Wocawaaro

Maganu Yesuusira mannu ooso qarra baala tirate wolqa uyinosi. Yesuusi loosino maalale, xaa yannara ninke uminkenni hooꞌla dandiineemmokki qarra baala hoola dandaannota leellishshanno. Lawishshaho isira mannu ooso qarrira kaima ikkinoha ragiꞌnoommo cubbo hattono cubbu abbino dhibbanna reyo hunate wolqa noosi. (Mat. 9:1-6; Rom. 5:12, 18, 19) Isi loosino maalale ‘addi addi dhibba’ hursanna reyitinore nafa kayisa dandaannota leellishshanno. (Mat. 4:23; Yoh. 11:43, 44) Qoleno isira wolqaataame bubbe sammi assatenna bushu ayyaani amadinonsare hursate wolqa noosi. (Maq. 4:37-39; Luq. 8:2) Yihowa Beettisira togoo wolqa uyinosita afanke lowo geeshsha jawaachishshannonke! Albillitte Maganu Gashshooti yannara ikkanno yinoonnihu danchu coyi woꞌmannota addaxxa dandiineemmo. Yesuusi uullate aana noo yannara loosino maalale, isi iima Maganu Gashshooti Moote ikke gashshanno yannara hakkiinni sainore assannota anfeemmo gede assitannonke. w23.04 3 guf. 5-7

Songoꞌne jawa ikkituronna anga duucha higge kayisittorono xaꞌminannihekkiha ikkiro, hexxo mudhattora dandaatto. Ikkirono dawaro qolate woꞌnaala agurtooti. Gambooshshe haꞌratto kiiro duucha dawaro qixxaabbe haꞌri. Hatto ikkiro umi qara dawaro qolatto gede xaꞌma hoongihero, gambooshshu goofa geeshsha dawaro qolatto faro afiꞌrattora dandaatto. Agarooshshu Shae qixxaawatto woyite mitte mittenti gufo xiinxallote birxichi cuꞌmo ledo mayi xaadooshshe afidhinoro hedi. Hatto assittoro xiinxallo gooffa geeshsha qolattota dancha dawaro dihoogatto. Qoleno xawise kulate qarrisannoha gufote giddo kulloonniha hawa gede huwantannikkiha Qullaawu Maxaafi halaale xawisse kulate qixxaawa dandaatto. Mayira? Korkaatuno togoo woyite dawaro qolanno manni shiima ikkara dandaanno. Xaano kayinni gambooshshunniwa dawaro qolate faro afiꞌrittokki keeshshoottohalla ikki? Massaganno rodiira hiittee xaꞌmora dawaro qola hasiꞌrattoro kuli. w23.04 21-22 guf. 9-10

Yooseefi Yihowa biddishsha harunsate maahoyye yiino; tini qolte dancha minaanna ikkanno gede assitinosi. Ajayi ajeenna sase hige Yihowa Yooseefira maatesi daafira biddishsha uyinosi. Lowore biddi assiꞌra hasiissannosiha ikkirono, Yooseefi sasente yannara Yihowara bayichonko hajajamino. (Mat. 1:20; 2:13-15, 19-21) Yooseefi Yihowa biddishsha harunse Maariyaami agarinose, kaaꞌlinose hattono towaatinose. Yooseefi assinori Maariyaami iso mageeshshi geeshsha baxxannonna ayirrissanno gede assinosero hanni hedi! Minaannuwa, maateꞌne towaaxxate Qullaawu Maxaafi amaale harunsitine kiꞌneno Yooseefi lawishsha harunsa dandiitinanni. Biddi assiꞌra hasiissannoꞌneri heeꞌriro nafa tenne amaale harunsitiniro, minaamaꞌne baxxinannita leellishshinanni; hattono adhamaꞌne kaajjitanno. Mine assidhunkunni 20 diro saꞌꞌannoseti Vaaniwaatu yinanniwa heedhanno rodoo togo yitino: “Minaanniꞌya Yihowa biddishsha hasiꞌrannonna loosu aana hosiisanno woyite albinni roore ayirriseemmasi. Iso addaxxeemmasi hattono danchare assannota dihuluullameemma.” w23.05 21 guf. 5

Baabiloonetenni gobbansa higinohu Ayihudete manni Maganinsara “qullaawa gosa” ikkanno. (Mar. 7:6) Hatto yaa kayinni insa Yihowa hagiirsiisate mito coye biddi assiꞌra dihasiissannonsa yaa diꞌꞌikkitino. Rooru Ayihudete manni ilaminohu Baabilooneteeti; hakko daafira insa Baabiloonootu assootenna seeransa rossukki digattino. Umo fultino Ayihudooti Israeele higguhunni lowo diri gedensaanni, Gashshaanchu Nehimiya, Israeelete ilantino qaaqquulli Ayihudete manni coyiꞌranno qaale dandiitannokkita afiti lowo geeshsha dadillino. (Mar. 6:6, 7; Neh. 13:23, 24) Ikkina kuri qaaqquulli Maganu Qaale borreessinoonniha Ibiraawootu afoo dandiitannokkiha ikkiro, Yihowa baxanna iso magansiꞌra hiitto ikkite dandiitanno? (Izi. 10:3, 44) Hakko daafira kuni Ayihudete manni lowore biddi assiꞌra hasiissinonsa; ikkirono halaalu magansiꞌra sunu sununni wirro xintantanni noowa Israeelete gobbara heeshshonsa biddi assiꞌra qarra diꞌꞌikkitannonsa.—Neh. 8:8, 9. w23.05 15 guf. 6-7

Lowo hasatto heedhunkerono woy ninkeneeto eemadhinummorono guficho ikkannori tuncu yaankera dandaanno. Lawishshaho ‘hedeweelchu coyi’ mixonke wonshiꞌrate sharrammeemmo yanna hoongeemmo gede assankera dandaanno. (Ros. 9:12) Hexxo mudhineemmonna wolqa baꞌneemmo gede assanno qarri iillankera dandaanno. (Law. 24:10) Guuntete xeꞌne noonkere ikkinoommo daafira mixonke wonshiꞌra qarra ikkitannonke gede assitanno soꞌro loonsammora dandiineemmo. (Rom. 7:23) Woy daafurrammora dandiineemmo. (Mat. 26:43) Guficho woy ataawe ikkannonkere qeelleemmo gede kaaꞌlannonkeri maati? Guficho ikkannori tuncu yiihe yaa mixokki wonshiꞌra didandaatto yaa ikkitinokkita qaagi. Qullaawu Maxaafi qarra ikkannonkeri duucha hige tuncu yaankera dandaannota kulanno. Ikkirono, iillannonke qarra qeelle saꞌꞌa dandiineemmotano kulanno. Addanko, qarra woy ataawe ikkannori heeꞌreennanni mixonke wonshiꞌrate sharramanke Yihowa hagiirsiisa hasiꞌneemmota leellishshanno. Yihowa mixonke wonshiꞌrate woꞌmanka woyite sharrammanna laꞌꞌanno woyite lowo geeshsha hagiidhanno! w23.05 30 guf. 14-15

Suwisaancho ikka mittu wedellichi addi addi manni ledo sumuu yee loosa dandaanno gara rosanno gede kaaꞌlitannosi. Qoleno woxe hayyotenni horoonsiꞌranno gedenna afimalsannokki gede kaaꞌlitannosi. (Fil. 4:11-13) Woꞌma yanna soqqansho hanafate kaaꞌlitannoti kaajja doogo kaaꞌlaancho suwisaancho ikkate; tini woꞌma yanna suwisaano ikke soqqamate qixxaambanni gede kaaꞌlitanno. Woꞌma yanna suwisaano ikkine soqqama wolu garite woꞌma yanna soqqanshora lawishshaho Magano magansiꞌnanni mine minate woy Beeteelete soqqamate faro fantanno. Labballu roduuwi songote cimeeyye ikkite roduuwinsara soqqamate ikkadoota ikkate mixo fushshiꞌra hasiissannonsa. Qullaawu Maxaafi tenne mixo wonshiꞌrate sharrantanno labballi ‘ayirrado looso halchitannota’ kulanno. (1 Xim. 3:1) Mittu rodii umo, songote soqqamaancho ikke soqqamate ikkado ikka hasiissannosi. Songote soqqamaano duucha doogganni songote cimeeyye kaaꞌlitanno. Songote soqqamaanonna songote cimeeyye umonsa heeshshi assite ammanate roduuwinsara soqqantanno; hattono diinaggaabbe sabbakkanno. w23.12 28 guf. 14-16

Moote Iyosiyaasi Yihowa hasiꞌra hanafinohu wedellichu heeꞌreeti. Isi Yihowa daafira rosanna fajjosi wonsha hasiꞌrino. Ikkirono konni wedellichu mootera heeshsho shota diꞌꞌikkitino. Isi kaphu maganna batidhe noo yannara halaalu magansiꞌrara halama hasiissinosi. Hedinorino qiniinosi! Isi 20 diro ikkasira albaanni Yihudu gobbanni kaphu maganna huna hanafino. (2 Dud. 34:1, 2) Dirikki shiima ikkiro nafa Yihowa hasidhenna akattasi daafira xiinxallite Iyosiyaasi lawishsha harunsate murciꞌra dandaatto. Togo assakki heeshshokki isira sayisse aatto gede kakkayissannohe. Heeshshokki Yihowara sayisse aakki barru barrunku hiittoo heeshsho heeꞌratto gede assitannohe? Luki yinannihu 14 dirisinni cuuamino rodii togo yiino: “Xaanni hanafe heeshshoꞌya giddo Yihowa balaxisiisatenna iso hagiirsiisate sharrameemmo.” (Maq. 12:30) Atino hatto assattoha ikkiro lowo atoote afiꞌratto! w23.09 11 guf. 12-13

Soqqamaasinchu Phaawuloosi tenne sokka Teselonqe noo songora borreessi yannara, songo xintantunkunni mitto diro diꞌꞌikkino. Tenne songora noori shoomantino labballi woꞌnaalshu noonsakkire ikkitara dandiitanno; hattono soꞌro loossinoha ikkara dandaanno. Ikkirono roduuwu insa ayirrisa hasiissannonsa. Bayiru qarri roore gambise daanno woyite, xaa yannanni roore biddishsha afiꞌneemmohu songote cimeeyyewiinni calla ikkara dandaanno. Hatte yannara qara biironni woy sinu biironni biddishsha afiꞌra hoongammora dandiineemmo; hakko daafira xaanni songote cimeeyye baxanna ayirrisa rosa hasiissannonke. Ikkirino ikkiro, insata guuntete xeꞌnensa illachisha agurre Yihowa Kiristoosi widoonni kuri ammanantino labballo massaganni noota leellishshanno taje illachinshe jilbunni heeꞌno. Gullee olamaanchu umo agartannonte gede, gatote hexxonkeno hedonke agartanno. Tini alame shiqishshannori kaaꞌlannori nookkita anfoommo. (Fil. 3:8) Hexxonke wodanaaꞌmineemmonna manseemmokki gede kaaꞌlitannonke. w23.06 11-12 guf. 11-12

Hawanya mancho huuro macciishshitannori mitte doodha hasiissannonsa: Insa ise koyishsha adhitannonso gibbanno? Foorretewiinni xeertiꞌneemmo gede assannohu ikkadu korkaati no. Hawanya mancho, ‘Moorre anganni wayi coommanno’ yitanni noohu gede assine kulloonni. (Law. 9:17) “Moorre anganni wayi” maati? Qullaawu Maxaafi minaanninna minaama siimu xaadooshshe asse afiꞌranno hagiirre gooꞌro qolanno wayi gede asse kulanno. (Law. 5:15-18) Konni garinni hagiirre afiꞌra dandaannori seerunni adhamino minaannanna minaama callaho. ‘Moorroonni wayi’ kayinni kawiinni lowo geeshsha baxxanno. Kuni wayi foorre leellishannoho. Mooranno manchi maaxame moorannonte gede, fooranno manchino foorannota wolootu affannokki gede assate woꞌnaalanno. Foortannori assootensa wolu manni diafino yite heddanno daafira, kuni ‘moorte aggino wayi’ coommannoha lawansara dandaanno. Tini insaneeto dogate! Yihowa baalankare laꞌꞌanno. Yihowa dadillisate geeshsha qaraarannori dino; hakko daafira togoore assine afiꞌnanniri ‘coommannore’ diꞌꞌikkino.—1 Qor. 6:9, 10. w23.06 22 guf. 7-9

Albi gede giddokkita fushshite huuccidhanni noottokkitanna soqqanshokkinni hagiirraamo ikkoottokkita huwatittoro maa assa dandaatto? Yihowa ayyaana hoogoottohu gede assite heddooti. Guuntete xeꞌne nooheha ikkootto daafira, yannate kiiro hedatto gari soorramara dandaanno. Albi gede diinaggaabbanni noottokkiha ikkiro, soqqamaasinchu Phaawuloosi lawishsha hiinci. Isi Yesuusi faale haꞌrate woꞌnaalinoha ikkirono, mito woyite assa hasiꞌrinore assate hasatto heedhannosikkita afino. Phaawuloosi mito woyite hasatto heedhannosikkiha ikkirono, diinaggaawe soqqanshosi umo fushshate murciꞌrino. Hatteente gede atino guuntete xeꞌne nooheha ikkootto daafira, hedattori gara ikkinokkire doodhatto gede assahera wodhitooti. Hasatto heedhannohekki woyite nafa gara ikkinore assate murciꞌri. Woꞌmanka woyite gara ikkinore assate sharramattoha ikkiro, gale hose hedatto garino soorramara dandaanno.—1 Qor. 9:16. w24.03 11-12 guf. 12-13

Ammanate roduuwinke ledonke yanna sayissanno gede anga fanne haaꞌne insara baxille leellisha dandiineemmo. (2 Qor. 6:11-13) Batinye songuwa giddo noo roduuwi budinna akatinsa addi addiho. Ikkirono songonke giddo noo roduuwi baalunkuha dancha akatansa illachinshe baxillinke lexxanno gede assiꞌra dandiineemmo. Woloota Yihowa laꞌꞌanno garinni laꞌꞌa ronsummoro insa banxeemmonsata leellinsheemmo. Bayiru qarri yannara baxillu lowo geeshsha hasiisannoho. Kuni qarri hanafanno woyite agarooshshe afiꞌneemmohu mamiinniiti? Hanni hunda Baabiloone siꞌni yannara Yihowa mannasi mayyee hajajinoro laꞌno; isi togo yiino: “Mannaꞌya, miniꞌnera eꞌine cufana cufidhe; hanqu saꞌꞌa geeshsha shiima yanna maaxamme.” (Isa. 26:20) Bayiru qarri yannara kuni biddishshi ninkeno harunsineemmoha ikkara dandaanno. w23.07 6-7 guf. 14-16

Amanyootiꞌnenni quwa saꞌinannikkire ikkitinoonnita leellishshe. Ateneeto togo yite xaꞌmi: ‘Mannu ane quwa saeemmokkihu, maahoyye yeemmohunna cinceemmohu gede asse hedannonso ani yoommori calla ikko yeemmoha, kaajjado woy kakkacha ikkoommohu gede asse hedanno? Wolootu yitannore macciishshe, hasiisannoha ikkiro yitinorira sumuu yeemmo?’ Quwa saꞌneemmokkire ikkinoommota leellinshummo kiiro, albinni roore Yihowanna Yesuusi lawishsha harunsinanni heeꞌnoommota leellinsheemmo. Heeꞌnoommo gari soorramanno woyiteno quwa saꞌneemmokkire ikka hasiissannonke. Togoo woyite hendoommokki qarri amadankera dandaanno. Lawishshaho hedeweelcho buuto dhiwammammora dandiineemmo. Woy heeꞌnoommo gobba hedeweelcho miinju qarri amadeenna woy poletiku ikkito soorranteenna lowo qarri amadankera dandaanno. (Ros. 9:11) Yihowa dirijjite wolu gari soqqansho soqqammeemmo gede kultunkero tini nafa qarra ikkitankera dandiitanno. Aane nooha shoole coye assinummoro heeshshonke gari soorramanno woyite tenne rosa dandiineemmo; insano: (1) iillinonke coye ammane adhate, (2) woyyitino yanna daggannota hedate, (3) dancha danchare illachishate hattono (4) woloota kaaꞌlannore assate. w23.07 21-22 guf. 7-8

Baabiloonootu Daanieeli gobbasinni qafadde haadhe hadhu yannara isi wedellichaho. Kayinni qafadde haadhe hadhusiri Daanieeli dhagge assidhinoti dihuluullissannote. Insa “aaniido” yaano Daanieeli ‘guutanna dana xuma’ ikkinota hattono ayirrado maatenni ilaminota affino. (1 Sam. 16:7) Hakko daafira insa Daanieeli mootete mine soqqamanno gede qajeelsitinosi. (Dan. 1:3, 4, 6) Yihowa Daanieeli baxinosihu kuni wedellichi Isira ammanaminoha ikka doodhino daafiraati. Isinni Yihowa Daanieeli, Nohinna Iyyoobi ledo qummi assi woyite Daanieelira 20 diri ballalla ikkannosi; Nohinna Iyyoobi Yihowara lowo diro ammanante soqqantinoreeti. (Kal. 5:32; 6:9, 10; Iyo. 42:16, 17; Hiz. 14:14) Daanieeli seedanna dhagge ikkitanno heeshsho heeꞌrino; Yihowano iso heeshshosi diro woꞌma baxinosi.—Dan. 10:11, 19. w23.08 2 guf. 1-2

Mitto mine hidhattora hedittoro, hakkuyi miniha mitto mittonka coye marte seekkite laꞌꞌattoti egennantinote. Qullaawa Maxaafa nabbambeemmonna xiinxallineemmo woyiteno hatto assa dandiineemmo. Qullaawa Maxaafa iimi iimi adda calla nabbambeemmoha ikkiro, “Maganu qaaliha umi roso” calla wodanchineemmo. (Ibi. 5:12) Hidha hasiꞌnoommo miniha mitto mittonka coye laꞌneemmonte gede, Maganu Qaaleno woꞌmunni woꞌma huwatate hatto assa hasiissannonke. Qullaawa Maxaafa seekke xiinxallate kaaꞌlitannoti kaajja doogo, Qullaawu Maxaafi giddo noo sokka tiꞌi teꞌee ledo xaaddanno gara hedate. Ammanneemmo halaale calla ikkikkinni konne halaale ammanneemmohu mayiraatirono huwatate sharrama hasiissannonke. Maganu Qaale seekkine afate, hawa gede huwantannikkiha Qullaawu Maxaafi halaale xiinxalla hasiissannonke. Soqqamaasinchu Phaawuloosi ammanate roduuwisi Maganu Qaali halaali “mageeshshi geeshsha halaꞌladonna hojjaameessa, seedanna diime ikkinoro” buuxate diinaggaabbe xiinxallitanno gede jawaachishinonsa. Hatto assituro insa ammanansanni ‘rumuxxitenna kaajjite’ heeꞌra dandiitanno. (Efe. 3:14-19) Ninkeno hatto assa hasiissannonke. w23.10 18 guf. 1-3

Qullaawu Maxaafi cincatenni dancha lawishsha ikkannoha batinye manna kulanno. Konni manni xagge xiinxallate pirogiraame fushshiꞌri. Lawishshaho, Daawiti Israeelete moote ikkate buuraminohu anje heeꞌre ikkirono moote ikke gashshate lowo diro agadha hasiissinosi. Simiooninna Haanna daanno yine kulloonniha buuramino Moote agadhe noo yannara Yihowara ammaname soqqamino. (Luq. 2:25, 36-38) Tenne xagge xiinxallatto woyite aante noo xaꞌmuwara dawaro afiꞌrate woꞌnaali: Kuni manchi cincannoha ikkanno gede kaaꞌlinosiri maati? Cincasi kaaꞌlitinosihu hiittoonniiti? Isi lawishsha harunsa dandeemmohu ma garinniiti? Cincinokki manni xagge xiinxallakkino kaaꞌlitannohe. (1 Sam. 13:8-14) Ateneeto togo yite xaꞌma dandaatto: ‘Insa cincitannokki gede assinonsari maati? Cinca hoogansa mayi qarra abbitinonsa?’ w23.08 25 guf. 15

Soqqamaasinchu Pheexiroosi ammanaminoho; isi aye coyino hexxo mudhanno gede assasira diwodhino. Lawishshaho, Yesuusi mitte yannara rosaanosira huwatate qarrisannore coyiꞌri woyite, Pheexiroosi ammanaminoha ikkinota leellishino. (Yoh. 6:68) Batinyu manni, Yesuusi hatto yee coyiꞌrinohu mayyaate hedeetiro buuxa agure iso harunsa agurino. Pheexiroosi kayinni hatto diassino. Isi “hegere heeshsho qaali” noosihu Yesuusa calla ikkinota huwatino. Yesuusi, Pheexiroosinna wole rosaanosi hunte hadhannosita afino. Ikkirono isi, Pheexiroosi galagale higannotanna ammaname heeꞌrannota addaxxannota coyiꞌrino. (Luq. 22:31, 32) Yesuusi ‘ayyaanu qixxaawa maalu kayinni daafuraamo’ ikkinota huwatino. (Maq. 14:38) Pheexiroosi iso egenninokkita kule kaadisihu gedensaanni nafa, Yesuusi konne soqqamaasinchosi hexxo mudhe tuge diagurinosi. Yesuusi reyotenni kaihu gedensaanni Pheexiroosira leellino; tenne yannara Pheexiroosi callisi nooha ikkara dandaanno. (Maq. 16:7; Luq. 24:34; 1 Qor. 15:5) Tini, konne hexxo mudhino soqqamaasincho lowo geeshsha jawaachishshinositi dihuluullissannote! w23.09 22 guf. 9-10

Maganu iso ammantannori cubbo gatona yaanno woy diwanno. Isi cubbonsa woꞌmunni woꞌma gatona yaanno; hattono diqaaganno. (Far. 32:1, 2) Yihowa, ammana noonsa daafira togoo manna minshe noonsakkirinna keeraanote gede asse laꞌꞌannonsa. Keeraanote yinoonninsari Abirihaami, Daawitinna wolootu ammanantino soqqamaano cubbaataammaho. Kayinni insara ammana noonsa daafira Maganu minshe noonsakkiri gede asse lainonsa; roorenkanni ammana noonsakkiri ledo heewisiinsiro Maganu insa keeraanote yaasi garankolla. (Efe. 2:12) Soqqamaasinchu Phaawuloosi borreessino sokkara xawisinonte gede, Maganu ledo jaalooma kalaqiꞌrate ammana hasiissanno. Abirihaaminna Daawiti ammana noonsa daafira Maganu jaala ikkitino; ninkeno ammana heedhunkero Maganu jaalla ikka dandiineemmo. w23.12 3 guf. 6-7

Xaa yannara baalunku Kiristaanira yannansa, wolqansanna woxensa horoonsiꞌre Maganu Mangiste balaxisiise Yihowara kakkalo shiqishiꞌrate qoosso noonsa. Yihowara kakkalo shiqishiꞌrate dandiinummore baala assine iso magansiꞌrate qoossonke naandeemmota leellisha dandiineemmo. Soqqamaasinchu Phaawuloosi Yihowa magansiꞌrate assineemmoha dea hasiissannonkekkiha duucha coye kulino. (Ibi. 10:22-25) Kuri giddo gamu huuccatto assiꞌrate, hexxonke daafira wolootaho kulate, gambooshshe haꞌratenna ‘Yihowa barri gamba yiinota qaanganni mimmitonke albinni roore jawaachishate.’ Yihowa sokkaasinchi Ajuujate maxaafi jeefora Yihowa magansiꞌra hasiissannota luphi asse kulanni “Maganoho kumbuuli!” yiino. (Aju. 19:10; 22:9) Yihowahu bayiru ayyaanaamittennihu qullaawu mini daafira ronsoommo halaalenna bayira Maganonke Yihowa magansiꞌrate afiꞌnoommo qoossonke dea dihasiissannonke! w23.10 29 guf. 17-18

Ninke baalunku, woꞌmanka woyite ‘mimmitinke ledo baxama’ hasiꞌneemmo. Ikkirono Yesuusi, “lowo manni baxilli qiidanno” yee kulino qorowishshano qaaga hasiissannonke. (Mat. 24:12) Isi hatto yiinohu rosaanosi giddonni rooru manni mimmito baxa agurannota kulate diꞌꞌikkino. Ikkirono tenne alamera noohu baxillu noonsakki manni hunannonkekki gede baqqi yine heeꞌra hasiissannonke. Hanni tenne wodanaho wodhine, aante noo xaꞌmo hendo: Ammanate roduuwinkera noonke baxilli kaajje nooronna teꞌee anfeemmo gede kaaꞌlannonkeri maati? Heeshshonke giddo mittu coyi tuncu yiinkero assineemmori, ammanate roduuwinkera noonke baxilli kaajje nooronna teꞌee afate kaaꞌlannonke. (2 Qor. 8:8) Soqqamaasinchu Pheexiroosi tuncu yaankera dandaannoha mitto coye xawisino. Isi, “Baxillu, batinye cubbo diwanno daafira, woꞌmunkuri aleenni mimmitiꞌne ledo seekkitine baxamme” yiino. (1 Phe. 4:8) Hakko daafira wolootu laanfenna guuntete xeꞌnensa baxillinke kaajjadohoronna teꞌee anfanni gede assitara dandiitanno. w23.11 10-11 guf. 12-13

Songote giddo noore mito roduuwa calla banxeemmoha ikkiro Yesuusi baxillu daafira kulino hajajo wonsha didandiineemmo. Hige Yesuusi gede mito roduuwa roorsine banxeemmoha ikkara dandaanno. (Yoh. 13:23; 20:2) Ikkirono soqqamaasinchu Pheexiroosi baalunku roduuwi ayyaanaamittete maatenke ikkitino daafira insa baxate sharrama hasiissannonketa qaagiissinonke. (1 Phe. 2:17) Pheexiroosi “mimmitiꞌne ledo xalalu wodaninni seekkitine baxamme” yee jawaachishinonke. (1 Phe. 1:22) “Seekkine” baxate yaa mitto mancho banxeemmokki gede assanno coyi heeꞌriro nafa iso baxate yaate. Lawishshaho mittu rodii koffi assinonkeha woy xissiisinonkehalla ikki? Iso baxantenni umi qara rabbisiꞌra rakkankera dandiitanno. Ikkirono Pheexiroosi Yesuusiwiinni rabbisiꞌra Magano hagiirsiissannokkita rosino. (Yoh. 18:10, 11) Isi, “Maassidhe ikkinnina, bunshe bunshetenni, xonono xonotenni qoltinoonte” yee borreessino. (1 Phe. 3:9) Woloota seekkine banxeemmoha ikkiro, xissiissinonke roduuwira nafa shaqqille leellinsheemmo. w23.09 28-29 guf. 9-11

Mittu qaaqqi rahe lophe jawa ikkanno gara laꞌneemmo woyite dhagge assiꞌneemmo. Qaaqqu lophannohu mannu sharronni diꞌꞌikkino. Ayyaanaamittetenni lophate kayinni sharrama hasiissanno. (1 Qor. 13:11; Ibi. 6:1) Ayyaanaamittetenni lophate Yihowa ledo kaajja jaalooma kalaqiꞌra hasiissannonke. Qoleno Maganu baxanno akatta heedhannonke gede assiꞌrate, kaaꞌlitanno dandoo rosatenna albillitte afiꞌneemmo qoossora qixxaawate Maganunnihu qullaawu ayyaani hasiisannonke. (Law. 1:5) Yihowa manna labbaahanna meyata asse kalaqino. (Kal. 1:27) Labbaahunna meyati dana mitto ikkinokkinte gede, wolu coyinnino babbaxxanno. Lawishshaho Yihowa labbaahanna meyata uyinoonninsa looso umo fushshitara kalaqino; hakko daafira insara uyinoonninsa looso umo fushshitanno gede kaaꞌlitanno akattanna dandoo hasiissannonsa.—Kal. 2:18. w23.12 18 guf. 1-2

Yesuusi wolootu Annisi suꞌma horoonsidhara hasiꞌranno? Ee hasiꞌranno. Hatte yannara heedhinori mite ammaꞌnote massagaano lowo geeshsha qullaawa ikkino daafira Maganu suꞌma gana dihasiissanno yite ammantannoha ikkara dandaanno; Yesuusi kayinni kuni Qullaawa Borro ledo sumuu yaannokki budi Annisi suꞌma ayirrisannokki gede assasira diwodhino. Hanni Yesuusi Gergesenooni yinanni qooxeessira mitto agaaninte amaddino mancho hursi woyite ikkinore laꞌno. Hakko qooxeessi manni lowo geeshsha waajjino daafira Yesuusi qooxeessinsanni agure haꞌranno gede huucciꞌrino; hakko daafira Yesuusi hakko dikeeshshino. (Maq. 5:16, 17) Ikkirono isi hakko heeꞌranno manni Yihowa suꞌma afara hasiꞌrino. Hakko daafira Yesuusi konne hurino mancho isi assinosire ikkikkinni Yihowa assinosire haꞌre mannaho kulanno gede hajajino. (Maq. 5:19) Xaa yannarano Yesuusi Annisi suꞌma alame woꞌmate kullammora hasiꞌranno! (Mat. 24:14; 28:20) Hatto assineemmo woyite Mootenke Yesuusa hagiirsiinseemmo. w24.02 10 guf. 10

Tenne qarrissannote goofimarchu barruwa giddo, Yihowa dirijjite wido ikkankenni addinta baꞌraaꞌnoommoreeti. Tenne alame ikkito roore bushshanni hadhanni nooha ikkirono, Yihowa mittimma noota ayyaanaamittete maate uyinonke. (Far. 133:1) Isi maatenke hagiirru noota ikkitanno gede kaaꞌlannonke. (Efe. 5:33–6:1) Qoleno Yihowa giddoyidi keere afiꞌneemmo gede kaaꞌlitanno wodanchanna hayyo aannonke. Ikkirono Yihowara ammanamme soqqammanni heeꞌrate sharrama hasiissannonke. Mayira? Korkaatuno mito woyite wolootu guuntete xeꞌne noonsare ikkitino daafira koffi assitankera dandiitanno. Qoleno roorenkanni duucha hinge mittu gari soꞌro loonseemmo woyite hexxo mudhinammora dandiineemmo. Ikkirono, (1) Ammanate rodiinke koffi assannonke woyite, (2) galtenke hexxo mudhineemmo gede assitannonke woyitenna (3) loonsoommo soꞌronni hexxo mudhineemmo woyite Yihowara ammanamme soqqammanni heeꞌrate sharrama hasiissannonke. w24.03 14 guf. 1-2

Yannate kiiro, soqqanshonsa halashshiꞌrate fushshidhino mixo wonshidhino roduuwi woꞌnaalsha macciishshatto. Kuri roduuwi Maganu Mangiste Sawaakooti Rosi Mine eꞌe rossinoha woy sabbakkannori roore hasiissannowa hadhinoha ikkara dandaanno. Dandaattoha ikkiro, atino togoo mixo fushshiꞌrakki danchate. Yihowa manni isira albinni roore soqqamate quqquxamanno. (Soq. 16:9) Kayinni xa hatto assa dandaattokkihalla ikki? ‘Ani wolootu assitanno geeshshire assa didandeemmoho’ yite heddooti. Qaru coyi goofimarchu geeshsha Yihowara kaajjite soqqamate. (Mat. 10:22) Isira soqqamate dandiittore baala assitto geeshsha Yihowa hagiidhannota deꞌooti. Cuuamittohu gedensaanni woꞌmanka woyite Yesuusa harunsa dandaattoti qara doogo tenneeti.—Far. 26:1. w24.03 10 guf. 11

Maaro eꞌneemmoha ikkiro, iimi Anninke gatona yaannonketa kule qaale eino. (Far. 86:5) Hakko daafira cubbinkera addinta maaro eꞌneemmoha ikkiro, Yihowa gatona yaannonketa ammana hasiissannonke. Yihowa quwa saꞌꞌannokkiha ikkinota qaaga hasiissannonke. Isi assa dandiineemmokkire horonta asse diyaannonke. Isira soqqamate dandiinummore baala assinummo geeshsha isi assineemmore naadanno. Qoleno Yihowara woꞌma lubbonsanni soqqaminohu Qullaawu Maxaafi giddo kulloonni manni lawishsha hiince. Hanni soqqamaasinchu Phaawuloosi lawishsha hedde. Isi lowo diro Yihowara diinaggaawe soqqamino, lowo kume ikkitanno kiilo meetire haꞌrino hattono batinye songo xintino. Ikkina isi albi geeshsha soqqama dandaa hoogiti Magano hagiirsiisa dandiinokkihu gede asse hedinoni? Dihedino. Isi dandiire baala assa diagurino; Yihowano maassiꞌrinosi. (Soq. 28:30, 31) Hatteente gede, ninkeno Yihowara soqqamate assineemmori yanna yannate garinni babbaxxara dandaanno. Kayinni Yihowa roore laꞌꞌannohu isira soqqammeemmo gede kakkayisinonke coyeeti. w24.03 27 guf. 7, 9

Yesuusi umisi huuccatto assiꞌre rosaanosira dancha lawishsha ikkino. Isi uullate aana soqqami yannara ganye huucciꞌrino. Isira duucha woyite loosu batiꞌrannosihuranna batinyu manni isiwa daanno daafira, huuccatto assiꞌrate yanna gaaꞌma hasiissinosi. (Maq. 6:31, 45, 46) Isi callisi huuccatto assiꞌranno yanna afiꞌrate soodo gute kaꞌꞌanno. Mitte yannara isi mitto lowo geeshsha hasiisanno coye assara albaanni hashsha woꞌma huucciꞌranni galino. (Luq. 6:12, 13) Qoleno Yesuusi reyara albaanni noo hashsha uullate aana loosara uyinoonnisiha shaaꞌꞌa ikkinokki looso umo fushshanno gede kaaꞌlasira Yihowa duucha hige huucciꞌrino. (Mat. 26:39, 42, 44) Yesuusi lawishshinni, loosu batiꞌrannonkeha ikkirono huuccatto assiꞌrate yanna gaaꞌma hasiissannonketa ronseemmo. Ninkeno Yesuusi gede soodo guto woy hashsha huuccatto assiꞌrate yanna gaaꞌma dandiineemmo. Hatto assineemmoha ikkiro, Yihowa tenne muxxe elto uyinonke daafira galatu noonketa leellinshanni heeꞌnoommo. w23.05 3 guf. 4-5

Hanni techohu barru qummeeshshira nooha “woꞌmino” yaanno qaale hedi. Mitte borro konne qaale “ninkewa lolahu gede ikke dayi” yite xawissino. Tini yaatto Yihowara buuramino Kiristaanira noosi baxilli batiꞌra ikkinota dancha gede assite xawissanno. Buuramino Kiristaanino ‘Maganu baxannonsata’ afino. (Yih. 1) Soqqamaasinchu Yohaannisi insara macciishshamannonsare borreessanni togo yiino: “‘Maganu oosooti’ yinanninke gede Maganu Annu hiittoo baxille uyinonkero laꞌe.” (1 Yoh. 3:1) Yihowa baxannohu buuramino Kiristaana callaatini? Deeꞌni; Yihowa ninke baalanka baxannonketa leellishino. Yihowa baxannoheta leellishinoti baalanta roortino doogo hiittenneeti? Wodote kakkalooti; Yihowa tenne kakkalo widoonni taalle nookki baxillesi leellishinonke!—Yoh. 3:16; Rom. 5:8. w24.01 28 guf. 9-10

Kuni qummeeshshi Daawiti waajja qeeꞌlino doogo kulanno. Heeshshosi qarru giddo nooha ikkirono, Daawiti Yihowa albillitte assannosire hiincino. Daawiti, Yihowa maltino yannara gatisannosita afino. Isinni Yihowa, aane Israeelete moote ikkannohu Daawiti ikkinota egensiisino. (1 Sam. 16:1, 13) Daawiti Yihowa uyinosi hexxo baala woꞌmitannota dihuluullamino. Yihowa maa assahera qaale eino? Yihowa iillannonke qarra baala hoolannonke yine dihendeemmo. Ikkollana, xaa yannara iillanni noohe qarri ikkihano ikkiro, Yihowa daggannote haaro alamera konne qarra baala hunanno. (Isa. 25:7-9) Kalaqaanchinkera reyitinore kayisate, dhibba hursatenna gibbannonkere baala hunate wolqa noosi.—1 Yoh. 4:4. w24.01 6 guf. 12-13

Heeshshokki Yihowara sayisse oottohunna cuuamoottohu mayiraatiro hedi. Kuri coyibba assoottohu Yihowa wido ikka hasiꞌrootto daafiraati. Hanni halaale afiꞌroottota ammanatto gede kaaꞌlinoheri maatiro galagalte hedi. Yihowa daafira halaale ikkitino egenno afiꞌrootto hattono iimi Annakki ayirrisanna baxa hanafootto. Ammanakki lexxituta maaro eootto. Busha rosicho agurootto hattono Yihowa fajjo ledo sumuu yaanno garinni heeꞌra hanafootto. Maganu cubbokki gatona yiinota afittoti fooliishsho afiꞌrootto. (Far. 32:2) Songote gambooshshe haꞌranna rosoottoha dhagge ikkanno coye wolootaho kula hanafootto. Heeshshokki Yihowara sayisse oottohanna cuuamootto Kiristaancho ikkootto daafira xa heeshshonniwa massitanno doogora hadhanni nootto; hattono tenne doogonni fulattokki gede murciꞌrootto. (Mat. 7:13, 14) Yihowa calla magansiꞌrate ammanamme heeꞌno, kaajjine uurrino, hattono seerisira hajajamate shashshafammeemmokkire ikkino. w23.07 17 guf. 14; 19 guf. 19

Huuccatto assidhe heeshshokki Yihowara sayisse oottota hiincakki iillannohe fonqolo baala gargadhate jawaante ikkitannohe. Lawishshaho, wolu manchi galtera gara ikkinokki baxille leellishattoni? Hatto assattokkiti egennantinote! Togoo coye assattokki gede wonanni Yihowara qaale eootto. Konni garinni gara ikkitinokki yorto wodanikkira rumuxxitannokki gede assiꞌrittoro, gedensaanni iillannohe qarrinni gatatto. ‘Bushuullu doogowa higge dihaꞌratto.’ (Law. 4:14, 15) Yesuusi Annasi hagiirsiisate murciꞌrino gara qaagakki, heeshshokki sayisse ootto Magano dadillisannoha aye coyeno bayichonko giwatto gede kaaꞌlitannohe. (Mat. 4:10; Yoh. 8:29) Qarrunna fonqolu woꞌmanka woyite Yesuusa harunsate murciꞌroottota leellishatto faro fanannohe. Hatto assatto woyite Yihowa kaaꞌlannoheta addaxxa dandaatto. w24.03 9-10 guf. 8-10