Birra

Yihowa ‘cincanna shesho aanno Maganooti.’ (Rom. 15:5) Iillannonke qarra calla ikkikkinni heeꞌnoommo gara, macciishshamannonkere, wole agurina kalaqammoommo gara woꞌmunni woꞌma huwatara dandaannohu iso callaati. Hakko daafira cincineemmo gede assate isira baxxitino dandoo noosi. Maganu cincate kaaꞌlitanno jawaante afiꞌrate huucciꞌneemmo huuccattora dawaro qolannohu hiittoonniiti? Yihowa fonqolo dandiine saꞌneemmo gede kaaꞌlankera huucciꞌneemmoha ikkiro isi ‘fulleemmo furcho qixxeessannonke.’ (1 Qor. 10:13) Togo yaa Yihowa mereero eꞌe iillinonke fonqolo hoolanno yaateni? Hatto assanno woti heeꞌrara dandaanno. Duucha wote kayinni fulleemmo furcho qixxeessannonkehu fonqolo ‘cincine saꞌneemmo gede asseeti.’ Ee, Yihowa ‘cincatenninna hagiirrunni baalanka coye woꞌmunni woꞌma cincine saꞌneemmo gede’ jawaachishannonke. (Qol. 1:11) Qoleno isi bisinke, surrenkenna hedonke dhuki mageeshshihoro seekke afinohura ammanamme heeꞌneemmokki gede assanno fonqoli iillankera difajjanno. w16.04 2:5, 6

Maganu Qaali mannu gashshootira hajajammeemmo gede kulannonkeha ikkirono mannunni roore Maganoho hajajammeemmo gede rosiisannonke. (Soq. 5:29; Tit. 3:1) Ikkina tini ise iseneewa sumuu yitannokki hedo diꞌꞌikkitino? Diꞌꞌikkitino! Bikkunni hajajammeemmo gede kulannonkehu xintu seeri tenne assa hasiisannonkehu mayiraatiro huwanteemmo gede kaaꞌlannonke. Yesuusi konne xintu seera kulanni techohu barru qummeeshshi aana noo hedo coyiꞌrino. Heeꞌnoommo gobba gashshooti fushshanno higgera hajajammeemmoha, silxaane noonsare ayirrinseemmohanna xaꞌminanninke qaraxo baanteemmoha ikkiro Qeesaarire Qeesaarira uyineemmo. (Rom. 13:7) Ikkollana silxaane noonsari Maganoho hajajammeemmokki gede assannore assinammora kultunkero ayirrinyunni tenne assineemmokkita kulleemmonsa. Poletiku hajora anga diwodhineemmo. (Isa. 2:4) Konnira, Yihowa gashshara fajjinoha mannu gashshoote digimbeemmo; woy gobbanke banxeemmotanna ninke gobba woletewiinni roortanno yine hendeemmota leellishannore diassineemmo. (Rom. 13:1, 2) Mangiste mito coye assa hasiissannonsa yine dicoyiꞌrammeemmo; mirca ditungeemmo; silxaane diamandeemmo, woy gashshoote soorrate diwoꞌnaalleemmo. w16.04 4:1, 2

Duucha wote Kiristaanu mereero kawa kaꞌaa higino coyi kalaqamanno yannara callootinsa tira dandiitanno; qoleno hatto assa hasiissannonsa. Ikkollana Yesuusi kalaqamino qarra songote kula hasiissanno yanna heedhara dandiitannota coyiꞌrino. (Mat. 18:15-17) Koffi assino manchi rodoosino, naqaasheno, songono macciishshalla giwi? Tenne yannara, ‘ammaninokkihunna qaraxaasinchu gede assine agurranni.’ Xaa yannara tenne songotenni bohate yinanni. Tini, “sao” mulla kawa kaꞌaa higino coye calla ikkitinokkita leellishshannote. Hatteentenni tini, (1) coyi kawa kaꞌaa higinonsa mannooti lamunku tira dandiitanno saooti; (2) tira hoongiro kayinni bohamate geeshsha iillishshara dandiitanno saooti. Tini sao woxe looxa woy mannu suꞌma huna ikkitara dandiitanno. Yesuusi Maatewoosi 18:15-17 aana qummi assinoha sasenka dirima harunsinannihu togoori ikkanno yannara callaati. w16.05 1:14

Qullaawu Maxaafi giddo assi woy assitooti yine hajanjoonnikkihu bacu coyi tuncu yaannonke. Lawishshaho, Qullaawa Borro giddo Kiristaanu ma gari uddano uddiꞌra hasiissannoro kultannoti xawinse kulloonni higge dino. Tini Yihowa hayyo leellishshannohu hiittoonniiti? Uddiꞌnanni gari mittu bayichinni wolu bayichiwiinni calla ikkikkinni yannate kiiro babbaxxanno. Qullaawu Maxaafi giddo uddiꞌratenna seesate daafira kultanno higge tittirre kulloommero tini higge yanna saꞌinota ikkitanno. Qoleno, qullaawu ayyaaninni borreessaminohu Maganu Qaali giddo Kiristaanu loosa hasiissannonsa looso, fayyimma agadhanno garanna hiikkonne boohaarsha boohaara hasiissannonsaro kultannoti batinye higge dino. Qullaawu Maxaafi giddo assi woy assitooti yitanno hajajo nookki coyi tuncu yaannonke yannara maa assa hasiissannonke? Tenne yannara, doodhineemmore ninke baxisinonke daafira calla doodha agurre Yihowa hagiirsiisannonna isi atoote afiꞌneemmo gede assanno doorsha doodhate sharrama ninke faantaati.—Far. 37:5. w16.05 3:2, 6

Ninke baalunkura nabbawa baxisannonkehu Qullaawu Maxaafi gafi nooti egennantinote. Mitu manni, Beettisi aana xabbe leeltinota dhagge ikkitannota Yihowa akatta amaddino Wongeeluwa nabbawa roorse baxanno. (Yoh. 14:9) Wolootu qolte, masaalo amadinoha Qullaawu Maxaafi gafa lawishshaho “muli yanna giddo ikkanno coye” kultannota Yohaannisi Ajuuja nabbawa baxxanno. (Aju. 1:1) Qoleno, ninke giddo Faarsote maxaafa nabbawe shesho afiꞌrinokkihu, woy Lawishshu maxaafa nabbawe dancha roso afiꞌrinokkihu ayi no? Addaho, Qullaawu Maxaafi baalunku mannira borreessamino maxaafaati. Qullaawa Maxaafa banxeemmohura Qullaawu Maxaafi aana xintantino borruwano banxeemmo. Lawishshaho, maxaaffate, birosherubbatenna wole borruwa widoonni shiqqannonketa ayyaanaamittete sagale baasa naandeemmo. Tini Yihowa qixxeessino qixxaawo, ayyaanaamittetenni baqqi yine heeꞌneemmo gede, seekkine sagaꞌlineemmonna “ammanatenni . . . fayyaaleeyye” ikkineemmo gede kaaꞌlitannonketa anfoommo.—Tit. 2:2. w16.05 5:1-3

Qullaawu ayyaani addi addi doogonni seekke biddi assankera dandaanno. Lawishshaho, qullaawu ayyaani Maganu ayyaani gumi akatta widira gaamantannota Kiristoosite gedee akatta lossiꞌrate kaaꞌlannonke. Ayyaanu gumi akatta giddo mittu baxilleho. Maganu hajajubba duha ikkitinokkita anfoommohura iso banxeemmo, hattono isira hajajammeemmo; qoleno seekke biddi assankera hasiꞌneemmo. Qullaawu ayyaani alamete faale harunsineemmokki gedeno kaaꞌlannonke. (Efe. 2:2) Aju beetti noo waro Yihudu ammaꞌno marootiha naaxxate akata harunsannohu soqqamaasinchu Phaawuloosi togo yee borreessino: “Wolqa aannoehunni Kiristoosinni [“Maganunni,” NW] baalankare assa dandeemmo.” (Fil. 4:13) Konnira ninkeno Phaawuloosinte gede qullaawa ayyaana afiꞌrate huuccatto assiꞌra agurroonke. Yihowa suwashshu wodani noonsa manni huucciꞌranno huuccatto macciishshanno.—Far. 10:17. w16.06 1:12

Yihowa mittonna callicho Maganonke ikkinota leellishate iso calla magansiꞌra hasiissannonke. Wole maganna magansiꞌra woy magansiꞌranke lase kaphu rosi woy assooti daara wodha dihasiissannonke. Qoleno, Yihowa wole maganna giddo mittu gede assine hedanna wole maganna ledo taashshine isi rooriidiho woy wolqaataamoho yaa nafa dihasiissannonke. Magansiꞌra hasiissannohu Yihowa callaati. Yihowa calla magansiꞌrate, heeshshonke giddo mittu coyino isira calla aa hasiissannonkere wolurira uyineemmo woy beenkeemmo gede assankera wodha dihasiissannonke. Hakku coyi maa ikkara dandaanno? Yihowa, Tonne Hajajo giddo mannisira iso agurranna wole maganna heedhannonsakkinna kaphu maganna magansidhannokki gede xawise kulinonsa. (Mar. 5:6-10) Xaa yannara, addi addi coyi kaphu maganna ikkara dandaanno; kuri giddo mitu xawe leella hoogara dandaanno. Yihowa ninke assinammora hasiꞌranno coyi kayinni disoorramino; isi xaano mitto Yihowaati.—Maq. 12:29. w16.06 3:10, 12

Pheexiroosi Yesuusa “lamala hige” gatona yooni yee xaꞌmisi yannara, isi togo yee dawarinosi: “Lamala higge lamalawo ikkinninna lamala higge calla aguri diyeemmohe.” Yesuusi tenne coyiꞌrinohu ayewoteno manna gatona yineemmo gedeeti; konnira ninke ayewoteno tenne assate sharrama hasiissannonke. (Mat. 6:15; 18:21, 22) Ninkeno soꞌro loonseemmore ikkinoommohura wole manna koffi assineemmo woti heeꞌrara dandaannota qaaga hasiissannonke. Qullaawu Maxaafi wole manna koffi assinoommoti leeltunkero hakkonne koffi assinoommo manchiwa marre kawa kaꞌaa higinonke coye tira hasiissannonketa kulannonke. (Mat. 5:23, 24) Wolu manni loonsoommo soꞌrora koma ammaxxannokkiha ikkiro, ninkera tashshi yaannonkente gede ninkeno hatto assa hasiissannonke. (1 Qor. 13:5; Qol. 3:13) Ninke wole manna duuchanka wote gatona yineemmoha ikkiro, Yihowano gatona yaannonke. Ee, Yihowa soꞌro loonseemmo yannara maarannonkente gede, ninkeno wolu manni koffi assannonke yannara gatona yine, maaranno Anninke Yihowa faale haꞌno.—Far. 103:12-14. w16.06 4:15, 17

Tenne heeꞌnoommote goofimarchu yannara Yihowa soqqamaano, “Maganu Gashshootiha Dancha Duduwo gobba baalate” kultanno gede hajanjoonninsa. (Mat. 24:14) Tini dudumbeemmo sokka ‘Maganu eltohu Danchu Duduwi’ giddo mittete; korkaatuno Maganu Gashshooti hunda atoote afiꞌneemmohu Isi elto widoonniiti. (Soq. 20:24; Efe. 1:3) Ninkeno Phaawuloosi gede diinaggaambe soqqamme, Yihowa uyinonke eltora galanteemmosita leellinshanni heeꞌnoommo? (Rom. 1:14, 15) Cubbaataamma ikkinummorono Yihowa eltonni addi addi horo afiꞌnanni heeꞌnoommo. Yihowa manna baala baxannota leellishannohu hiittoonniitironna insa tennenni horo afiꞌra dandaannohu ma garinniitiro kulate dandiinummore baala assa hasiissannonke. w16.07 4:4, 5

Yesuusi reyara boode yanna gatte heedheenna rosaanosira, Daawuloosi “tenne gobba gashshaancho” ikkinota sase hige qaagiissinonsa. (Yoh. 12:31; 14:30; 16:11) Yesuusi, Daawuloosi mannu Maganu albillittete yanna daafira coyiꞌrino masaalo woꞌma rakkinota huwatannokki gede assannota afino. (Sof. 1:14) Sheexaanu, alame woꞌmate noote kaphu ammaꞌno widoonni mannu wodana beeshshino. Ati soqqanshonniwa manna hasaawisatto wote tenne dihuwatootto? ‘Ammanannokki’ manni, tini alame baꞌannotanna Kiristoosi Maganu Mangiste Moote ikke gashsha hanafinota huwatannokki gede Daawuloosi wodanansa ‘beeshshinota’ diwodanchootto? (2 Qor. 4:3-6) Ninke, tini alame baꞌanno yanna gambissinota kulleemmonsa wote, rooru manni tenne dunqulli asse aguranno. Mannu ayyaanaamittete coye lashshi asse agurinota laꞌe, baqqi yite agadha agurattokki gede qoropha hasiissannohe. w16.07 2:11, 12

Idayicho sargese barra lowo geeshsha biiffe, gaamaarino idayichise albira shiqqanno wote lamunku baasa hagiidhanno. Adhanna adhama xintino Magani, adhamino manni hagiirrunni heeꞌraranna adhamansa geedonnita ikkitara hasiꞌranno; konni daafira Qaalisi giddo adhama hasiꞌranno mannira baalaho kaaꞌlitannota kaajja amaale worino. (Law. 18:22) Ikkirono, Qullaawu Maxaafi guuta ikkinokkihu adhamino mannira ‘qarru’ iillannonsata xawise kulanno. (1 Qor. 7:28) Ikkina, togoo qarra ajisha dandiinannihu hiittoonniiti? Kiristaanu adhamansa hagiirru noota assiꞌra dandaannohu hiittoonniiti? Qullaawu Maxaafi baxillu lowo geeshsha hasiisannota kulanno. Adhamino manni mimmito addu jaalla gede asse baxa (Giriikete Afiinni, fiiliya) hasiissannonsa. Qoleno, meyaatenna labbaahu mereero heeꞌranno baxilli (eroosi) hasiisannonsa; hattono ooso ilannoha ikkiro, maatete mereero heeꞌranno baxille (istoorge) leellisha hasiissannonsa. Ikkollana, adhamansa seekkannonna hagiirru noota ikkitanno gede assannohu agaappe yinanniho xintu seera harunsine leellinshanni baxilleeti. w16.08 2:1, 2

Ximootewoosi gikki yiinoho Maganu Mangiste sawaakichaati. Ikkirono, soqqanshosinni dancha guma afiꞌrannohu rosiisanno roso ‘seekke agadhiro’ callaati. Qoleno mannu bashsho gede ikke macciishshannoella yee agadha didandaanno. Isi rosiisannore mannu macciishshanno gede, rosiisanno rosi insara hasiise noori ledo sumuu yaanno gede assa hasiissannosi. Ninkeno Maganu Mangistere dudumbeemmore ikkinoommo daafira hatto assa hasiissannonke. Duucha wote minunni mine haꞌne soqqammeemmo yannara manna minensa dianfeemmo. Mite gobbara mite fooqqanna hasiꞌni gede ea dandiinannikki qooxeessa haꞌne sabbaka didandiineemmo. Ati heeꞌrattohu hattoo qooxeessira ikkiro, dancha duduwo duduwate wole doogga mayira diwoꞌnaalatto? Gudumaaleho farciꞌra dancha duduwo halashshate kaajja doogooti. Batinye Yihowa Farciꞌraasine tenne soqqanshonni dancha guma afidhanni no. Insa baaburunna otobise uurritannowa, dikkote, paarkenniwanna wolewa lowo manni heeꞌrannowa sabbakate yanna gaaꞌmitino. w16.08 3:14-16

Yihowa alamete doyichora nooha ninke daafira hedannonna jawaachishannonke roduuwa uyinonke. (Ibi. 12:12, 13) Umi xibbi diro heeꞌrinohu batinyu manni konni garinni ayyaanaamittete jawaante afiꞌrino. Xaa yannarano togoo jawaante afiꞌra dandiinanni. Maa assine kaꞌla dandiineemmo? Aarooninna Hoori olu yannara Muse anga iimira qolte kayisse amaddino. (Ful. 17:8-13) Ninkeno, wolu mannira mitore assine kaaꞌla dandiineemmo doogga heda dandiineemmo. Hiittoo manna kaaꞌla dandiineemmo? Geedhimma amaddinonsare, fayyimmate qarri noonsare, maatensa gibbinonsare, callimma amaddinonsarenna shiidhinore jawaachisha dandiineemmo. Qoleno tini alame gara ikkinokkire assitanno gede woy rosunni, woxunni, woy egennotenni suꞌmira qiniiteho yinannire afiꞌra hasidhanno gede xixxiibbannonsa wedella jawaachisha dandiineemmo. (1 Tes. 3:1-3; 5:11, 14) Mangistete Addaraashe giddo heeꞌnoommo wote, soqqammeemmo yannara, sagale wolu manni ledo inteemmo wote, woy silketenni hasaawinseemmo yannara wolu mannira hendeemmota leellinsheemmo faro hasiꞌra dandiineemmo. w16.09 1:13, 14

Qullaawa Maganonke Yihowa, ayyaanaamittete roduuwankenna sabbankeemmo manna ayirrinseemmohura, Maganoho ayirrinye abbitannotanna mannu sabbankeemmo sokka macciishshanno gede assitanno uddano uddiꞌneemmo. (Rom. 13:8-10) Roorenkanni ayyaanaamittete coye assineemmo wote lawishshaho, gambooshshe haꞌneemmonna sabbankeemmo yannara kawajjaame uddano uddiꞌra hasiissannonke. “Magano magansiꞌneemmo” yaanno manni uddiꞌranno garinni uddiꞌra hasiissannonke. (1 Xim. 2:10) Mittowa kawajjaame assine laꞌnanni uddano wolewa kawajjaame ikka hooggara dandiitanno. Ikkollana baalanti Yihowa Farciꞌraasine qooxeessinsa budi ledo sumuu yaanno garinni manna gufissannokki uddano uddidhanno. Jajjabba gambooshshuwa haꞌneemmo yannara, uddiꞌneemmo uddano alamete faale haꞌrunsineemmota leellishannota ikkitukkinni, kawajjaamenna likkanya ikka hasiissannose. Hatto ikkiro, Yihowa Farciꞌraasine ikkankenni disaalleemmo. Qoleno, faro afiꞌneemmo yanna baalantera salfantummokkinni sabbankeemmo. w16.09 3:7, 8

Tini Phaawuloosi coyiꞌrino yaatto addaho! Xurqa ikkinore loosannohu hedate dandoo noosiho. Qullaawu Maxaafi gara ikkasi huluullamanno manchi ledo hasaawatto yannarano hattoo hayyo horoonsiꞌra dandaatto. Isi maa ammanannoronna hasaawa baxanno haja hittenneetiro afate woꞌnaali. (Law. 18:13) Sayinsennire baxannoha ikkiro, Qullaawu Maxaafi sayinsete ledo sumuu yaanno gara kayisse hasaawisittoro macciishshe adhara dandaanno. Wolu manni kayinni Qullaawu Maxaafi masaalo woꞌmitinotanna giddosi kulloonni xagge adda ikkase leellishanno lawishsha afa hasiꞌrannoha ikkara dandaanno. Woy Qullaawu Maxaafi giddo lawishshaho Ilaalu Sibikate giddo nooha kaajja seera kulattosira dandaatto. Tenne baala assattohu heewisante qeelate ikkikkinni, hasaawissanni nootto manchi kulattosire huwatanno gede assateeti. Konnira coyiꞌranno wote seekkite macciishshi. Mite xaꞌmuwa xaꞌma dandaatto; hedokki xawisatto yannara shaqqillunninna ayirrinyunni coyiꞌri; hakko iso jajjabba manna hasaawissanni noottoha ikkiro tenne assa hasiissannohe. Hatto ikkiro, isi coyiꞌrattore macciishshe adhara dandaanno. w16.09 4:14-16

Songote giddo manni gobbanni dagginori borsitannokki gede assate ninkeneeto, ‘Ani wolewa haꞌroommoro mannu ma assaera hasiꞌreemmo?’ yine xaꞌma hasiissannonke. (Mat. 7:12) Wolewiinni dagge kiꞌne gobba rosate woꞌnaaltanni noore cincatenni amaddensa. Umi qara, heddanno garanna ikkitonsa woꞌmunni woꞌma afa hoongammora dandiineemmo. Ikkollana, insa ninke bude rossanno gede calla agadha agurre, insa budeno rosate mayira diwoꞌnaalleemmo? Insa budi daafira anfummoro, insa ledo hasaawa shota ikkitankera dandiitanno. Maatete magansiꞌra assiꞌneemmo yannara, songonkera woy qoqqowinkera heeꞌrannohu seekkine anfoommokki manni daafira xiinxalla dandiineemmo. Manni gobbanni dagginoriwa roore shiqa dandiineemmoti wole doogo insa mininkera sagalete koyisate. Yihowa “dagate ammanate” waalcho fanino; ikkina ninke manni gobbanni dayinohu “ammaꞌnino mannira” woy roduuwinkera waalchonke fana dihasiissannonke?—Soq. 14:27; Gal. 6:10; Iyo. 31:32. w16.10 1:15, 16

Phaawuloosi kaajjado ammana noonsa labballonna meento kulihu gedensaanni, baalunku manninni roore ammanate kaajja lawishsha ikkannonkeha Mootichanke Yesuusi Kiristoosa qummi assino. Qullaawu Maxaafi isi daafira kulanni togo yaanno: “Isi albasiinni noo hagiirri daafira yee, shollinye waajjikkinni masiqalu [“qarru haqqi,” NW] aana ree, ayirradu Maganu barcimira qiniiteenni ofollino.” (Ibi. 12:2) Ee, buutote qarri tuncu yiinkerono, ammanate lawishsha ikkannoha Yesuusa ‘qaaga’ hasiissannonke. Yesuusi gede, umi xibbi diro heeꞌrino Kiristaanano, Maganoho ammanaminohura shinoonninsa; insa giddo mittu Antiphaasiiti. (Aju. 2:13) Insa reyotenni kae iimira haꞌrino; tini kao kaajjado ammana noonsari Kiristinnu yannara albaanni heedhinori afidhanno kao ‘roorete.’ (Ibi. 11:35) Maganu Mangiste 1914nni gashsha hanaffuhunni shiima yanna gedensaanni, hakkuyira albaanni reyinohu buuramino Kiristaani Yesuusi ledo uulla gashshate iimira haꞌrino.—Aju. 20:4. w16.10 3:12

Mitu annuwinna amuuwi oosonsa digalatanno; korkaatuno insa umonsa annuwansanna amuuwinsa jawachishinsakkinni lophino. Batinye loosaasine loosu basera galantanninsakki daafira lowo geeshsha caaccaabbanno. Manna jawaachinsheemmo doogga giddo mitte assinoha dancha coye kulle galatate. Qoleno, noonsata dancha akatta kulle, hattono “waajjaleeyye” woy hexxo mudhitinore dhaawannore coyiꞌne jawaachisha dandiineemmo. (1 Tes. 5:14) “Jawaachisha” yine tirroonnihu Giriikete qaali noo gedeenni tirriro “anewiinni faffooti” yitanno tiro afiꞌrino. Roduuwinke ledo soqqammeemmo wote, insa jawaachishannore coyiꞌrate faro afiꞌneemmo. (Ros. 4:9, 10) Roduuwanke banxeemmotanna naandeemmota kulate injiitanno yanna doorreemmo? Tenne xaꞌmo dawaro laꞌnammora albaanni, “Labbino dawaro qola hagiirsiissanno; yannasira coyiꞌnoonni coyi hiittoo danchaati!” yitanno amaale hedanke danchate.—Law. 15:23. w16.11 1:3-5

Maganu mannisi albillitte heeꞌranno heeshsho daafira togo yee masaalino: “Geꞌreewu allaaletenni hige gooꞌraana eannohu gede, ani woꞌmanka mittowa gamba asseemmoꞌne.” (Mik. 2:12) Qoleno, Yihowa masaalaanchu Sofooniyaasi widoonni togo yiino: “Hatte yannara, ane magansidhannoe gede dagate hedo soorreemmo; insano wole maganna agurte ane calla magansidhanno; baalunku mitteenni anera soqqantanno.” (Sof. 3:9) Ee, mittimmatenni Yihowa magansiꞌrate faro afiꞌranke lowo geeshsha hagiirsiissannote! Qullaawu ayyaaninni borreessinoonnihu Maganu Qaali giddo noo amaale, umi xibbi diro Qorontoosi katamiranna wole bayicho heeꞌrino Kiristaani, songuwa xuru nookkita, hattono salaamenna mittimma noota ikkitanno gede assate kaaꞌlitinonsa. (1 Qor. 1:10; Efe. 4:11-13; 1 Phe. 3:8) Yannankerano Maganu manni mittimmatenni soqqamanno daafira, Maganu hedore kulannohu danchu duduwi gobba gosate duduwamanni no. w16.11 2:16, 18

Yesuusi ilami gedensaanni noohu boodu sani giddo, Giriikete Afiinninna Laatinetenni qixxeessinoonniha Qullaawa Maxaafa nabbawa dandaannohu lowo manni no. Konni daafira, kuni manni Maganu Qaalenna beetekiristaane kalaqqino roso heewisiisa dandaanno. Insa Qullaawu Maxaafi giddo nabbabbinori, beetekiristaane rosiissannoha qullaawa borro aana xintaminokki totao gibbanno gede assinonsa; ikkollana togoore faajjete coyiꞌra qarra iillishshansara, wole agurina reyote geeshsha nafa massitara dandiitanno. Gale hosanni, lowo manni Qullaawa Maxaafa borreessinoonni afoo coyiꞌra aguri; qoleno beetekiristaane Maganu Qaale lowo manni coyiꞌranno afiira qolle tirrannikki gede assitu. Beetekiristaane rosiissanno roso adha giwannoha baasa qorichinshanni. Konni daafira ayyaanunni buurantinoti ammanantinoti Maganu soqqamaasine gamba yitannohu gaamo gaamotenni maaxanteeti; maaxame gamba yaate nafa roore wote diꞌꞌinjaannonsa. Buuramino Kiristaanino qiniino garinni Magano magansiꞌra didandiino. Hakka waro, Bayira Baabiloone manna fugge amaddino! w16.11 4:8, 10, 11

Biꞌre Qorontoosi heeꞌrinohu mitu manni assannoha shota ikkinokki cubbo assa roso assiꞌra dihasiissannonke. Hatto assa hasiissannonke; korkaatuno cubbo loonsanni heeꞌne Maganu elto afiꞌneemmo yine heda dihasiissannonke. Ikkollana, “woꞌmu wodaninni” hajajamme baalunku cubbiwiinni xeertiꞌrate dandiinummore baala assinanni heeꞌnoommo? (Rom. 6:14, 17) Hanni soqqamaasinchu Phaawuloosi daafira hedi. Isi 1 Qorontoosi 6:9-11 geeshsha kulliha shotinse laꞌnannikki cubbo assanni nooha ikkinokkita anfoommo. Ikkollana, isi cubbaataamo ikkinota coyiꞌrino. Togo yee borreessino: “Ani maala uddiꞌroommo[ho]; qoleno cubbu borojjimmara hiramoommoho. Ani asseemmore diegennoommo; baxeemmore agure, giweemmore asseemmo.” (Rom. 7:14, 15) Kuni qummeeshshi Phaawuloosi cubbu gede asse lainori woluri nootanna konni gara ikkinokki coyiwiinni xeertiꞌrate sharraminota leellishanno. (Rom. 7:21-23) Ninkeno isi lawishsha harunsine Maganoho ‘woꞌmu wodaninkenni hajajamate’ sharrama hasiissannonke. w16.12 1:15, 16

Masisanno, waajjishanno woy yaachishanno coyi iillihero, wodanikki giddo noore baala baxillaanchu iimi Annikkira hasaaphi. Qarra tirate assa dandaattore assittohu gedensaanni giddokkinni kaꞌe assiꞌratto huuccatto, yaaddo assite affannokkire assitanno. (Far. 94:18, 19) Filiphisiyusi Sokka 4:6, 7 aana kulloonninte gede, Yihowa giddonkenni, laalaante hattono agurrummokkinni huucciꞌneemmo huuccattora dawaro qolanno. Hiittoonni? Surrenkenna wodananke fooliishsho hoolino coyinni gante giddoyidi salaame afiꞌneemmo gede assannonke. Batinyu roduuwinke tenne uminsa heeshshonni laino. Maganu, insa yaachishannonsa coyinni fooliishshidhe mannu huwata dandaannokki salaame afidhanno gede asse yaano giddonsa harshammi yitanno gede asse kaaꞌlinonsa. Atino togoo salaame afiꞌra dandaatto. Konni daafira “Maganu keeri” woy salaame iillannoheha aye qarrano dandiite saꞌꞌatto gede kaaꞌlitannohe. Yihowa eino qaale woꞌmunni woꞌma addaxxa dandaatto; isi togo yiino: “Ani Maganokkiitina hexxo mudhitooti [‘yaaddooti’, NW]. Ani jawaachisheemmohe; kaaꞌleemmohe.”—Isa. 41:10. w16.12 3:3, 4

Muse Gibitsete jiro giwino; isi “cubbunni afiꞌnannihunni yannate geeshshi hagiirrinni roore Maganu manni ledo qarra adha” doodhino. (Ibi. 11: 25, 26) Konni daafira, doodhate dandoonke naandeemmota leellishatenna Maganu fajjo assate horoonsiꞌne, kaajja ammana noonsahu hundi yannara heeꞌrinohu ammanamino manni faale haꞌno. Wolu manni doorannonke gede assa shota labbannoha ikkirono, tini doodhate dandoonke horoonsiꞌnummoro afiꞌra dandiineemmoha lowo atoote afiꞌneemmokki gede assitanno. Konne atoote Marro 30:19, 20 giddo qummi assinoonni. Kiiro 19 giddo Maganu Israeelete doorsha uyinonsata kulloonni. Kiiro 20 giddo Yihowa insa Iso mageeshshi geeshsha baxxannoro leellisha dandiitannota dancha faro uyinonsata kulloonni. Ninkeno Yihowa Magansiꞌrate doodha dandiineemmo. Doodhate dandoonke geeshsha, Yihowa banxeemmota leellishatenna isira ayirrinye abbate faro fanannonkeri woluri dino yaa dandiinanni. w17.01 2:10, 11

Yihowa uyinonke dandoo danchu garinni horoonsiꞌnammora hasiꞌranno. Mayira? Korkaatuno, isi ninke baxannonke; qoleno dandoonke danchu garinni horoonsiꞌnummoro hagiirre afiꞌneemmota afino. Yihowa mannu ooso assite affannokkiri nootano afino. Ninke uminke wolqanni guuntete xeꞌne, cubbonna reyo hooꞌla didandiineemmo; qoleno, manna baalaho doodhate dandoo noonsahura insa illaallisa didandiineemmo. (1 Mot. 8:46) Noonke egenno woy woꞌnaalshi aye geeshshiha ikkirono, Yihowa ledo heewisiinsiro ninke duuchanka wote daaimu gedeeti. (Isa. 55:9)Yihowa kaaꞌlannonketanna ninke assiꞌra dandiineemmokkire assannonketa anfe iso duuchanka wote addaxxa hasiissannonke. Ikkollana, ninke assa dandiineemmore assa hasiissannonke, yaano qarra tiratenna woloota kaaꞌlate dandiineemmore assa hasiissannonke. Coye haransate, ‘Yihowa addaxxano danchare assano’ hasiissannonke; qoleno, ‘ammanammoommore ikka’ hasiissannonke. w17.01 1:2-4

Barzilayi tennera sumuu diyiino Sumuu yaa giwinohu mayiraati? Isi geedhino daafira, Daawitira duha ikka hasiꞌrinokkita kulino. Konni daafira, Barzilayi isi bayicho Kimihami haꞌranno gede hedo shiqishi; Kimihami oososi giddo mitto ikkikki digatino. (2 Sam. 19:31-37) Barzilayi dhukasi afinoha ikkino daafira, gara ikkino doorsha doodhino. Isi Daawiti koyisinosi koyishsha adhikki gatinohu, looso loosa giwinohura woy fooliishshiꞌre deseꞌe yee heeꞌra hasiꞌrinohura diꞌꞌikkino. Barzilayi hatto assinohu, heeshshosi gari soorraminohuranna assa dandaannokkiri noota huwatinohuraati. Isi wolqasira aleenni ikkino coye assate shelleggama dihasiꞌrino. (Gal. 6:4, 5) Silxaane afiꞌra, maccare ikka, woy mannu afankera hasiꞌneemmoha ikkiro, tini umonke banxeemmo, heewisammeemmonna jeefote hexxo mudhineemmo gede assitannonke. (Gal. 5:26) Dhukanke hambeemmokkiha ikkiro kayinni, noonke dandoonna assineemmo loosi gamba yee Maganoho ayirrinye abbanno gara, hattono manna albinni roore kaaꞌlineemmo gara hendeemmo.—1 Qor. 10:31. w17.01 4:5, 6

Yihowa taalamannosihu nookki Kalaqaanchooti. Isi kalaqinori baalu danchaho. (Erm. 10:12) Kalaqo leellishshannonte gede Yihowa worino danni no. Isi baalunku coyi mimmitoho sumuu yee heeꞌranno gede kalaqamunna amanyootu higge worino. (Far. 19:7-9) Konni daafira, Maganu kalqete alame giddo kalaqinori baalu umisi bayichonna looso afiꞌrino. Yihowa kalaqino coyibba mitteenni sumuu yite heedhanno gede higge fushshino. Lawishshaho, goshoonshete wolqa, uulla gaangeessitino ayyare uullate qooxeessiꞌra heedhanno gede, hattono dambalunna wuqiyanoose heedhanno gede assitanno; tini wolqa hooggoommero uullate aana heeshshote noo kalaqami diheeꞌranno. Kalaqamu baalu, heeꞌrannohunna millisannohu Maganu worinohu konni danni giddooti. Ee, Maganu kalaqamaho worino higge isi uullatenna mannu oosora hedinori noota leellishshanno. Soqqanshonniwa mannu tini dhagge ikkitanno higguwa heedhanno gede assino Magani daafira hedanno gede assineemmo?—Aju. 4:11. w17.02 1:4, 5

Muse yanna gedensaanni iso lekkisinohu Iyyaasu, Maganu manna Kanaani gobba manni ledo olamara haaꞌre haꞌri yannara, Yihowa “olanto hajajaanchi” wolqa ikkinosi. (Iya. 5:13-15; 6:2, 21) Gedensaanni, Moote Hiziqiyaasi yannara waajjishshannoti Asoorootu olanto Yerusaalame horrate kaꞌino. Hatte yannara mitto hashsha, Yihowa “sokkaasinchi . . . 185,000 olanto” shiino. (2 Mot. 19:35) Sokkaasine guuta kalaqamaati; insa kaaꞌlitino manni kayinni diguutaho. Lawishshaho, Muse mitte yannara Yihowara ayirrinye uyikki gatino. (Kir. 20:12) Iyyaasu Gebaooni manni ledo qaalu gondooro ei yannara, Maganu biddishsha aannosi gede dixaꞌmino. (Iya. 9:14, 15) Mitte yannara Hiziqiyaasi “wodanisira booꞌna” woꞌmitinota leellishannore assino. (2 Dud. 32:25, 26) Kuri massagaano guuntete xeꞌne noonsare ikkiturono, Israeele kayinni insa yitannore assa hasiissinonsa. Yihowa hakkawaro konne manna sokkaasinete widoonni qole kaaꞌlanni no. Ee, Yihowa mannasi massagino. w17.02 3:7-9

Mitto mancho ayirrisate yaa hakko mancho baxxino garinni laꞌꞌate woy naadate. Ayirrinsannisi gede assannore assinoha woy silxaane noosi mancho ayirrinsanniti egennantinote. Hakko daafira ninkeneeto togo yine xaꞌma hasiissannote: ‘Ayirrisa hasiissannonkehu ayeti? Ayirrinseemmohu mayiraati?’ Yohaannisi Ajuuja 5:13 giddo kulloonninte gede, “ayirradu barcimira ofolle noohuranna Geꞌrechoho” ayirrinyu hasiissannonsati egennantinote. Yohaannisi Ajuuja fooliishsho 4 giddono, Yihowa ayirrinsanni gede assannoha mitto korkaata kulloonni. Iima heedhannoti ayyaanaame kalaqo, “hegerenni hegere geeshsha” heeꞌrannoha Yihowa guwisidhanno. Togo yitanno: “Mootichankenna Maganonke! Baalanka kalaqoottona, kalaqamanno gede assoottona, heeshsho oottohu ateetina, atera ayirrinyu, guweenyunna wolqa ikkitohe!”—Aju. 4:9-11. w17.03 1:1, 2

Lowo manni wodanikki hedinore assi yaanno. Hatto assa kayinni gawajjitara dandiitanno. Qoleno, togoo yaatto qullaawa borro ledo sumuu diyitanno. Qullaawu Maxaafi mitto doorsha doodhineemmo wote, guuntete xeꞌne noo wodaninke kulannonkere calla harunsineemmokki gede qorowisiisannonke. Qullaawu Maxaafi wodanisi yaannore harunsanno manchi qarru giddora eannota kulanno. Wodananke ammaꞌna didandiineemmo; korkaatino, “mannu wodani baalunkunni roore xagaraamoho”; qoleno “difayyannoho [‘bushaho’, NW].” (Erm. 3:17; 13:10; 17:9; 1 Mot. 11:9) Hakko daafira, wodaninke yaannore calla assinummoro mayi ikkara dandaanno? Lawishshaho hanqine heeꞌne doodhinummoro mayi ikkara dandaanno? Bashsho hatto assitine egentinoonniha ikkiro tenne huwata diqarrisannoꞌne. (Law. 14:17; 29:22) Qoleno hexxo mudhine heeꞌne dancha doorsha doodhine anfeemmo? (Kir. 32:6-12; Law. 24:10) Mitto doorsha hanqine woy hexxo mudhine heeꞌne doodhineemmoha ikkiro soꞌnammora dandiineemmo. w17.03 2:12, 13

Guuntete xeꞌne noonkere ikkinoommo daafira, soꞌro loosa rakkannonke. Ikkollana, Yihowa “cubbinke deerrinni diqorochishannonke”; isi cubbinkera maaro eꞌnummoronna Yesuusite wodote kakkalo widoonni ammanatenni shinqummoro maarannonke. (Far. 103:10) Ikkirono, Daawiti Selemoonira kulinonte gede, Yihowa hagiirsiisanno garinni magansiꞌrate isira “woꞌmu wodaninni . . . soqqama” hasiissannonke. (1 Dud. 28:9) Yihowara “woꞌmu wodaninni” soqqamate, iso lubbora baxanna iso magansiꞌnanni heeꞌra hasiissanno. Qullaawu Maxaafi giddo batinye basera “wodana” yaanno qaale, mittu manchita giddoyidi ayimmasi kulate horoonsiꞌnoonni. Kuni qaali hakko manchi hasatto, hedo, dooꞌꞌo, lao, dandoo, mitto coye assate kakkaꞌanno gede assannosirenna mixosi leellishanno. Konni daafira, Yihowara woꞌmu wodaninni soqqamanno manchi, iso magansiꞌrannohu, magansiꞌra hasiissannosihura woy woga wonshate geeshshira calla yee diꞌꞌikkino. Ninkena? Guuntete xeꞌne noonkere ikkinummorono, Magano banxeemmohanna iso magansiꞌneemmoha ikkiro, Isira woꞌmu wodaninni soqqama dandiineemmo.—2 Dud. 19:9. w17.03 3:1, 3

Mitto dancha coye assineenna qinaannonke wote, Yihowa ‘wodaninke giddo noori’ xawo fulanno gede ‘fonqole afara yee facci asse agurinonkeha’ ikkakka? Lawishshaho, mittu rodii lallawo seekke qixxaawe lowo manni albaanni shiqishino yino. Lowo manni tennera baasa naadisi. Isi mannu konni garinni galatinositera naaxxannoha ikkara dandaanno. Wolu manni naadannonke wote, Yesuusi coyiꞌrino qaale qaaga hasiissannonke: “Hajanjoonniꞌnere . . . wonshitinanni woyite, ‘Ninke tidhinoommokki soqqamaanooti; assa hasiissannonke daafiralla assinoommo’ yiiyye.” (Luq. 17:10) Togoo wote Hiziqiyaasi lawishshi kaaꞌlannonke. Naaxxasi xawo fultinohu Maganu “assinosi danchummara galata” qolikki gati yannaraati. (2 Dud. 32:24-27, 31) Yihowa assinonkere heeshshi gotti assine hedanke Isi giwanno akatta hooꞌlate kaaꞌlitannonke. Ammaname mannasi kaaꞌlanno Magani Yihoware naande coyiꞌra dandiineemmo. w17.03 4:12-14