Maganu Jaali Abirahaami

BAOTE wayi gedensaanni gamu manni Uuri yinanni base haꞌri. Tini baseno dureette katama ikkitu; biifado minnano minantu. Ikkollana hakko heeꞌranno manni kaphphu maganna magaꞌnannoha ikki. Baabeeli katamira noo yannarano hattonni kaphphu maganna magaꞌnannoho. Uurinna Baabeeli katamira heeꞌranno manni, Yihowara soqqantinore Nohinna beettisi Seemi gedeere diꞌꞌikkino.

Baote wayi saihunni 350 diri gedensaanni, ammanamino manchi Nohi reyi. Tenne misile aana laꞌꞌatto manchi ilaminohu Nohi reyihunni lamu diri gedensaanniiti. Kuni manchi Maganu ledo addi fiixooma afiꞌrinoho. Suꞌmisi Abirahaamiiti. Isino maatesi ledo Uuri katamira heeꞌrino.

Mitto barra Yihowa Abirahaami togo yiisi: ‘Uurinni fulte, fiixakkino agurte, ani leellisheemmohe gobba haꞌri.’ Abirahaami Maganoho hajajame, Uuri noo qawaaxxo duuchcha agure fuliyya? Ee fulino. Abirahaami Maganu jaala yaamaminohu, ayeewoteno Maganoho hajajaminohuraati.

Gamu Abirahaami fiixi isi Uurinni fule haꞌri wote ledosi haꞌrino. Abirahaami anni Taaranna Abirahaami wosiila ikkannohu Looxino ledosi hadhino. Qolteno Abirahaami galte Saara ledosi hadhino. Kuni duuchchunku manni haꞌranni mare Kaaraani iilli; hakkiichcho Taara reyi. Abirahaaminna fiixisi Uurinni lowo geeshsha faffe hadhino.

Shiima yanna gedensaanni, Abirahaaminna fiixisi Kaaraaninni fule Kanaꞌꞌaani yinanni gobba haꞌri. Hakka martuta Yihowa Abirahaami togo yiisi: ‘Tini gobba oosokkira eemmote.’ Abirahaamino Kanaꞌꞌaani gobbara dunkaanaho heeꞌri.

Maganu Abirahaami maassirinosi daafira, gereewisinna wole saadasi lowo hoshsha ikkitu; hattono batinynye soqqamaano noosi. Ikkollana isiranna galtesi Saarara uminsa ooso dinonsa.

Abirahaamira 99 diro ikkisita Yihowa, ‘Batinynye dagara anna ikkatto’ yee qaale eisi. Abirahaaminna Saara geedhite ooso iltannowiinni saꞌuna, kuni hiitto ikke ikkanno?