Maaja

Coyiꞌrate dandoonke baxillaanchu Maganinke uyinonke eltooti. Ikkirono coyiꞌrate dandoo garimale horoonsidhinori no. Sheexaanu Daawuloosi Heewanira kaphino; kuni kaphi mannu ooso cubbaataammanna guuntete xeꞌne noonsare ikkitanno gede assino. (Kal. 3:1-4) Addaami isi loosino soꞌrora Heewani wole agurina Yihowa nafa busha asse, coyiꞌrate dandoosi garimale horoonsiꞌrino. (Kal. 3:12) Qaayeeli rodoosi Aabeeli shiihu gedensaanni Yihowara kapho coyiꞌrino. (Kal. 4:19) Qoleno xaa yannara mite busha qaalla horoonsiꞌnoonnikki filme dino yaa dandiinanni. Rosaano rosu mine hattono jajjabbu loosu bayicho mancaꞌꞌa coye coyiꞌnanna macciishshitanno. Busha coye coyiꞌnanna macciishsha roso assiꞌnummoro, qoropha hoongummoro ninke uminke busha coye coyiꞌnammora dandiineemmo. Ninke Kiristaana ikkinoommo daafira Yihowa hagiirsiisa hasiꞌneemmo; hakko daafira busha coye coyiꞌra qorophineemmo. Qoleno tenne dhagge ikkitinota coyiꞌrate dandoonke danchu garinni yaano Maganonke guwisiꞌrate horoonsiꞌra hasiꞌneemmo. w22.04 4 guf. 1-3

Yesuusira maalaamittete coyira gara ikkitino lao noosi. Isi itatenninna agatenni hagiidhino. (Luq. 19:2, 6, 7) Isi mitte yannara umi maalale loosi woyite waa dancha woyinete xajjera qole soorrino. (Yoh. 2:10, 11) Qoleno isi reyi barra lowo waagi uddano uddiꞌre no. (Yoh. 19:23, 24) Ikkirono Yesuusi maalaamittete coye dibalaxisiisino. Yesuusi, Maganu Mangiste balaxisiinseemmoha ikkiro, Yihowa hasiisannonkere wonshannonketa rosiisino. (Mat. 6:31-33) Batinye roduuwa Yihowa woxu daafira uyinonke amaale harunsansa kaaꞌlitinonsa. Hanni mittu seenne adhinokkihu Daanieeli yinanni rodii woꞌnaalsha laꞌno. Isi togo yiino: “Shiimu noommo yannara heeshshoꞌya giddo ayyaanaamittete coye balaxisiisate murciꞌroommo.” Daanieeli heeshshosi bikkunnita assiꞌrino daafira, yannasinna dandoosi horoonsiꞌre batinye tiokiraasete looso loosa dandiino. Isi lede “Yihowa uyinoe atooti aye woxinni diafiꞌnanniho” yiino. w22.05 21-22 guf. 6-7

Ganyine Qullaawa Maxaafanna Qullaawu Maxaafi aana xintantino borro xiinxalline halaale banxeemmota leellisha dandiineemmo. Qoleno halaalu mine keeshshinoommo diri ikki geeshshihano ikkiro, woꞌmanka woyite rosa hasiissannonke. Xiinxallo shaaꞌꞌa looso diꞌꞌikkitino; kayinni kiissanno. Nabbawanna xiinxalla banxeemmori ninke baalanko yaa diꞌꞌikkino. Ikkirono Yihowa halaale seekkine huwanteemmo gede egenno ‘jawaante hasiꞌnammora’ koyisinonke. (Law. 2:4-6) Togo assate sharramanke woꞌmanka woyite kaaꞌlitannonke. Koori yinanni rodii Qullaawa Maxaafa nabbawanno woyite mitto mittonka qummeeshsha seekke illachishannota coyiꞌrino. Isi togo yiino: “Mitto mittonka lekkaalliidi qaagiishshanna fiixxanno hedo kultanno qummeeshshuwano laeemmo hattono lede xiinxalleemmo. . . . Konni garinni nabbawaꞌya lowo geya kaaꞌlitinoe!” Ninke xiinxallineemmohu konni garinni woy wolu garinnino ikko, yanna gaaꞌmine xiinxallate sharrammeemmoha ikkiro halaale naandeemmota leellinsheemmo.—Far. 1:1-3. w22.08 17 guf. 13; 18 guf. 15-16

Yesuusi uullate aana noo yannara rosaanosira Annisi daafira rosiisate kalaqama horoonsiꞌrino. Hanni isi rosiisino rosi giddo mitto laꞌno. Yihowa baalanka manna baxanno. Yesuusi Ilaalu Sibikate yannara rosaanosi batinyu manni mulluri gede asse laꞌꞌannoha lame kalaqama illachishshanno gede rosiisinonsa: insano arrishshotenna xeenaho. Kuri lamunku coyi heeshshotenni heeꞌrate lowo geeshsha hasiisannoho. Yihowa kuri coyibba isira soqqamannokki mannira hoꞌla dandaanno. Ikkirono isi shaqqillunni baalunku mannira xeenanna arrishsho aanno. (Mat. 5:43-45) Yesuusi konne roso horoonsiꞌre rosaanosira Yihowa baalanka manna banxammora hasiꞌrannota rosiisinonsa. Arrishsho eꞌanno woyite heeꞌranno biinfillenna xeena shoranna laꞌneemmo woyite Yihowa baalanka manna baxannota qaangeemmo. Isi lawishshi ninkeno baalunku mannira sabbanke baxille leellinsheemmo gede assannonke. w23.03 17 guf. 9-10

Soqqamaasinchu Yohaannisi maalaꞌlinohu mayiraati? Mitte mancho duumo moyicho guluffe noota laino daafiraati. Ise, ‘foorretenni egennantino manchooti’; suꞌmaseno ‘Batiꞌra Baabiloone’ woy Bayira Baabiloone yinoonni. Ise, ‘baattote aani mootoolla ledo foortanno.’ (Aju. 17:1-5) Bayira Baabiloone maati? Tini mancho poletiku gashshaano ledo foortinota kulloonni daafira, poletiku dirijjitta riqibbannota diꞌꞌikkitino. (Aju. 18:9) Tini mancho lawishshu yaattonni moyicho guluffannota kulloonni daafira, insara annatate woꞌnaaltanno. Qoleno Sheexaanu alameta hafuuraame daddalu dirijjitta riqibbannota diꞌꞌikkitino. Insa bande “baattote aana noo daddalaasine” yine kulloonni. (Aju. 18:11, 15, 16) Hundi Baabiloone kaphu ammaꞌnora maꞌnote. Hakko daafira Bayira Baabiloone kaphu magansiꞌra baala riqibbannoti dihuluullissannote. Isinni Bayira Baabiloone alamete doyichora noota kaphu ammaꞌno baala riqibbanno.—Aju. 17:5, 18. w22.05 11 guf. 14-16

Mitte ama, ‘Qaaqqiꞌya Yihowara soqqama doodhanso giwa ikka?’ yite hedase nooreentilla. Qoleno, annuwunna amuuwu oosonsara tenne Sheexaanu alame giddo lowo fonqoli iillannonsata afino. Hakkiinni saeno batinyu amuuwi oosonsa calluwinsa woy Yihowa Farciꞌraasincho ikkinokki anni ledo lossiꞌranno daafira lowo qarri iillannonsa. Fonqolo ikkanno coyi iillannonsari ammaꞌnotenni bebbeehantino maate calla diꞌꞌikkitino. Yihowa Farciꞌraasine ikkitino anniranna amara nafa, wedellu oosonsa ammanantinore Yihowa soqqamaano ikkitanno gede kaaꞌla shota ikka hooggansara dandiitanno. Quwa saꞌine yaaddinoonte. Yihowa kaaꞌlannoꞌne. Maatete magansiꞌrara qixxeessinoonni uduunne danchu garinni horoonsiꞌra dandiitinanni gara kultannoꞌne gede woꞌnaalshu noonsa annuwanna amuuwa amaaꞌla dandiitinanni. (Law. 11:14) Qoleno Yihowa oosoꞌne ledo danchu garinni hasaabbinanni gede kaaꞌlannoꞌne. Isi oosoꞌne surreranna wodanira noore affinanni gede kaaꞌlaꞌnera huucciꞌra dandiitinanni.—Law. 20:5. w22.04 17 guf. 4, 7; 18 guf. 9

Yesuusi Yihowa akatta guutu garinni leellishino; hakko daafira Yesuusa seekkine anfummo kiiro Yihowa albinni roore banxeemmo. (Ibi. 1:3) Yesuusa afa dandiineemmoti qara doogo xaggesi kulannoha shoole Wongeella xiinxallate. Qullaawa Maxaafa barru baala nabbawate rosichi noohekkiha ikkiro, xaanni Yesuusi daafira kultanno xagge nabbabbe hanafa dandaatto. Yesuusi daafira kultanno xagge nabbawatto woyite akattasi illachishi. Isi ruxxi yinikki shinqanniho; qoleno isi baxillunni, qaaqquullu isiwa dagganno gede asse hanqafinonsa. (Maq. 10:13-16) Yesuusi shaqqadohonna faasiiqaho; hattono rosaanosi isira giddonsata ruxxi yitukkinni hasaaphitanno. (Mat. 16:22) Konni garinni Yesuusi iimi Annisi lawishsha harunsino. Yihowano ruxxi yinikki shinqanniho. Iso huuccattotenni hasaawisa dandiineemmo. Qoleno huucciꞌneemmo woyite giddonketa gudinse kuꞌla dandiineemmo. Yihowa togo yaannonke yine diwaajjineemmo. Isi baxannonke hattono ninke daafira hedanno.—1 Phe. 5:7. w22.08 3 guf. 4-5

Kalaqaanchonke ikkino daafira Yihowa ninke daafira baalankare afino. Hanni hedi! Isi baattote aana noohu mittu mittunku manchi daafira baalankare afino. (Far. 139:15-17) Hakko daafira annuwinkenna amuuwinkewiinni ragiꞌnoommoti guuntete xeꞌne noonketa afino. Wole agurina isi heeshshonke giddo iillinonkeri hiittoore ikkineemmo gede assinonkero afino. Yihowa mannu ooso daafira baalankare afasi ma assanno gede assitannosi? Maarannonke gede assitannosi. (Far. 78:39; 103:13, 14) Yihowa gatona yaate quqquxamannota leellishino. Isi umi manchi Addaami assinorinni ninke baalunku cubbonna reyo ragiꞌnoommota afino. (Rom. 5:12) Cubbunninna reyotenni ninkeneetono ikko woloota gatisa dandiineemmo doogo dino. (Far. 49:7-9) Ikkollana baxillaanchu Maganinke mararinonke daafira, cubbuyinna reyotenni wolaphineemmo faro faninonke. Yohaannisi 3:16 kultanno garinni Yihowa ninke daafira yee reyara mitto Beettosi soyino.—Mat. 20:28; Rom. 5:19. w22.06 3 guf. 5-6

Yihowa soqqamaanchisi Iyyoobira kulinori, maartannore maarrannita leellishanno. Konne ammanamino mancho Elfaazi, Beldaadinna Soofaari yinanniri sasu manchi gawajjannore coyidhe lowo geeshsha xissiissinosi. Yihowa Iyyoobi insa daafira huuccanno gede kulinosi. Iyyoobi hatto assihu gedensaanni Yihowa iso maassiꞌrinosi. (Iyo. 42:8-10) Koma amaxxa gawajjitanno. Koma amada lowo duhi gedeeti; Yihowa konne duha aaninkenni hooꞌline fooliishsho afiꞌnammora hasiꞌranno. (Efe. 4:31, 32) Isi “hanqonna giirama” agurreemmo gede jawaachishinonke. (Far. 37:8) Tenne amaale harunsa hayyote. Koma amaxxa mannimmankenna surrenke gawajjitira dandiitanno. (Law. 14:30) Koma amaxxine koffi assinonke manchi gawajjamanno yine heda ninke hadho ange kaꞌne wolu manchi gawajjamanno yine hedate gedeeti. Woloota gatona yineemmoha ikkiro kayinni ninkeneetira baraarsha uyinanni heeꞌnoommo. Hatto assinummoro surretenna wodanu keere afiꞌneemmo; hattono Yihowara soqqammanni heeꞌra dandiineemmo. w22.06 10 guf. 9-10

Hexxonke gulleete gede hedonke agartannonke; qoleno Yihowa ledo noonke jaalooma huntannonte meessaneeto calla baxate hasattonni agartannonke. (1 Qor. 15:33, 34) Qoleno hexxonke Yihowa hagiirsiisate sharramanke waagu dinoote yine hendeemmokki gede agartannonke. Suꞌmira Iyyoobi jawaachisheemmo yee dayinohu Elfaazi Iyyoobira togoore coyiꞌrinota qaagge. Elfaazi togo yiino: “Mannu fayyaaleessa ikkara dandaannoni?” Qoleno isi Magano togo yiino: “Kuneeti, Maganu qullaawoota sokkaasinesi nafa diammaꞌnanno; isi albaanni gordu kalaqami nafa keeraancho diꞌꞌikkino.” (Iyo. 15:14, 15) Kuni waajjo kaphooti! Togo yine hendammora hasiꞌrannohu Sheexaane ikkinota qaango. Isi togoo coye calla hendeemmoha ikkiro hexxonke baꞌannota afino. Hakko daafira togoo kapho macciishshitooti. Yihowa hegere heeshsho afiꞌrattora hasiꞌrannotanna tenne mixo wonshiꞌratto gede kaaꞌlannoheta huluullantooti.—1 Xim. 2:3, 4. w22.10 25-26 guf. 8-10

Sheexaanu Iyyoobi qarru iillinoehu Yihowa dadillisoommo daafiraati yee hedara hasiꞌrino. Lawishshaho, Sheexaanu tonnenti Iyyoobi ooso mitteenni sagale ittanni heedheenna wolqaataame bubbe dagge insa noo mine diigganno gede assino. (Iyo. 1:18, 19) Qoleno isi iiminni giira dirrite Iyyoobi saadanna allaalaasinesi ittanno gede assino. (Iyo. 1:16) Bubbenna giira iiminni daggino daafira, Iyyoobi tenne assinohu Yihowaati yee hedino. Hakko daafira Iyyoobi Yihowa hanqisummokki digatoommo yee hedino. Ikkirono isi iimi Annasi dirumino. Iyyoobi lowo diro Yihowa batinye dancha coye uyinosita afino. Hakko daafira isi ‘Yihowawiinni dancha coye hagiirrunni adhummonte gede busha coyeno adha hasiissannoe’ yee hedino. Isi “Kaaliiqi suꞌmi galataminoha ikko” yiino.—Iyo. 1:20, 21. w22.06 21 guf. 7

Yesuusi Yohaannisi 17:14 aana rosaanosira togoo qorowishsha kulino. Roorenkanni saihu 100 diri giddo tini masaalo woꞌmitanna laꞌnoommo. Hiittoonni? Yesuusi 1914nni buuramino Moote ikkihunni shiima yanna gedensaanni Sheexaanu uullara tugamino. Xa isi uullate qooxeessira heeꞌre baꞌꞌanno yanna agadhe no. (Aju. 12:9, 12) Ikkirono isi disammi yee ofolle agadhe no. Sheexaanu lowo geeshsha hanqino daafira Maganu manna sianni no. (Aju. 12:13, 17) Hakko daafira alamete aana noo manni Maganu manna albinni roore giwanni haꞌrino. Ikkirono Sheexaanenna harunsaanosi waajjineemmo gede assannonkeri dino. Hatteentenni ninkeno soqqamaasinchu Phaawuloosi gede, “Maganu ninke ledo heeꞌriro, qeelankera dandaannohu ayeti?” yineemmo. (Rom. 8:31) Woꞌmunni woꞌma Yihowa addaxxa dandiineemmo. w22.07 18 guf. 14-15

Yesuusi tenne alame goofimarchi yannara sabbakate looso loosanno manni ajanno yee diyaadino. Isi faarsaasinchu coyiꞌrinohu masaalote qaali woꞌmannota afino; faarsaasinchu, “Olaho fulatto barra olantokki baxxe ledokki fultanno” yiino. (Far. 110:3) Sabbakate looso loossanni noottoha ikkiro, Yesuusiranna ammanamino borojjichira hajajantanni nootto; hattono tini masaalo woꞌmitanno gede kaaꞌlitanni nootto. Konne looso loonsanni heeꞌnoonni; kayinni qarra ikkannorino no. Maganu Mangiste daafira sabbakkannore mannu giwannonsa; qarra ikkannonsa coyi giddo mittu konneeti. Kaadaasine, ammaꞌnote massagaanonna poletiku mannooti loosinke daafira kapho tareessitanno. Fiixinke, anfoommo manninna ledonke loossannori konne totao adda assidhe, Yihowara soqqamanna sabbaka agurreemmo gede xixxiibbankera dandiitanno. Mite gobbara, gibbannonkeri ammanate roduuwanke waajjishiishshansara, gawajjitansara woy usurtansara dandiitanno. w22.07 8 guf. 1; 9 guf. 5-6

Yihowa Qullaawa Maxaafa ganyine xiinxallatenna nabbamboommore seekkine hiincate yanna gaaꞌminammora hasiꞌranno. Ronsoommore loosu aana hosiinseemmo woyite ammananke kaajjitanno hattono albinni roore iimi Anninkewa shinqeemmo. Tini iillannonke qarra dandiine saꞌneemmo gede jawaante ikkitannonke. Qoleno Yihowa Qaalesi addaxxitannorira qullaawa ayyaanasi aannonsa. Kuni ayyaani qole aye fonqolono dandiine saꞌneemmo gede “jawa wolqa” aannonke. (2 Qor. 4:7-10) Yihowa kaaꞌlonni “ammanaminohunna wodanaamu borojjichi” batinye borro, viidiyubbanna muuziiqa qixxeessannonke. Kuri coyibba ammananke kaajjishiꞌratenna ayyaanaamittetenni baqqi yine heeꞌneemmo gede kaaꞌlitannonke. (Mat. 24:45, NW) Yihowa mannisi qarru iillannonsa woyite mimmito baxannonna sheshifachishanno gede qajeelsinonsa. (2 Qor. 1:3, 4; 1 Tes. 4:9) Ammanate roduuwinke qarru yannara ammanammoommore ikkineemmo gede ninke kaaꞌlate quqquxantanno. w22.08 12 guf. 12-14

Ammanate roduuwinketa dancha akatta kulleemmoha ikkiro, insa albinni roore mimmitunniwa gamba yitanno gede assinanni heeꞌnoommo; tini qolte songote giddo baxillu heeꞌranno gede assitanno. Mito woyite ayyaanaamittetenni gikki yiino Kiristaani nafa mimmitu ledo sumuu yaa hoogara woy mereeronsa heewo kaꞌara dandiitanno. Soqqamaasinchu Phaawuloosinna muli jaalisi Barnabaasi mereero togoori kalaqamino. Insa misiyoone ikkite hadhu woyite, mittu Marqoosi ledonke haꞌro yaanna mittu dihaꞌranno yaanna mereeronsa lowo heewo kaꞌino. Hakko daafira lamunku mereero “lowo gibbo” kaꞌeenna insa babbaxxitino. (Soq. 15:37-39) Ikkirono Phaawuloosi, Barnabaasinna Marqoosi mereeronsa kawa kaꞌaa higino coye tirtino. Gedensoonni Phaawuloosi, Barnabaasinna Maarqoosi daafira danchare coyiꞌrino. (1 Qor. 9:6; Qol. 4:10) Ninkeno songote giddo noo roduuwinke ledo kawa kaꞌaanni higinonke coye heeꞌriro hasaambe tiranna insata dancha akattansa illachisha hasiissannonke. Konni garinni keerunna mittimma heedhanno gede assineemmo. w22.08 23 guf. 10-11

Yihowahu keeraanchu biddishshi garinni heeꞌrate sharrammeemmo woyite, wolootaho yoo yineemmokki gedenna insanni roore keeraano ikkinoommohu gede assine hendeemmokki gede qoropha hasiissannonke. “Gobba baalate gashshaanchi” woy Daanyi Yihowa ikkinota qaango. (Kal. 18:25) Yihowa wolootaho yoo yaate silxaane diuyinonke. Hanni keeraanchu manchi Yooseefi lawishsha laꞌno. Isi wolootu lowo geeshsha miiccinosiha ikkiro nafa insara yoo diyiino. Iso roduuwisi beebba assidhinosi, borojjimmate hirtinosi hattono Yooseefi reyino yite annansa ammansiissino. Lowo diri gedensaanni Yooseefi galagale maatesi ledo xaadino. Xa Yooseefi wolqaataamo gashshaancho ikkino daafira roduuwisira kaajjado yoo yaanna insa rabbisiꞌra dandaanno. Yooseefi roduuwi assitino bunshera addinta maaro eꞌinoha ikkirono insa isi hatto assannonke yite waajjitino. Yooseefi kayinni, “Waajjitinoonte! Bado qolammora ani Magano diꞌꞌikkoommo!” yee jawaachishinonsa. (Kal. 37:18-20, 27, 28, 31-35; 50:15-21) Yooseefi umosi heeshshi asse yoo Yihowara agurino. w22.08 30 guf. 18-19

Mittu manchi giddosita kuꞌle huucciꞌrino huuccattora Yihowa dawaro qolate ate horoonsiꞌrahera dandaannota afootto? Songote cimeessa, songote soqqamaancho, suwisaancho woy halashshaanchono ikkittoro woloota kaaꞌla dandaatto. Ajuno akkaluno, labbaahuno meya roduuwino woloota kaaꞌla dandaanno. Mittu Yihowa baxanno manchi kaaꞌlannosi gede Yihowa huucciꞌriro, Yihowa togoo mancho ‘jawaachishate’ duucha woyite songote cimeeyyenna wole ammanantino soqqamaanosi horoonsiꞌranno. (Qol. 4:11) Konni garinni Yihowaranna ammanate roduuwinkera soqqama lowo qoossooti! Fayya ubbanno woyite, kalaqamu dano iillitanno woyite woy dartu iillannonsa woyite ammanate roduuwanke kaaꞌlanna jawaachisha dandiineemmo. Woloota kaaꞌla hasiꞌneemmoha ikkirono ninke uminke maate miilla dhiwantinoha woy angate anje qarrissinonkeha ikkara dandaanno. Ikkirono roduuwanke kaaꞌla hasiꞌneemmo; insa kaaꞌlate dandiinummore baala assineemmo woyite Yihowa hagiidhanno.—Law. 19:17. w22.12 22 guf. 1-2

Addaxxinannire ikkate kaaꞌlannonkehu qaru akati baxilleho. Yesuusi baalantenni roortannoti lame hajajo, Yihowanna olliichonke baxa ikkitinota coyiꞌrino. (Mat. 22:37-39) Yihowara noonke baxilli addaxxinannire ikkate isiha guuta lawishsha harunsineemmo gede kakkayisannonke. Lawishshaho, ammanate roduuwinkera noonke baxilli fojonsa maanxeemmo gede assannonke. Insa gawajjannore, saalfattanno woy xissiisidhanno gede assannore horo assa dihasiꞌneemmo. Umonke heeshshi assa addaxxinannire ikkineemmo gedeno kaaꞌlitannonke. Umosi heeshshi assanno Kiristaanchi mitto coye balaxe kule mannu naadannosi gede assate diwoꞌnaalanno. (Fil. 2:3) Wolootu isi konne coye afino yite heddanno gede assate yee kula hasiissannosikki fojo dikulanno. Qoleno umonke heeshshi assa Qullaawu Maxaafi giddo woy borronke giddo xawinsoonnikki coye mannaho kulleemmokki gede kaaꞌlitannonke. w22.09 12 guf. 12-13

Sokkaasinchu Daanieeli maxaafi giddo kulloonni masaalo Maganu manni woꞌmunni woꞌma huwatanno yanna daggannota Daanieelira kulinosi. Ikkirono, ‘haxawarrootu mittoreno wodanchitannokkita’ coyiꞌrino. (Dan. 12:10) Ninke bushuullu wido ikkinoommokkita leellinsheemmo yanna xaati. (Mil. 3:16-18) Yihowa ‘baxxino woxi’ woy jajji gede asse laꞌꞌannore gamba assanni no. Ninkeno insa wido ikka hasiꞌneemmoti egennantinote. Addanko heeꞌnoommohu dhagge ikkitanno yanna giddooti. Kayinni muli yannara roore dhagge ikkanno coyi ikkanno. Muli yannara bunshe baala baꞌanna laꞌneemmo. Hakkiinni Yihowa Daanieelira eino qaali woꞌmanna laꞌneemmo. Isi Daanieelira, “Goofimarchu [barra] kaꞌe qeechakki adhatto” yiinosi. (Dan. 12:13) Daanieelinna shiiꞌrootto manni reyotenni ‘kaeenna’ laꞌꞌate quqquxamootto? Hatto ikkiro, xa ammanante heeꞌrate dandiittore baala assi; hatto assittoro, suꞌmikki Yihowahu heeshshote maxaafira borreessame heeꞌranno. w22.09 24 guf. 17; 25 guf. 19-20

Tini Hiziqeeli jawaachishshinositi dihuluullissannote. Mayira? Isi, Yihowa Musenna Isayaasi masaalaano asse soqqi woyiteno hatto yiinonsata qaaginoti dihuluullissannote. (Ful. 3:10; Isa. 6:8) Qoleno Hiziqeeli Yihowa kuri lamunku masaalaano qarra dandiite saꞌanno gede kaaꞌlinonsa gara afino. Hakko daafira Yihowa Hiziqeeli lame hige, “Soyammoheraati” yiisita kuni masaalaanchi Yihowa kaaꞌlannosita addaxxanno gede assannosiha ikkado korkaata afiꞌrino. Hakkiino sae Hiziqeeli maxaafi giddo duucha basera, “Yihowa qaali anewa dayi” yitanno yaatto no. (Hiz. 3:16, NW) Qoleno Hiziqeeli, “Yihowa qaali galagale anewa dayi” yee duucha hige borreessino. (Hiz. 6:1, NW) Addanko Hiziqeeli Yihowa soyinosita ammanino. Qoleno Hiziqeeli kakkalaanchu beetto ikkino daafira annisi isira Yihowa hundinni kayise masaalaanosira kaaꞌlannonsata kulino gara rosiisinosiha ikkara dandaanno. Yihowa Yisihaaqira, Yaiqoobiranna Ermiyaasira ‘ani ledokki noommo’ yiino.—Kal. 26:24; 28:15; Erm. 1:8. w22.11 2 guf. 3

Addaaminna Heewani cubbo loossinohanna sirchinsara reyo abbitinoha ikkirono, Yihowa mannu oosora hedinore disoorrino. (Isa. 55:11) Isi ammanantinoti mannu ooso hegerera heedhanno gede assate hedinori xaano disoorramino. Yihowa hedinore wonshate coyiꞌrinorenna assinore hedate woꞌnaalle. Yihowa reyitinore kayisannonsatanna hegere heeshsho aannonsata qaale eino. (Soq. 24:15; Tit. 1:1, 2) Ammanamino manchi Iyyoobi Yihowa reyitinore kayisannota ammanino. (Iyo. 14:14, 15) Masaalaanchu Daanieeli reyino manni reyotenni kae hegerera heeꞌranno faro afiꞌrannota afino. (Far. 37:29; Dan. 12:2, 13) Yesuusi waro heeꞌrinohu Yihudu mannino Yihowa ammanamino mannira “hegere heeshsho” aannonsata afino. (Luq. 10:25; 18:18) Yesuusi mannaho tenne hexxo duucha hige kulino; qoleno Annisi iso reyotenni kayisinosi.—Mat. 19:29; 22:31, 32; Luq. 18:30; Yoh. 11:25. w22.12 4-5 guf. 8-9

Yihowa isiwa shinqeemmo gede koyisinonke. (Yai. 4:8) Isi Maganonke, Annankenna Jaalanke ikka hasiꞌranno. Isi huuccattonkera dawaro qolanno hattono qarru yannara kaaꞌlannonke. Qoleno isi ninke rosiisatenna agarate dirijjitesi horoonsiꞌranno. Huuccatto assiꞌne, Qaalesi nabbambenna hiincine Yihowawa shiqa dandiineemmo. Togo assinummoro isira noonke baxillinna galati lexxanno. Isira hajajammeemmosi hattono hasiisannosi guweenya uyineemmosi. (Aju. 4:11) Yihowa roore anfummo kiiro isonna dirijjitesi albinni roore addaxxineemmo. Ikkirono, Daawuloosi sunu sununni Yihowanna dirijjitesi addaxxa agurreemmo gede assate woꞌnaalanno. Ikkirono isita xagarrote hayyo gargadha dandiineemmo. Ammananke kaajjado ikkituronna albinni roore Yihowa addaxxineemmoha ikkiro Yihowanna dirijjitesi diagurreemmo.—Far. 31:13, 14. w22.11 14 guf. 1-3

Batinyu addu Kiristaani Woꞌmunkura Aliidi Gashshaanchonsa Yihowa baxino daafira uminsa horo agurino; wole agurina heeshshonsa nafa qarru giddo tugino. Woꞌmunkura Aliidi Maganira ammanante heeꞌrate murcidhino daafira giirate giddo tungeennansa gatte fulturi sasu Ibiraawooti gede insano Yihowara ammanante heeꞌrate murcidhino. Faarsaasinchu Daawiti Maganu albaanni minshe nookkire ikkine heeꞌra hasiissannohu mayiraatiro kulanni togo yiino: “Kaaliiqi daga baalate yoo yaanno; Kaaliiqa ballo, keeraanchimmaꞌyanna ammanamaꞌya garinni yiie.” (Far. 7:8) Qoleno isi, “Ammanamanna halaalaanchimma agartannoe” yee borreessino. (Far. 25:21) Baalantenni woyitino heeshsho woꞌmanka woyite Yihowara ammaname heeꞌrate. Hatto ikkiro, ninkeno faarsaanchu yiinota yaa dandiineemmo; isi “Suwashsho doogo hadhannorinna, Kaaliiqi seeri garinni heedhannori baraadhinoreeti” yee borreessino.—Far. 119:1. w22.10 17 guf. 18-19

Iyyoobi mannu ledo duucha hige hasaawino; Maganu Yihowa ledo hasaawino hasaawi kayinni lowo geeshsha baxxinoho. Konni hasaawi yannara Yihowa Iyyoobi mito dhagge ikkanno kalaqama laꞌꞌanno gede kulinosi; tini Iyyoobi Yihowa hayyicha ikkinota huwatanno gedenna soqqamaanosira hasiisannonsare aannonsata albinni roore addaxxanno gede assitannosi. Lawishshaho, Maganu saada towaatannota Iyyoobi qaaganno gede assinosi; hakko daafira Maganu Iyyoobino towaatannosi. (Iyo. 38:39-41; 39:1, 5, 13-16) Iyyoobi kalaqama lae Maganisi akatta daafira lowore rosino. Ninkeno Yihowa kalaqinore xiinxalline isi daafira albinni roore rosa dandiineemmo. Ikkirono hatto assa woꞌma woyite shota ikkitannonke yaa diꞌꞌikkino. Heeꞌneemmohu katamaho ikkiro, barru baala Yihowa kalaqino kalaqama laꞌneemmota gari faro afiꞌra hoongammora dandiineemmo. Heeꞌneemmohu katamaho ikka hoogiro nafa, kalaqama laꞌꞌate gari yanna dinonke yine hendammora dandiineemmo. Ikkirono yanna gaaꞌmine kalaqama laꞌꞌate sharrama hasiissannonke. w23.03 15 guf. 1-2

Yesuusi goofimarchu daara albaanni ‘baatto huxidhannotanna’ wole addi addi dano kalaqantannota coyiꞌrino. (Luq. 21:11) Qoleno isi ‘bunshe batidhannota’ masaalino; yannankera noo jaddo, finqillenna shabbarsitannori iillishshanno dano tenne leellishshanno. (Mat. 24:12) Yesuusi togoo dano iillitannonkehu Yihowa ninkera hedannokki daafira ikkinota dicoyiꞌrino. Isinni batinye ammanantinote Yihowa soqqamaanora dano iillitinonsa. (Isa. 57:1; 2 Qor. 11:25) Yihowa maalaletenni dano iillitannonkekki gede assa hoogara dandaanno; kayinni isi wodanaaꞌminenna keerinke baikkinni heeꞌneemmo gede hasiisannonkere aannonke. Ma assineemmoro balanxe qixxaambummoro dano kalaqantanno woyite wodanaaꞌmineemmo. Kayinni balaxe qixxaawa ammana noonkekkita leellishshannoni? Deeꞌni. Isinni dano kalaqantanno woyitira balaxe qixxaawanke Yihowara ninke gatisate dandoo noosita ammanneemmota leellishshanno. Hiittoonni? Maganu Qaali dano kalaqantanno woyitira qixxaambeemmo gede amaalannonke. w22.12 18 guf. 9-10

Yooseefi usuru mine noo yannara Yihowa Gibitsete moote lame yaachishshanno haaqee haaqiiꞌranno gede assino. Moote Yooseefira haaqee tirate dandoo noosita afiti usuru mininni woshshiishe abbino. Yihowa kaaꞌleennasi Yooseefi haaqeete tiro kulino; hattono kaajja amaale amaalesi Feriooni maalaꞌlanno gede assino. Feriooni Yihowa konni wedellichi ledo noota afiti Gibitsete gobba baalate sagale beehanno gede shoominosi. (Kal. 41:38, 41-44) Gedensoonni Gibitsetenna Yooseefi maate heedhannote Kanaani gobbara buutote hude ubbu. Xa Yooseefi maatesi gatisa dandaanno; tini Buuramino Moote daanno kali gate saꞌꞌanno gede assitanno. Yooseefira baalunku coyi qinaannosi gede assinohu Yihowaati. Yooseefi roduuwi iso shaate gano gantinoha ikkirono, Yihowa konne coye soorre isi hedinori woꞌmanno gede assino. w23.01 17 guf. 11-12

Qorophanno manchi Yihowa ledo noosi jaalooma hunara dandaanno coye baala baqqi yee agadhanno; hattono togoo coye hooꞌlate sharramanno. Konni garinni “Maganu baxilli giddo” heeꞌranno. (Law. 22:3; Yih. 20, 21) Soqqamaasinchu Phaawuloosi Kiristaanu qorophanno gede kulino. Lawishshaho isi Efesooni heeꞌranno Kiristaana togo yee amaalino: “Hiitto ikkitine heeꞌra hasiissannoꞌnero seekkitine affe. Egennaammu gede ikkinnina gowwootu gede ikkitine heedhinoonte.” (Efe. 5:15, 16) Sheexaanu Yihowa ledo noonke jaalooma hunate woꞌmanka woyite sharramanno; hakko daafira Qullaawu Maxaafi “Mootichu hedo maatiro wodanche” yee amaalannonke; tini Sheexaanu sia baala gargadhate kaaꞌlitannonke. (Efe. 5:17) Dancha doorsha doodhate ‘Yihowa hedo’ maatiro wodancha hasiissannonke. Maganu Qaale ganyine xiinxallinenna hiincine tenne assa dandiineemmo. Albinni roore Yihowa fajjo maatiro anfummoronna “Kiristoosi wodani” heeꞌrannonke gede assiꞌnummoro, konne asse konne assitinoonte yine kulloonni biddishshi heeꞌrannokki woyite nafa “egennaamu gede” ikkine heeꞌra dandiineemmo.—1 Qor. 2:14-16. w23.02 16-17 guf. 7-9

Minekki meekki meekkita fiiꞌratto? Hakko mine gala hanafattora albaanni seekkite fiiꞌroottoha ikkara dandaanno. Kayinni hakkunni gedensaanni minekki feyaalla aguritto? Feya agurittoro minu lowo geeshsha ishinara dandaanno. Minikki ishinannokki gede ganyite feya hasiissannoheti egennantinote. Hedonkenna akatanke biddi assiꞌrateno woꞌmanka woyite sharrama hasiissannonke. Hige cuuammammora albaanni “manninatenna ayyaana batteessannori baaluwiinni umonke [keereensate]” biddi assiꞌra hasiissannonkere biddi assiꞌrate sharrammoommoti dihuluullissannote. (2 Qor. 7:1) Ikkirono xaano, soqqamaasinchu Phaawuloosi ‘haarooꞌminanni’ haꞌneemmo gede uyinonke amaale harunsa hasiissannonke. (Efe. 4:23) Tenne alame xuri mulenni daafankera dandaanno. Togoo coyi iillannonkekki gedenna woꞌmanka woyite Yihowa hagiirsiisate hedonke, akatankenna yortonke ganyine layiꞌra hasiissannonke. w23.01 8 guf. 1-2

Hanni Yesuusi rosiisanna macciishsha mageeshsha baxissannoro hedi. Isi duucha hige Qullaawa Borro giddonni qummi assanno! Yesuusi cuuaminna qullaawu ayyaaninni buurami yannara manna ikkara albaanni iima heeꞌrino heeshsho qaaginoti dihuluullissannote. Yesuusi cuuamihu gedensaanni umi qara rosiisi woyitenna reyara albaanni noote shiima yanna giddo coyiꞌri woyite Qullaawa Borro giddonni qummi assino. (Mar. 8:3; Far. 31:5; Luq. 4:4; 23:46) Isi tenne lamente yanna mereero noote sase dironna darate ikkitanno yanna giddo, mannu albaanni nabbawino, Qullaawa Borro giddonni qummi assino hattono Qullaawa Borro xawisino. (Mat. 5:17, 18, 21, 22, 27, 28; Luq. 4:16-20) Yesuusi soqqansho hanafara haammatu diri albaanni Maganu Qaale duucha hige nabbawino hattono macciishshino. Isi, Maariyaaminna Yooseefi mini giddo Qullaawa Borro giddonni qummi assite coyidhanna macciishshinoti dihuluullissannote. (Mar. 6:6, 7) Qoleno, Yesuusi maatesi ledo Sambatu kiiro gambooshsheho qullaawa mine haꞌranno. (Luq. 4:16) Qoleno isi hakkiicho Qullaawa Borro nabbambanni woyite seekke macciishshannoti egennantinote. w23.02 8 guf. 1-2

Yihowa banxeemmo gede assannonkehu batinyu korkaati no. Lawishshaho, isi “heeshshote buicho” ikkinotanna “dancha eltonna woꞌmu atooti baalu” isiwiinni ikkinota huwatootto. (Far. 36:9; Yai. 1:17) Dancha coye baala afiꞌnoommohu shaqqadunna baxillaanchu Maganinkewiinniiti. Wodo Yihowa uyinonkete dhagge ikkitanno eltooti. Hatto yineemmohu mayiraati? Hanni Yihowanna Beettisi mereero noo jaalooma hedi. Yesuusi, “Anniꞌya ane baxannoe” hattono “Ani Annaꞌya baxeemmo” yiino. (Yoh. 10:17; 14:31) Insa lowo biliyoone diro mitteenni heeꞌransa mereeronsa noo jaaloomi kaajjanno gede assitino. (Law. 8:22, 23, 30) Hanni Maganu Beettisi qarramannonna reyanno gede fajji woyite mageeshshi geeshsha xissiisiꞌrinoro hedi. Yihowa mannu ooso lowo geeshsha baxanno; hakko daafira atino wolu mannino hegere heeshsho afidhinanni gede baxanno Beettosi wodo asse uyino. (Yoh. 3:16; Gal. 2:20) Magano banxeemmo gede assannonkehu qaru korkaati konneeti. w23.03 4-5 guf. 11-13

Kaadaasinete roso giwa hasiissaanke. Yesuusi Phergamooni songora heeꞌrannohu mitu Kiristaani mereeronsa mittimma heedhannokki gede assino daafira rufinonsa. (Aju. 2:14-16) Isi Tiyaxiroosi heeꞌranno Kiristaani, “Sheexaanunniha goꞌle noo coye” giwino daafira galatinonsa; qoleno halaale ‘seekke cuꞌmiꞌranno’ gede jawaachishinonsa. (Aju. 2:24-26) Togooha kaphu roso ammaninohu hakko heeꞌrannohu ammanatenni shoshshoggino Kiristaani maaro ea hasiissinonsa. Xaa yannara ninkena? Yihowa hedo ledo sumuu yaannokki roso baala giwa hasiissaanke. Kaadaasine ‘Magano magansidhannore labbara’ dandiitanno; ‘maganimmate wolqasi’ kayinni kaaddannoreeti. (2 Xim. 3:5) Maganu Qaale diinaggaambe xiinxallineemmoha ikkiro, kaphu roso bade afanna giwa qarra diꞌꞌikkitannonke. (2 Xim. 3:14-17; Yih. 3, 4) Magansiꞌranke Yihowa adhannoteronna teꞌee buuxiꞌra hasiissaanketa ronsoommo. Yihowa magansiꞌranke adhannokki gede assannore assinanni heeꞌnoommoha ikkiro, bayichonkonni biddi assiꞌra hasiissaanke.—Aju. 2:5, 16; 3:3, 16. w22.05 4 guf. 9; 5 guf. 11