Manchi Beetti Reyote Ledo Sharramino Sharro

Reyo waajjishanno diinaati. Wolqanke assitu deerrinni konni diini ledo sharramate woꞌnaalleemmo. Reyo banxeemmo manna xoqoltanno wote, tenne ammane adha lowo geeshsha qarrissannonke. Woy wedellimmate wolqanni heeꞌnoommo daafira, kuni diini qooxoꞌya nafa didaanno yine hendeemmoha ikkara dandaanno; qoleno tenne beebbate halcho agura qarrissannonke.

Hundite Feeriooni yinanni nugussa geeshsha reyote coyi yaachishinohu wolu manni dino yaa dandiinanni. Insa heeshshonsa giddo lowo diro reyo qeelate sharrantanni heedhino, hattono lowo kume ikkitanno soqqamaanonsa horoonsidhe tenne halchonsa wonshiꞌrate woꞌnaaltino. Insa loossinoti piiraamide yinanni gimbuwa insa tennera baasa sharrantinotanna beebba daafurte gattinota leellishshanno.

Biꞌre Chayinu nugussano reyo qeelte hegerera heeꞌrate halcho noonsa. Insa woꞌnaaltinohu kayinni wolu garinniiti; yaano hegerera heeꞌrate kaaꞌlannoha digintenniha anganni xagicho qixxeessiꞌrate woꞌnaaltanni heedhino. Chini Shi Huwang yinanni nugusi xagga qixxeessitanno loosaasinesi, reyo qeelanno xagicho qixxeessitanno gede hajajino. Ikkollana insa bulbulte qixxeessitinoti lowo xagga hadhaame merkure amaddinote; isinni hakko nugusa shiinohu insa qixxeessitino xagicho ikkikki digatino.

Ispeenete gobbahu Huwani Ponse de Liyon yinannihu haaro qooxeessa haꞌrate fullahino manchi, wedellicha ikkine heeꞌrate kaaꞌlitanno buicho afiꞌrate 16⁠ki sanira M.D., Karibiyani yinanni giddichuwa markaawetenni haꞌrino yinoonni. Isi haꞌrino widoonni, Yunayitidi Isteetete nooha Filoorida yinanni bayicho afino; hakkiinnino shiimu diri gedensaanni hakkawaro Ameerikaho noo manni ledo olame reyino. Wedellimmatenni heeꞌrate kaaꞌlitanno buicho heedhe diegentino.

Feeriooni yinanni nugussa, Chayinu nugussanna haaro qooxeessa hassanni hadhanno mannooti baalunku reyo qeelate woꞌnaaltino. Insa horoonsidhino doogga naadano hoongummoro, mixonsa kayinni minshannire diafidhino. Ninke baalunku hegerera heeꞌra hasiꞌneemmo.

REYO QEELA DANDIINANNI?

Reyo makkiꞌne gimbeemmohu isi mayiraati? Qullaawu Maxaafi mayiraatiro kulannonke. Qullaawu Maxaafi Kalaqaanchinke Yihowarea kulanni togo yaanno: “Baalanka coye yannasira biifise kalaqino. Isi [mannu] wodanira hegere heeshsho worino.” (Mekibibi 3:11) Biifado uulla aana 80 diro woy hakkeeshsha calla ikkikkinni hegerera heeꞌrate halcho noonke. (Faarso 90:10) Tini hasatto wodaninke giddo noote.

Maganu wodaninke giddo “hegere heeshsho” worinohu mayiraati? Mulla halchine hoongammoraati? Deeꞌni, hatto diꞌꞌikkino. Maganu reyo qeelanteenna hegerera heeꞌneemmo gede assannonketa coyiꞌrino. Qullaawu Maxaafi, Maganu reyo hoole hegere heeshsho eemmoꞌne yiinota duucha basera kulanno.—“Reyo Qeelantanno” yitanno saaxine lai.

Yesuusi Kiristoosi umisi xawise togo yiino: “Hegere heeshsho afidhanno gede, ati callu halaalaancho Magano ikkoottoha atenna soottoha Yesuusi Kiristoosi affanni haꞌra hasiissannonsa.” (Yohaannisi 17:3) Konni daafira reyote ledo sharrammanni sharro beebbate daafuro diꞌꞌikkitino. Ikkollana Yesuusi, ninkera kaaꞌle konne diina qeelannohu Magano ikkinota coyiꞌrino.