බැබිලෝනියේ රජ වෙලා හිටිය මේදීය ජාතික දාරියුස් දැනගෙන හිටියා දානියෙල් විශේෂ කෙනෙක් කියලා. ඒ නිසා රජ එයාව දේශයේ උසස් නිලධාරීන්ගේ නායකයා විදිහට පත් කළා. ඒ ගැන නිලධාරීන් හිටියේ ඊර්ෂ්‍යාවෙන්. දානියෙල් දවසට තුන් පාරක් යෙහෝවාට යාච්ඤා කරනවා කියලා දැනගෙන හිටිය එයාලා දාරියුස් ළඟට ගිහින් මෙහෙම කිව්වා. ‘රජතුමෙනි, ඔබ ඇරෙන්න වෙන කිසි කෙනෙක්ට යාච්ඤා කරන අයව සිංහ ගුහාවට දාන්න නීතියක් හදන්න අවසර දෙන්න කියලා අපි ඔබෙන් ඉල්ලනවා.’ රජත් ඒකට කැමති වෙලා ඒ නීතිය සඳහන් ලියවිල්ල අත්සන් කළා.

දානියෙල් ඒ ගැන දැනගත්තාම එයා වෙනදා වගේම ගෙදර ගිහින් ඇරලා තිබුණු ජනේලේ ළඟ ඉඳන් යෙහෝවාට යාච්ඤා කළා. උසස් නිලධාරීන් ඒක දැකලා රජට මෙහෙම කිව්වා. ‘රජතුමෙනි, දානියෙල් ඔබේ නීතිය කඩලා දවසට තුන් පාරක්ම එයාගේ දෙවියන්ට යාච්ඤා කරනවා.’ දාරියුස් දානියෙල්ව මරන්න කැමති වුණේ නැති නිසා එයාව බේරගන්න විදිහක් හෙව්වා. ඒත් රජ දාපු නීතියක් වෙනස් කරන්න රජටවත් අවසර තිබුණේ නැති නිසා එයාට සිද්ධ වුණා දානියෙල්ව සිංහ ගුහාවට දාන්න කියන්න.

එදා රෑ රජට නින්ද ගියෙත් නැහැ. එයා පහුවෙනිදා උදෙන්ම සිංහ ගුහාව ළඟට ගිහින් දානියෙල්ට කතා කරලා ඇහුවා ‘අනේ දානියෙල් ඔයාගේ දෙවියන් ඔයාව බේරගත්තාද’ කියලා.

එතකොටම දානියෙල් මෙහෙම කිව්වා. ‘යෙහෝවා දේවදූතයෙක්ව එවලා සිංහයන්ගේ කටවල් වැහුවා.’ දාරියුස් හුඟක් සතුටු වෙලා දානියෙල්ව ගුහාවෙන් එළියට ගන්න කියලා අණ කළා. දානියෙල්ට පොඩ්ඩක්වත් තුවාල වෙලා තිබුණේ නැහැ. ‘දානියෙල්ට චෝදනා කරපු අයව සිංහ ගුහාවට දාන්න’ කියලා රජ අණ කළා. එයාලව ගුහාවට දැම්මාම සිංහයෝ එයාලව කෑලි කෑලිවලට ඉරලා දැම්මා.

ඊටපස්සේ දාරියුස් මෙහෙම අණ කළා. ‘හැමෝම දානියෙල්ගේ දෙවියන් ගැන බයෙන් ඉන්න ඕනේ. ඔහු දානියෙල්ව සිංහයන්ගෙන් බේරගත්තා.’

දානියෙල් වගේ ඔයාත් හැමදාම යෙහෝවාට යාච්ඤා කරනවාද?

එස්තර් හැදුණේ පර්සියානු නගරයක් වන ෂූෂන්වල. අවුරුදු ගාණකට කලින් නෙබුකද්නෙෂර් රජ එස්තර්ගේ පවුලේ අයව යෙරුසලමෙන් අරන් ඇවිත් තිබුණා. එස්තර්ව හදාගත්තේ එයාගේ නෑදෑයෙක් වුණු මොර්දෙකයි. එයා අහෂ්වේරොෂ් රජගේ සේවකයෙක්.

අහෂ්වේරොෂ් රජට අලුත් රැජිනක් ඕන වුණා. ඒ නිසා එයාගේ සේවකයන් ඒ දේශයේ හිටිය ලස්සනම තරුණියන්ව අරන් ආවා. එයාලා අතරින් එස්තර්වයි රජ තෝරගත්තේ. මොර්දෙකයි එස්තර්ට කිව්වා එයා යුදෙව්වෙක් කියලා කාටවත් කියන්න එපා කියලා.

දේශයේ උසස් නිලධාරීන්ගේ නායකයා වුණු හාමාන් කැමති වුණේ අනිත් අය තමන් ඉස්සරහා වැඳ වැටිලා ආචාර කරනවාටයි. ඒත් මොර්දෙකයි ඒක කළේ නැති නිසා හාමාන්ට ඕනෙ වුණා මොර්දෙකයිව මරන්න. මොර්දෙකයි යුදෙව්වෙක් නිසා දේශයේ හිටපු හැම යුදෙව්වෙක්වම මරන්න එයා කුමන්ත්‍රණය කළා. එයා රජට කිව්වා ‘යුදෙව්වෝ හරි භයානකයි. එයාලව විනාශ කරන්න’ කියලා. හාමාන්ට කැමති දෙයක් කරන්න රජ අවසර දුන්නාම ආදාර් මාසේ 13වෙනිදාට හැම යුදෙව්වෙක්වම මරන්න එයා නීතියක් හැදුවා.

ඒ නීතිය ගැන එස්තර් දැනගෙන හිටියේ නැහැ. ඒ නිසා මොර්දෙකයි නීතියේ පිටපතක් දීලා එස්තර්ට කිව්වා ‘රජතුමාව හම්බ වෙන්න යන්න’ කියලා. එස්තර් මෙහෙම කිව්වා. ‘රජතුමා එන්න කියන්නේ නැතුව කෙනෙක් එයාව හම්බ වෙන්න ගියොත් එයාව අනිවාර්යයෙන්ම මරනවා. දවස් 30කින් රජතුමා මට එන්න කියලා නෑ. ඒත් මං යන්නම්. රජතුමා එයාගේ යෂ්ටිය මගේ පැත්තට දික් කළේ නැත්නම් මාව මරයි.’

එස්තර්, රජව හම්බ වෙන්න ගියා. රජ එස්තර්ව දැකලා එයාගේ යෂ්ටිය දික් කරලා ඇහුවා ‘ඔයාට මගෙන් මොනවාද ඕනෙ’ කියලා. ‘රජතුමෙනි, මං ඔබට කෑම වේලක් ලෑස්ති කරලා තියෙනවා. හාමාන් එක්ක ඔබට එන්න පුළුවන්ද’ කියලා එස්තර් ඇහුවා. කෑම කන අතරේ එස්තර්, රජතුමාට කිව්වා හෙටත් කෑමකට එන්න කියලා. දෙවෙනි දවසෙත් රජ එස්තර්ගෙන් ඇහුවා ‘ඔයාට මගෙන් මොනවාද ඕනෙ’ කියලා. ‘කෙනෙක් මාවයි මගේ සෙනඟවයි මරන්න යන්නේ. අපිව බේරගන්න’ කියලා එස්තර් කිව්වාම රජ ඇහුවා ‘කවුද ඒ කෙනා’ කියලා. එතකොට එස්තර් කිව්වා ‘මේ හාමාන් තමයි ඒ කෙනා’ කියලා. අහෂ්වේරොෂ් රජට කේන්ති ගිහිල්ලා හාමාන්ව මරන්න අණ කළා.

ඒත් හාමාන් දාපු නීතියට රජ අවසර දුන්න නිසා ඒක වෙනස් කරන්න රජටවත් බැරි වුණා. ඒ නිසා රජ මොර්දෙකයිව උසස් නිලධාරීන්ගේ නායකයා විදිහට පත් කරලා එයාට කිව්වා අලුත් නීතියක් හදන්න කියලා. යුදෙව්වන්ට එයාලාගේ සතුරන් එක්ක සටන් කරන්න පුළුවන් වෙන විදිහට මොර්දෙකයි අලුත් නීතියක් හැදුවා. යුදෙව්වන් ආදාර් මාසේ 13වෙනිදා එයාලාගේ සතුරන්ව පරාජය කරලා හැම අවුරුද්දේම ඒක සැමරුවා.