Maganu Abirihaami Ammana Fonqoli

Abirihaami beettosi Yisihaaqi, Yihowa baxanno gedenna Maganu coyiꞌrinore wonshannota ammananno gede rosiisinosi. Yisihaaqira mito 25 diro ikkisita, Yihowa Abirihaami mitto waajjishanno coye assi yiisi. Yihowa iso ma assi yiinoro afootto?

Maganu Abirihaami togo yiinosi: ‘Baxattoha mitto beettokki Yisihaaqi haadhe Mooriyu Gobba haꞌri; hakkiicho iso ilaalu aana gorrite kakkalo assite shiqishie.’ Abirihaami Yihowa togo assi yiinosihu mayiraatiro diafino. Ikkirono isi Yihowara hajajamino.

Abirihaami layinki barra gute kae, beettisi Yisihaaqinna lame soqqamaasinesi ledo Mooriyu gobba haꞌri. Sase barra hadhu gedensaanni xeertote heedheenna Mooriyu gobbara noo ilaali leellinsa. Abirihaami soqqamaasinesi, ‘Aninna Yisihaaqi kakkalo shiqinshe dangammo geeshsha kowiicho agarre’ yiinsa. Yisihaaqi kakkalo giirranni haqqe duheenna, Abirihaami kayinni billawa haaꞌre haꞌri. Yisihaaqi annasi, ‘Kakkalleemmo saada mama nooyya?’ yee xaꞌmi. Hakkiinni Abirihaami iso, ‘Beettoꞌya, Yihowa qixxeessanno’ yiisi.

Insa ilaalunniwa iillituti kakkallanni darga qixxeessitu. Hakkiinni Abirihaami Yisihaaqi anganna lekka usure kakkallanni bayicho wori.

Abirihaami beettosi gorrara billawa kayisi. Hatte yannara Yihowa sokkaasinchi iima heeꞌre togo yiisi: ‘Abirihaami! Beettokki kissooti! Xa mitticho beettokki kakkala mararoottokki daafira Magano ammanattota afoommo.’ Hakkiinni Abirihaami dubbu giddo, buuddasi citu ledo sarraaqante nooha geꞌrechu goco lai. Abirihaami hakkawontenni Yisihaaqi tire hakkonne goco kakkalino.

Hakko barrinni kayise, Yihowa Abirihaami jaalaꞌya yiinosi. Maganu iso togo yiinosihu mayiraatiro afootto? Abirihaami Maganu assi yiinosire baalankare assino; isi Maganu assi yiinosiri leellinosikki woyite nafa Isira hajajamino.

Yihowa Abirihaami xaano togo yiisi: ‘Maassiꞌreemmohe, oosokki woy sirchokki batiseemmo.’ Konni daafira Yihowa Abirihaami maate widoonni dancha manna baala maassiꞌranno.