ස්වාභාවික බලයන් පාලනය කළ හැකි කෙනෙක්

යේසුස් ආශ්චර්යවත් විදිහට දහස් ගණනකට කන්න දීපු එක මිනිසුන්ගේ හිත්වලට තදින්ම කාවැදිලයි තියෙන්නේ. ඒ නිසා තමයි මේ ඉන්නේ මෙසියස් විදිහට හඳුන්වන “ලෝකයට එන්න සිටින අනාගතවක්තෘ” කියලා ඔවුන් කියන්නේ. යේසුස්ට පාලකයෙක් වෙන්න සුදුසුකම් තියෙනවා කියලත් ඔවුන් කතා වෙනවා. (යොහන් 6:14; ද්විතීය කතාව 18:18) ඒ නිසා ඔවුන් දැන් උත්සාහ කරන්නේ යේසුස්ව රජකමට පත් කරන්න.

ඒත් ඔවුන් කරන්න යන දේ යේසුස් තේරුම්ගන්නවා. සමූහයාව පිටත් කර හරින ඔහු ඔරුවෙන් එගොඩට යන්න කියලා ගෝලයන්ට අණ කරනවා. ඔවුන් යන්නේ කොහෙටද? ඔවුන් මුලින්ම බෙත්සයිදාවට ගිහින් ඊළඟට කපර්ණවුමට යන්න නියමිතයි. යේසුස් රාත්‍රිය පුරාම යාච්ඤා කරන්න තනිවම කන්දකට යනවා.

මහා පාන්දර වුණත් ගෝලයන් ගමන් කරන ඔරුව යේසුස්ට පෙනෙන්නේ තවමත් සඳ එළිය තියෙන නිසයි. තද සුළං හමන නිසා ගෝලයන් “ඉතා අමාරුවෙන් ඔරුව පදවන ආකාරය” යේසුස් දකිනවා. (මාක් 6:48) මේ වෙද්දී ඔවුන් “කිලෝමීටර් පහක් හයක් පමණ” දුර ගිහින්. (යොහන් 6:19) කන්දෙන් බැස එන යේසුස් වතුර මත ඇවිදන් යනවා. සමහරවිට ඔවුන්ව පසු කරගෙන යන්න යේසුස් හිතන්න ඇති. ඔහුව දකින ගෝලයන් මොන තරම් බය වෙනවාද කියනවා නම් “ඒ අවතාරයක්” කියා කෑගසනවා.—මාක් 6:49.

ඔවුන්ව සන්සුන් කරමින් යේසුස් කියන්නේ මෙහෙමයි. “භය වෙන්න එපා. මේ මමයි. ධෛර්යවත් වන්න.” එතකොට පේතෘස් “ස්වාමීනි, ඒ ඔබ නම් වතුර මත ඇවිදගෙන ඔබ ළඟට එන්න කියා මට පවසන්න” කියලා කියනවා. “එන්න” කියලා යේසුස් කිව්වාම පේතෘස් වතුර මත ඇවිදගෙන ඔහු වෙතට යනවා. ඒත් කුණාටුව දැකලා බය වෙන පේතෘස් ගිලෙන්න පටන්ගන්නවා. ඒ නිසා තමයි ඔහු කෑගසමින් “ස්වාමීනි, මාව බේරගන්න” කියා පවසන්නේ. ඒ මොහොතේම තම අත දිගු කර ඔහුව අල්ලාගන්නා යේසුස් “ඔබේ විශ්වාසය දුර්වල වුණේ ඇයි? ඔබ තුළ සැකයක් ඇති වෙන්න ඉඩ දුන්නේ ඇයි” කියා අසනවා.—මතෙව් 14:27-31.

පේතෘස් සහ යේසුස් ඔරුවට නැග්ගාම කුණාටුව නතර වෙනවා. ගෝලයන්ට ඒ ගැන දැනෙන්නේ මහත් පුදුමයක්. ඒත් ඇත්තටම ඔවුන් ඒ ගැන පුදුම වෙන්න ඕනෙ නැහැ. මොකද පැය කිහිපයකට කලින් යේසුස් ආශ්චර්යවත් විදිහට දහස් ගණනකට කන්න දීලා තිබුණා. “රොටි රැගෙන ඔහු කළ ආශ්චර්යයෙන් වටහාගත යුතු දේ” ඔවුන් වටහාගෙන හිටියා නම් යේසුස් මුහුද මත ඇවිදිමින් කුණාටුව නතර කරපු එක ගැන පුදුම වෙන්න ඕනෙ නැහැ. යේසුස් ඉදිරියේ දණින් වැටෙන ඔවුන් “සැබවින්ම ඔබ නම් දෙවිගේ පුත්‍රයායි” කියා දැන් පවසනවා.—මාක් 6:52; මතෙව් 14:33.

කපර්ණවුමට දකුණින් පිහිටලා තියෙන ලස්සන, සාරවත් තැනිතලාවක් වුණු ගෙනසරෙත්වලට එන්න ඔවුන්ට වැඩි වෙලාවක් යන්නේ නැහැ. ඔරුවෙන් බහින ඔවුන් දැන් වෙරළට ඇවිදන් යනවා. මිනිසුන් යේසුස්ව හඳුනාගත්තාම ඔවුන් අවට ප්‍රදේශවල ඉන්න අයටත් ඒ ගැන දන්වනවා. එතකොට ඒ හැමෝම අසනීප වෙලා ඉන්න අයව යේසුස් ළඟට අරන් එනවා. ඔවුන් යේසුස්ගේ පිට වස්ත්‍රයේ වාටිය ඇල්ලුවාම සම්පූර්ණයෙන්ම සුව වෙනවා.

යේසුස් පිටත් වෙලා ගිහින් කියලා ආශ්චර්යවත් විදිහට ඔහු කෑම දීපු වෙලාවේ එතැන හිටිය අයට දැනගන්න ලැබෙනවා. ඒ නිසා ඔවුන් ටයිබීරියස් නුවරේ ඉඳන් ආපු අයගේ ඔරුවල නැඟලා යේසුස්ව හොයාගෙන කපර්ණවුමට යනවා. එගොඩට ගිහින් යේසුස්ව මුණගැහුණාම ඔවුන් අසන්නේ “ගුරුතුමනි, ඔබ මෙහි ආවේ කොයි වෙලාවේද” කියායි. (යොහන් 6:25) ඒත් යේසුස් ඔවුන්ට තදින් කතා කරනවා.