Maaja

“Wosina adha” yaannohu Qullaawu Maxaafi qaali “wosinaho shaqqado ikka” yitanno tiro afiꞌrino. Kuni qaali Abirahaaminna Looxi lawishsha qaangeemmo gede assankera dandaanno. Lamunku egentinokki mannira shaqqille leellishshino. Gedensaanni insa hakku wosini sokkaano ikkinota huwattino. (Kal. 18:2-5; 19:1-3) Ninkeno woloota mininkera sagalete woy mitteenni gamba yine mimmito jawaachishate koyinse wosinimma adhineemmo? Wosina adhate lowore qixxeessa hasiissannonke yaa diꞌꞌikkino; qoleno mitore assite anga qola dandiitannore calla koyisa dihasiissannonke. (Luq. 10:42; 14:12-14) Wosina adhineemmohu manna jawaachishateeti ikkinnina leellamate yine diꞌꞌikkino. Woradu aliidi laꞌꞌaanchonna minaamasi gari geeshsha egenninoommokkiha ikkiro nafa, insa hisante wosinsineemmo? (3 Yoh. 5-8) Dilgo batidhinonkeha woy heeshshonke giddo yaachishannori nooha ikkirono, ‘wosina adha hamboonke’! w16.01 1:11, 12

Qullaawu ayyaani togo baxxino garinni loose, buurantinori albillitte afidhanno raggera taje (woy qawude) ikkanno yaate. Mittu buuramino Kiristaanchi tenne taje adhannohura albillitte afiꞌranno ragge daafira huluullo diheedhannosi. (2 Qor. 1:21, 22; 5:5) Kuni Kiristaanchi iimira haꞌrara koyisaminota dihuluullamanno. Ikkollana, iimira haꞌre baraarsha adhannohu jeefote geeshsha ammanaminoha ikkirooti. Pheexiroosi tenne togo yee xawisino: “Konni daafira, roduuwa, woshshamaꞌnenna dooramaꞌne huluullissannokkita assiꞌrate albinni roore jawaatte; tenne coyibba assa agura hoogginiro, horonta diubbinannina. Isinni roore maassantinanni; Mootichinkenna Gatisaanchinke Yesuusi Kiristoosita hegere Mangisteno eꞌinanni.” (2 Phe. 1:10, 11) Konni daafira, mittu mittunku buuramino Kiristaanchi ammanaminoha ikke heeꞌrate sharrama hasiissannosi. Hatto ikka hoogiro, iimira woshshamasi woy koyisamasi calla assitannosiri dino.—Ibi. 3:1; Aju. 2:10. w16.01 3:6, 7

Mittu manchi buuraminoha Kiristoosi rodoo ikkiro nafa, gotti gotti assa gara diꞌꞌikkitino. Qullaawu Maxaafi songote cimeeyye daafira kulanni, ammanatenni insa lambeemmo gede jawaachishannonke; ikkirono, aye manchono massagaanchinke gede assine quwa saꞌne ayirrinseemmo gede diamaalannonke. (Ibi. 13:7) Hige mitootaho “erote ayirrinye aa hasiissannota” Qullaawa Borro kultannonke. Ikkollana, insara ayirrinyu hasiisinonsahu buurantino daafira ikkikkinni “danchu garinni gashshitanno” daafiranna “coyiꞌratenna rosiisate diinaggaabbe loossanno” daafiraati. (1 Xim. 5:17) Konnira, iimi heeshshora woshshantinore hasiisannokki garinni guwinsiro woy insa aana illacha tungiro insa saalfattanno. Roore busha kayinni, buuramino Kiristaani baxxino ayirrinye uyinanninsaha ikkiro, shooshaqoota ikka qarrissansara dandiitanno. (Rom. 12:3) Kiristoosi roduuwi giddo mittohono guficho ikka hasiꞌneemmokkiti egennantinote!—Luq. 17:2. w16.01 4:9

Jaaloomu muxxe jirooti yaa dandiinanni. Ikkollana, jaaloomu hidhine kaꞌne mitto bayicho worre agurranni uduunnichi gede diꞌꞌikkino. Jaaloomu seye heeꞌranno gede towaanyonna agarooshshu hasiisannosi; hakko daafira heeshsho afiꞌrinori gedeeti yaate. Abirahaamira Yihowa ledo noosi jaaloomi loworeeti; qoleno konne jaaloomasi baꞌannokki gede agadhe heeꞌrino. Isi konne assinohu hiittoonniiti? Abirahaami, alba Magano waajjenna hajajame heeꞌroommo heeshsho ikkitino yee dihedino. Isi halaꞌlado maatesi ledo Kanaani gobba haꞌri yannara, shiimaaddano jajjabba coyeno assanno wote Yihowa biddishsha harunsa diagurino. Yisaaqi ilamara mittu diri albaanni, Abirahaami 99 dirihu noo waro, Yihowa Abirahaami mine noo labballi woꞌmunku barcimanno gede hajajino. Hakkawote Abirahaami hattee hajajo huluullaminoni? Woy Hajajamikki saꞌꞌanno faro hasiꞌrinoni? Deeꞌni; isi Magano addaxxe hattee hajajo “hakko barranni” wonshino.—Kal. 17:10-14, 23. w16.02 1:9, 10

Qaaqqoho yine hendannihu nafa gara ikkinore assanna Kalaqaanchisira isonooto sayise aate yaa mayyaatero huwatara dandaanno. Konnira mittu wedellichi mito geeshsha gikki yiironna isonooto Yihowara sayise uyiro cuuamasi hasiissannotenna garaho. (Law. 20:7) Ikkina gikki yaate yaa mayyaate? Gikki yaate yaa aana lopha calla diꞌꞌikkitino. Qullaawu Maxaafi, gikki yiino manni “garanna gara ikkinokkire bada dandaanno gede wodanchate dandoonsa horoonsiꞌranni [qajeelsiꞌrinota]” kulannonke. (Ibi. 5:14) Hakko daafira gikki yiino manni Yihowa albaanni gara ikkino coye bade afinohonna konne coye assate murciꞌre kainoho. Konnira togoo manni gara ikkinokki coye assate shotunni didoogamanno; hattono gara ikkinore assate wolu manni xixxiiwansara diagadhanno. Ee, cuuamino wedelli annuwinsanna amuuwinsa woy wolu jajjabbu manni nookki yannarano Maganu seerubba harunsanno yine heda garaho.—Fil. 2:12. w16.03 1:4, 5

Wedellichu Daawiti jigeessa mancho Goliyaadi shiino gari Yoonaataanira dhagge ikkisikki digatino. Daawiti konni “Filisxeemete manchi umo anga haare” Yoonaataani annira Nugusu Saaoolira albaanni uurre no. (1 Sam. 17:57) Yoonaataani Daawiti waajja hooginohura naadinosiha ikkara dandaanno. Maganu Daawiti ledo ikkinoti egennantinote; hakko daafira “Yoonaataaninna Daawiti lubbora jaaloontu.” Isinni Yoonaataani Daawiti “umisi gede asse baxinohura lamunku gondooro eꞌino.” (1 Sam. 18:1-3) Yoonaataani hatte yannanni kayise Daawitira ammaname heeꞌrino. Daawiti aantete Isiraeelete nugusa ikkanno gede Maganu shoominosiha ikkirono, Yoonaataani Daawiti ledo quraanyame heeꞌrino. Saaooli Daawiti shaara hasanni noo yannara Yoonaataani Daawiti daafira yaadino. Isi jaalasi jawaachishate Horeshi yinanniwa Yihudu halalla haꞌrino. Hakkiicho Yoonaataani techohu barru qummeeshshira noo hedo coyiꞌre, Daawiti “albinni roore Yihowa addaxxanno gede” jawaachishinosi.—1 Sam. 23:16. w16.02 3:1, 2

Mittimma hanaffinohu kalaqate loosi hanafi yannaraati. Annunna Beettu buusante loosse yannankera laꞌneemmoha babbaxxinoha heeshsho afiꞌrino kalaqama kalaqqino. Yannate gedensaannino Maganu soqqamaano isi looso buusante loossino. Nohi diro isinna minisi manni mitteenni markaawe loosino; Maganu manni halalla haꞌri wote xaadooshshu dunkaana qasanno, kayise hoolannonna mittu bayichinni wole bayicho haaꞌre haꞌranno yannara sumuu yee loosanno; hattono Yihowa beetemeqidese giddo iso muuziiqunni mitteenni guwisanno. Konne baala assate kaaꞌlama lowo geeshsha hasiissino. (Kal. 6:14-16, 22; Kir. 4:4-32; 1 Dud. 25:1-8) Umi xibbi diro heeꞌrino Kiristaanino mitteenni buusame loosino. Hawaariya Phaawuloosi mittu mittunku buuramino Kiristaanira “babbaxxino aamamooshshi” noosiha, “babbaxxitino soqqansho” soqqamannohanna “babbaxxino looso” loosannoha ikkirono baalunku “mitto biso” ikkinota xawisino.—1 Qor. 12:4-6, 12. w16.03 3:1, 2

Hanni Yesuusi harunsaanosira uyinoha dancha duduwo duduwate looso hedi. Konne sabbakate looso loossanno garinna deerri baxxinoho. Alba mannu Yihowara soqqamate Isiraeele maranno yannara Isiraeelete manni anga fane haaranno. (1 Mot. 8:41-43) Konne assinannihu Yesuusi techohu barru qummeeshshira noo hajajo aara albaanniiti. Yesuusi rosaano duuchante dagawa ‘hadhanno’ gede kulloonninsa. Yihowa 33 M.D., danchu duduwi alame woꞌmate iillara hasiꞌrannota leellishannore assino. Qullaawu ayyaanisi haarote xintantino songo wido ikkinohu 120 mannira maalaletenni addi addi afoo coyiꞌrate dandoo eennansa Yihudunna Yihudimmate soorrantinorira uminsa afiinni sabbakino. (Soq. 2:4-11) Hakkiinni sabbakate loosi Samaariyu geeshsha halaꞌlino. Yannate gedensaanni 36 M.D., sabbakate loosi Isiraeelete gaꞌre ikkinokkihu barciminokki mannira nafa iillino. Konnira sabbakate loosi “buete” geeshsha ikkannohu Yihudu manniwiinni “wuqiyanoosete” geeshshite mannu ooso baalantera iillino yaa dandiinanni. w16.03 4:12

Maganu soqqamaano hundinni jammarte, qajeelshu hendoonnire qineessate kaaꞌlannota huwattino. Lawishshaho, Abirahaami Looxi gatisate “qajeeltino mannootasi haare haꞌrino”; kuri mannooti uyinoonninsa looso qineessitino. (Kal. 14:14-16) Nugusu Daawiti waro, Maganu mine faarsitanno faarsaano “Yihowara faarsate qajeeltinoreeti”; konnira insa Magano guwisa dandiitino. (1 Dud. 25:7) Ninkeno yannankera Sheexaanunna harunsaanosi ledo ayyaanaamittete ola olammanni heeꞌnoommo. (Efe. 6:11-13) Qoleno, Yihowara guweenya aate sharrammanni heeꞌnoommo. (Ibi. 13:15, 16) Konni daafira, hundiri Maganu soqqamaanonte gede ninkerano hedonke qinaabbanno gede qajeelshu hasiisannonke. Yihowa songote giddo, cimeeyyete roduuwa qajeelsitanno gede halaafinate uyinonsa. Cimeeyye gari temokkiro nookkihura mittu rodiira qajeelsha aate kaꞌꞌansara albaanni, roduu wodani qajeelsha adhate roore qixxaawanno gede mite Qullaawu Maxaafi assaawe kula hasiissansara dandiitanno.—1 Xim. 4:6. w15 4/1 2:1, 2

Hatto yaa kayinni manna baalanka isi umisi shaanno yaa diꞌꞌikkitino. Ikkollana, alamete aana kuꞌu koꞌoye giwanna finqille batidhino; tini Sheexaanu akattaati. Hakkiinni saeno, Sheexaanu Heewani doge Addaami Maganoho finqilanno gede assino daafira, cubbunna reyo manna baalaho iillitino. (Rom. 5:12) Konni garinni, Daawuloosira “reyo abbate wolqa noosi” yaate. Yesuusi iso “lubbo shaannoho” yiino. (Yoh. 8:44) Ee, Sheexaanu wolqaataamo diinaati! Sheexaane giwanke, isira calla ikkikkinni isira haꞌlite Maganoho finqiltannorira baalaho diinna ikkineemmo gede assitannonke. Hatte finqilaasine giddo, agaanintete yinanniri batinye ayyaanu kalaqo no. (Aju. 12:3, 4) Agaaninte amaddino manna shetissenna rakkeessite mannunnita roortino wolqa noonsata duucha higge leellishshino. (Mat. 8:28-32; Maq. 5:1-5) Tini busha sokkaanonna “agaanintete roorrichi” afiꞌrino wolqa mulluri gede assine laꞌꞌa dihasiissannonke. (Mat. 9:34) Yihowa kaaꞌlo nookkiha Sheexaanu ledo gaaramme qeela didandiineemmo. w15 5/1 1:6, 7

Amanyoote bainore assatto gede xixxiibbanno hedo heedhuhero, maa assa dandaatto? Laanfe nooheta ammani. (Rom. 7:22, 23) Jawaante afiꞌrate Magano huucciꞌri. (Fil. 4:6, 7, 13) Foorrete widira qole massanno coyiwiinni xeertiꞌri. (Law. 22:3) Fatana ikkannori daanno wote, bayichonko gimbi yii. (Kal. 39:12) Fatana ikkannore gargadhate Yesuusi kaajja lawishsha ikkinonke. Isi Sheexaanu oyeemmohe yiinosirinni didogamino; qoleno shiima geeshsha assaawe kae qolate dihedino. Hatteentenni isi bayichonko, “Yine borreessinoonni” yee qolino. (Mat. 4:4-10) Yesuusi Maganu Qaali yaannore seekke afino; hatti egennosi fatanu tuncu yiisi yannara bayichonko Qullaawa Borro horoonsiꞌre dawaro qolanno gede kaaꞌlitinosi. Addaho, Sheexaanu ledo olamme qeelate, fooratewiinni xeertiꞌra hasiissannonke. w15 5/1 2:15, 16

Iillinonkekki coye huwatate dandoonke, Yihowa hayyo harunsine assootinke abbanno guma balanxe hendeemmo gede kaaꞌlitannonke. Yihowa hasiꞌriro, mittu coyi albillitte hiittoo guma laalannoro balaxe afa dandaanno. Ninkera hattoo dandoo noonkekkiha ikkirono, assinammora kaꞌnoommo coyi abbara dandaanno guma heda hasiissannonke. Maganu hayyo harunsate, assootinke abbara dandaanno guma heda woy ikkanni noori gede assine heda hasiissannonke. Adhamate hasidhe mimmitu ledo yanna sayissanni noori, siimu xaadi hasatto lowo wolqa afidhinota heda hasiissannonsa. Yihowa ledo noonkeha muxxe jaalooma hunara dandaannoha mitto coyeno assa dihasiissannonke! Hatteentenni, Yihowata tenne dancha amaale harunsino: “Xiinxallu manchi adaga laꞌꞌanno wote gaaꞌlannowa hasiꞌranno; egenno noosikkihu kayinni aanaho haꞌranno, qarruno iillannosi.”—Law. 22:3. w15 5/1 4:10, 11

Hanni Nugusu Daawitira iillinore laꞌno. “[Daawiti] sagannatete heeꞌre mitte mancho biso hayishshidhanna laino.” (2 Sam. 11:2) Isi hakkawote illesi ise aaninni dihoolino woy agure wolere dihedino. Tini qolte wolu manchi galte yoranno gedenna ise ledo fooranno gede assitinosi. Ammanamino manchi Iyyoobinte gede ninkeno busha yorto gargadhate ‘illenke ledo gondooro ea’ hasiissannonke. (Iyo. 31:1, 7, 9) Illenke eemadhatenna wole mancho yortote illenni laꞌneemmokki gede murciꞌra hasiissannonke. Qoleno, kompiyuterete aana, egensiishshu taappeellira, metseettatenna woleno konne lawannori aana noota amanyoote bainore leellishshanno misilla laꞌꞌa qoropha hasiissannonke. Busha yorto gargadhate, biddi assiꞌra hasiissannohere rakke biddi assiꞌri. Maganu Qaali aannohe amaalera hajajamakki, cubbuwiinni xeertiꞌratto gede kaaꞌlitannohe daafira amanyootunni xuru nookki heeshsho heeꞌratto gede assitannohe.—Yai. 1:21-25. w15 6/1 3:12-14

“Fonqolu giddora eessitootinke” yitanno huuccatto, Yesuusi cuuamihu gedensaanni tuncu yiinosire qaagiissitannonke. Hatte yannara Maganu ayyaani Yesuusa halallira haꞌranno gede assino. Mayira? “Daawuloosi fonqolannosi gede.” (Mat. 4:1) Tenne dhagge assiꞌra hasiissannonkeni? Maganu Beettosi uullara soyinohu qaru korkaati maatiro huwanteemmoha ikkiro, tini dhagge diꞌꞌikkitannonke. Iso uullara sonkoonnihu qaru korkaati, Addaaminna Heewani finqilte Maganu aliidimma adha gibbu yannara kaꞌino xaꞌmora dawaro qolaraati. Hakkawote dawaro qolate yanna hasiissanno xaꞌmuwa kaꞌino. Lawishshaho, Maganu mancho kalaqino gari xeꞌne afiꞌrinokka? Guutu manchi “bushu” Daawuloosi addi addi fonqolo abbisirono, Maganu aliidimma irkisa dandaanno? Sheexaanu yii gede manchu beetti Maganu gashshootiwiinni baxxe fuliro woyyitino heeshsho heeꞌranno? (Kal. 3:4, 5) Tenne xaꞌmuwara dawaro afiꞌrate yanna hasiissanno; ikkirono, tini xaꞌmuwa duushshitanno dawaro afidhanno wote Yihowa silxaanesi horoonsiꞌrannohu horoomanno garinni ikkinota hedate dandoo noonsa kalaqami baalunku huwatanno. w15 6/1 5:12

Bayiru qarri hanafannohu hiittoonniiti? Ajuujate maxaafi kuni ikkannohu “Bayira Baabiloone” baꞌanno wote ikkinota kulanno. (Aju. 17:5-7) Kaphu ammaꞌno fotaancho woy soorraasincho ikkitinohu gede asse kula garankolla! Ammaꞌnote marooti tenne busha alame gashshaano ledo foortino. Insa Yesuusinna Mangistesira ammanantinore ikka agurte, mannu gashshoote irkissino; qoleno poletiku kaaꞌlo afiꞌrate yite Maganu seera lashshi assite agurtino. Collooꞌminohunna seeminaatensa agadhinohu buuramino Kiristaaninna insa mereero lowo badooshshi no. (2 Qor. 11:2; Yai. 1:27; Aju. 14:4) Ikkina tenne fotaancho dirijjite hunannohu ayeti? Maganu Yihowa “hedosi” “xiille duumu moyichite” “tonne buudda” wodanira woranno. Tini buudda xaa yannara Buusantino Mangistubba Dirijjite irkisannoha poletiku gashshoote baalanka riqibbanno; “duumu xiille moyichi” qole tenne Dirijjite riqiwanno.—Aju. 17:3, 16-18. w15 7/1 2:3, 4

Tenne roduuwu mereero babbadooshshe kalaqqanno hajora malu maati? Phaawuloosi togo yee kaajjishe amaalinonsa: “Konnira roduuwa, coyidhinanni gari mitto ikkanno gedenna, mereeroꞌne babbadooshshu heeꞌrannokki gede, hatteentenni hedotenninna alaamunni woꞌmunni woꞌma mitto ikkitinanni gede eeggo yeemmoꞌne.” (1 Qor. 1:10, 11, 13) Yannankerano Kiristaanu songo mereero babbadooshshe kalaqannohu mittu coyino heeꞌra dihasiissannosi. (Rom. 16:17, 18) Phaawuloosi buuramino Kiristaani uullate coye agure iimi qansichimmansa aana illachishanno gede amaalino. (Fil. 3:17-20) Insa Kiristoosi riqibbe loossanno ambaasadderootaati. Ambaasaadderootu noo gobba hajora anga diwodhitanno. Insa ammanantannohu gobbansaraati. (2 Qor. 5:20) Uullate aana heeꞌrate hexxo noonsa Kiristaanino Maganu Mangiste qansootaati; hakko daafira, alamete gaance yannara mitto wido higge tuqqa dihasiissannonsa. w15 7/1 3:9, 10

Konne qummeeshsha hiincakki Yihowa baxannohetanna ate daafira hedannota huwatatto gede kaaꞌlitannohe. Yihowa ninke daafira lowo geeshsha hedannota dihuluullammeemmo. Maganu ninke hasaawisannonketi qara doogo Qullaawa Maxaafa ikkino daafira, Qaalesi kaffi assine laꞌꞌa hasiissannonke. Annunna beettu mimmitu ledo giddonsata fushshite hasaabbannoha ikkiro, mereeronsa noo baxilli lexxanno, hattono mimmito roore addaxxitanno. Yihowa baxillaancho Annankeeti. Ninke iso laꞌne woy coyiꞌranna macciishshine egenninoommokkiha ikkirono, isi ayyaanunni borreessamino Qaalisi widoonni “coyishiishannonke”; hakkawote macciishsha hasiissannonke. (Isa. 30:20, 21) Yihowa heeshshonke isira sayinse uyinoommore ninke mannasi massagankera, hattono gawajjotenni agarankera hasiꞌranno. Qoleno, seekkine anfammosiranna addaxxinammosira hasiꞌranno.—Far. 19:7-11; Law. 1:33. w15 8/1 1:6, 7

Gannatete heeꞌrate quqquxammeemmoha ikkirono, roore hagiirsiisannonkehu ayyaanaamittete atooteeti. Hakkawote Yihowa suꞌmi qullaawinotanna aliidimmasi ayirritinota afanke lowo geeshsha tashshi assitannonke! (Mat. 6:9, 10) Yihowara mannu oosoranna uullate noosihu hundi alaami woꞌmanni noota afanke baasa hagiirsiissannonke. Qoleno, galle honsanni guuta ikkineemmo wote Yihowawa shiqa mageeshshi geeshsha shota ikkitannoro heda dandaatto! (Far. 73:28) Yesuusi “Maganu duuchankare dandaanno” yiino daafira konne atoote afiꞌneemmota dihuluullameemmo. (Mat. 19:25, 26) Ikkollana, haaro alamera hegerera heeꞌra hasiꞌnummoro hegere heeshsho “seekkine cuꞌmira” hasiissannonkehu xaati. (1 Xim. 6:19) Tenne busha alame goofimarchi daanno yanna hexxotenni agadhanna haaro alamera afiꞌneemmo heeshshora qixxaawate assa hasiissannonkere xaanni assa hasiissannonke. w15 8/1 3:2, 3

Tenne alamehu batinyu xaadooshshu buusi lawishshaho televizhiinete pirogiraame, webisayitenna maxaaffa ayyaanaamittenke daaffara dandiitannoreeti. Togoo coyibba qixxaabbannohu Yihowaranna isi uyino hexxora noonke ammana kaajjishate diꞌꞌikkino. Tini coyibba Sheexaanunnita busha alame hexxinanni gede xixxiibbannote. Konni daafira, “alamete yorto” kakkayisanno boohaarsha doodhineemmokki gede lowo geeshsha qoropha hasiissannonke. (Tit. 2:12) Tenne goofimarchu barruwara Yihowa dirijjite qixxeessitanno coyibba alame qixxeessitanno coyi gede ikkikkinni, hegere heeshsho afiꞌrate kaaꞌlanno akati heeꞌrannonke gede kaaꞌlitannote. Halaalu magansiꞌrara kaaꞌlitanno metseetta, birosherubba, maxaaffa, viidiyonna Webisayite noonke daafira lowo geeshsha maassammoommoreeti! Qoleno, Maganu dirijjite alamete deerrinni 110,000 saꞌanno songuwara lamalate kiiro gambooshshu heeꞌrannonke gede assitino. Songote gambooshshiwa, hattono woradunna qoqqowu gambooshshiwa, Maganohonna isi uyinonke hexxora noonke ammana jawaata ikkitanno gede kaaꞌlannonkeha Qullaawu Maxaafi aana xintamino roso ronseemmo.—Ibi. 10:24, 25. w15 8/1 4:9,11

Yihowa soqqamaano tiiansa qajeelsiꞌra hasidhanno. Tiiansa Maganu Qaali giddo garanna gara ikkinokkiri, hattono danchu coyinna bushu coyi daafira kultanno seerubba ledo sumuu yaanno gede assidhanno. Dancha gede qajeelino tiiꞌꞌi Kiristaanu songora baasa kaaꞌlanno. Ikkollana, tiianke qajeelsiꞌratenna horoonsiꞌrate egenno calla diguddanno. Qullaawu Maxaafi danchu tiiꞌꞌi ammanatenna baxillu ledo xaado afiꞌrinota kulanno. Phaawuloosi togo yee borreessino: “Tenne hajajo hedo xalalu wodaninni, danchu tiiꞌꞌinninna doga nookki ammananni afiꞌnanni baxilli heeꞌrannonke gedeeti.” (1 Xim. 1:5) Tiianke qajeelsiꞌneemmohanna kulannonkere macciishshineemmoha ikkiro, Yihowara noonke baxillinna ammana lexxitanno. Tiianke horoonsiꞌneemmo gari ayyaanaamittetenni mageeshshi geeshsha lophinoommoro, wodaninke hiittoohoronna Yihowa hagiirsiisa hasiꞌneemmohu mageeshshi geeshshaatiro leellishanno. Ee, tiiꞌꞌinke ninke hiittoo mannaatiro leellishanno. w15 9/1 2:2, 3

Mannu ooso baalanta kalaqinohu Yihowaati. (Far. 100:3-5) Qullaawu Maxaafi Addaami “Maganu beettooti” yaannohunna Yesuusino harunsaanosi “iima heeꞌratto Annanke” yite huuccidhanno gede rosiisinonsahu iseraati. (Luq. 3:38; Mat. 6:9) Heeshsho uyinonkehu Yihowa ikkino daafira isi Annankeeti; hakko daafira isinna ninke mereero noo fiixoomi annunna beettu gedeeti. Haranchunni, Yihowa baxannonkehu mittu shaqqadu anni oososi baxanno garinniiti. Iltinonke annuwa guuntete xeꞌne noonsareeti. Insa baxillensa leellishshankera sharrantannoha ikkirono, Yihowa baxillesi leellishanno garinni woꞌmunni woꞌma baxillensa leellisha didandiitanno. Isinni mitu mannira anjensanni annuwansa gawajjitinonsa gari wodaninsa giddo busha bassa kalaqino. Kuni bassi xissannohonna dadillinanni gede assannoho. Yihowa kayinni togoo anna diꞌꞌikkino. (Far. 27:10) Yihowa mageeshshi geeshsha baxannonkeronna ninke daafira hedannoro afanke, isiwa albinni roore shinqeemmo gede assitannonke.—Yai. 4:8. w15 9/1 4:3, 4

Mitto coye Yihowa fajjo maatiro hendummokki uminkenni assineemmoha ikkiro, tini Yihowa addaxxanna baxillu xeinonketa leellishshanno. Saamueeli diro Isiraeele Filisxeemete ledo olante baasa qeelantino. Hakkawote tenne Maganu dagara kaaꞌlonna agarooshshu lowo geeshsha hasiisinonsa. Insa ma assituyya? Togo yitino: “Ninke ledo ikkanno gedenna baarigaarranke anganni gatisannonke gede, Yihowaha gondooru taawoota Seelonni haaꞌne haꞌno.” Hakkiinni mayi ikkiyya? “Lowo manni goofi; Isiraeelete widinni 30,000 lekkatenni haꞌre olamanno wottaaddari reyi. Maganu taawootino qafadami.” (1 Sam. 4:2-4, 10, 11) Isiraeele taawoota haadhe hadhino daafira Yihowa kaaꞌlo hasidhinoha lawara dandaanno. Ikkollana, insa Yihowa biddishsha afiꞌrate woꞌnaala agurte uminsa hedo harunsitino; tini baasa gawajjitinonsa.—Law. 14:12. w15 9/1 5:16, 17

Ammanakki kaajjishiꞌratenna jawaata ikkite heedhanno gede assiꞌrate wolere maa assa dandaatto? Cuuamattora albaanni rosootto coyinni calla kassi yitooti. (Ibi. 6:1, 2) Qullaawu Maxaafi giddo masaalleenna woꞌmitino masaalo huwatate woꞌnaali; korkaatuno togoo masaalo ammanakkira kaajjado xinta ikkitahera dandiitanno. Hakkiinni saeno, ammanakki jawaata ammana noonsa manni assanno yinoonnire assatto gede kakkayissannohe gedeeta ikkase buuxate Maganu Qaale horoonsiꞌra dandaatto. (Yai. 1:25; 2:24, 26) Hawaariya Phaawuloosi ammanate roduuwisira ‘kuꞌu kuꞌuyi ammananni mimmito jawaachisha’ dandiitannota kulino. (Rom. 1:12) Ammanate roduuwinkewa aanneemmoha ikkiro, hakko iso “fonqolu giddoonni saꞌino ammana” noonsari ledo honseemmo wote kuꞌu kuꞌuyi ammana jawaachinsheemmo. (Yai. 1:3) Bushu jaaloomi ammana hunanno; danchu kayinni ammana kaajjishanno. (1 Qor. 15:33) “Mitteenni gamba yaa” lashshi assa agurre, ‘mimmito jawaachinsheemmo’ gede amaalloonninkehu mittu korkaati konneeti.—Ibi. 10:24, 25. w15 10/1 2:2,8, 9

Qullaawa Maxaafa mannaho xiinxallisate qixxaambeemmo wote hiinca hasiissannonke. Xiinxallinseemmoha mitto mittonka mancho hendanni, ayyaanaamittetenni lophanno gede kaaꞌlate, wodanisi hedo fushshe coyiꞌranno gede assitanno xaꞌmo woy lawishsha heda dandiineemmo. Konni garinni hiincanke, uminke ammana jawaattanno gedenna Qullaawa Maxaafa mannaho kaajja gede assinenna albinni roore iibbado giddonni rosiinseemmo gede kaaꞌlitannonke. Qanchu soqqanshora wodananke qixxeessineemmo woteno konne assa dandiineemmo. (Izi. 7:10) Qullaawu Maxaafi giddonni Hawaariyaatete Loosi maxaafita mitte fooliishsho nabbawanke soqqanshote ‘diinaggaambeemmo’ gede assitannonke. Hakko barra soqqanshote horoonsiꞌra hasiꞌnoommoha Qullaawu Maxaafi qummeeshshanna elate hendoommo borro hiincanke soqqanshote baasa kaaꞌlitannonke. (2 Xim. 1:6) Soqqanshote qoqqowiꞌne giddo heeꞌranno manni daafiranna hasattonsa kakkayisara dandaanno coye hiinci. Konni garinni qixxaawanke, Qullaawa Maxaafa horoonsiꞌne “Maganu ayyaananna wolqa leellishanno” garinni farciꞌneemmo gede kakkayissannonke.—1 Qor. 2:4. w15 10/1 4:9

Kiꞌneneeto togo yitine xaꞌme: ‘Qaaqqiꞌya teeda baꞌino misilla laꞌꞌate hedanno gede kakkayisasira dandaannori maati? Togoo misilla baasa gawajjitannoti qaaqqiꞌyara leeltinosi? Qaaqqiꞌya miteekke hedeweelcho teeda baꞌino misilla lairo nafa daye kaaꞌlo xaꞌmiꞌrannoe gede, ani huxuxxi yiikki coyishiishannoe gedeeho?’ Qaaqquulliꞌne shiimmaadda ikkituro nafa togo yitinansara dandiitinanni: “Interneetete aana teeda bainori woy saalfachishannori tuncu yeennahe hedeweelcho hakkoye laittoro, mittoreno waajjittokki anera kulie. Anera kula saalfattooti. Ani ate kaaꞌla hasiꞌreemmo.” Wodancha kiꞌne umiꞌne boohaarsha hayyotenni doodhitinanni gede kaaꞌlitannoꞌne. Piraanasi togo yiino: “Ninke annuwanna amuuwu danchaho yineemmo muuziiqi, filme, woy maxaafi maatenke harunsitannoha ikkanno. Duuchu coyi daafira duuchare coyidhinara dandiitinanni; oosoꞌne kayinni assitinannire laꞌanno hattono hakkoye harunsitanno.” Qaaqquulliꞌne kiꞌne qorophitine dancha boohaarsha doodhitinanna laꞌannoha ikkiro, insano hattonni dancha boohaarsha doodhitara dandiitanno.—Rom. 2:21-24. w15 11/1 1:12-14

Xaa yannara gudumaaleho yaano otobise uurritannowa, baaburu xaawira, makeena uurrisiꞌnanni bayicho, hattono dikkote farciꞌrate roore illachinshanni heeꞌnoommo. Togoowa sabbaka waajjishannoheha ikkiro, lowo diro songuwa towaatanni soqqaminohu Anjeelo Maneera yinanni rodii yiinore huuccattotenni hedi; isi togo yiino: “Mitte mittenta haaro sabbakate hayyo Yihowara soqqammeemmo doogo, isira ammanammoommore ikkanke leellinsheemmo doogo, mishsho noonkekkire ikkanke buuxinseemmo doogonna isi hasiꞌranno gari baalunkunni soqqama hasiꞌneemmota leellinsheemmo doogo ikkitino gede assine laꞌneemmo.” Waajjanke qeeꞌline ikkinummota ikkine haaro sabbakate hayyo horoonsiꞌranke, Yihowa albinni roore addaxxineemmo gedenna ayyaanaamittetenni lophineemmo gede kaaꞌlitannonke. (2 Qor. 12:9, 10) Batinye halashshaano mannaho jw.org yinanni webisayitenke leellisha baxxanno. Webisayitenke fafo gobbuwara noo manni nafa gatikki halaale afanno gede kaaꞌlitanni no. w15 11/1 5:12, 13,15

Albiti Ingilizete afiiti Haaro Alame Tiro, Ingilizete afiite wole Qullaawu Maxaafi tiro gede Rosiisaancho 9:10 nna wole hattoo qummeeshshuwa aana “Shiooli” yaannoha Ibirayisxete qaale amaddino. Hakku qummeeshshi alba togo yaanno: “Haꞌrattowa Sioolete giddo loosuno, somuno, egennono ikko hayyo dino.” Hakko daafira, Haaro Alame Tiro wolu afiira tirtannote batinye gaamora aante noo coyibba qarra ikkitinonsa: Rooru manninsa “Sioole” yaanno qaale diafino, kuni qaali qaallate tiro amaddino maxaaffansa giddo dino, woy mitu mannira isinni bayichu woy gobbate suꞌma lawannonsa. Konninni kainohunni, 2013 tirora addi additi tirote gaamo “Shiooli” yaannoha Ibirayisxete qaalenna addaarro tiro afiꞌrinoha “Heedisi” yaannoha Girikete qaale “Waamma” yite tirtanno gede fajjinoonni. Qoleno, yannankera mannu horoonsiꞌra agurinota Ingilizete afii qaalla fushshine hoolle xaa yanna qaalla eessinoonni; qoleno xabbe leeltannotanna huwatate qarrissannokkita hattono gara ikkitino sokka sayissanno qaalla horoonsiꞌrate lowo geeshsha sharrammoonni. Wolu afiiti tirote gaamo assitinore harunsa Ingilizete afii tiro gamaxate woy roore seekkate kaaꞌlitino. w15 12/1 2:10,12

Hundiri Maganu soqqamaanonte gede xiwammeemmo wote shesho, hayyonna irko afiꞌrate Yihowa hexxa dandiineemmo. Ikkirono, Daawiti waro qarraminoha mararanno manchi hegerira heerꞌinokkita anfoommo. Hakko daafira Daawiti aleenni qummi assini hedo borreessi wote, togoo manchi maalaletenni heeshshote heeꞌranno, qoleno hakko garinni hegere heeshsho afiꞌranno yaasi diꞌꞌikkitino. Daawiti ayyaanunni borreessinohu kuni qaali, Maganu woloota mararannoha ammanamino mancho kaaꞌlannota leellishannoho. Hiittoonni kaaꞌlanno? Daawiti togo yee xawisino: “Xiwame goxinowa daallasaho Yihowa irkisannosi; xiwamanno yannara ati daallasasi gudisse soorratto.” (Far. 41:3) Ee, qarraminoha mararanno manchi isonna assinoha dancha coye Maganu hawannokkita addaxxa dandaanno. Qoleno Maganu, isonooto dhaawate wolqa afiꞌrino biso uyinosi daafira dhibbisinni beya afiꞌrara dandaanno. w15 12/1 4:7

Phaawuloosi kowiicho kulanni noohu usuru mine noo manna baalanka ikkikkinni ammanansara yee usuramino roduuwi daafiraati. Isi umisi tenne sokka Ibiraawete Kiristaanira borreessi yannara usuru minira einku mito shoole diro ikke noosi. (Fil. 1:12-14) Phaawuloosi ‘usuru mine noore marartinohura’ roduuwa galatinonsa. (Ibi. 10:34) Ibiraawete Kiristaani Phaawuloosi noowiinni xeertiꞌre no. Ikkina insa iso kaaꞌla dandaannohu hiittoonniiti? Isi daafira ganye giddonsanni huuccatto asseeti. (Ibi. 13:18, 19) Yannankera ninkeno usuru mine noo roduuwinkewiinni xeertiꞌne heeꞌnoommoha ikkara dandaanno. Usuru minira mulannowa heedhanno roduuwinke kaaꞌlitannonsa geeshsha kaaꞌla hoongammora dandiineemmo. Ikkollana, ganyine insa daafira Yihowa huuccine kuri ammanantino roduuwa mararreemmotanna roduuwinke gede assine banxeemmonsata leellisha dandiineemmo. w16.01 1:13, 14

Maganu umo hedinohu mannu ooso hegerera uullate aana heedharaati. (Kal. 1:28; Far. 37:29) Mannu mereerinni mitootu iimira hadhe nugussanna kakkalaano ikkitanno gede doora haaro coyeeti. Tini baxxitino qixxaawooti. Tini woshshatto, mittu manchi buuramanno wote hedanno gari, laosinna hexxosi gudisidhe soorrantanno gede assitanno. (Efe. 1:18) Ikkina mittu manchi iima heeꞌrara woshshaminota, woy tenne baxxitino taje adhinota mayinni afanno? Phaawuloosi “qullaawoota ikkara woshshaminohura” Roomaho noohura buuramino roduuwira coyiꞌrinori tenne xaꞌmora dawaro ikkanno. Isi togo yiinonsa: “Galagaltine waajjitinanni gede assannoꞌneha borojjimmate ayyaana diadhitinoonni; hatteentenni, Maganu ooso gede ikkitine kiirantinanni gede assannoꞌne ayyaana adhitinoonni; kuni ayyaani, ‘Abba, Anna!’ yine woshshineemmo gede assannonke.” (Rom. 1:7; 8:15) Haranchunni, Maganu qullaawu ayyaanisinni, hakku manchi albillitte iimi Mangistera moohara koyisaminoha ikkasi bade afanno gede assannosi.—1 Tes. 2:12. w16.01 3:8, 9

Yihowa buurinore gara ikkitino doogonni ayirrinseemmota leellisha dandiineemmohu hiittoonniiti? Buurantino gara qorranni diqarrinseemmo. Konni garinni eessannonkekki coyi giddora ea qorophineemmo. (2 Tes. 3:11) Buuramino Kiristaanchi annanna ama, galtesi woy wole fiixasino buuraminohu gede assine dihendeemmo. Fiixoomu woy adhanna adhama buuramate ledo xaado diafidhino. (1 Tes. 2:12) Hakkiinni saeno, buuramino Kiristaanchi galte albillitte uullate aana Gannatete isiweelo heedhannota heddanno wote mayi macciishshamannosero xaꞌma dihasiissannonke. Togoota xissiissanno xaꞌmo xaꞌmantenni, ninke baalunku Yihowa angasi fane ‘heeshshote kalaqami baalunku hasatto wonshannota’ addaxxa dandiineemmo. (Far. 145:16) Buuramino Kiristaana gara ikkitino doogonni ayirrissannori gawajjotenni gattanno. Qullaawa Borro, “suꞌmu roduuwi” songote giddora eꞌara dandiitannota kultanno.—Gal. 2:4, 5; 1 Yoh. 2:19. w16.01 4:10, 11