Birra

Gambooshshunniwa huuronke naggi assine faarsine hattono dancha gede qixxaambe dawaro qolle gambooshshu hagiirsiisannoha ikkanno gede kaaꞌla dandiineemmo. Mitu roduuwira mannu noowa faarsa woy dawaro qola qarra ikkitannonsa. Aterano tini qarra ikkitinohe? Hatto ikkiro, wolootu waajja qeeꞌlate maa assitinoro afakki kaaꞌlitannohe. Mitootu woꞌma giddonni faarsansa kaaꞌlitinonsata wodanchitino. Faarso faarsineemmohu qaru korkaati Yihowa guwisiꞌrateeti. Hakko daafira gambooshsheho qixxaawattonte gede faarsono mine qixxaabbe haꞌri. Faarso rosiisiꞌratto woyite faarsote kiiro woy giximi gambooshshunniwa shiqanno rosi ledo mayi xaadooshshe afiꞌrinoro wodanchate woꞌnaali. Qoleno, faarsate dandookki ikkikkinni faarsote hedo illachishi. Gambooshshunniwa dawaro qola mitootaho qarra ikkitannonsa. Tennera mayi kaaꞌlahera dandaanno? Ganyite dawaro qolate woꞌnaali. Dawarokki harancho, qara hedo luphi assitannotanna huwatate qarrissannokkita ikkito. Yihowa iso songote mereero guwisiꞌrate assineemmo sharro baasa naadanno. w22.04 7-8 guf. 12-15

“Kaaꞌlaancho” yaanno qaale kaaꞌlo hasiisseennasi raarannoha kaaꞌlara dodanno mancho kulate horoonsiꞌnoonni. Hanni Yihowa qarru giddo nooha mitto mancho gatisate wiinamanna hedi. Kuni xawishshi Yihowa ninke kaaꞌla lowo geeshsha hasiꞌrannota leellishannoho; addanko isi ninke kaaꞌlate quqquxamanno. Yihowa ledonke noo daafira hagiirrinke baikkinni iillannonke qarra cincine saꞌꞌa dandiineemmo. Yihowa kaaꞌlannonketi mite doogga hiitteeti? Hanni dawaro afiꞌrate Isayaasi maxaafa laꞌno. Mayira? Isayaasi qullaawu ayyaani massageennasi borreessinoti batinye masaalo xaa yannara noota Maganu soqqamaano kaaꞌlitannote. Hakkiinnino sae Isayaasi duucha hige Yihowa daafira xawisinohu qarrammummokkinni huwata dandiineemmo gede asseeti. Lawishshaho hanni Isayaasi fooliishsho 30 laꞌno. Tenne fooliishshora Isayaasi Yihowa mannasi kaaꞌlanno gara xawisate kaajja lawishshuwa horoonsiꞌrino. Isi borreessinori (1) Yihowa seekke macciishshannonketanna huuccattonkera dawaro qolannota, (2) biddishsha aannonketa hattono (3) xaano ikko albillitte atootesi oye kaaꞌlannonketa leellishanno. w22.11 8 guf. 2-3

Yesuusi Semirineesinna Filidelfiyaho heedhanno songuwara borreessino sokkara hakko heeꞌranno Kiristaani ammanamansa kiissannonsa daafira, amadansara noo qarra waajjannokki gede jawaachishinonsa. (Aju. 3:10) Dartu iillannonketa anfoommo; hakko daafira cincine saꞌꞌate qixxaawa hasiissaanke. (Mat. 24:9, 13; 2 Qor. 12:10) Ajuujate maxaafi heeꞌnoommohu ‘Mootichu barri’ giddo Maganu manna xiimbannita kulanno. (Aju. 1:10) Ajuuja fooliishsho 12 Yesuusi Maganu Mangiste moote ikkanni heeꞌreennanni iima olu kainota kultanno. Mikaeeli yaano ayirrinye adhinohu Yesuusi Kiristoosinna olantosi Sheexaanunna agaanintesi ledo olantino. (Aju. 12:7, 8) Hakko daafira Maganu diinna qeelantino hattono insa uullara tungoonni; tini baattote aana heeꞌranno manni baasa qarramanno gede assitino.—Aju. 12:9, 12. w22.05 5 guf. 12-13

Yihowa woꞌmanka woyite taalo yoo yaanno. Isi horonta dimallaadanno. Yihowa mittu manchira gatona yaannohu danasi, jironna maccaha ikkasi woy dandoosi lae diꞌꞌikkino. (1 Sam. 16:7; Yai. 2:1-4) Ayino Yihowa mitto coye assanno gede xixxiiwa woy gubbo oye doga didandaanno. Isi caaccaawe woy hanqe muddame yoo diyaanno. (Ful. 34:7) Yihowa ninke daafira baalankare seekke afinohura isi gedee Daanyi dino. (Mar. 32:4) Ibiraawootunnita Qullaawa Borro borreessituri Yihowa maaro baxxitinota ikkitinota wodanchitino. Mitte borro xawissino garinni, kuri borreessaano “mite basera horoonsidhinohu Ibiraawootu Afii qaali Maganu cubbaataammaho leellishanno maaro calla kulannoho; kuni qaali mannu ooso mimmitoho leellishshannota dannu noo maaro kulannoha diꞌꞌikkino.” Cubbo loosse maaro eꞌannore woꞌmunni woꞌma gatona yaate silxaane noosihu Yihowa callaati. w22.06 4 guf. 10-11

Qaaqquulleꞌne calluwiꞌne woy ammaꞌnotenni bebbeehantino maate giddo lossidhinanni heedhinoonniha ikkiro, danchu lawishshiꞌne woloota jawaachishannotanna loosoho kakkayisannota huluullantinoonte. Qaaqqiꞌne iso kaaꞌlate sharrantinanni heedhineennanni giwinohalla lawiꞌne? Qaaqqoꞌne qajeelsate yanna hasiissannota qaagge. Mitto wixa wixxinanni woyite, ‘Kuni wixi lophe guma laala ikka?’ yitine heddinanni woyiti heeꞌrara dandaanno. Lossitinanniri kiꞌne ikka hoogginirono, waa hayikkissinanni wixu lophanno gede injo kalaqa dandiitinanni. (Maq. 4:26-29) Hatteente gede mitte ama mito woyite, “Qaaqqiꞌya Yihowa baxanno gede seekke rosiisoomma ikka?” yite huluullantara dandiitanno. Qaaqquulliꞌne dancha doorsha doodhitanno gede giddeessa didandiitinanni. Ikkollana insa qajeelsate dandiitinire baala assa agura hoogginiro, ayyaanaamittetenni lophitanno faro fantinanninsa. w22.04 19-20 guf. 16-17

Selemooni Yihowara ammaname soqqamanni noo yannara umisi daafira gara ikkitino lao noosiho. Isi wedellichu noo yannara assa dandaannokkiri noota huwatino; hattono Yihowa biddishsha afiꞌrate huuccatto assiꞌrino. (1 Mot. 3:7-9) Selemooni moote ikke gashsha hanafi balla naaxxa abbitanno gawajjo huwatino. Gedensoonni kayi Selemooni umisi amaalino amaale harunsikki gatino; tini dadillissannote. Isi gashsha hanafihunni boode yanna gedensaanni naaxxe Maganu biddishsha lashshi assa hanafino. Lawishshaho Maganu uyino seeri giddo mittu, Israeelicha ikkino moote “Kaaliiqiwiinni xeertisannosina lowo meento adhoonke” yaanno. (Mar. 17:17) Selemooni konne seera diige 700 meentonna 300 irkote meento adhino! (1 Mot. 11:1-3) Selemooni tini qarra diafidhino yee hedinoha ikkara dandaanno. Kayinni isi Yihowa seera diigasi gedensaanni qarramanno gede assitinosi.—1 Mot. 11:9-13. w22.05 23 guf. 12

Xaa yannara mannu mitto lowo geeshsha hasiisanno doorsha doodha hasiissannonsa. Insa kalqe alame gashshate silxaane noosihu Maganu Yihowa widonso Yihowa diina ikkinohu urungichu Sheexaanu Daawuloosi wido ikka doodhita ikka? Kawano kaꞌano ikkikki gatano manchi dino. Mannu doodhanno doorshi hegere heeshsho afiꞌranno gede woy afiꞌrannokki gede assansara dandaanno. (Mat. 25:31-33, 46) ‘Lowo qarri’ woy bayiru qarri yannara insara gatote woy baote malaate malaatinsanninsa. (Aju. 7:14; 14:9-11; Hiz. 9:4, 6) Yihowa gashshootira halama doodhoottoha ikkiro dancha doorsha doodhootto. Wolootuno dancha doorsha doodhitanno gede kaaꞌlate quqquxamootto. Yihowa gashshootira ammanante halantannori atoote afidhanno. Konne lowo geeshsha hasiisanno halaale seekkine xiinxalla hasiissannonke. Hatto assanke Yihowara soqqamate albinni roore murciꞌneemmo gede kaaꞌlitannonke. Qoleno ronsoommore horoonsiꞌne wolootu Yihowara soqqama doodhitanno gedenna isira soqqama agurtannokki gede kaaꞌla dandiineemmo. w22.05 15 guf. 1-2

Diinnanke yitannore ikkikkinni Yihowa yaannonkere macciishsha hasiissannonke. Iyyoobi Yihowa hasaawisannasi seekke macciishshino. Maganu Iyyoobi coye heeshshi gotti asse hedanno gede kaaꞌlinosi; togo yiinosi: ‘Iillinohe qarra baalanka afoommo. Ate towaata dandeemmokkiha lawannohe?’ Iyyoobi umosi heeshshi asse Yihowa danchumma lowo geeshsha naadannota leellishanno garinni qolino. Isi, “Macciishshate woyite duduwokki macciishshoommo; xa kayinni illeꞌyanni afoommohe” yiino. (Iyo. 42:5) Iyyoobi tenne coyiꞌri woyiteno buluulu aana afolle nooha, bisisi madire goofeenna dadille nooha ikkara dandaanno. Ikkirono Yihowa Iyyoobi baxannotanna isinni hagiidhinota buuxisinosi. (Iyo. 42:7, 8) Xaa yannarano mannu xonankeranna ditidhinoommoreeti yine hendeemmo gede assankera dandaanno. Insa ninkeha woy Yihowa dirijjite suꞌma bushiishate woꞌnaaltanno. Iyyoobi xaggenni qarru iillinkerono, Yihowa isira ammanamme heeꞌneemmota addaxxannota ronseemmo. w22.06 24 guf. 15-16

Bayira Baabiloone baꞌanno woyite iima lowo hagiirri ikkanno; ikkirono hakkiinni roore hagiidhinanni gede assannohu wolu coyino no. (Aju. 19:1-3) Kuni coyi Ajuujate maxaafi giddo kulloonniho lowo geeshsha hasiissannoho ‘Geꞌrechu jilaati’ woy sargeeti. Baalunku 144,000 wido ikkitinori Armagedooni hanafara albaanni iimira hadhanno. Ikkirono hatti Geꞌrechu sarge sarginsanni yanna diꞌꞌikkitino. (Aju. 21:1, 2) Geꞌrechu sarge sarginsannihu Armagedooni oli goofihunna Maganu diinna baala baꞌuhu gedensaanniiti. (Far. 45:3, 4, 13-17) Geꞌrechu sarge yannara mayi ikkanno? Meyatinna labbaahu adhamanno woyite mitto ikkannonte gede, tenne geꞌrechu sarge yannarano Moote Yesuusi Kiristoosinna “idayicho” yaano 144,000 mitto ikkitanno. Tenne dhagge ikkitanno yannanni hanaffe Yesuusi Kiristoosinna 144,000 mootoolla 1,000 diri geeshsha uulla gashsha hanaffanno.—Aju. 20:6. w22.05 17 guf. 11-13

Yesuusi goofimarchu yannara ayyaanaamittete sagale shiqishannoha ‘ammanaminohanna wodanaamo borojjicho’ shoomannota kulino. (Mat. 24:45) Tini halaale ikkase leeltino. Yesuusi Maganu manniranna wolu hasatto noonsa mannira ayyaanaamittete “sagale hasiissanno yannara” shiqishate buurantinori giddonni boode labballo horoonsiꞌrino. Kuri labballi wolootu ammanara mootooꞌmitinohu gede assite diheddanno. (2 Qor. 1:24) Hatteentenni insa, mannisira ‘gaadaanninna roorrichu’ Yesuusa ikkinota affino. (Isa. 55:4) Ammanaminohunna wodanaamu borojjichi 1919nni hanafe, hasatto noonsa manni mite yee Qullaawu Maxaafi giddo noo halaale rosanno gede kaaꞌlitannota addi addi borro qixxeessanni keeshshino. Kuni borojjichi 1921nni, hasatto noonsari Qullaawu Maxaafiha xinta ikkino halaale rossanno gede kaaꞌlate, Maganu Gingilaate yinanni maxaafa qixxeessino. Yanna soorrantanni hadhuta lende wole borro qixxeessinoonni. Ati baxillaancho iimi Annanke afattonna baxatto gede kaaꞌlitinohe borro hiitteeti? w22.07 10 guf. 9-10

Yihowa gedee shaqqadi no. Yihowara aattori ikkireno ikkiro isi woꞌmanka woyite hakkiinni roorse aannohe. (Maq. 10:29, 30) Isi tenne baꞌara shiima yanna gatte noo alame giddo nafa hagiirsiissannotanna harshammi assitanno heeshsho aannohe. Tini hanafotella. Baxillaanchu Annikkira hegerera soqqantanni heeꞌra dandaatto. Atenna Annikki Yihowa mereero noo baxilli lexxanni haꞌranno; Yihowa hegerera heeꞌrannoha ikkino daafira atino hegerera heeꞌratto. Heeshshokki Maganoho sayisse aatto woyitenna cuuamatto woyite Annikki Yihowara lowo geeshsha muxxe ikkinore aate qoosso afiꞌratto. Hagiidhatto gede assannoheha dancha coye baala uyinohehu isooti. Atino iimanna uulla kalaqino Maganira noosikki coye aa dandaatto; kuni coyi umikki fajjonni isira ammanante soqqamate. (Iyo. 1:8; 41:11; Law. 27:11) Tenne saꞌino heeshsho horo dino. w23.03 6 guf. 16-17

Wedellimmate yannara siimu xaadooshshi hasatto qarrissara dandiitanno; qoleno wolootu togoore assatto gede xixxiibbahera dandiitanno. Sheexaanu togoo yortora qeelamattora hasiꞌranno. Amanyootunni xuru nookkiha ikkite heeꞌratto gede kaaꞌlannoheri maati? (1 Tes. 4:3, 4) Huuccatto assiꞌratto woyite giddokkita Yihowara hasaaphi. Qoleno jawaante aannohe gede iso huucciꞌri. (Mat. 6:13) Yihowa ate qorichisha ikkikkinni kaaꞌlahera hasiꞌrannota qaagi. (Far. 103:13, 14) Qarraꞌne umiꞌnenni tirate woꞌnaaltinoonte. Qarra ikkinoꞌnere anniꞌneranna amaꞌnera hasaaphe. Togoore insara hasaapha waajjishshaꞌnera dandiitanno; kayinni hasaapha hasiissannonke. Qullaawa Maxaafa nabbawaꞌnenna xintu seera hiincaꞌne Yihowa hagiirsiisannore assa qarra ikkitannoꞌnekki gede kaaꞌlitannoꞌne. Yihowara mittu coyira noosi lao hiittootero affinanni daafira mittu mittunku coyira seeru hasiisannoꞌnekkita wodanchitinanni. w22.08 5 guf. 10-12

Kiristaancho ikkinohu maatete umi maatesira maalaamittete hasiisannore shiqisha mulluri gede asse dilaꞌꞌanno. Ati maatete umootiro, ‘Maateꞌyara hasiissanno sagale shiqishanna minu kira baaxxa hoogeemmo’ yite yaadattoha ikkara dandaanno. Qoleno loosoꞌya hoogummoro wole afiꞌra didandeemmo yite waajjattoha ikkara dandaanno. Woy shiimu woxinni heeꞌra didandeemmo yite waajjattoha ikkara dandaanno. Sheexaanu konni garinni lowo manna waajjishiisha dandiino. Sheexaanu Yihowa ninke mittu mittunku daafira dihedanno yine hattono maatenkera hasiisannore shiqishate sharrammeemmo woyite dikaaꞌlannonke yine hendeemmo gede assate woꞌnaalanno. Hakko daafira loosonke hoongeemmokki gede aye coyeno wole agurina Qullaawu Maxaafihu xintu seeri ledo sumuu yaannokkire assa hasiissannonke yine hendeemmoha ikkara dandaanno. w22.06 15 guf. 5-6

Maganinke ‘maarannoha, hanqoho muddamannokkihanna mararaancho Magano ikkinota hattono ammanamasinna bagamannokkihu baxillisi batiꞌra’ ikkinota anfoommo. (Ful. 34:6) Yihowa taashsho baxannoho. (Isa. 61:8) Isi ninke qarrammanna laꞌꞌanno woyite lowo geeshsha xissiisiꞌranno; hattono hirqino yannara qarra baala hoolate qixxaawinoho, qoleno tenne assate quqquxamanno. (Erm. 29:11) Hattee hagiirsiissanno yanna quqquxamme agadhineemmo! Yihowa lowo geeshsha banxeemmoti dihuluullissannote! Halaale banxeemmo gede assannonkehu wolu korkaati maati? Halaalu lowore kaaꞌlannonke. Hanni mitto lawishsha laꞌno. Qullaawu Maxaafi halaali albillittete hexxonke daafirano kulanno. Mokkollichu yowolo milli miliqqi yitannokki gede kaaꞌlannonte gede, Qullaawu Maxaafi aana xintantino hexxonkeno addi addi qarri iillannonke woyite hembeelammeemmokki gede kaaꞌlitannonke. Soqqamaasinchu Phaawuloosi techohu barru qummeeshshi aana coyiꞌranni noohu buuramino Kiristaanira noonsate iimi hexxo daafiraati. Kayinni isi coyiꞌrino hedo gannate ikkitanno uullara hegerera heeꞌrate quqquxamanno Kiristaanirano kaaꞌlitannote. (Yoh. 3:16) Addanko hegere heeshsho hexxo daafira rosanke hagiirru noo heeshsho heeꞌneemmo gede kaaꞌlitinonke. w22.08 14-15 guf. 3-5

Roduuwanke addaxxate kaaꞌlannonkehu qaru coyi baxilleho. Umi Qorontoosi fooliishsho 13te woloota addaxxineemmo gede woy galagalle addaxxineemmo gede kaaꞌlannonkeha batinye baxillu akata kulloonni. (1 Qor. 13:4-8) Lawishshaho kiiro 4te ‘baxillu cincanna elannoha’ ikkinota kulloonni. Yihowa cubbo loonseemmoha ikkiro nafa cincannonke. Ninkeno ammanate roduuwinke caaccaambeemmo woy xissiisiꞌneemmo gede assannore coyidhanno woyite woy assitanno woyite, cincineemmore ikka hasiissaanke. Kiiro onte qolte “Baxillu . . . dicaaccaawanno; baxillu koma dikiiranno” yitanno. Roduuwinke xissiisiꞌneemmo gede assitinonketa qaanganni koma amada dihasiꞌneemmo. Rosiisaancho 7:9 ‘hanqoho muddama’ hasiissannonkekkita kultannonke. Roduuwakki Yihowa laꞌꞌanno garinni laꞌꞌate woꞌnaali. Maganu insa baxannonsa; isi cubbonsa dikiiranno. Ninkeno hatto assa hasiissaanke. (Far. 130:3) Soꞌronsa illachishantenni dancha akattansa illachishi.—Mat. 7:1-5. w22.09 3-4 guf. 6-7

Daanieeli maxaafi, goofimarchu yannara aante aantenni ikkannoha dhagge ikkanno coye kulanno. Lawishshaho, Daanieeli 12:1 ‘[Maganu] manna agarate’ Mikaeeli yaano Yesuusi Kiristoosi ‘leellannota’ woy kaꞌꞌannota kultanno. Tenne masaalohu mitu gafi woꞌma hanafinohu 1914nni Yesuusi iima Maganu Mangiste Moote ikke shoomami woyiteeti. Ikkirono Daanieelira, Yesuusi ‘mannu kalaqaminkunni ikke egenninokkihu lowo qarri ikkanno’ yannara ‘leellannota’ woy kaꞌꞌannotano kulloonnisi. Tini “lowo qarri” yanna Maatewoosi 24:21 kulloonnite “lowo qarri” woy bayiru qarri yanna ledo mittete. Yesuusi hakkuyi bayiru qarri jeefora yaano Armagedooni yannara Maganu manna gatisate kaꞌꞌanno yaano qaafo adhanno. Ajuujate maxaafi “lowo qarra qeelte fulte dagginoreeti” yee konni ‘lowo manni’ daafira kulanno.—Aju. 7:9, 14. w22.09 21 guf. 4-5

Heeshshote maxaafi giddo borreessinoonni manni suꞌma hoola woy huna dandiinanni; Yihowa konni manni suꞌma umo irsaasetenni borreessinohu gedeeti. (Aju. 3:5) Suꞌminke baꞌꞌannokki garinni biiretenni borreessama geeshsha konni maxaafi giddo heeꞌranno gede assiꞌrate sharrama hasiissannonke. Suꞌmansa heeshshote maxaafira borreessinoonniti mitte gaamo iima Yesuusi ledo gashshitara doorantinoreeti. Soqqamaasinchu Phaawuloosi Filiphisiyusi heedhannorira ‘soqqanshote miillasira’ kulino garinni, Yesuusi ledo gashshara dooraminohu buuramino Kiristaani suꞌmi xaa yannara heeshshote maxaafi giddo no. (Fil. 4:3) Ikkollana suꞌminsa konni maxaafi giddonni baikkinni heeꞌranno gede, insa ammanantinore ikkite heeꞌra hasiissannonsa. Hakkiinni insa reyitara albaanni woy bayiru qarri hanafara albaanni jeefote sumuda sumundanninsa woyite, suꞌmansa heeshshote maxaafira baꞌꞌannokki garinni borreessinanni.—Aju. 7:3. w22.09 14 guf. 3; 15 guf. 5-6

Hanni mittu manchi baxxinanni sagale qishinoꞌne yine hendo. Ikkollana muddantinoonni woy wodaniꞌne wolewa noo daafira sagale coommitinorono coommitinokkirono affinikki rakkine ittine guddini. Guddinihu gedensaanni muddantine heedhine ittinoonnita wodanchitini; hakkiinni mayi coommillese badanni sununnilla ito yitini. Hatteente gede, Qullaawa Maxaafa muddantine heedhine nabbabbinanni sokkasi hiincitinikki gattine egentinoonni? Maganu Qaale nabbabbine hiincate yanna gaaꞌme; xaggete giddo kulloonnire laꞌꞌate, huuro macciishshatenna nabbabbinanni heedhinoonnire hedate woꞌnaalle. Konni garinni nabbawaꞌne hagiirriꞌne lexxanno gede assitannoꞌne. Yesuusi ayyaanaamittete sagale hasiissanno yannara shiqishanno gede ‘ammanaminohanna wodanaamo borojjicho’ shoomino; qoleno ayyaanaamittete sagale dancha gede sagaꞌlinanni heeꞌnoommo. (Mat. 24:45, NW) Ammanamino borojjichi qixxeessanno coyi baalu xintaminohu Maganu ayyaaninni borreessaminohu Qullaawu Maxaafi aanaati.—1 Tes. 2:13. w22.10 7-8 guf. 6-8

Qullaawu Maxaafi goofimarchu barra qacifatanno manni heeꞌrannota kule qorowisiisanno. (2 Phe. 3:3, 4) Insa tenne assitannohu, “uminsa yorto maganiweelote hoode” haꞌra hasidhanno daafiraati. (Yih. 7, 17, 18) ‘Egennote aana haariimanno manni’ gedeere ikkineemmokki gede qoropha dandiineemmohu hiittoonniiti? Tenne assa dandiineemmoti mitte doogo qacifatanno manniwa aana hoogate. (Far. 1:1) Hatto yaa kaadaasine yitannore dimacciishshineemmo woy insa borreessitinore mittoreno dinabbambeemmo yaate. Qoropha hoongummoro ninkeno minsheemmore ikkinammora hattono Yihowanna isi dirijjitesi widoonni aannonke biddishsha huluullama hananfammora dandiineemmo. Hakko daafira ninkeneeto togo yine xaꞌma hasiissannonke: ‘Haaro biddishsha woy xawishsha uyinanninke woyite gara ikkinokkire coyiꞌra rakkannoe? Albisa ikkite soqqantannori soꞌro xinqisiisiꞌreemmo?’ Bayichonkonni togoo hedo hooꞌlineemmoha ikkiro Yihowa hagiidhanno.—Law. 3:34, 35. w22.10 20 guf. 9-10

Maganu ayyaani Hiziqeeli ‘mokkookkunna wodana xillino’ mannira sabbakanno gede jawaante ikkinosi. Yihowa Hiziqeeli togo yiinosi: “Ate insa gede kaajjadonna yinoonnita bashshi assattokkiha asseemmohe. Ate dhinqu kinchinna kaajjadu siwiili gedeeha asseemmohe. Kunnira, hakko haxawarroota waajjitooti.” (Hiz. 3:8, 9) Yihowa Hiziqeeli, ‘Mannu kakkacha ikkinota laꞌe hexxo mudhitooti. Ani jawaachisheemmohena yiinosihu gedeeti.’ Hakkiinni Maganu ayyaani Hiziqeeli sabbakanno qoqqowo massisi. Hiziqeeli, “Kaaliiqiti jawaata wolqa anewa daggu” yee borreessino. Hiziqeeli sabbakanno sokka woꞌmunni woꞌma wodanchate mitte lamala hasiissinosi. (Hiz. 3:14, 15) Hakkiinni Yihowa isi lagicha dirranno gede asseenna hakkiicho Maganu ‘ayyaani giddosira eꞌꞌe’ woꞌmino. (Hiz. 3:23, 24) Hiziqeeli xa soqqansho hanafate qixxaawino. w22.11 4-5 guf. 8-9

Masaalaanchu Imbaaqoomira lowo qarri iillinosi. Isi mitte yannara Yihowa isi daafira hedannota huluullamino. Hakko daafira isi huuccattotenni giddosita gudise Yihowara hasaaphino. Yihowa ammanamino soqqamaanchisi giddosita kuꞌle huucciꞌrino huuccatto macciishshino. (Imb. 2:2, 3) Imbaaqoomi Yihowa mannasi gatisino gara hiincihu gedensaanni galagale hagiirraamo ikkino. Isi Yihowa isi daafira hedannotanna iillannosi qarra baala dandee saꞌꞌanno gede kaaꞌlannosita ammanino. (Imb. 3:17-19) Tennenni ninke maa ronseemmo? Qarru iillannohe woyite Yihowa huucciꞌri hattono macciishshamannohere isira hasaaphi. Hakkiinni isi kaaꞌlo hasiꞌri. Hatto assittoro Yihowa dandiite saꞌꞌate hasiissanno jawaante aannoheta addaxxa dandaatto. Yihowa kaaꞌlinoheta huwatatto woyite isira noohe ammana albinni roore kaajjitanno. Woꞌmanka woyite ayyaanaamittete coye assattoha ikkiro, qarru woy huluullo Yihowawiinni baddahera diwodhatto.—1 Xim. 6:6-8. w22.11 15 guf. 6-7

Yesuusinna ledosi sutantinori lamu jaddo loossinori reyitara kaꞌe lowo geeshsha qarrante no. (Luq. 23:32, 33) Lamunku ledosi sutantinori jaddo loossinori Yesuusa xontino. (Mat. 27:44; Maq. 15:32) Insa giddonni mittu kayinni hedosi biddi assiꞌrino. Isi, “Mootichaꞌya! Gashshootikkinni daatto woyite qaagie” yiino. Yesuusi isira dawaro qolanni techohu barru qummeeshshira noo hedo coyiꞌrino. (Luq. 23:39-42) Yesuusi jaddo loosino manchira coyiꞌrinori, albillitte Gannatete giddo heeshsho hiittoota ikkitannoro hendeemmo gede assannonke. Qoleno keeru woꞌminohu Moote Salamooni gashshootinni Gannatete daafira ronseemmori no. Qullaawu Maxaafi Yesuusi Selemooni roorannota kulanno; hakko daafira Yesuusinna ledosi gashshitannori uulla biifado gannate assitannota heda dandiineemmo. (Mat. 12:42) ‘Wolu geꞌreewi’ wido ikkitinori Gannatete giddo hegerera heeꞌrate ikkadoota ikkate quqquxantannoti dihuluullissannote.—Yoh. 10:16. w22.12 8 guf. 1; 9 guf. 4

Isayaasi Yihowa raarenke seekke macciishshannotanna eeggifante huucciꞌneemmo huuccattora bayichonkonni dawaro qolannota buuxisinonke. Isayaasi lede “Raareꞌne macciishshanni heeꞌrenni dawaro qolannoꞌne” yiino. Tini Anninke Yihowa isiwa raartannore kaaꞌla hasiꞌrannota buuxissannote; addanko isi insa kaaꞌlate quqquxamanno. Tenne afanke hagiirrinke baikkinni cincine heeꞌneemmo gede kaaꞌlitannonke. Yihowa mittu mittunku huucciꞌneemmo huuccatto seekke macciishshanno. Hatto yineemmohu mayiraati? Isayaasi fooliishsho 30te umi gafira Yihowa mannisira coyiꞌrinohu gaamote deerrinniiti. Ikkirono, Qullaawa Maxaafa umo borreessinoonni afii tiro garinni kiiro 19te coyiꞌrinohu mittu mittunku manchiraati. Hatte tirora noo qummeeshshi togo yaanno: “Xaate konni kaꞌa diwiꞌlatto; Kaaliiqi shaqqado ikkino daafira kaaꞌlannohe; huucciꞌratto yannara macciishshe dawarannohe.” Yihowa baxillaancho Anna ikkino daafira ninke mitto mittonka laꞌꞌannonke hattono mittu mittunku huucciꞌneemmo huuccatto macciishshanno.—Far. 116:1; Isa. 57:15. w22.11 9 guf. 5-6

Mannu giwinkerono, sabbakankenna rosiisanke hagiirrenna keere afiꞌneemmo gede assitannonke. Umi xibbi diro, Ayihudete roorrooti Yesuusi soqqamaasine sabbaka agurtanno gede hajajjunsata, kuri ammanantino labballi Maganoho hajajama doodhitino. Insa sabbaka diagurtino; tini hagiirraamma ikkitanno gede assitinonsa. (Soq. 5:27-29, 41, 42) Hige loosonke hoollanni woyite hayyotenni sabbaka hasiissannonke. Ikkirono dandiinummore baala assinummoro, Yihowa hagiirsiinsironna heeshsho gatissanno sokka kulliro afiꞌnanni hagiirri heeꞌrannonke. Lowo qarri iillannonke yannara nafa keere afiꞌra dandiineemmota dihuluullammeemmo. Togoo yannara hasiisannonkehu Yihowa calla aanno keereeti. Fayya ubbanno woyite, dano kalaqantanno woyite woy dartu iillannoꞌne woyite Yihowa addaxxe. Dirijjitesiwa gamba yitine heedhe. Albillitte daggannota dhagge ikkitanno yanna illachishshe. Hatto assitiniro, “keeru Magani ledoꞌne heeꞌranno.”—Fil. 4:9. w22.12 21 guf. 17-18

Tenne assate qaafo adha hasiissannonke. Aara, hanqonna gibbo hattono wole busha akatta hooꞌlate sharrama hasiissannonke. (Efe. 4:31, 32) Tenne assa qarra ikkitankera dandiitannohu mayiraati? Korkaatuno mite busha akatta giddonke rumuxxitinoha ikkara dandaanno. Lawishshaho Qullaawu Maxaafi mitu manni ‘hanqaaleessanna aaramannoha’ ikkinota kulanno. (Law. 29:22) Giddonke rumuxxitinota busha akatta hooꞌlate cuuammummohu gedensaanni nafa sharrama hasiissannonke. (Rom. 7:21-23) Yihowa macciishshannohetanna kaaꞌlannoheta addaxxite qarrisannohe akata kulte iso huucciꞌri. (1 Yoh. 5:14, 15) Yihowa busha akatakki maalaletenni hoolannokkiha ikkirono, konni bushu akatira qeelamattokki gede kaaꞌlannohe. (1 Phe. 5:10) Bushu akati wirro waadannohe gede assannohe coye qorophite huuccattokki ledo sumuu yaannore assi. Hattono gara ikkinokkire heddooti.—Fil. 4:8; Qol. 3:2. w23.01 10 guf. 7, 9-10

Manna banxeemmota leellinsheemmoti mitte doogo sabbakate looso diinaggaambe loosate. Xaandeemmo mannira baalaho sabbankeemmo. Sirchinsa woy gaꞌrensa ikkitutano ikkituro, buxane woy dureeyye, rosinoha woy rosinokkihano ikkiro baalunku mannira sabbankeemmo. Tini Yihowa fajjo ledo sumuu yaanno garinni loonsanni heeꞌnoommota leellishshanno. Isi fajjo “mannu baalunku gatannonna halaale afanno gedeeti.” (1 Xim. 2:4) Qoleno ammanate roduuwanke banxe Maganonna Kiristoosi banxeemmota leellisha dandiineemmo. Insara hendeemmota leellishanna qarru yannara insa kaaꞌla dandiineemmo. Shiidhanno woyite sheshifachishate, dhiwantanno woyite xaꞌmatenna hexxo mudhitanno woyite jawaachishate dandiinummore baala assineemmo. (2 Qor. 1:3-7; 1 Tes. 5:11, 14) Qoleno “Keeraanchu manchi huuccatto, lowo guma uyitannota jawa wolqa afidhino” daafira insara woꞌmanka woyite huuccineemmo.—Yai. 5:16. w23.01 28-29 guf. 7-8

Mittu mine minanno manchi minate dandoosi yannate kiiro woyyeessiꞌrannonte gede, ninkeno mimmito dhaawate dandoonke woyyeessiꞌra dandiineemmo. Alba qarra dandee saino manni lawishsha kulle roduuwinke iillannonsa qarra dandiite saꞌꞌate jawaante afidhanno gede kaaꞌla dandiineemmo. (Ibi. 11:32-35; 12:1) Wolootunniha dancha akata illachinshe, keere hunannori kalaqamanno woyite keeru baꞌꞌannokki gede assate sharramme, hattono kawa kaꞌaanni higino coye tirate woꞌnaalle keeru baꞌꞌannokki gede assa dandiineemmo. (Efe. 4:3) Qullaawu Maxaafi giddonni kaaꞌlitannonsata kaajja amaale kulle, mitore assine kaaꞌline hattono ayyaanaamittetenni shoshshoggitinore kaaꞌline woꞌmanka woyite roduuwinke ammana dhaawa dandiineemmo. Ninkeno roduuwinke ammana jawaattanno gede kaaꞌlineemmo woyite hagiidhineemmo hattono harshammo afiꞌneemmo. Mittu minnoonni mini gedensoonni akkale diigamasi digattanno; roduuwinke ammana dhaawanke abbitanno gumi kayinni hegerera dibaꞌꞌannoho! w22.08 22 guf. 6; 25 guf. 17-18

Yesuusi Maganu Qaale nabbambe huwata hasiꞌnummoro mittu akati hasiisannonketa kulino; kuni akati wodanchate. (Mat. 24:15) Wodanchate yaa mayyaate? Wodanchate yaa mitte hedo wole hedo ledo xaaddannohu woy baxxitannohu hiittoonniitiro bade afate hattono xawinse kulloonnikki coye huwatate dandooti. Qoleno Yesuusi kulino garinni Qullaawu Maxaafi masaalo woꞌmitino gara afate wodancha hasiissannonke. Hattono Qullaawa Maxaafa nabbambe woꞌma horo afiꞌrate kuni akati hasiisannonke. Yihowa soqqamaanosira wodancha aanno. Hakko daafira konne akata lossiꞌratto gede kaaꞌlahera iso huucciꞌri. Huuccattokki ledo sumuu yaannore assa dandaattohu hiittoonniiti? Nabbawootto coye seekkite hedi hattono kuni coyi alba afoottohu ledo mayi xaadooshshe afiꞌrinoro huwati. Nabbabbanni noottoha Qullaawu Maxaafi gafa huwatatenna loosu aana hosiisa dandaatto gara wodanchate woꞌnaali. (Ibi. 5:14) Wodanchatenni nabbawattoha ikkiro Qullaawa Borro albinni roore huwatatto. w23.02 10 guf. 7-8

Hanni mittu jaalikki akkala makeena uyinohe yine hendo. Kuni makeeni shiimawa qalame luqqaino hattono mitowa xenfeꞌe yiino. Ikkirono kuni makeeni lowo kume woxe hirannoho. Konne makeena lowori gede assite laꞌꞌattotinna dancha gede assite amaxxattoti dihuluullissannote. Hatteente gede Yihowa lowo waaga afiꞌrinore yaano heeshsho uyinonke. Isinni Yihowa Beettosi wodote kakkalo asse oyenke heeshshonke mageeshshi geeshsha naadannoro leellishino. (Yoh. 3:16) Yihowa heeshshote Buichooti. (Far. 36:9) Soqqamaasinchu Phaawuloosi, “Lubbotenni heeꞌnoommohunna milli yineemmohu isinniiti; heeꞌneemmohuno isinniiti” yee konne halaale ammanannota leellishino. (Soq. 17:25, 28) Hakko daafira heeshsho Maganu uyinonke eltooti yaa dandiineemmo. Isi shaqqillunni heeshshotenni heeꞌrate hasiisannoreno uyinonke. (Soq. 14:15-17) Ikkollana Yihowa ninke heeshsho agarate maalale diloosanno. Hatteentenni isi maalaamittetenna ayyaanaamittete fayyimmanke agadhate dandiinummore baala assinammora hasiꞌranno.—2 Qor. 7:1. w23.02 20 guf. 1-2

Maganu Yihowa Qullaawa Maxaafa uyinonke daafira lowo geya galaxxineemmosi! Isi Qullaawu Maxaafi widoonni xaa yannara iillannonke qarra dandiine saꞌneemmo gede kaaꞌlitannonketa kaajja amaale aannonke. Qoleno isi dhagge ikkitannota albillittete hexxo uyinonke. Baalunkunni roore Yihowa Qullaawu Maxaafi widoonni batinye akattasi anfeemmo gede assinonke. Isita baxissanno akatta hiincineemmo woyite wodaninke hagiidhanno; hattono isi ledo muli jaalooma kalaqiꞌne albinni roore isiwa shinqeemmo. (Far. 25:14) Yihowa mannu iso afara hasiꞌranno. Hundi waro isi, mannu iso afanno gede assinohu haaqeete, ajuujatenni sokkaasinete widoonniiti. (Kir. 12:6; Soq. 10:3, 4) Kayinni borreessa hoongoommero mannu haaqeete, ajuujate woy sokkaasinete widoonni kulloonni sokka hiitto asse xiinxalla dandaanno? Yihowa anfammora hasiꞌrannore ‘maxaafaho borreessinanni’ gede assinohu iseraati. ‘Maganu doogo guuta’ ikkitino daafira, isi ledo konni garinni xaandeemmo gede assasi danchanna kaaꞌlitannonketa ikkitinota addaxxa dandiineemmo.—Far. 18:30. w23.02 2 guf. 1-2

Kaaꞌlitanno mixo fushshidhe. Ammanaꞌne kaajjitanno gede assitannotanna ayyaanaamittetenni lophitinanni gede kaaꞌlitannoꞌne mixo fushshidhe. (Efe. 3:16) Lawishshaho ganyitine hojju xiinxallo assidhinanni garanna Qullaawa Maxaafa nabbabbinanni gara woyyeessiꞌrate mixo fushshiꞌra dandiitinanni. (Far. 1:2, 3) Woy ganyitine huucciꞌranna huuccidhinanni gara woyyeessiꞌra hasiissinoꞌneha ikkara dandaanno. Qoleno doodhitinanni boohaarshinna yannaꞌne horoonsidhinanni gara lainohunni albinni roore kiꞌneneeto eemadha hasiissinoꞌneha ikkara dandaanno. (Efe. 5:15, 16) Woloota kaaꞌlitinanni woyite albinni roore ayyaanaamittetenni gikki yitinanni. Lawishshaho songoꞌnera noore geerra roduuwanna dhuku anje noonsare kaaꞌlate mixo fushshiꞌra dandiitinanni. Qoleno dikkotenni hadhine mitore hira kaaꞌlitine woy elektirooniksete uduunnichonsa horoonsidhanno gara kultine kaaꞌla dandiitinanni. Qoleno Yihowa Farciꞌraasine ikkinokki mannira Maganu Mangisteha dancha duduwo dudubbine baxxinanninsata leellisha dandiitinanni. (Mat. 9:36, 37) Dandiitinanniha ikkiro, woꞌma yanna soqqansho soqqamate mixo fushshidhe. w22.08 6 guf. 16-17