Maganu Abirahaami Ammana Fonqoli

TENNE misile lai. Kuri lamunku ayeeootiro afootto? Anga billawa amadinohu Abirahaamiiti; haqqete aana noohu kayinni umisi beettooti. Abirahaami ma assanni no? Beettosi gorrara kainoha lawanno. Mayiraati togo assanni noohu? Mayira assanni nooro ronsammora albaanni, Abirahaaminna Saara ila afidhinohu hiittoonniitiro hanni laꞌno.

Maganu ila aansara qaale einonsata qaagi. Ikkollana Abirahaaminna Saara geedhitino daafira, iltannoha dilawanno. Abirahaami kayinni, Maganu dandaamannokkire lawannore assa dandaannota ammanino. Hanni mayi ikkinoro laꞌno.

Maganu ila aansara qaale einkunni woꞌmu diri sai. Abirahaamira 100 diro, Saarara kayinni 90 diro ikkita Yisaaqi yinanni qaaqqo ili. Maganu eino qaale wonshino!

Yisaaqi lophphihu gedensaanni, Yihowa Abirahaami ammana fonqoli. ‘Abirahaami!’ yee woshshisi. Hakkiinnino Abirahaami, ‘Kuneeti noommo!’ yee qoli. Maganu togo yiisi: ‘Hakkonne mittichcho beettokki haadhe, ani leellisheemmohe ilaala haꞌri. Hakkiichchono beettokki gorrite kakkalo assite shiqishi.’

Yihowa togo yaasi kawoote Abirahaami lowo geeshsha dadillissinosi; korkaatuno Abirahaami beettosi lowo geeshsha baxanno. Qoleno Maganu, Abirahaami ooso Kanaꞌꞌaani gobbara heedhanno yee qaale einota qaagi. Kayinni Yisaaqi reyiro kuni hiitto ikke ikkanno? Abirahaamira kuni coyi hiitto ikke ikkannoro dileellinosi; ikkeennano Maganoho hajajamino.

Abirahaami ilaalu noowa iilliti, Yisaaqi usure kakkalote qixxeessino bayichcho goxisi. Hakkiinnino beettosi gorrara billawa kayisi. Billawa kayise heeꞌreenna Maganu sokkaanchi, ‘Abirahaami, Abirahaami!’ yee woshshisi. Abirahaamino, ‘Kuneeti noommo!’ yii.

Maganuno, ‘Beetto gorritooti; mittoreno assitooti; ane ammanattota xa afoommo; korkaatuno beettokki, nooheha mittichcho beettokki anera aa dimararoottona’ yiisi.

Abirahaami Magano seekke ammanino! Abirahaami, Yihowa dandaannokkiri nookkitanna, Yisaaqino reyotenni nafa kayisa dandaannota ammanino. Ikkollana Yihowa, Abirahaami Yisaaqi addinta gorrara dihasiꞌrino. Konni daafira Maganu, mule noo citi giddo gerechchu goci noota kule, Abirahaami beettosi agure goco kakkalanno gede kulisi.