බයිබලය දෙවියන්ගෙන් ලැබුණ පොතක්

බයිබලය කියන්නේ පොත් 66ක එකතුවක්. ඒක යෙහෝවා දෙවියන්ගෙන් අපිට ලැබුණ වටිනා තෑග්ගක්. හැබැයි ඔයා මෙහෙම කල්පනා කරනවා ඇති. ‘දෙවියන් කොහොමද බයිබලය මිනිස්සුන්ට දුන්නේ? ඒකේ තියෙන්නේ කාගේ අදහස්ද?’ දැන් අපි ඒ ගැන බලමු.

1. බයිබලය ලිව්වේ මිනිස්සු නම් ඇයි ඒකට දේවවචනය කියලා කියන්නේ?

බයිබලයේ මුල් පොත ලිව්වේ අවුරුදු 3,500කට විතර කලින්. අන්තිම පොත ලිව්වේ අවුරුදු 1,900කට විතර කලින්. අවුරුදු 1,600ක් පුරා එක එක පසුබිම්වල හිටපු මිනිස්සු 40දෙනෙක් ඒක ලිව්වා. හැබැයි බයිබලයේ තියෙන අදහස් අතර කිසිම ගැටීමක් නැහැ. එහෙම වෙන්නේ කොහොමද? මොකද බයිබලයේ තියෙන්නේ දෙවියන්ගේ අදහස්. (1 තෙසලෝනික 2:13 කියවන්න.) බයිබලය ලියපු මිනිස්සු ලිව්වේ එයාලාගේ අදහස් නෙමෙයි. ඒ වෙනුවට “දෙවියන්ගේ බලයේ මඟ පෙන්වීම්වලට එකඟව දෙවියන්ගෙන් ලැබුණ වචන තමයි මිනිස්සු කිව්වේ.”a (2 පේතෘස් 1:21) දෙවියන් ඔහුගේ බලය පාවිච්චි කරලා ඔහුගේ අදහස් ලියන්න මිනිස්සුන්ට මඟ පෙන්නුවා.—2 තිමෝති 3:16.

2. බයිබලයෙන් ප්‍රයෝජන ගන්න පුළුවන් කාටද?

“හැම ජාතියකම, ගෝත්‍රයකම, ජනවර්ගයකම අයටත් හැම භාෂාවක්ම කතා කරන අයටත්” බයිබලයේ තියෙන ශුභාරංචියෙන් ප්‍රයෝජන ගන්න පුළුවන්. (එළිදරව් 14:6 කියවන්න.) දෙවියන් මිනිස්සුන්ට එයාලාගෙම භාෂාවෙන් බයිබලය ලබා දෙන්න ගොඩක් දේවල් කරලා තියෙනවා. බයිබලය වෙන කිසිම පොතකට වඩා වැඩි භාෂා ගාණකට පරිවර්තනය කරලා තියෙනවා. ඒ නිසා මිනිස්සු කොහේ ජීවත් වුණත් මොන භාෂාව කතා කළත් එයාලාගේ භාෂාවෙන්ම බයිබලයක් කියවන්න හෝ ඒක අහන්න එයාලට පුළුවන්කම තියෙනවා.

3. යෙහෝවා දෙවියන් මෙච්චර කාලයක් බයිබලය ආරක්ෂා කළේ කොහොමද?

බයිබලය ලියන්න පාවිච්චි කළේ සත්තුන්ගේ හම්, පැපිරස් වගේ වැඩි කල් පවතින්නේ නැති දේවල්. ඒත් බයිබලයට ගොඩක් ගරු කරපු අය ඒවාවල පිටපත් ආයේ ආයේ හැදුවා. සමහර බලපුළුවන්කාර අය බයිබලය විනාශ කරන්න හැදුවත් තවත් අය එයාලාගේ ජීවිතේ ගැනවත් හිතන්නේ නැතුව ඒක ආරක්ෂා කළා. බයිබලය අපිට ලබා දෙන එක වළක්වන්න කිසිම කෙනෙක්ටවත් කිසිම දේකටවත් යෙහෝවා දෙවියන් ඉඩ දුන්නේ නැහැ. බයිබලයේ මෙහෙම කියනවා. “අපේ දෙවියන්ගේ වචනය සදහටම පවතියි.”—යෙසායා 40:8.

තවත් හොයමු

4. බයිබලයේ තියෙන්නේ කාගේ අදහස්ද කියලා බයිබලයේම තියෙනවා

වීඩියෝ එක බලන්න. ඊටපස්සේ 2 තිමෝති 3:16 කියවලා මේ ප්‍රශ්න ගැන කතා කරන්න.

වීඩියෝ: ‘බයිබලය කාගෙන් ලැබුණු පොතක්ද? - කෙටි වීඩියෝව’ (2:48)

• බයිබලය ලිව්වේ මිනිස්සු නම් ඒකේ තියෙන්නේ දෙවියන්ගේ අදහස් කියලා කියන්නේ ඇයි?

• දෙවියන්ට ඔහුගේ අදහස් මිනිස්සුන්ට දැනුම් දෙන්න පුළුවන් කියලා ඔයා හිතනවාද?

5. බයිබලය විනාශ කරන්න බැරි වුණා

වීඩියෝ: ‘ඔවුන් බයිබලය අගය කළා - කෙටි වීඩියෝව (විලියම් ටින්ඩේල්)’ (6:17)

• බයිබලය ආරක්ෂා කරන්න මිනිස්සු මේ තරම් දේවල් කළා කියලා ඔයා දැනගත්තාම ඒක කියවන්න ඔයාට ආස හිතුණාද? එහෙම කියන්නේ ඇයි?

ගීතාවලිය 119:97 කියවලා මේ ප්‍රශ්නය ගැන කතා කරන්න.

• ජීවිතේ ගැනවත් හිතන්නේ නැතුව බයිබලය පරිවර්තනය කරන්න, ඒක බෙදාහරින්න ගොඩක් මිනිස්සු පෙලඹුණේ ඇයි?

6. හැමෝම වෙනුවෙන් ලියපු පොතක්

මේ වෙන කල් වැඩියෙන්ම පරිවර්තනය කරලා බෙදාහැරපු පොත බයිබලය. ක්‍රියා 10:34, 35 කියවලා මේ ප්‍රශ්න ගැන කතා කරන්න.

• බයිබලය ගොඩක් භාෂාවලට පරිවර්තනය කරලා බෙදාහරින්න දෙවියන්ට ඕනෙ වුණේ ඇයි?

• ඔයා බයිබලයට ආස ඇයි?

ඉගෙනගත්ත දේ

බයිබලය දෙවියන්ගේ වචනය. දෙවියන් ඒක හැම කෙනෙක්ටම ලබා දෙන්න පියවර ගත්තා.

ඔයා හිතන්නේ මොකක්ද?

• බයිබලය ලියන්න දෙවියන් මිනිස්සුන්ට මඟ පෙන්නුවේ කොහොමද?

• බයිබලය ආරක්ෂා කරපු විදිහ, ඒක පරිවර්තනය කරපු විදිහ සහ බෙදාහැරපු විදිහ ගැන ඔයාට දැනෙන්නේ කොහොමද?

• ඔයාට තොරතුරු දැනුම් දෙන්න දෙවියන් මෙච්චර දේවල් කරලා තියෙනවා කියලා දැනගත්තාම ඔයාට කොහොමද දැනෙන්නේ?

තව දැනගන්න

බයිබලය මේ වෙන කල් ආරක්ෂා වුණ විදිහ ගැන දැනගන්න.

“අද කාලය දක්වා ආරක්ෂා වූ බයිබලය” (2007 නොවැම්බර් ‘පිබිදෙව්!’)

බයිබලය තර්ජන තුනකින් ආරක්ෂා වුණේ කොහොමද කියලා දැනගන්න.

“සුරැකුණු ඉපැරණි පොතක්” (2016 අංක 4 ‘මුරටැඹ’)

ජීවිතේ අවදානමේ වැටුණත් බයිබලය පරිවර්තනය කරන්න මිනිස්සු කළේ මොනවාද කියලා දැනගන්න.

‘ඔවුන් බයිබලය අගය කළා’ (14:26)

බයිබලය ගොඩක් සැරයක් පරිවර්තනය කරලත් පිටපත් කරලත් තියෙනවා. එහෙම කරද්දී ඒකේ තියෙන තොරතුරු වෙනස් වුණේ නැහැ කියලා විශ්වාස කරන්න පුළුවන් ඇයි?

“බයිබලයේ තොරතුරු වෙනස් කරලාද?” (වෙබ් ලිපිය)