෙහෝවා දෙවිට කරපු සේවයෙන් මම ලොකු තෘප්තියක් අද්දැක්කා.” පීඩා හමුවේ මිනිසුන් දෙවිට විශ්වාසවන්තව සිටින්නේ නැහැයි කියමින් සාතන් කළ චෝදනාවට ඇය ලබා දුන්නේ මොන තරම් කදිම පිළිතුරක්ද! (යෝබ් 1:9-11) ඇය යෙහෝවා දෙවිගේ සිත සතුටු කළ බව අපට ස්ථිරයි. ඒ නිසා දෙවි, ඇයවත් තමන්ට විශ්වාසවන්තව සේවය කර මිය ගොස් සිටින සියල්ලන්වත් නැවත නැඟිටුවන්න ඉතා ආශාවෙන් බලා සිටිනවා.—යෝබ් 14:15.
12. අපි දෙවි සමඟ මිත්‍රත්වයක් ඇති කරගන්නේ ඇයි?
12 අපි, දෙවි සමඟ මිත්‍රත්වයක් ඇති කරගන්නේ ඔහුට ප්‍රේම කරන නිසයි. ඒ වගේම අපි ඔහුගේ ගුණාංග අගය කරනවා. ඔහුගේ කැමැත්තට අනුව ජීවත් වීමට අපි දැඩි වෑයමක් දරනවා. අපි දෙවිට ප්‍රේම කරන්නේ කවුරුවත් කියන නිසාවත් වාසි ප්‍රයෝජන බලාපොරොත්තුවෙන්වත් නොවෙයි. අපගේ මුළු හදවතින්මයි. දෙවි කෙරෙහි එවන් ප්‍රේමයක් අපට තිබෙන නිසා දැඩි පීඩා හමුවේ වුවත් දෙවිට විශ්වාසවන්තව සිටීමට එය අපට මහත් ශක්තියක්. එමෙන්ම යෙහෝවා දෙවිද ‘තමන්ට පක්ෂපාතව සිටින අයගේ ගමන් මඟ සුරකිනවා.’—හිතෝ. 2:8, NW; ගීතා. 97:10.
13. දෙවි, අප කරන සේවය සලකන්නේ කෙසේද?
13 අපට කළ හැකි දේ සීමා සහිත වුවත් දෙවිගේ නාමයට ප්‍රශංසා කිරීමට අපව පොලඹවන්නේ ඔහු කෙරෙහි ඇති අපගේ ප්‍රේමයයි. දෙවිට කරන නමස්කාරය තුළ අප ආශා කරන සියල්ල අපට කළ නොහැකි වුවත් ඒ සඳහා අපගේ සිතේ තිබෙන ආශාව යෙහෝවා දෙවි දකිනවා. ඔහු, අප කරන දේවල් ගැන පමණක් නොව අප ඒවා කරන චේතනාව ගැනද සැලකිලිමත් වෙනවා. උදාහරණයකට යෝබ් ගැන සිතන්න. ඔහු සිටියේ දැඩි වේදනාවකිනුයි. ඒ තත්වයේ සිටියදී පවා දෙවි කෙරෙහි ඔහුට තිබූ ප්‍රේමය ඔහු පැවසූ දේවලින් හෙළි වුණා. (යෝබ් 10:12; 28:28 කියවන්න.) ඒ නිසා යෙහෝවා දෙවි, “මාගේ සේවක” කියා යෝබ් ගැන සඳහන් කිරීමෙන් හා ඔහුව හමු වීමට පැමිණි මිතුරන් තිදෙනා වෙනුවෙන් පූජාවක් ඔප්පු කරන්න කියා පැවසීමෙන් පැහැදිලි වන්නේ දෙවි ඔහු ගැන සතුටු වූ බවයි. (යෝබ් 42:7-9) නමුත් එලිෆස්, බිල්දද් හා ෂෝපර් සත්‍යය කතා නොකළ නිසා දෙවි ඔවුන් කෙරෙහි කෝප වුණා. අපත් දෙවිගේ අනුමැතිය ලැබීම සඳහා යෝබ් මෙන් කටයුතු කරමු.
තම සේවකයන්ට දෙවි උපකාර කරයි
14. යෝබ්ගේ ආකල්ප නිවැරදි කරගැනීමට දෙවි ඔහුට උපකාර කළේ කෙසේද?
14 යෝබ් අසම්පූර්ණ කෙනෙකු වුවත් දෙවිට දිගටම විශ්වාසවන්තව සිටියා. ඔහු දැඩි පීඩනයකින් සිටියදී යම් වැරදි ආකල්ප දැරූ අවස්ථාද තිබුණා. වරක් ඔහු දෙවිට මෙසේ පැවසුවා. ‘මා උපකාරය පතා මොරගැසුවද ඔබ මට පිළිතුරු දුන්නේ නැත. ඔබ මා සමඟ උදහස් වී ඔබේ මුළු වැර යොදා මට පහර දුන්නේය.’ එමෙන්ම තමා ධර්මිෂ්ඨ බව ඔප්පු කිරීමට ඔහු මෙසේද පැවසුවා. ‘මා දුෂ්ටයෙකු නොවෙයි. මා කිසිවෙකුට හානියක් සිදු කර නැත. මාගේ යාච්ඤාද අවංකය.’ (යෝබ් 10:7; 16:17; 30:20, 21, NW) කෙසේනමුත් යෙහෝවා දෙවි කාරුණිකව ඔහුව නිවැරදි කළා. ඒ සඳහා යෝබ් මුහුණ දෙමින් සිටි තත්වයෙන් ඔහුගේ අවධානය වෙනතකට යොමු කරන්න දෙවි ඔහුගෙන් ප්‍රශ්න කිහිපයක් ඇසුවා. දෙවි, මිනිසුන්ට වඩා මොන තරම් උසස්ද කියා තේරුම්ගන්න ඒවා යෝබ්ට උපකාර කළා. පසුව යෝබ් එම මඟ පෙන්වීම් පිළිගෙන තමාගේ ආකල්ප සකස් කරගත්තා.—යෝබ් 40:8; 42:2, 6 කියවන්න.
15, 16. දෙවි අපට උපකාර කිරීම සඳහා ලබා දී තිබෙන සැපයුම් මොනවාද?
15 යෙහෝවා දෙවි, යෝබ්ට මෙන් අපටත් විවිධ ආකාරවලින් කාරුණිකව මඟ පෙන්වනවා. ඒ සඳහා ඔහු බොහෝ සැපයුම් ලබා දී තිබෙන අතර ඒවායින් අපට ඉමහත් ප්‍රයෝජන ගත හැකියි. අපගේ පව්වලට සමාව ලබාගැනීම සඳහා දෙවි, යේසුස්ගේ ජීවිත පූජාව ලබා දුන්නා. ඒ තුළින් අපට දෙවි සමඟ කිට්ටු මිත්‍රත්වයක් පවත්වා ගැනීමට හැකි වී තිබෙනවා. (යාකො. 4:8; 1 යොහ. 2:1) අප පරීක්ෂාවලට මුහුණ දෙන විට යාච්ඤා කර දෙවිගේ බලය ඉල්ලන්නත් අපට හැකියි. ඊට අමතරව ඔහුගේ වචනය වන බයිබලය අපට තිබෙනවා. එය කියවා අධ්‍යයනය කර ඒ ගැන ගැඹුරින් සිතා බැලීමෙන් පරීක්ෂාවන්ට මුහුණ දීමට සූදානම් වන්න අපට හැකියි. බයිබලය අධ්‍යයනය කිරීමෙන් තවත් ප්‍රයෝජනයක් ලැබෙනවා. එය නම් දෙවිට සියල්ල පාලනය කිරීමට ඇති අයිතිය පිළිබඳව සාතන් මතු කළ ප්‍රශ්නය ගැන අපට ඇති අවබෝධය තවත් වැඩි වීමයි. එමෙන්ම දෙවිට විශ්වාසවන්තව සිටිය යුතු ආකාරය තේරුම්ගැනීමටත් ඉන් අපට හැකියි.
16 දෙවි ලබා දී ඇති තවත් සැපයුමක් වන්නේ ‘විශ්වාසවන්ත නුවණ ඇති දාසයාගෙන්’ මඟ පෙන්වීම් ලබන සහෝදර සංගමයයි. (මතෙ. 24:45-47) එයට ලොව පුරා විසිරී තිබෙන 1,00,000කට ආසන්න සභා ඇතුළත් වෙනවා. ඒවායෙහි කරන ඉගැන්වීම් මගින් අපට මුහුණ දීමට සිදු විය හැකි පරීක්ෂාවන් ගැන අපව දැනුවත් කරන අතර දෙවි කෙරෙහි ඇති අපගේ විශ්වාසයද ඉන් ශක්තිමත් වෙනවා. ඒ බව සනාථ කරන ෂීලා නමැති සහෝදරියගේ අද්දැකීම සලකා බලන්න.
17. දෙවි තම සංවිධනය මගින් ලබා දෙන මඟ පෙන්වීම් ඒ විදිහටම අනුගමනය කිරීම ඥානවන්ත බව පෙන්වන උදාහරණයක් සඳහන් කරන්න.
17 ජර්මනියේ ජීවත් වන සහෝදරී ෂීලාගේ වයස අවුරුදු 15යි. දිනක් ඇයගේ පන්තියේ ගුරුවරයෙක් නොසිටි අවස්ථාවේදී සෙසු ශිෂ්‍යයන්, ඔවුන්ගේ අනාගතය ගැන දැනගැනීමට භූතයන්ව සම්බන්ධ කරගෙන කරන ක්‍රීඩාවක නිරත වෙන්න තීරණය කළා. එවිට ෂීලා ඉක්මනින්ම පන්තියෙන් පිටව ගියා. එසේ කිරීම ගැන පසුව ඇය ගොඩාක් සතුටු වුණා. ඊට හේතුව ශිෂ්‍යයන් එම ක්‍රීඩාව කරන අතරතුර සමහරුන්ට භූතයන්ගේ බලපෑම දැනෙන්න පටන්ගැනීමයි. ඒ නිසා සමහරුන් ඒ මේ අත දුවන්නද පටන්ගත්තා. නමුත් ෂීලා කලින්ම පන්තියෙන් පිටව ගියේ ඇයි? ඒ ගැන ඇය මෙසේ පවසනවා. “මේ සිද්ධිය වෙන්න දවස් කිහිපයකට පෙර එම ක්‍රීඩාවේ ඇති භයානකකම ගැන සභා රැස්වීමකදී සාකච්ඡා කළා. ඒ නිසා කරන්න ඕනේ මොනවාද කියලා මම දැනගෙන හිටියා. ඒ වගේම හිතෝපදේශ 27:11හි සඳහන් විදිහට යෙහෝවා දෙවිව සතුටු කරන්න මට ඕනා වුණා.” එදා ඇය රැස්වීමට ගොස් හොඳින් ඇහුම්කන් දී තිබීම ඇයට මොන තරම් ප්‍රයෝජනයක් ගෙන දුන්නාද!
18. ඔබගේ අධිෂ්ඨානය කුමක්ද?
18 අප සියලුදෙනාමත් දෙවිගේ සංවිධනයෙන් ලැබෙන මඟ පෙන්වීම්වලට කීකරු වීමට අදිටන් කරගනිමු. නොකඩවා රැස්වීම්වලට සහභාගි වීම, බයිබලය කියවීම, ඒ මත පදනම් ප්‍රකාශන අධ්‍යයනය කිරීම, නොකඩවා යාච්ඤා කිරීම හා දෙවි සමඟ මිත්‍රත්වයක් ඇති අයව ඇසුරු කිරීම මගින් අපට අවශ්‍ය මඟ පෙන්වීම් හා උපකාර ලබා ගත හැකියි. යෙහෝවා දෙවි ආශා කරන්නේ අපි සාතන්ට විරුද්ධව ජය ගන්නවාටයි. අපි එසේ කරයි කියා අප ගැන ලොකු විශ්වාසයක් දෙවි තබා තිබෙනවා. ඒ අනුව බලද්දී යෙහෝවා යන දෙවිගේ නාමය ප්‍රශංසාවට පත් කිරීමට, ඔහුට විශ්වාසවන්තව සිටීමට හා ඔහුගේ හදවත සතුටු කිරීමට අපට තිබෙන්නේ මොන තරම් උතුම් වරප්‍රසාදයක්ද!
ඔබට මතකද?
• සාතන් වග කිව යුත්තේ කුමකටද?
• අප සතු වටිනාම දෙය කුමක්ද?
• අප, දෙවි සමඟ මිත්‍රත්වයක් ඇති කරගන්නා හේතුව කුමක්ද?
• අද දින දෙවි අපට උපකාර කරන ක්‍රම මොනවාද?
[8වන පිටුවේ පින්තූරය]
ඔබ සතු වටිනා දැනුම අන් අය සමඟ බෙදාගැනීමට ඔබ තුළ පෙලඹීමක් තිබෙනවාද?
[9වන පිටුවේ පින්තූරය]
දෙවිට විශ්වාසවන්තව සිටීමට සෙසු නමස්කාරකයන්ට උපකාර කරන්න අපට හැකියි
[10වන පිටුවේ පින්තූරය]
දෙවිට විශ්වාසවන්තව සිටීම සඳහා සහෝදරී වැලන්ටීනා තමන් සතු සියල්ල පරිත්‍යාග කිරීමට කැමැත්තෙන් සිටියා