Mitiimmaame Heeshsho Hanaffu

ADDAAMINNA Heewani Edenete kaashshi base giddonni fushshinihu gedensaanni lowo qarri iillinsa. Sagale afiꞌrate lowo geeshsha daafura hasiissannonsa. Qooxeessinsara dancha guma uyitanno haqqe gatteenna utunna kokkoꞌlu calla woꞌmino. Addaaminna Heewani Maganoho hajajamanna Isi jaalla ikka gibbuta iillinonsari konneeti.

Ikkollana konninni roore bushinori no; Addaaminna Heewani hegerera heeꞌra didandiitino. Hoolloonni haqqichcho guma itturo reyitannota Maganu balaxe kulinonsata qaagi. Hakkonne guma ittu barrinni hanaffe sunu sununni geedhitu; gedensaannino reyitu. Maganu yiinota macciishsha hoogansanni hiitto gowwitino!

Addaaminna Heewani ooso iltinohu Maganu insa Edenete kaashshu basenni fushshinsa gedensaanniiti. Konni daafira oosonsano geedhitanno; hattono reyitanno yaate.

Addaaminna Heewani Yihowara hajajantoommero, insano oosonsano dancha heeshsho heedhannonka. Baalunku uullate aana hagiidhitanni hegerera heedhannonka. Mittuno geedhikki, xiwamikki, hattono reyikki hegerera heeꞌrannonka.

Maganu mannu hagiirrunni hegerera heeꞌrara hasiꞌranno; qoleno barrunni mitto barra konne wonshate qaale eino. Woꞌmanti uulla biifado ikkitanno; konne calla ikkikkinni baalunku manni fayyimma afiꞌranno. Mittu mittunku manchi baalunku manni ledonna Maganu ledo jaala ikkanno.

Ikkollana Heewani Maganu jaala ikka didandiitino. Konni daafira ooso iltu wote game lowo geeshsha qarrissinose. Heewani Yihowara hajajama hoogase lowo shetto abbitinose; ati tenne diammanatto?

Addaaminna Heewani haammata labballonna seenne ooso iltino. Bayiru beettinsa ilamita suꞌmasi Qayeeli yitu. Layinkiha kayinni Aabeeli yitu. Insara mayi iillinonsaro afootto?