Reyote Macco

Reyonnire kayise hasaawa baxissannota diꞌꞌikkitino. Lowo manni isere kayise hasaawa dihasiꞌranno. Ikkirono, mulenni woy keeshshite daase digattanno. Qoleno reyote macci baasa xissiisanno.

Anna woy ama, galte woy ooso shiira ayewoteno ammane adhate qarrissannote. Reyo hedeweelcho woy seeda yanna giddo daggara dandiitanno. Daggu garinnino dagguro, reyo lowo geeshsha xissiissanno; hakko iso hoolle anfeemmokkita hendeemmo wote giddonke gooffanno.

Makeenu danonni anna shiiꞌrinohu Antooniyo yinanni manchi togo yiino: “Shiiro mittu manchi minikkira qulfe gane makifacha adhinohu gedeeti. Shiima geeshsha nafa minikkira ea didandaatto. Bashshota heddanni dadilla agurranna wolere assite diafatto. Kuni xoonqe fullannire diꞌꞌikkino. Tini horo beebbate yite hedatto daafira ammane adhate qarrisiherono, assite afattori dino.”

Dooreetti yinanniti 47 dirisenni minaanna shiidhino mancho, reyo lainohunni mite xaꞌmuwara dawaro afiꞌra hasidhino. Ise Sambatu rosi mine reyote gedensaanni heeshsho no yite rosiissannoha ikkirono, reyini gedensaanni hiikkinanni yitanno xaꞌmora gari dawaro diafidhino. Ise beetekiristaanensara nooha mitto qeesicha, “Reyinihu gedensaanni hiikkinanni?” yite xaꞌmitu. Isi togo yee qolise: “Tenne bade afinonku dino. Daggu wote anfa geeshsha sammi yee agaratella.”

“Sammi yee agara” agurranna woluri dino yaate? Reyo baalunku coyira goofimarcho ikkitinotanna teꞌee bande anfeemmo gari no?