බව්තීස්ම වෙන්න තීරණයක් ගන්න

ඔයා බව්තීස්ම වෙලා නැති යෞවනයෙක් නම් නැත්නම් බයිබලය පාඩම් කරන කෙනෙක් නම් කැප වෙලා බව්තීස්ම වෙන්න ඔයා ආසද? ඇයි එහෙම කරන එක වැදගත්? ඒකෙන් යෙහෝවා දෙවියන් එක්ක විශේෂ බැඳීමක් ඇති කරගන්න පුළුවන් වෙනවා. (ගීතා 91:1) ඒ වගේම ඒක ගැලවීමටත් මඟ පාදනවා. (1පේතෘ 3:21) බව්තීස්ම වෙන්න ඔයාට උදව් වෙන්නේ මොන පියවරද?

මේකයි සත්‍යය කියලා ඔයාටම තහවුරු කරගන්න. ඒ ගැන මොනා හරි ප්‍රශ්නයක් තියෙනවා නම් තව හොඳට අධ්‍යයනය කරන්න. (රෝම 12:2) ජීවිතේ මොන වගේ වෙනසක් කරගන්න ඕනෙද කියලා හිතලා යෙහෝවා දෙවියන්ව සතුටු කරන අරමුණින් ඒ වෙනස්කම් කරගන්න. (හිතෝ 27:11; එෆී 4:23, 24) හැම තිස්සේම උදව් ඉල්ලලා යාච්ඤා කරන්න. දෙවියන් ඔයාට උදව් කරනවා කියලා කිසිම සැකයක් තියාගන්න එපා. (1පේතෘ 5:10, 11) බව්තීස්ම වෙන්න ඔයා දරන වෑයම කවදාවත් අපතේ යන්නේ නැහැ. යෙහෝවා දෙවියන්ට සේවය කරන එක තමයි ඔයාට කරන්න පුළුවන් හොඳම දේ.—ගීතා 16:11.

‘බව්තීස්මය දක්වා ගිය ගමන’ කියන වීඩියෝ එක බලලා මේ ප්‍රශ්නවලට උත්තර දෙන්න.

මොන වගේ අභියෝගද සමහර අය ජය අරන් තියෙන්නේ?
යෙහෝවා දෙවියන්ට ජීවිතය කැප කරන්න පොලඹවන විදිහේ විශ්වාසයක් ඇති කරගන්න පුළුවන් කොහොමද?
බව්තීස්මය කියන ඉලක්කයට යන්න අවශ්‍ය පියවර ගන්න සමහර අය පෙලඹිලා තියෙන්නේ ඇයි?
යෙහෝවා දෙවියන්ට සේවය කරන්න තීරණය කරන අයට ලැබෙන ආශීර්වාද මොනවාද?
කැප වීමෙන් සහ බව්තීස්මයෙන් අදහස් කරන්නේ මොනවාද?

බව්තීස්ම දේශනය දෙන සහෝදරයා දේශනයේ අන්තිම හරියෙදී බව්තීස්ම අපේක්ෂකයන්ට නැඟිටින්න කියලා මෙහෙම අහනවා.

ඔයා යේසුස් ක්‍රිස්තුස් මාර්ගයෙන් ගැලවීම ලබා දෙන්න දෙවියන් ඇති කරලා තියෙන සැලැස්ම පිළි අරන්, ඔයාගේ පව් ගැන පසුතැවිලි වෙලා, යෙහෝවා දෙවියන්ගේ කැමැත්ත කරන්න ඔයාගේ ජීවිතය කැප කරලා තියෙනවාද?

බව්තීස්ම වෙනවා කියන්නේ ඔයා යෙහෝවා දෙවියන්ගේ සංවිධානයත් එක්ක එකතු වෙලා යෙහෝවා දෙවිගේ සාක්ෂිකරුවෙක් විදිහට දෙවියන්ට සේවය කරනවා කියන එකයි. ඔයා ඒක තේරුම් අරගෙන ඉන්නවාද?

බව්තීස්ම අපේක්ෂකයන් ස්ථිර විශ්වාසයකින් ඒ ප්‍රශ්නවලට ‘ඔව්’ කියලා උත්තර දෙද්දී එයාලා යේසුස්ගේ ජීවිත පූජාව විශ්වාස කරනවා කියලත් ජීවිතය යෙහෝවා දෙවියන්ට සම්පූර්ණයෙන්ම කැප කරලා තියෙනවා කියලත් ‘ප්‍රසිද්ධියේම ප්‍රකාශ කරනවා.’—රෝම 10:9, 10.