Ella

Rosiisaanchu rosaanosi daafira lowo geeshsha heda hasiissannosi. Insa albillitte ayyaanaamittete roduuwakki ikkitannota hedi. Insara alamete noo jaalla aguranna biddi assiꞌra hasiissannonsare baala biddi assidhe Yihowara soqqama shota diꞌꞌikkitannonsa. Woꞌnaalshu noonsari Qullaawu Maxaafi rosiisaano, rosaanonsa songote roduuwi ledo egensiissanno; songote roduuwi rosaanchu ayyaanaamittetenni lophanno gede kaaꞌlitannosi. Qullaawu Maxaafi rosaano ayyaanaamittete kaaꞌlannonsahunna qarru iillannonsa woyite jawaachishannonsahu Maganu manni ledo jaalooꞌma baxxara dandiitanno. Qullaawu Maxaafi rosaanchi songote miilanna ayyaanaamittete maatenke wido ikkinohu gede asse hedara hasiꞌneemmo. Isi hagiirsiisannohunna baxisannohu roduuwu maamari wido ikkara hasiꞌneemmo. Hatto assinummoro Yihowa baxannokki manni ledo noosi aante agura diqarrissannosi. (Law. 13:20) Albi jaallasi gibbusirono, Yihowa dirijjite giddo addu jaalla afiꞌra dandaannota huwatanno.—Maq. 10:29, 30; 1 Phe. 4:4. w20.10 17 guf. 10-11

Yihowa ledo dancha aante heedhankera hasiꞌnummoro Yesuusi jaalla ikka hasiissannonke. Hatto yineemmohu mayiraati? Hanni lame korkaata laꞌno. Umihunni, Yesuusi harunsaanosira ‘Anniꞌya baxinoꞌnehu ane baxxinoonniehuraati’ yiino. (Yoh. 16:27) Isi lede “Ane widoonni ikka hoogiro, ayino Anniꞌyawa daannohu dino” yiino. (Yoh. 14:6) Yesuusi ledo jaaloommikkinni Yihowa ledo jaaloomate woꞌnaala mittu minira waalcho agurre waalchu nookki widoonni eate woꞌnaalate gedeeti. Yesuusi “Ani geꞌreewu waalchooti” yee coyiꞌri woyite togoo lawishsha horoonsiꞌrino. (Yoh. 10:7) Layinkihunni, Yesuusi Annisi lawishsha guutu garinni harunsino. Isi harunsaanosi “Ane afinohu annaꞌyano afino” yiino. (Yoh. 14:9) Konnira, Yihowa daafira ronseemmo doogga giddo mitte Yesuusi heeshsho xiinxallate. Yesuusi daafira ronsummo kiiro iso albinni roore banxeemmo. Yesuusira lubbote jaalla ikkinummoro qole, Yihowara noonke baxilli lexxanni haꞌranno. w20.04 21-22 guf. 5-6

Dhibbu minira qolinohe? Woy milli yaattohu bisu xeꞌne noonsari ofoltanno gaarenniiti? Dhuku ajinohe woy ille dunkitinohe? Hatto ikkiro, wedellunna ordu fayyimma noonsari ledo doda dandaatto? Ee dandaatto! Batinyu akkallenna dhuku anje amaddinonsari heeshshote doogora doddanni no. Insa hatto assa dandiitinohu uminsa wolqanni diꞌꞌikkino. Insa Kiristaanu gambooshshe viidiyotenni woy silketenni harunsite Yihowa aanno wolqa afiꞌrate sharrantanno. Qoleno, akimete, towaatannonsa manniranna fiixinsara farcidhe manna rosaano assate looso loossanno. Dhuku anje amaddinohe daafira heeshshote doogora doda didandeemmo yite hexxo mudhitooti. Yihowa ammanakkinna daafurokki hawannokki daafira lowo geeshsha baxannohe. Xa albinni roore Yihowa kaaꞌlo hasiissannohe; isino tuge diagurannohe. (Far. 9:10) Hatteentenni isi Jaalakki ikkannohe. w20.04 29 guf. 16-17

Ammaꞌno noosi manchi ledo hiittee hajo kayissine hasaawa dandiitinanni? Sumuu yitinanni hedo afiꞌrate woꞌnaalle. Hasaawissinanni heedhinoonni manchi halaalaanchu Magani mitto calla ikkinota, mannu ooso gatisaanchi Yesuusa ikkinota, hattono tini busha alame muli yannara baꞌannota ammanannoha ikkara dandaanno. Sumuu yitinanni hedo kaima assidhine Qullaawu Maxaafi sokka manchu hasatto kakkayisanno garinni kullesi. Mannu ammaꞌnote rosiisaano kultannonsare mitto mittonka coye ammananno yaa diꞌꞌikkino. Hakko daafira, mittu manchi ammaꞌno buuxxinihu gedensaanni nafa manchu mayyee ammanannoro huwatate woꞌnaalle. Misiyoone ikke soqqamannohu mittu rodii mitu manni Sillaase ammanannota coyiꞌrannoha ikkirono, Annu, Beettunna qullaawu ayyaani mitto Maganooti yee ammanannokkita wodanchino. Isi togo yiino: “Tenne afanke hattoo manna hasaawinseemmo woyite sumuu yitanno hedo afiꞌra roore shota ikkitannonke gede kaaꞌlitannonke.” Hakko daafira mannu addinta maa ammanannoro afate woꞌnaalle. Hatto assitiniro, soqqamaasinchu Phaawuloosi gede “baalunku mannira baalankare” ikka dandiitinanni.—1 Qor. 9:19-22. w20.04 10 guf. 9-10

Daanieelino Yohaannisino Yihowaranna Yesuusira soqqantannori hattenne quuxxote yannara gatte saꞌannota coyidhino daafira, bashshi diyineemmo. Daanieeli ‘suꞌmansa Maganu maxaafira borreessinoonniri’ baotenni gattannota coyiꞌrino. Ikkina suꞌmanke konni maxaafira borreessinanni gede maa assa hasiissannonke? Maganu Geꞌrecho Yesuusa ammanneemmota loosunni leellisha hasiissannonke. (Yoh. 1:29) Qoleno heeshshonke Yihowara sayinse uyinoommota leellishate cuuama hasiissannonke. (1 Phe. 3:21) Hakkiinnino sae, wolqanke assitu geeshsha wolootu Yihoware rossanno gede kaaꞌline, Maganu Mangiste doodhinoommota leellisha hasiissannonke. Yihowanna ammanantino soqqamaanosi amaddino dirijjitesi albinni roore addaxxa hasiissannonke yanna xaati. Maganu Mangiste doodha hasiissannonkehuno xaati. Hatto assinummoro, Maganu Mangiste aliyye mootenna wodiidi moote huntanno woyite ninke baotenni ganteemmo. w20.05 16 guf. 18-19

Addaaminna Heewani Maganu suꞌmi Yihowa ikkinotanna isi ayimma daafira lowore afino. Qoleno Isi Kalaqaancho ikkinota, hattono heeshsho, Gannate ikkitino uullanna guuta galte uyinonsahu iso ikkinota afino. (Kal. 1:26-28; 2:18) Ikkina insa guuta surrensa, Yihowa assinonsare baala hiincitanni heeꞌrate horoonsidhinoni? Woy insa Yihowara noonsa baxillinna galati baikkinni heeꞌranno gede assiꞌrate sharrantinoni? Maganu diini fonqolinsa yannara tini xabbe leeltino. Sheexaanu hamashsho horoonsiꞌre Heewani togo yee xaꞌmino: “Halaalintanni Maganu Edeni Gennetete noo haqqe baalante laalo ittinannikki gede hoolinoꞌneni?” (Kal. 2:16, 17; 3:1) Tini giddo kaphonna xagarro afidhino xaꞌmo, maanxe worroonni marze gedeete. Maganu mitte haqqicho laalo agurranna baalante haqqe laalo ita dandiitannota kulinonsa. (Kal. 2:9) Sheexaanu coyiꞌrinori, Maganu gaggaadaamoho yine hendanni gede assannoreeti. Heewani ‘Maganu hoꞌlinonkehu danchu coyi noo ikka?’ yite heddinoha ikkara dandaanno. w20.06 3-4 guf. 8-9

Mite Yihowa soqqamaano ammanate roduuwinsa assitinorinni xissiisidhino. Soqqamaasinchu Phaawuloosi roduuwinke ‘koffi assitannonke’ woyiti heeꞌrara dandaannota coyiꞌrino. Wole agurina insa miiccankera nafa dandiitanno. Qoropha hoongummoro, tennera quwa saꞌne giirammammora dandiineemmo. Tini, mittu rodii sunu sununni Yihowa manniwiinni xeertiꞌranno gede assitasira dandiitanno. Wodiidi Ameerikira heeꞌrannoha Pabilo yinanni rodoo gara ikkinokkire assino yine beebba kassansoonnisi daafira, songote giddo noosita soqqanshote qoosso hoogino. Ikkina isi hiitto ikkiyya? Pabilo “Tennera hanqe, sunu sununni songotewiinni xeertiꞌroommo” yiino. Woy alba cubbo loosino mancho, tiiꞌꞌisi bushiishanni waadasiranna Maganu dibaxannoe yee hedanno gede assasira dandaanno. Cubbisira maaro eꞌꞌeenna Maganu gatona yiinosiha ikkirono, isi kayinni Maganoho soqqamate diꞌꞌikkoommoho yee hedara dandaanno. Togoo coyi tuncu yiinonsa roduuwi daafira mayi macciishshamannohe? w20.06 19 guf. 6-7

Xiinxalloota ikkine iillitankera dandiitanno gawajjo balanxe hedanna gargadha hasiissannonke. (Ibi. 5:14) Lawishshaho, boohaarreemmo boohaarsha hayyotenni doodha hasiissannonke. Duucha woyite televizhiinete pirogiraamenna filme maaeela coye leellishshanno. Togoo coyi Magano hanqisanno; ninkeno gawajjasi digattanno. Konnira Maganoho noonke baxilli sunu sununni qiidanno gede assara dandaanno boohaarsha giwa hasiissannonke. (Efe. 5:5, 6) Kaadaasine roduuwinke daafira kapho tuqisate woy Yihowa dirijjite huluullammeemmo gede assate halashshitanno kaphi gawajjannota wodancha hasiissannonke. (1 Xim. 4:1, 7; 2 Xim. 2:16) Togoo kaphi ammananke hoshooshara dandaanno. Konni totainni dogammeemmokki gede qoropha hasiissannonke. Mayira? Korkaatuno togoo kapho halashshannohu ‘wodanu soorraminohonna halaalu baino mannaati.’ Hasattonsa ‘moronshonna nyerrimma’ kaꞌanno gede assate. (1 Xim. 6:4, 5) Insa kaphonsa ammannammoranna roduuwanke huluullammammora hasidhanno. w20.09 29 guf. 13, 15

Minaanninna minaama mimmito baxanna ayirrisa hasiissannonsa. (Efe. 5:33) Qullaawu Maxaafi adhantenni roore aa hasiissannonketa rosiisannonke. (Soq. 20:35) Minaanninna minaama mimmito baxannohunna ayirrisannohu hiittoore ikkirooti? Umonsa heeshshi assannore ikkirooti. Batinyu adhamino Kiristaani umonsa heeshshi assansa galtensanni hagiirraamma ikkitanno gede kaaꞌlitinonsa. Lawishshaho Istiifeni yinanni minaanni togo yiino: “Roorenkanni qarru kalaqamanno woyite, galteꞌne ledo mitteenni mala hasse. ‘Anera woyyannoeri maati?’ yaantenni ‘Ninkera woyyaannonkeri maati?’ yitine hedde.” Galtesi Isteefaniino togo yitino: “Kanca yaanni heeꞌra baxannohu dino. Coyi kawa kaꞌaa higannonke woyite, coyiꞌrammeemmo gede assinonkeri maatiro afate woꞌnaalleemmo. Hakkiinni, huuccatto assiꞌne seekkine xiinxallinummohu gedensaanni kalaqamino qarra tira dandiineemmo gara hasaambeemmo. Mimmitu ledo itamantenni qarra tirate olammeemmo.” Minaanninna minaama hasiisannohunni aleenni uminsa daafira hedannokkiha ikkiro, lowo geeshsha hagiidhanno. w20.07 3-4 guf. 5-6

Yihowara soqqammeemmo woyite uminke jawaante woy dandoo addaxxa dihasiissannonke. Soqqamaasinchu Phaawuloosi lowo roso rosinoho; qoleno iso mannu ayirrisannosihunna seeru rosiisaancho ikkinohu Gemaaliyaali yinanni Yihudichi rosiisinosi. (Soq. 5:34; 22:3) Alba Phaawuloosi Yihudu manni mereero ayirradoho. (Soq. 26:4) Ikkirono, Phaawuloosi umosi diaddaxxino. Phaawuloosi, mannu ayirrisannosi gede assitinosi coyibba xiixamikkinni facci asse agurino. (Fil. 3:8) Isi Kiristoosi harunsaancho ikkate yee lowore agurino. Iso umisi daga gibbinosi. (Soq. 23:12-14) Gobbasi qansoota ikkinohu Roomu manni ganinosi, hattono usursiisinosi. (Soq. 16:19-24, 37) Qoleno Phaawuloosi laanfesi waaddinosi. (Rom. 7:21-25) Ikkollana, isi mannu giwinosi daafira woy laanfesinni kainohunni Kiristoosi rosaancho ikka diagurino; hatteentenni ‘wolqiweellesinni tashshi yiinosi.’ Mayira? Korkaatuno Maganu wolqa giddosi loossanna laꞌꞌannohu wolqiweelanno woyiteeti.—2 Qor. 4:7; 12:10. w20.07 16 guf. 7-8

Xaa yannara Maganu Mangisteha sabbakate looso illachisha hasiissannonke. Yesuusi isi reyihu gedensaannino kuni loosi uurrannokkitanna halaꞌladunni loosamannota coyiꞌrino. Isi reyotenni kaihu gedensaanni mite rosaanosi maalaletenni lowo qulxuꞌme woshshaaxxitanno gede assino. Yesuusi hakkawoyite rosaanosira manna woshshaadate loosi wolu baalunku loosinni roore hasiisannoha ikkinota luphi asse xawisino. (Yoh. 21:15-17) Isi iimira haꞌrara albaanni, rosaanosi sabbakate looso Israeelete calla ikkikkinni gobbate qacce geeshsha loossannota kulinonsa. (Soq. 1:6-8) Boodu diri gedensaanni Yesuusi soqqamaasinchu Yohaannisira “Mootichu barra” ikkannore ajuujatenni leellishinosi. Sokkaasinchu massaganna Yohaannisi “baattote aana noo gosara, gaꞌretenna addi addi afiinni coyiꞌranno manni baalaho” hegereta “Danchu Duduwi sokka” dudumbanna laino. (Aju. 1:10; 14:6) Tini Yihowa ikkino yaa geeshsha sabbakate looso xaa yannarano loonsammora hasiꞌrannota leellishshanno. w20.09 9 guf. 5

Abirihaamira maatesi giddono qarru kalaqamino. Baxanno minaamasi Saara ooso diꞌꞌiltino. Insa tennenni kainohunni lowo diro xissiisiꞌre keeshshino. Yannate gedensaanni Saara soqqamaanchose Aggaara ooso iltansara Abirihaamira uyitino. Ikkollana Aggaara Isimaeeli godobbuti Saara misha hanaffino. Kuni coyi lowo qarra abbino daafira Saara Aggaara mininni fushshite haꞌrissino. (Kal. 16:1-6) Jeefote Saara godobbe Abirihaamira labbaa qaaqqo iltu; Abirihaamino isira Yisihaaqi yee suꞌma fushshi. Abirihaami lamenta oososi yaano Isimaeelinna Yisihaaqi baxannonsa. Ikkollana Isimaeeli Yisihaaqi qacifatinosi daafira Abirihaami Isimaeelinna Aggaara mininni fushshe haꞌrisino. (Kal. 21:9-14) Gedensoonni Yihowa Abirihaami beettosi Yisihaaqi kakkalanno gede xaꞌmino. (Kal. 22:1, 2; Ibi. 11:17-19) Abirihaami lamente yannara yannate gedensaanni Yihowa oososi daafira eino qaale wonshannota addaxxino. w20.08 4 guf. 9-10

Reyotenni kaino manni akkala mannimmansa fushshe hoole Maganu seerinni galanno woyite mageya hagiidhannoro hanni hedi. Hatto assanno manni hegerera gannatete heeꞌranno. Maganoho finqiltannori kayi gannatete noo salaame huntara worre dilaꞌnanninsa. (Isa. 65:20; Yoh. 5:28, 29) Lawishsha 10:22 Yihowa “maasso jiro abbitanno; aanahono mitiimma dileddanno” yitanno; Maganu Mangiste hunda heedhanno soqqamaasinesi baala tini halaale ikkitinota laꞌanno. Yihowa ayyaani kaaꞌlannonsa daafira Maganu manni ayyaanaamittetenni durooꞌmanno; insa albinni roore Kiristoosi faale hadhanno daafira guuta ikkitanno. (Yoh. 13:15-17; Efe. 4:23) Insa barru baala gellessanna dancha manna ikkitanni hadhanno. Hakka woyite heeshsho baxissanno gari addiiti!—Iyo. 33:25. w20.08 17 guf. 11-12

Mitu Kiristaani horo adhamikkinni heeꞌrate doodhinota qaaga hasiissannonke. Mitu roduuwi adhama hasidhannoha ikkirono, insara maltino galte afiꞌra hooggara dandiitanno. Mitu galte shiidhinore ikkitara dandiitanno. Ikkihano ikkiro, songote giddo noore adhaminokki Kiristaana ‘Mayira diadhantinanni?’ woy ‘Galte hansoꞌnenni?’ yine xaꞌma garahoni? Insa galte hassenke yite amaaꞌlitukkinni ‘Galte hansoꞌnenni?’ yinummoro mayi macciishshamannonsa? (1 Xim. 5:13) Adhantinokki roduuwi adhama hoogansara ikkikkinni dancha akatta noonsa daafira galantummonsaro hagiidhitanno. Adhama hooggino daafira marara agurre ammanantino daafira galata hasiissannonke. Hatto assinummoro adhantinokki roduuwinke ‘Ninke kiꞌne dihasiꞌneemmoꞌne’ yitannonke yite diheddanno. (1 Qor. 12:21) Hatteentenni insa ayirrinseemmonsatanna songote giddo noonsa qeecha naandeemmota huwattanno. w20.08 29 guf. 10, 14

Gedensaanni Yesuusi soqqamaasinchu Phaawuloosirano leellino. (1 Qor. 15:8) Phaawuloosi (Saawuli) Demaasiqo haꞌranni doogo heeꞌre reyotenni kainohuta Yesuusi huuro macciishshino; hattono ajuujatenni Yesuusira iima noosi ayirrinye laino. (Soq. 9:3-5) Tini Yesuusi kao maatto ikkitinokkita ledde buuxissanno tajeeti. (Soq. 26:12-15) Phaawuloosi alba Kiristaana shorrannoha ikkino daafira, isi farciꞌrannori mitu mannira dhagge ikkinonsa. Isi Yesuusi reyotenni kainota ammanihu gedensaanni, wolootuno konne halaale ammantanno gede diinaggaawe sabbakkino. Phaawuloosi gannoonnisiha, usurroonnisiha, hattono markaawete dano iillitinosiha ikkirono, Yesuusi ree reyotenni kainota cince sabbakino. (1 Qor. 15:9-11; 2 Qor. 11:23-27) Phaawuloosi Yesuusi reyotenni kainota ammanino daafira, shinannisita nafa waajjikkinni sabbakino. Tini atino Yesuusi reyotenni kainota ammanatto gede diassitannohe? Qoleno kaote hexxo albinni roore ammanatto gede diassitannohe? w20.12 3 guf. 8-10

Ninkeneeto togo yine xaꞌma dandiineemmo: ‘Songote gambooshshuwa ganye haꞌreemmo?’ Yihowa dirijjite qixxeessitino gambooshshe haꞌneemmo woyite, Yihowawiinninna roduuwinkewiinni jawaante afiꞌneemmo. (Mat. 11:28) Qoleno ninkeneeto, ‘Qullaawa Maxaafa ganye xiinxallate rosichi nooe?’ yine xaꞌma dandiineemmo. Maatekki ledo heeꞌrattoha ikkiro, lamalate kiiro maatete magansiꞌra assiꞌrate yanna gaaꞌmatto? Woy callu heeꞌrattoha ikkiro, lamalate kiiro maate assitannohu gede assatto? Wolqakki assitu geeshsha sabbakatenna manna rosaano assate sharramatto? Ninkeneeto hatto yine xaꞌma hasiissannonkehu mayiraati? Qullaawu Maxaafi Yihowa hedonkenna wodananke laꞌꞌannota kulannonke daafira ninkeno layiꞌra hasiissannonke. (1 Dud. 28:9) Hasattonkenna hedonke biddi assiꞌra hasiissannonketa huwantummoro, Yihowa biddi assiꞌneemmo gede kaaꞌlankera huucciꞌra hasiissannonke. Albillitte iillannonke fonqolira qixxaawa hasiissannonkehu xaati. w20.09 19 guf. 19-20

Yesuusi, isi rosaancho ikka hasiꞌranno manchi maa assa hasiissannosiro lawishshunni kulino. Isi mine miꞌna hasiꞌranno manchi daafiranna olaho fulanno moote daafira coyiꞌrino. Yesuusi mine miꞌnannohu miꞌne gudate “mageeshshi woxi hasiisannosiro” ofolle maꞌla hasiissannosita coyiꞌrino; hattono olaho fulanno moote olantosi ola qeeltannoronna teꞌee ‘ofolle maꞌla’ hasiissannosita coyiꞌrino. (Luq. 14:27-32) Hatteente gede, Yesuusi rosaancho ikka hasiꞌranno manchi maa assa hasiissannosiro seekke buuxa hasiissannosi. Konni daafira Qullaawu Maxaafi rosaanonke lamalate kiiro xiinxallitanno gede jawaachisha hasiissannonke. Ninke Qullaawu Maxaafi rosiisaano ikkinoommo daafira, rosiinseemmore balanxe seekkine qixxaawa hasiissannonke. Rosaanchokki heddanni konne roso xawe leellannosi garinni hattono loosu aana hosiisa dandaanno garinni rosiisa dandaatto gara hiinci.—Neh. 8:8; Law. 15:28a. w20.10 7 guf. 5; 8 guf. 7

Yesuusi hajajo digoꞌlitinote. Hajajosi mannaho rosiisa hasiissannonke. Kayinni manna rosaano assineemmo woyite dea hasiissannonkekkiri no. Yesuusi, ‘Hajajoommoꞌnere baala rosiissensa’ diyiino. Hatteentenni isi, “Hajajoommoꞌnere baala assitanno [“agadhitanno,” NW] gede rosiissensa” yiino. Tenne hajajo agadhate Qullaawu Maxaafi rosaancho rosiisa calla ikkikkinni hajajosi ma garinni agadhannoro kaaꞌlano hasiissannonke. (Soq. 8:31) Hajajo ‘agadhate’ yaa hajajamate yaate. Mannaho Qullaawa Maxaafa xiinxallinseemmo woyite, Maganu maa assinammora hasiꞌrannoro rosiinseemmonsa. Kayinni kawiinni sainore assa hasiissannonke. Qullaawu Maxaafi rosaanonke rossinore barru baala loosu aana hosiissanno gede rosiisa hasiissannonke. (Yoh. 14:15; 1 Yoh. 2:3) Qullaawu Maxaafi rosaanonkera dancha lawishsha ikkine, rosu mine, loosu basewa woy boohaartanno woyite xinta ikkinoha Qullaawu Maxaafi halaale loosu aana hosiissanno gara leellisha dandiineemmo. Qullaawu Maxaafi rosaanonke qullaawu ayyaani massagannonsa gede, insa albaanni Yihowa huucca dandiineemmo.—Yoh. 16:13. w20.11 2-3 guf. 3-5

Yesuusi rosaanora qarra ikkinonsari no. Lawishshaho hakkawaro nooti Qullaawa Borro shiimatella. Xaa yannara ninkera noonketi Qullaawa Borro xiinxallate kaaꞌlitanno borro dinonsa. Hattono Yesuusi rosaano addi addi qaale coyiꞌranno mannira sabbaka hasiissinonsa. Togoohu qarra ikkanno coyi heeꞌrirono, kuri diinaggaabbe soqqantanno rosaano, mannu hedonni dandaamannokkiha lawanno looso loossino; insa boodu diri giddo dancha duduwo “kalqe baalate” sabbakkino. (Qol. 1:6, 23) Xaa yannarano, Yihowa mannasi massaganninna jawaachishanni no. Yihowa mannasi massagannoti qara doogo qullaawu ayyaaninni borreessamino Qaalisi widoonniiti. Qullaawu Maxaafi Yesuusi soqqanshorenna harunsaanosi isi hanafino looso loossanno gede hajajinota kulanno. (Mat. 28:19, 20) Yihowa mallaadannokki Maganooti; isi “baattote aana noo gosara, gaꞌretenna addi addi afiinni coyiꞌranno manni baalaho” dancha duduwo dudumbannita masaalino. (Aju. 14:6, 7) Isi Mangistesi sokka mannu baalu macciishshara hasiꞌranno. w20.10 21 guf. 6-8

Moote Daawiti Yihowa “Seera” baxanno manchooti. (Far. 1:1-3) Daawiti Yihowa umo heeshshi assitannore gatisannota, booꞌnaleeyye kayinni giwannota afino. Konnira, Daawiti Maganu seeri hedosi biddi assannosi gede assiꞌrino. Isi togo yee borreessino: “Amaalinoeha Kaaliiqa galaxxeemmo; wodaniꞌya hashsha nafa seejjannoe.” (Far. 16:7) Umonke heeshshi assineemmore ikkinummoro, gara ikkitinokki hedo gara ikkinokkire assineemmo gede assitunkekkinni Maganu Qaali biddi assannonke gede assiꞌneemmo. Maganu Qaali “Doogo tenneetina ise higgine hadhe” yee kulannonke. Doogo soꞌne gurara woy qiniitira hinge haꞌneemmo woyite qorowisiisannonke. (Isa. 30:21) Yihowa yaannonkere macciishshinummoro lowo horo afiꞌneemmo. (Isa. 48:17) Lawishshaho, amaallanninke woyite saalleemmo saalinni ganteemmo. Hattono Yihowa mittu baxillaanchu anni gede towaatannonketa huwanteemmo daafira isiwa albinni roore shinqeemmo.—Ibi. 12:7. w20.11 20 guf. 6-7

Tini Qorontoosi heeꞌrannohu mitu mannira hattoo lao heedhannonsa gede assitukkinni digattino. (1 Qor. 15:12) Wolootu qolte kao lawishshu yaattootilla, yaano mittu manchi cubbunni kainohunni “reyino,” Kiristaana ikkanno woyite kayinni “kaꞌꞌanno” yite heddannoha ikkara dandaanno. Kuni manni baxire coyiꞌrirono kao noota ammanannokkiha ikkiro, ammanansa mulla daafurooti. Maganu Yesuusa reyotenni kayisinokkiha ikkiro, cubbinsara wodo baantoonnikki daafira insa cubbu giddo no. Konni daafira, kao ammantannokkirira addu hexxo dinonsa. (1 Qor. 15:13-19; Ibi. 9:12, 14) Soqqamaasinchu Phaawuloosi umisi ‘Kiristoosi reyotenni kainota’ afino. Yesuusi kao alba uullate aana reyotenni kae wirro reyino manni kaonni baxxitinote. Phaawuloosi Yesuusi “reyitinorira reyotenni kaꞌꞌate umiha ikke” reyotenni kainota coyiꞌrino. Umo reyotenni kae ayyaanunni heeshshonniha ikkinohu Yesuusaati; qoleno mannu ooso giddonni umo iimira haꞌrinohu isooti.—1 Qor. 15:20; Soq. 26:23; 1 Phe. 3:18, 22. w20.12 5 guf. 11-12

Umi xibbi diro Yerusaalamete noohu aliidi bisi, Maganu manni mereero amanyootunna keeru heeꞌranno gede assate mittimmatenni loosino. (Soq. 2:42) Lawishshaho, 49 M.D. balla barcimate daafira kaꞌino hajo aliidi bisira shiqquta, qullaawu ayyaani massageennansa tenne hajo daafira hasaabbino. Aliidi Bisi tenne hajo hasaawe tira hoogoommero songote mereero babbadooshshu kalaqamanno daafira, sabbakate looso danchu garinni loosa didandiitanno. Soqqamaasinenna geerru Yihudoota ikkiturono, Yihudu budira digolantino woy konne roso rosiissannori widira higge dituqqitino. Hatteentenni insa Maganu Qaale xiinxallitino; hattono qullaawu ayyaani massagansara huuccidhino. (Soq. 15:1, 2, 5-20, 28) Tini mayi guma abbituyya? Yihowa insa assitinore maassiꞌrino daafira songotenni keerunna mittimma dibaꞌino; hattono jawaatte sabbakkino. (Soq. 15:30, 31; 16:5) Xaa yannarano, Yihowa dirijjite Maganu manni mereero amanyootunna keeru baꞌꞌannokki gede assate jawaatte loossanno. w20.10 22-23 guf. 11-12

Dirinkenni, fayyimmate qarrinni woy wolu korkaatinni kainohunni mite tiokiraasete qoosso afiꞌra hoongammora dandiineemmo. Hatto ikkiro Moote Daawiti lawishshi kaaꞌlankera dandaanno. Daawitira, Maganu mine minate lowo hasatto noosiha ikkirono, isi hatto assa dandaannokkita kulloonnisi; ikkirono isi Maganu konne looso loosara doorinoha woꞌmunni woꞌma kaaꞌlino. Daawiti shaqqillunni mine minate kaaꞌlannoha batinye culkanna camo nafa fushshino. Isi ninkera dancha lawishsha ikkinonke! (2 Sam. 7:12, 13; 1 Dud. 29:3-5) Faransayete gobbara heeꞌrannohu Yuugi yinanni rodii dhibbu waadannosi daafira songote cimeessa ikke soqqama agurino; hattono isi mini giddo loonsanniha shiimmaadda looso loosa nafa didandiino. Isi togo yee borreessino: “Umi qara hexxo mudhoommo hattono waagu dinoe yee hedoommo. Yannate gedensaanni kayinni, asse afeemmokkiri noota ammane adha hasiissannoeta huwatoommo; asseemmori shiimare ikkirono Yihowara soqqame hagiirre afiꞌroommo. Daafurte heedhenni olama agurtinokkiri Gedewooninna sasu xibbi manni gede anino olama diagureemmo!”—Eje. 8:4. w20.12 25 guf. 14-15

Soqqamaasinchu Yohaannisi Yesuusi heeshshore borreessi woyite “baxille” yaanno qaale wolootu sasu Wongeellu borreessaanonni roore horoonsiꞌrino; insa sasunku baxillu daafira borreessitinore gamba assineenna Yohaannisi borreessino geeshshiha diꞌꞌikkanno. Isi qullaawu ayyaaninni borreessino borro Kiristaanu baalanka coye baxillunni assa hasiissannonsata kultanno. (1 Yoh. 4:10, 11) Ikkollana Yohaannisira konne roso rosate yanna hasiissinosi. Yohaannisi wedellichu noo yannara baxille leellishinohu duuchanka woyite diꞌꞌikkino. Lawishshaho, Yesuusi mitte yannara harunsaanosi ledo Samaariyu widoonni hige Yerusaalame haꞌranni no. Mitu Samaariyu manni insa wosinimma adha giwino. Hakka woyite Yohaannisi hakko qachi manna baala iiminni giira dirrite fiite itte guddara Yesuusa xaꞌmino. (Luq. 9:52-56) Wole yannarano, Yesuusi Maganu Gashshootira ayirrado bayicho aannonsa gede amansa Yesuusa xaꞌmitanno gede assitinori Yohaannisinna rodoosi Yaiqoobi ikkikkinni digatino. Wolootu soqqamaasine Yohaannisinna Yaiqoobi assitinore affuti lowo geeshsha hanqitino. (Mat. 20:20, 21, 24) Yohaannisi tenne baala soꞌro loosinoha ikkirono Yesuusi baxannosi.—Yoh. 21:7. w21.01 8-9 guf. 3-4

Yihowa woloota kaaꞌlannore assanno. Lawishshaho, isi heeshsho uyinonkehu ninke heeꞌne hagiidhinammora yeeti ikkinnina umisi horora yee diꞌꞌikkino. Hattono cubbonke diwate Beettosi aannonke gede giddeessinosihu dino. Isi Beettosi kakkalo asse uyinonkehu umisi fajjonniiti. Yesuusi assinorino roore anga woloota kaaꞌlannoreeti. Lawishshaho, isi fooliishsho hasiisse noosi yannara nafa fooliishshiꞌra agure lowo manna rosiisino. (Maq. 6:31-34) Dancha maatete umo ikkino manchi, assa hasiissannosihu shota ikkinokki coyi giddo mittu maatesira woyyannore doora ikkitinota afino; isi konne qeechasi mulluri gede asse dilaꞌꞌanno. Konnira mitto coye heeshshi gotti asse hedikkinni woy muddame diassanno. Hatteentenni Yihowa biddishsha harunsanno. (Law. 2:6, 7) Konni garinni, umosi ikkikkinni woloota kaaꞌlannore hedanno. (Fil. 2:4) Mittu minaanni Yihowanna Yesuusi lawishsha harunsannoha ikkiro, dancha maatete umo ikka dandaanno. w21.02 7 guf. 19-21

Moote Aasa wedellichu noo yannara isonooto heeshshi assannohonna worbaho. Lawishshaho, isi annisi Abiyanni aane moote ikkiti kaphu maganna hunate kaino. Qoleno “Yihudu manni akaakkansa Maganita Kaaliiqi hedo wonshanno gedenna seerasinna hajajosi agadhanno gede hajajino.” (2 Dud. 14:1-7) Itiyophiyu moote Zaara 1,000,000 olanto adhe Yihudu daga qasara dayita, Aasa Yihowa kaaꞌlannosi gede togo yee huucciꞌrino: “Kaaliiqaꞌya! Wolqa hoogginore wolqaataammuwiinni gatisannohu ate gedeehu dino. Maganonke Kaaliiqa! Ninke kune ate hexxine suꞌmakki addaxxine . . . dangoommona kaaꞌlinke.” Tini, Aasa Yihowa isono ikko mannasi gatisate wolqa noosita addaxxannota leellishshannote. Aasa iimi Annasi addaxxino daafira Yihowa Itiyophiyu olanto qeelanno gede assinosi. (2 Dud. 14:8-12) Togoote 1,000,000 ikkitanno olanto ledo olama shota ikkitinokkiti egennantinote; Aasa qeelinoti togoo olantooti. w21.03 5 guf. 12-13

Qullaawu Maxaafi giddo guuntete xeꞌne noonsa manni mimmitu ledo lubbora baxaminota leellishshanno xagge no. Hanni Yoonaataaninna Daawiti xagge laꞌno. Qullaawu Maxaafi, “Yoonaataani ledo lamunku lubbote jaalla ikkitu; Yoonaataanino [Daawiti] lowo geeshsha baxisi” yaanno. (1 Sam. 18:1) Daawiti Saaoolinni aane moote ikkanno gede buuraminoho. Hakkunni gedensaanni Saaooli Daawiti hinaasino daafira shaasira woꞌnaalino. Saaooli beetti Yoonaataani kayinni, annisira halame Daawiti shaate dikaino. Yoonaataaninna Daawiti jaalla ikkite heedharanna woꞌmanka woyite mimmito kaaꞌlitara qaale eꞌino. (1 Sam. 20:42) Yoonaataaninna Daawiti jaalla ikkitannokki gede assara dandaanno coyi noota wodanchineemmo woyite, insa mimmitu ledo lubbora baxamansa dhagge ikkitannonke. Lawishshaho, Yoonaataani Daawiti mito 30 diro bayiranno. Yoonaataani, konni qaaqqunna woꞌnaalshu noosikkihu ledo jaalooma dihasiissannoe yaara dandaanno. Ikkollana, Yoonaataani Daawiti woffi asse dilaino. w21.01 21-22 guf. 6-7

Yesuusi harunsaanosi addinta hagiirraamma ikkitannota kulinonsa. Qoleno iso baxxannorira fonqolu iillannonsata coyiꞌrino. (Mat. 10:22, 23; Luq. 6:20-23) Yesuusi rosaano ikkanke hagiirsiissannonke. Kayinni maateꞌne gibbaꞌnera, gashshootu darantinanni gede assaꞌnera woy ledoꞌne rossannorinna loossannori gara ikkinokkire assitinanni gede xixxiibbaꞌnera dandiitannota heddinanni woyite mayi macciishshamannoꞌne? Tenne hendeemmo woyite yaandeemmoha ikkara dandaanno. Batinyu manni dartu hagiirsiisannore diꞌꞌikkino yee hedanno. Maganu Qaali kayinni dartu iillannonke woyite hagiidhineemmo gede kulannonke. Lawishshaho rosaanchu Yaiqoobi fonqolu iillannonke woyite quwa saꞌne dadillantenni hagiidha hasiissannonketa borreessino. (Yai. 1:2, 12) Yesuusino dartu iillannonke woyite nafa hagiidha hasiissannonketa coyiꞌrino. (Mat. 5:11) Yihowa Yaiqoobi sokka borreessanno gede ayyaanisinni kakkayisinosi; tini sokka Kiristaanu fonqolu iillinsarono hagiirrinsa baꞌꞌannokki gede assiꞌrate kaaꞌlitinonsa. w21.02 26 guf. 1-2; 27 guf. 5

Ximootewoosi waro heeꞌrinohu mitu Kiristaani Maganu ledo loosate qoossonsa dinaadino. Kuri giddo gamu Deemaasi, Figeluusi, Hermogeneesi, Hemenewoosi, Isikindirinna Filixoosiiti. (1 Xim. 1:19, 20; 2 Xim. 1:15; 2:16-18; 4:10) Kuni manni baalu albira ayyaanaamittetenni worbuulle ikkikki digatino; gedensoonni kayinni muxxe ikkino coye naada agurino. Sheexaanu, Yihowa eeggo uyinonkeha muxxe coye facci assine agurreemmo gede assate sharramannohu hiittoonniiti? Hanni isi horoonsiꞌrannota mite xagarro laꞌno. Isi cuꞌmiꞌnoommo halaale sunu sununni facci assine agurreemmo gede assitara dandiitanno hedonna akatta boohaarshunna tuqu xaadooshshi widoonni halashshanno. Isi darawonke woy darte waajjine sabbaka agurreemmo gede assate woꞌnaalanno. Qoleno isi “egenno ikkitukkinni egenno” lawanno rosinni doogamme halaale agurreemmo gede assate sharramanno. Qoropha hoongummoro sunu sununni cuꞌmiꞌnoommo halaale agurrammora dandiineemmo.—1 Xim. 6:21. w20.09 27 guf. 6-8

Jaalikki woy maatekki miili xissiise egenninohe? Hatto ikkiro, Moote Daawiti beetti Abeseloomi xagge xiinxallakki kaaꞌlitannohe. (2 Sam. 15:5-14, 31; 18:6-14) Nabbawootto xagge heddanni xissiisiꞌrootto gara Yihowara hasaaphi. (Far. 6:6-8) Hakkiinni, kuni baalu ikki woyite Daawitira mayi macciishshaminosiro hedi. Isi Abeseloomi baxanno hattono Akixofeeli ammananno. Ikkirono insa lamunku kaaddinosi. Insa isi lowo geeshsha xissiisiꞌranno gede assitinosi hattono shaate nafa woꞌnaaltino. Daawiti wolootu jaallasino Abeseloomira halantara dandiitanno yee insa ammana hoogara dandaanno. Isi umisi daafira calla hedanna callichisi wole gobba xooqa dandaanno. Woy hexxo mudhe facci asse agurara dandaanno. Hatteentenni kaaꞌlannosi gede Yihowa huucciꞌrino. Qoleno kaaꞌlitannosi gede jaallasi xaꞌmiꞌrino. Qoleno Daawiti assara hedinore rahe assino. Isi Yihowa addaxxino hattono jaallasi ammanino. w21.03 15 guf. 7-8; 17 guf. 10-11