Sadaasa

Itiyophiyu manchi cuuamate addinta qixxaawino? Hanni tenne hedi: Kuni manchi “Magano magansiꞌrara Yerusaalame haꞌrino.” (Soq. 8:27) Hakko daafira isi Yihudu ammaꞌno wido ikkikki digatino. Isi Ibiraawootu Afiite Qullaawa Borronni Yihowa daafira rosinoti dihuluullissannote. Ikkirono isi lede rosate quqquxamino. Filiphoosi konni manchi ledo doogote xaadi woyite, kuni manchi masaalaanchu Isayaasi xaaxo nabbawanni no. (Soq. 8:28) Kuni manchi lede rosa hasiꞌrino. Isi Yerusaalamete qullaawu mini noowa Yihowa magansiꞌrara Itiyophiyunni kae seeda doogo haꞌrino. Itiyophiyu manchira Filiphoosi mito hasiisanno halaale rosiisinosi; konni halaali giddo mittu Yesuusi Buuraminoha ikkinota kulannoho. (Soq. 8:34, 35) Kuni manchi Yihowaranna Beettisira noosi baxilli lexxanno gede assiꞌrino. Kuni manchi cuuame Yesuusi Kiristoosi harunsaancho ikkate mitto lowo geeshsha hasiisanno doorsha doodha hasiꞌrino. Filiphoosi kuni manchi cuuamate qixxaawinota afiti cuuinosi. w23.03 8-9 guf. 3-6

Halaale coyiꞌra hoongummoro Yihowa hagiirsiisa didandiineemmo. (Law. 6:16, 17) Xaa yannara batinyu manni kapha qarra afidhinokkihu gede asse hedannoha ikkirono, ninke kayinni tenne daafira Yihowate gedee lao heedhankera hasiꞌneemmo. (Far. 15:1, 2) Waajjo kapho kaphineemmokkiti egennantinote; ikkollana gama wido halaale gama wido kapho ikkinore coyiꞌne mannu soꞌranno gede assano qoropha hasiissannonke. Heme tareessineemmokki gedeno qoropha hasiissannonke. (Law. 25:23; 2 Tes. 3:11) Hasaabbinanni hasaawi hemete widira soorramiro, hasaawu dhaawannoha ikkanno gede assate woꞌnaalle. Heeꞌnoommo alamera batinyu manni bushare coyiꞌranno daafira, Yihowa hagiirsiisannore coyiꞌrate sharrama hasiissannonke. Isi soqqammeemmo woyite, gambooshshunniwa hattono mannu ledo hasaambeemmo woyite iso hagiirsiisannore coyiꞌrate assineemmore maassiꞌranno. Yihowa tenne busha alame huniro, coyiꞌneemmo coyinni isi ayirranno gede assa roore shota ikkitannonke.—Yih. 15. w22.04 9 guf. 18-20

Yihowanna Yesuusi mageeshshi geeshsha baxxannonkero hiincinummoro ninkeno insa banxeemmo. (1 Yoh. 4:10) Yesuusi reyinohu ninke mittu mittunkura ikkinota anfummoro isinni insa roore banxeemmo. Soqqamaasinchu Phaawuloosi tenne ammanino; hattono Galaatiyaho heeꞌranno Kiristaanira sokka borreessi woyite ‘Maganu Beetti baxannositanna isi daafira lubbosi sayise uyinota’ coyiꞌre galatu noosita leellishino. (Gal. 2:20) Yihowa wodote kakkalo widoonni, jaalasi ikkatto gede isiwa abbinohe. (Yoh. 6:44) Yihowa wodanikki giddo nooha shiima dancha coyi lainota afakkinna isi jaala ikkatto gede lowo waaga baatinota afakki lowo geeshsha dihagiirsiissannohe? Tini Yihowaranna Yesuusira noohe baxilli lexxanno gede diassitino? Hakko daafira, ‘Kuni baxilli maa asseemmo gede kakkayisannoe?’ yine ninkeneeto xaꞌma hasiissannonke. Maganohonna Kiristoosira noonke baxilli woloota banxeemmo gede kakkayisannoke.—2 Qor. 5:14, 15; 6:1, 2. w23.01 28 guf. 6-7

Qullaawu Maxaafi, Yihowa hedinori woꞌmanno gede yaano mannisi isira ‘mitteenni soqqamanno gede’ lowore kaaꞌlanno. Yihowa Qullaawa Maxaafa borreessiisinohu umonsa heeshshi assanno manni callu huwata dandaanno garinniiti. (Luq. 10:21) Baalankawa heeꞌranno manni Qullaawa Maxaafa nabbawanno. Kayinni Qullaawu Maxaafi yaannore addinta huwattannorinna loosu aana hosiissannori umonsa heeshshi assitannore callaho. (2 Qor. 3:15, 16) Qullaawu Maxaafi giddo Yihowa hayyo daafira ronseemmo. Yihowa Qullaawu Maxaafi widoonni gaamote deerrinni rosiisannonkeha calla ikkikkinni isi annu annu deerrinni biddishshano aannonke; hattono sheshifachishannonke. Yihowa Qaale nabbambeemmo woyite isi ninke mittu mittunkura hedannonketa wodancha dandiineemmo. (Isa. 30:21) Qullaawa Maxaafa nabbabbinanni heedhine duucha higgine kiꞌnera borreessinoonnihu gede assitine heddine diegentinoonni? Ikkirono Qullaawa Maxaafa borreessinoonnihu lowo miliyoone ikkanno manni huwata dandaanno garinniiti. Ikkina xaa yannara ninke mitto mittonka kaaꞌlitannonke mashalaqqe amada dandiinohu hiittoonniiti? Kuni ikkara dandiinohu Qullaawa Maxaafa hayyote taalle nookki Magani borreessiisino daafira callaati.—2 Xim.3:16,17. w23.02 4-5 guf. 8-10

Addu Kiristaana ikkinoommo daafira Yihowa lowo geeshsha banxeemmo. Yihowara soqqamate dandiinummore baala assa hasiꞌneemmo. Tenne assate ayyaanaamittete mixo fushshiꞌra hasiissannonke; lawishshaho, Magano hagiirsiissanno akatta lossiꞌra, kaaꞌlitanno dandoo rosanna woloota kaaꞌlineemmo doogga hasiꞌra hasiissannonke. Ayyaanaamittetenni lopha hasiꞌneemmohu mayiraati? Tenne assa hasiꞌneemmohu qaru coyi, baxillaancho iimi Annanke hagiirsiisa hasiꞌneemmo daafiraati. Yihowa dandoonke woꞌmunni woꞌma isira soqqamate horoonsiꞌnanna laꞌꞌanno woyite lowo geeshsha hagiidhanno. Qoleno ayyaanaamittetenni lopha hasiꞌneemmohu ammanate roduuwanke albinni roore kaaꞌla hasiꞌneemmo daafiraati. (1 Tes. 4:9, 10) Halaalu mine keeshshinoommo diri ikki geeshshihano ikkiro, baalunku ayyaanaamittetenni lopha dandiineemmo. w22.04 22 guf. 1-2

Muli yannara alamete mangistubba Bayira Baabiloone yaano alamennita kaphu ammaꞌno hunate kaꞌanno. Tini bayiru qarri hanafinota leellishshannote. Tini lowo manni Yihowa magansiꞌrate bobbahanno gede assitannoni? Diassitanno. Hatteentenni Ajuuja fooliishsho 6 kultannonte gede, hattee qarru yannara Yihowa magansiꞌrannokki manni agarooshshe afiꞌrate ilaallate ledo lawinsoonnihu poletiku gashshootiwanna daddalu dirijjittawa haꞌranno. Kuni manni Yihowa Gashshootira halamannokki daafira, Yihowa insa iso gibbannori gede asse laꞌꞌanno. (Luq. 11:23; Aju. 6:15-17) Hattenne bayiru qarri yannara ammanantinoti Yihowa soqqamaasine baxxite leeltanno. Hattee yannara uullate aana Yihowara soqqantannorinna ‘moyichoho’ kaaꞌlama gibbannori insa callaati.—Aju. 13:14-17. w22.05 16-17 guf. 8-9

Maganu manni duduwannohu ‘Maganu Gashshootiha dancha duduwo’ calla diꞌꞌikkino. (Mat. 24:14) Insa Ajuuja fooliishsho 8tenni 10 geeshsha kulloonni sokkaasine loossanno loosono kaaꞌla hasiissannonsa. Kuri sokkaasine Maganu Gashshoote gibbannorira aante aantete iillitanno bao kultino. Konni garinni Yihowa Farciꞌraasine ‘giiratenna kaadete’ gedee sokka dudubbanni keeshshitino; tini sokka Maganu busha Sheexaanu alamera yiino yoo leellishshannote. (Aju. 8:7, 13) Mannu heeshshonsa biddi assiꞌre Yihowahu hanqu barrinni gata dandaanno gede goofimarchu gambisinota afa hasiissannonsa. (Sof. 2:2, 3) Ikkollana tini sokka duuchu manni dibaxannote. Tenne sokka duduwate worbuulle ikka hasiissaanke. Bayiru qarri yannara dudumbeemmoti jeefonniti yoote sokka mannu roore giwannota ikkitanno.—Aju. 16:21. w22.05 7 guf. 18-19

Hanni ooso ilara kae noo Kiristaana hendo. Insa lowo diro ooso lossiꞌrate daafira kultanno lallawo duucha hige macciishshinoha ikkara dandaanno. Xa kayinni insa konne roso loosu aana hosiisaraati. Xa insa ooso ile lossiꞌraraati. Tini dishaaꞌꞌa qoossooti! Heeꞌnoommo gari soorramanno woyite mito Qullaawu Maxaafiha xintu seera roore harunsineemmo. Israeelete mootoolla assitara hajanjoonninte gede, Yihowa magansidhannori ‘heeshshonsa diro baala’ Qullaawa Borro nabbabbannohunna hiincitannohu mittu korkaati konneeti. (Mar. 17:19) Annuwanna amuuwa, kiꞌne Kiristaanu afiꞌrannote jawa qoosso giddo mitte afidhinoonni; tinino oosoꞌnera Yihowa daafira rosiisate. Kayinni oosoꞌnera Maganu daafira halaale ikkinore calla kultine agura dihasidhinanni. Oosoꞌne iso lowo geeshsha baxxanno gede kaaꞌla hasidhinanni. w22.05 26 guf. 2-3

Loonsoommo cubbira gaabba calla diguddanno. Qaafo adhateno qixxaamboommore ikka hasiissannonke. Yihowa cubbonke maarate hedanno woyite laꞌꞌannohu mittu lowo geeshsha hasiisanno coyi soorramate. Soorramate yaa busha assoote agurre Yihowa biddishshi garinni heeꞌrate yaate. (Isa. 55:7) Cubbo loosino manchi hedosi biddi assiꞌre Yihowa hedo garinni heeꞌra hasiissannosi. (Rom. 12:2; Efe. 4:23) Isi alba hedannoha busha coyenna assootesi agurate murciꞌra hasiissannosi. (Qol. 3:7-9) Hige Yihowa gatona yaannonkehunna cubbunni keereensannonkehu Kiristoosita wodote kakkalo ammanneemmo daafiraati. Yihowa assootenke biddi assiꞌrate addinta sharrammanni heeꞌnoommota laꞌꞌanno woyite wodote kakkalo widoonni gatona yaannonke.—1 Yoh. 1:7. w22.06 6 guf. 16-17

Mannu ooso lowo diro mimmito gawajjitanni keeshshitino. (Ros. 8:9) Lawishshaho, gashshaasine silxaanensa garimale horoonsidhanno, jaddo loossannori mancaꞌꞌa coye assitanno, rosu mine wolqa roortinori ledonsa rossannore xontanno hattono waajjishiishshanno; mitu manni isinni mininsa manna nafa beebba assiꞌranno. Mannu wole manna waajjansa dhagge assiꞌnannita diꞌꞌikkitino! Ikkina Sheexaanu tenne horoonsiꞌre gawajjankera woꞌnaalannohu hiittoonniiti? Sheexaanu manna waajjine Yihowara ammanammeemmokki gedenna sabbaka agurreemmo gede assate woꞌnaalanno. Sheexaanu xixxiiweennansa gashshaano loosonke agabbanno hattono darammeemmo gede assitanno. (Luq. 21:12) Sheexaanu alamera noohu batinyu manni Yihowa Farciꞌraasine daafira gara ikkinokkire woy kapho ikkino coye tareessanno. Konne kapho ammananno manni qacifatankera wole agurina gawajjankera dandaanno. (Mat. 10:36) Sheexaanunnita xagarrote hayyo dhagge assiꞌra hasiissaanke? Dihasiissannonke. Isi tenne hayyo umi xibbi dirono horoonsiꞌrino.—Soq. 5:27, 28, 40. w22.06 16 guf. 10-11

Halaalu widira qollanniri ‘lowo manni’ wido ikkitinori ayeooti? Reyotenni kaꞌꞌanno mannaati, Armagedooni gate saꞌꞌanno mannaatinna haaro alamera ilantanno oosooti. Kumu diri jeefora uullate aana heeꞌranno manni baalunku guuta ikkanno. Mittu manchi guuta ikkino daafira calla hegere heeshsho afiꞌranno yaa ikkitinokkita qaango. Hanni Addaaminna Heewani daafira hendo. Insa guuta mannaati; kayinni hegere heeshsho afidhara albaanni Yihowara hajajantannota leellisha hasiissannonsa. Insa kayinni isira hajajantukki gattino. (Rom. 5:12) Kumu Diri Gashshooti jeefora baalunku manni guuta ikkanno daafira baalunku hegerera Yihowa gashshootira hajajamanno yaatenso mitu Addaaminna Heewani gede guuta ikkirono isira ammanamikki gata ikka? Kuri xaꞌmuwara dawaro afa hasiissanno. w22.09 22-23 guf. 12-14

Alamete aana ikkanni noore laꞌꞌatto woyite albillitte dancha yanna daggannota ammana qarra ikkitannohe? Maatete giddo noo baxilli baꞌꞌanni haꞌrino. Mannu albinni roore finqila, umosi calla baxannohanna hanqaaleessa ikkino. Batinyu mannira silxaane noonsare addaxxa qarra ikkitinonsa. Ikkollana tini ikkito dancha yanna daggannota addaxxatto gede assitannohe. Mayira? Korkaatuno mannu ikkito, “goofimarchu barra” ikkanno yine masaalotenni kulloonniri woꞌmanni noota leellishshanno. (2 Xim. 3:1-5) Tini masaalo woꞌmase Kiristoosi Yesuusi Maganu Mangiste Moote ikke gashsha hanafinota leellishshanno tajeeti; suwashshu wodani noosihu aye manchino tenne kaada didandaanno. Kayinni Maganu Mangiste daafira kultannote batinye masaalo giddo tini mittetella. Tini baalanti masaalo gamba yite Yihowa yiinori woꞌmanni noo yanna giddo heeꞌnoommota leellishshannonke. w22.07 2 guf. 1-2

Koroonu fayya ubbu yannara songote gambooshshe assiꞌneemmo garanna ma garinni sabbankeemmoro kulloonninke. Koroonu fayya ubbanni heedheennanni songote gambooshshe, woradu gambooshshenna qoqqowu gambooshshe viidiyote widoonni assiꞌra hananfoommo. Sokka borreessinenna silke dowwolle soqqama hananfoommo. Yihowa assinoommore maassiꞌrino. Batinye sinu biiro halashshaanote kiiro lexxitinota kultino. Isinni hatte yannara batinyu roduuwi jawaachishanno woꞌnaalsha afidhino. Mitu manni Yihowa dirijjite Koroonu fayya qorophate quwa saꞌanno yee hedara dandaanno. Ikkollana uyinanninke biddishshi kaaꞌlannoha ikkinota duucha hinge wodanchinoommo. Yesuusi mannasi baxillunni massaganni noo gara hiincinummoro, albillitte baxi coyi ikkirono Yihowanna baxanno Beettisi ledonke noota dihuluullammeemmo.—Ibi. 13:5, 6. w22.07 13 guf. 15-16

Yihowa huuccattotenni guwinseemmotano agurranna, isi qixxeessinonkehu maalaꞌlinanni coyira iso galatano hasiissannonke. Lawishshaho baxisannoha addi addi kuula afidhino daraaro daafira, kiirre tunqannikkite coommitanno sagale daafiranna jaallanke ledo yanna sayinse afiꞌneemmo hagiirri daafira Yihowa galata dandiineemmo. Baxillaanchu Anninke kurinna wole batinye coyibba uyinonkehu hagiidhinammora yeeti. (Far. 104:12-15, 24) Wolu baalunkunni roore, falakkinota ayyaanaamittete sagale shiqishannonke daafiranna dhagge ikkitannote albillittete hexxonke daafira Yihowa galaxxineemmosi. Yihowa assinonke coyi baalaho galata hambeemmoha ikkara dandaanno. Qaangeemmo gede kaaꞌlankera dandaannori maati? Yihowa huucciꞌnoommo coye borreessine amaxxanna isi huuccattonkera dawaro qolinonkehu hiittoonniitiro afate hakko coye wirro laꞌꞌa dandiineemmo. Hakkiinni isi kaaꞌlinonke daafira huuccattotenni galaxxa dandiineemmo.—Qol. 3:15. w22.07 22 guf. 8-9

Halaale xiinxalla calla ikkitannokkita anfoommo. Woꞌma horo afiꞌrate halaalunni heeꞌra yaano ronsoommore loosu aana hosiisa hasiissannonke. Halaalu addu hagiirre afiꞌneemmo gede kaaꞌlannonkehu hatto assinummoro callaati. (Yai. 1:25) Halaalu giddo heeꞌnoommota buuxiꞌra dandiineemmohu hiittoonniiti? Mittu rodii, loosu aana hosiinsanni heeꞌnoommori maatironna woyyeessiꞌra hasiissannonkeri maatiro afate, ninkeneeto layiꞌra hasiissaanketa coyiꞌrino. Soqqamaasinchu Phaawuloosi tenne daafira kulanni togo yiino: “Kulloonninke garinni heeꞌnoommowiinni alba hinge qaanfo.” (Fil. 3:16) Hanni ‘halaalunni heeꞌrate’ dandiinummore baala assinummoro afiꞌneemmo horo hendo! Hatto assineemmoha ikkiro uminke heeshsho woyyaabbannoha calla ikkikkinni, Yihowanna ammanate roduuwinkeno hagiidhitanno gede assineemmo. (Law. 27:11; 3 Yoh. 3) Halaale banxeemmonna halaalunni heeꞌneemmo gede assannonkehu qaru coyi konneeti. w22.08 18-19 guf. 16-18

Songote cimeeyye Yihowanna Yesuusa baxxannota leellisha dandiitannohu hiittoonniiti? Insa tenne leellishshannoti qara doogo Yesuusi geꞌreewo towaatate. (1 Phe. 5:1, 2) Yesuusi soqqamaasinchu Pheexiroosira tenne hedo xawise kulino. Pheexiroosi Yesuusa sase hige kaadihu gedensaanni iso baxannota leellishate quqquxaminoha ikkara dandaanno. Yesuusi reyotenni kaihu gedensaanni Pheexiroosi, “Yoona beetto Simiooni, baxattoeni?” yee xaꞌmino. Pheexiroosi Mootichasi baxannota leellishate dandiire baala assinota dihuluullammeemmo. Yesuusi Pheexiroosi “Goodannaꞌya agari!” yiinosi. (Yoh. 21:15-17) Pheexiroosi heeshshosi diro woꞌma Mootichu geꞌreewo shaqqillunni towaate Yesuusa baxannota leellishino. Cimeeyye, Yesuusi Pheexiroosira kulinore lowori gede assitine laꞌinannita leellisha dandiitinannihu hiittoonniiti? Woꞌmanka woyite ammanate roduuwaꞌne towaattine hattono ayyaanaamittetenni qiiddinori Yihowawa higganno gede kaaꞌlitine Yihowanna Yesuusa baxxinannita leellisha dandiitinanni.—Hiz. 34:11, 12. w23.01 29 guf. 10-11

Iillanni nooe qarra afa dandaanno manchi dino yite heda qorophi. Togo yite heda hexxo mudhatto gedenna busha yorto qeeꞌle diafeemmo yite hedatto gede assitannohe. Qullaawu Maxaafi kayinni togo yaanno: “Jifantinanni woyite cincitine saꞌꞌa dandiitinanni gede, fultinanni doogo qixxeessannoꞌne.” Hakko daafira busha yorto waaddannonkeha ikkiro nafa qeelle saꞌꞌa dandiineemmo. Yihowa kaaꞌlonni busha coye assa qoropha dandiineemmo. Woꞌmanka woyite tenne qaagi: Guuntete xeꞌne noonkere ikkinoommo daafira busha yorto woꞌmunni woꞌma hooꞌla didandiineemmo. Kayinni togoo yorto waaddannonke woyite Yooseefi gede murciꞌne giwa dandiineemmo; isi Phoxifaari minaamawiinni bayichonkonni rahe xooqino. (Kal. 39:12) Busha yorto qarrissunkerono tenne yorto giwa dandiineemmo! w23.01 12-13 guf. 16-17

Taashsho Yihowa akataati. (Mar. 32:4) Taashsho mallaada hoogate ledo xaadooshshe afidhino; qoleno Yihowa dimallaadannoho. (Soq. 10:34, 35) Isi Qullaawa Maxaafa lowo manni coyiꞌranno qaalinni borreessinanni gede assasi mallaadannokkiha ikkinota leellishshanno. Yihowa goofimarchu yannara “addu egennono” yaano Qullaawu Maxaafi giddo noo egenno ‘woꞌmitannota’ kule qaale eino. Batinyu manni Qullaawa Borro huwatanno. (Dan. 12:4, NW) Tini egenno woꞌmitino doogga giddo mitte tirotenna attamate loosooti; hattono Qullaawa Maxaafanna Qullaawu Maxaafi aana xintantino borro mannaho tuqisate. Yihowa dirijjite Qullaawa Maxaafa woꞌma woy xea 240 saꞌꞌanno afiinni tirtino; hattono mannu woxe baatikkinni adha dandaanno. Konni garinni baalante gaꞌre manni goofimarchu daara albaanni ‘Maganu Gashshootiha Dancha Duduwo’ rosanni no. (Mat. 24:14) Taashshote Magani dandaami deerrinni batinyu manni Qaalesi nabbawe iso afanno faro afiꞌrara hasiꞌranno. Isi hatto assannohu ninke baalanka lowo geeshsha baxannonke daafiraati. w23.02 5 guf. 11-12

Keeraanchimma baxatto? Baxattoti dihuluullissannote. Kayinni baalunku guuntete xeꞌne noonkere ikkinoommo daafira qoropha hoongummoro garanna gara ikkinokkiri daafira tenne alame lawishsha harunsinammora dandiineemmo. (Isa. 5:20) Alamete aana lowo manni naaxxanno, woloota mishanno hattono wolootunni roore keeraano ikkinohu gede asse hedanno. Maganu kayinni togoo akatta dibaxanno. Yesuusi uullate noo yannara, hakka waro noori ammaꞌnote massagaano keeraanchimmate daafira uminsa seera fushshitannohura rufinonsa. (Ros. 7:16; Luq. 16:15) Yihowa albaanni gara ikkinore assanno manchi wolootunni roore keeraancho ikkinohu gede asse horonta dihedanno. Keeraanchimma baxisanno akataati. Haranchunni keeraanchimmate yaa Maganu Yihowa albaanni gara ikkinore assate yaate. Qullaawu Maxaafi giddo “keeraanchimma” yine tirroonni qaali, Yihowa biddishshi garinni heeꞌra yitanno tiro afiꞌrinoho. w22.08 27 guf. 3-5

Yesuusi rosaanosi soꞌro loossinoha ikkirono isi insa ammaninonsa. (Yoh. 15:16) Yaiqoobinna Yohaannisi Gashshootisi giddo baxxino bayicho aannonsa gede xaꞌmidhuta, Yesuusi insa Yihowara soqqantanno gede kakkayisinonsari maatiro dihuluullamino woy rosaanosi ikkitannota dihoolinonsa. (Maq. 10:35-40) Gedensaanni Yesuusa amandi hashsha rosaanosi baala Yesuusa agurte xooqqino. (Mat. 26:56) Ikkirono Yesuusi insa ammana diagurino. Insa guuntete xeꞌne noonsare ikkitinota seekke afino; hakko daafira “goofimarchu geeshsha [baxinonsa].” (Yoh. 13:1) Yesuusi reyotenni kaihu gedensaanni 11 ammanantino soqqamaasinesira shaaꞌꞌa ikkinokki looso yaano manna rosaano assatenna muxxe geꞌreewosi towaatate looso nafa uyinonsa. (Mat. 28:19, 20; Yoh. 21:15-17) Isi guuta ikkitinokkire kuri mannu ooso addaxxasi garankolla. Insa baalunku uullayidi heeshshonsa jeefissa geeshsha ammanante soqqantino. Addanko Yesuusi guuntete xeꞌne noonsare mannu ooso addaxxate dancha lawishsha ikkinonke. w22.09 6 guf. 12

Yihowa baxannonketanna ledonke noota ammannummoro, Sheexaanu waajjishiishankera didandaanno. Lawishshaho, Faarso 118 borreessino faarsaasinchira mitu lowo geya yaachishanno coyi iillinosi. Isira lowo diinna noosi; kuri giddo gamu lowo silxaane noonsareeti (kiiro 9, 10). Mite yannara iso lowo geeshsha waandoonnisi (kiiro 13). Yihowano kaajjishe seejjinosi (kiiro 18). Ikkirono kuni faarsaasinchi “diwaajjeemmo” yee faarsino. Isi Yihowa kaajjishe seejjinosiha ikkirono baxannosita afino. Kuni faarsaasinchi iillannosi qarri ikkihano ikkiro, baxillaanchu Maganisi iso kaaꞌlate woꞌmanka woyite qixxaawinoha ikkinota ammanino. (Far. 118:29) Yihowa ninke mitto mittonka baxannonketa ammana hasiissaanke. Tenne ammananke aane nooha sase rosamino coye waajjineemmokki gede kaaꞌlitannonke; insano: (1) maatenkera hasiisannore shiqisha hoongeemmo yine waajjate, (2) manna waajjate hattono (3) reyo waajjate. w22.06 15 guf. 3-4

Heeshshonke giddo Yihowa magansiꞌra balaxisiinsanni heeꞌnoommoronna teꞌee buuxiꞌra hasiissannonke. Kalaqaanchonke ikkino daafira Yihowa magansiꞌra hasiissannonke. (Aju. 4:11; 14:6, 7) Hakko daafira isi hasiꞌranno garinni yaano “ayyaanunninna halaalunni” magansiꞌra hasiissannonke. (Yoh. 4:23, 24) Qaalisi giddo noo halaali garinni Yihowa magansiꞌrate qullaawu ayyaanisi massagannonke gede assiꞌra hasiissannonke. Loosonke hoolloonni woy agamboonni gobbara heeꞌneemmoha ikkiro nafa, Yihowa magansiꞌra balaxisiisa hasiissannonke. Xaa yannara Yihowa Farciꞌraasine ikkitino daafira calla 100 saꞌanno roduuwanke usurroonninsa. Ikkirono insa hagiirrunni huucciꞌrate, xiinxallatenna Maganu Mangiste daafira wolootaho kulate dandiiture baala assitanni no. Mannu xoninkerono xiiwinkerono Yihowa ledonke noota anfoommo daafira hagiirraamma ikka dandiineemmo.—1 Phe. 4:14. w22.10 9 guf. 13

Lawishshu maxaafi giddo Yihowa woꞌmanka woyite kaaꞌlitannonke amaale uyinonke; tenne amaale loosu aana hosiinsummoro heeshshonke woyyaabbanno. Hanni hayyo noote tenne amaale giddo lame laꞌno. Umihunni, nooherinni kassi yite heeꞌri. Lawishsha 23:4, 5 togo yite amaaltannonke: “Jirote yite atenee orbaassooti. . . . Jiro iima hige buuwanno allamurchi gede, ati laꞌanna hedeweelcho qoola assidhe buubbe baꞌanno.” Ikkirono xaa yannara dureeyyeno buxaneno jiro afiꞌrate lowo geeshsha yaaddanno. Tini duucha woyite, suꞌnaado suꞌmansa, wolootu ledo noonsa aante wole agurina fayyimmansa nafa gawajjannore assitanno gede assitannonsa. (Law. 28:20; 1 Xim. 6:9, 10) Layinkihunni, coyiꞌrattora albaanni balaxxe hedi. Qoropha hoongummoro coyiꞌneemmo coyi lowore gawajjara dandaanno. Lawishsha 12:18, “Dayi gede coyiꞌnanni coyi manna urdete gede qasanno; egennaamu arrawi kayinni hursanno” yaanno. Wolootu soꞌro kulle heꞌma qorophineemmoha ikkiro keeru heeꞌranno gede assineemmo.—Law. 20:19. w22.10 21 guf. 14; 22 guf. 16-17

Hiziqeeli duduwanno sokka woꞌmunni woꞌma wodancha hasiissinosi. Isi tenne sokka sabbakate kaꞌꞌanno gede giddose borreessinoonnire seekke ammana hasiissannosi. Hakkiinni dhagge ikkannori ikki. Hiziqeelira xaaxo ‘malawimma coommitusi.’ (Hiz. 3:3) Mayira? Yihowa riqiwe tenne sokka duduwa Hiziqeeli hagiirsiissinosi; hattono coommannori gede ikkitinosi. (Far. 19:8-11) Isi Yihowa masaalaanchosi asse soqqinosi daafira hagiidhino. Gedensoonni Yihowa Hiziqeeli, “Kuleemmohere baala seekkite wodanchi” yiinosi. (Hiz. 3:10) Yihowa konne biddishsha oye Hiziqeeli xaaxote giddo borreessinoonni coye qaagannonna hiincanno gede kulinosi. Hiziqeeli hatto assasi ammanasi roore kaajjishshino. Qoleno tini mannaho duduwannota kaajja sokka huwatanno gede kaaꞌlitinosi. (Hiz. 3:11) Maganu sokka wodanisiranna afiisira noo daafira Hiziqeeli uyinoonnisi looso hanafatenna umo fushshate qixxaawino. w22.11 6 guf. 12-14

Yihowa dirijjite assitino taashsho fonqolo ikkituhero, maa assatto? Dirijjite biddi assitino coyira woꞌmunni woꞌma hajajami. Israeele halalla dukkaꞌnitinowiinni kaꞌe bayichunni bayicho hadhanno woyite Qehaati ilama taaboota dukke mannu baalu albaanni hadhanno. (Kir. 3:29, 31; 10:33; Iya. 3:2-4) Tini lowo qoossooti! Ikkirono, Israeele Hexxote Gobba eꞌe heeꞌra hanaffuta kuni coyi soorramino. Xaate Taaboota bayichunni bayicho haaꞌne haꞌra dihasiissanno. Hakko daafira Qehaati ilamara wole looso uyinoonni. (1 Dud. 6:31-33; 26:1, 24) Qehaati ilama wido ikkitinori alba kaajja qoosso noonsa daafira xa uyinoonninsa qoosso mishshinota woy wole ayirrado looso uyinansara xaꞌmidhinota leellishannori dino. Ninke maa ronseemmo? Noohe qoosso hoogatto gede assannoha ikkiro nafa, Yihowa dirijjite biddi assitino coyira baalaho woꞌmunni woꞌma hajajami. Uyinannihe loosi baalunkunni hagiidhi. Yihowa albaanni lowo waaga afiꞌratto gede assannohehu uyinoonnihe looso ikkinokkita qaagi. Yihowa roore naadannohu noohe qoosso ikkikkinni hajajamattoha ikkakkiiti. w22.11 23 guf. 10-11

Onesifoori soqqamaasincho Phaawuloosi hasino; hattono isinni xaadi yannara mitore asse iso kaaꞌlanno faro hasiꞌrino. Onesifoori hatto asse umisi heeshsho nafa qarru giddo tugino. Ninke maa ronseemmo? Manna waajja dartu iillanni noonsa roduuwa kaaꞌlineemmonsakki gede assitankera wodha dihasiissannonke. Hatteentenni insara halamanna insa kaaꞌla hasiissannonke. (Law. 17:17) Insara ninke baxillinna kaaꞌlo hasiissannonsa. Hanni Ruusiyaho heedhanno roduuwi muxxe ammanate roduuwansa usurri yannara insa kaaꞌlitino gara laꞌno. Insa yoote shiqinshi yannara batinyu roduuwi insara kaaꞌlamate yoote minira hadhino. Ninke maa ronseemmo? Albisa ikkite soqqantanno roduuwa suꞌmansa hunnanni woyite, usurranninsa woy darte iillinshanninsa woyite waajja dihasiissannonke. Insa daafira huucce, maatensa towaatte hattono mitore assitine kaaꞌlitinanninsata wole faro hasidhe.—Soq. 12:5; 2 Qor. 1:10, 11. w22.11 17 guf. 11-12

Songote cimeeyye loossanno loosi giddo gamu, dadillitinore ayyaanaamittetenni dhaawatenna jawaachishate. (1 Phe. 5:2) Dano kalaqantanno woyite, umo songote cimeeyye mittu mittunku halashshaanchi gatato afiꞌrinoro, sagale, uddanonna galannowi noosiro buuxa hasiissannonsa. Ikkirono dano kalaqantuhunni lowo agani gedensaanni nafa mitu roduuwira ayyaanaamittete jawaantenna shesho hasiissannonsa. (Yoh. 21:15) Dano iillitinonsare batinye roduuwa hasaawisinohu Harooldi yinannihu mittu Sinu Biiro Komite miili togo yiino: “Roduuwu galagalte jawaatate yanna hasiissannonsa. Insa albinsa gede ikkite heeꞌra hanaffara dandiitanno; kayinni shiidhino manni, bainonsahu muxxe ikkino coyinna xooqqe fultino gari qulli yaanni waadansara dandaanno. Tenne qaagansa galagalte dadillitanno gede assitansara dandiitanno. Tini nooreentilla ikkiina ammana ajjinonsata leellishshannota diꞌꞌikkitino.” Songote cimeeyye “wiꞌlitannori ledo wiꞌle” yitanno amaale harunsitanno.—Rom. 12:15. w22.12 22 guf. 1; 24-25 guf. 10-11

Yihowa gara ikkinore assate sharrammeemmo woyite ninke kaaꞌlate shaqqillunni qullaawa ayyaanasi aannonke. Maganu Qaale xiinxallineemmo woyite, Maganu ayyaani kaaꞌlannonke gede assiꞌnanni heeꞌnoommo. Gambooshshe haꞌneemmo woyiteno qullaawa ayyaana afiꞌneemmo. Gambooshshunniwa ninkente gede gara ikkinore assate sharrantannori ammanate roduuwinke ledo yanna sayinseemmo; tini qolte jawaachishshannonke. (Ibi. 10:24, 25; 13:7) Mite laanfenke qeeꞌlineemmo gede kaaꞌlankera giddonketa kulle Yihowa eeggifante huucciꞌnummoro, isi sharrama agurreemmokki gede kaaꞌlannonkeha qullaawa ayyaanasi aannonke. Kuri coyibba busha yorto qeeꞌlineemmo gede assa hooggunkero nafa, togoo coye assineemmo gede xixxiiwannonkere gimbeemmo gede kaaꞌlitannonke. Ayyaanaamittete coye assate rosichi heeꞌrannonke gede assiꞌnummohu gedensaanni, konne coye woꞌmanka woyite assatenna gara ikkinore assate agurrummokki sharrama hasiissannonke. w23.01 11 guf. 13-14

Qullaawu Maxaafi fayyimma agadhinanni gara woy intanni sagale daafira kulanno maxaafa ikka hoogirono, tenne hajo daafira Yihowa hedo anfeemmo gede kaaꞌlannonke. Lawishshaho mannimmanke gawajjanno ‘qarra abbannore’ hooꞌlineemmo gede jawaachishannonke. (Ros. 11:10) Qullaawu Maxaafi quwa saꞌne itanna aga hasiissannonkekkita kulannonke; quwa saꞌne ita woy aga fayyimmanke gawajjitaranna shitankera nafa dandiitanno. (Law. 23:20) Yihowa maa inteemmoronna angeemmoro hattono mageeshshire inteemmoronna angeemmoro doodhineemmo woyite, ninkeneeto qeeꞌlineemmore ikkinammora hasiꞌranno. (1 Qor. 9:25) Mitto coye seekkine buunxe Maganu uyinonke heeshsho lowo geeshsha naandeemmota leellishanno doorsha doodha dandiineemmo. (Far. 119:99, 100; Law. 2:11) Lawishshaho inteemmore qorophine doodha dandiineemmo. Mitte banxeemmo sagale inteenna dhiwannonkeha ikkiro hattee sagale ita dihasiissannonke. Dancha gede gonxe, ganyine ispoorte loonse, woꞌmanka woyite hayishshiꞌnenna qaenke ishinu nookkita assiꞌne hayyoota ikkinoommota leellisha dandiineemmo. w23.02 21 guf. 6-7

Qullaawa Maxaafa nabbambeemmo woyite ayyaanaamittete jiro afiꞌra dandiineemmohu hiittoonniiti? Hanni 2 Ximootewoosi 3:16, 17 yitannore laꞌno. Qummeeshshu, “Qullaawa Borro baala” (1) rosiisate, (2) seejjate, (3) soꞌro hoolatenna (4) biddishsha aate ‘kaaꞌlitannota’ kulanno. Duucha woyite nabbabbinannikkita Qullaawu Maxaafi maxaaffa nabbabbinanni woyite nafa tenne shoolenta horo afiꞌra dandiitinanni. Nabbabbinanni heedhinoonni xagge Yihowa daafira, isi hedinori daafira woy Maganu seeri daafira maa rosiissannoꞌnero hedde. Qoleno tini xagge seejjo afiꞌrate kaaꞌlitannohu hiittoonniitiro wodanche. Tenne assate, qummeeshshu gara ikkitinokki dooꞌꞌo woy hedo bade afate woy hooꞌlate hattono Yihowara ammanantine heeꞌrate kaaꞌlannoꞌnehu hiittoonniitiro wodanche. Nabbabbinanni heedhinoonni gafi soꞌro hoolate woy gara ikkitinokki hedo biddi assate horoonsiꞌra dandiitinannihu hiittoonniitiro hedde; lawishshaho soqqanshonniwa xaaddinanni manni coyiꞌrannore heda dandiitinanni. Qoleno qummeeshshu giddo biddishsha afiꞌratenna Yihowa hedo maatiro afate kaaꞌlitanno hedo nooro wodanche. Tenne shoolenta horo hendeemmoha ikkiro Qullaawu Maxaafi niwaawenni roore horo afiꞌneemmo gede kaaꞌlitannonketa ayyaanaamittete jiro afiꞌneemmo. w23.02 11 guf. 11

Daanieeli maxaafi giddo nooti wole masaalo Yesuusi moohannohu masaalotenni kulloonnihu lamalu diri jeefora ikkinota kultanno. Yesuusi moote ikkinohu mamooteetiro afa dandiinanni? (Dan. 4:10-17) “Lamalu diri” 2,520 dirooti. Kuni diri hanafinohu 607 K.A. Baabiloonootu Yerusaalamete Yihowa zuufaanera ofolle nooha jeefote moote qeeltu woyiteeti. Kuni diri goofinohu 1914 M.D. Yihowa ‘doorinohu’ Yesuusi Maganu Mangiste Moote ikki woyiteeti. (Hiz. 21:25-27) Tini masaalo kaaꞌlitannonkehu hiittoonniiti? “Lamalu diri” daafira kultanno masaalo huwatanke Yihowa eino qaale hirqino yannara wonshannota addaxxineemmo gede assitannonke. Yihowa hirqino yannara Mangistesi xintantanno gede assinte gede, wole baala masaalono hirqino yannara woꞌmitanno gede assanno. Ee, Yihowa barri ‘dikeeshshanno.’—Imb. 2:3. w22.07 3 guf. 3-5