AANIIDI QOOLIHA COYI UMO | SIJAARA ANGANNITA MAGANU BAXANNO?
Alame Woꞌmate Qarra
Araddonna sijaaru manna buujjanni no.
Saihu xibbu diri giddo 100,000,000 manna shiino.
Diru dirunku 6,000,000 manna gudanno.
Lewu sokondi sai kiiro, mereerimunni mitto mancho shaanno.
Konni kaꞌano tini ikkito soorrantannoha dilawanno.
Gashshaano yitanno garinni, xa noo ikkito tenne gedee heedhannoha ikkiro 2030 balla araddotenna sijaaru korinni diru dirunku reyanno manni 8,000,000 saꞌꞌanno. Qoleno, gashshaano sijaarunni goofanno manni 21ki sani jeefora 1,000,000,000 ikkanno yite heddanno.
Araddonna sijaaru gawajjannohu aganno manna calla diꞌꞌikkino. Sijaara aganno manchi maatera tini simmeetensa gawajjitanno, miinjansano gantanno; qoleno sijaara aganno manniwiinni fultanno wiliilenni calla diru dirunku 600,000 ikkanno manni goofanno. Xaggate fulanno woxi lexxanno daafira, tini ikkito baalunku manni miinja kissanno.
Dokiterootu xagga hassanni daafurtannohu wolu lawaawe gudanno dhibbi gede ikkikkinni, kuni buutote qarri tira dandiinanniho; malu goꞌle qarrisannoha diꞌꞌikkino. Alamennite Fayyimmate Uurrinshara qara sooreette ikkitinoti Dokiteri Margareeti Chani togo yitino: “Araddotenna sijaaru qarri mannulla kalaqinoho; hakko daafira, mangistubbanna dagoomu loosoꞌyaati yee sharramannoha ikkiro hoola dandiinannireeti.”
Konne fayyimmate guficho ikkino qarra tirate alamete deerrinni daga lowore assitino. Mite 175 gobbuwa, Woxawaajje 2012nni jammarte sijaara angannita illaallisate sumuu yitino.a Ikkollana, kuni lawaawanno qarri uurrannokki gede assitanno coyibba no. Araddote industire haaro dambanya kalaqiꞌrate hakko iso lophitanni noo gobbuwara heeꞌranno meentinna wedellooti hedo kakkayisanno egensiishsha fushshate diru dirunku lowo biliyoone doolaare ikkanno woxe fushshitanno. Qolteno, araddo araado amadisiissanno daafira mitte biliyoone ikkannohu xa sijaara aganno manni giddo rooru reyansa digattanno. Xaa yannara sijaara aganno manni agura hoogiro, reyanno manni kiiro aanannohu shoyilluu diri giddo lowonta lexxitanno.
Egensiishshunna araado, lowo manni tenne gade giddonni luxuphe fula baxe heeꞌreenna fula qarra ikkitannonsa gede assitino. Naaoko yinanni manchora togoori iillinose. Ise sijaara aga hanaffinohu anjesenniiti. Xaadooshshu buusi danchare lawise shiqishannore harunsase busulle labbinose. Naaoko annisenna amase shombu kaansere amaddeenna reyinota affanni heedhenni, sijaara aga diagurtino; wole agurina lame meya qaaqquullese lossidhanni noo yannarano tenne diagurtino. Ise togo yitino: “Shombu kaansere amaddaekka yee yaadeemma, qoleno qaaqquulliꞌya fayyimma daafira hedeemma; ikkirono agura didandoomma. Hakkawotira sijaara aga agure diafeemma yee hedoomma.”
Ikkirono, Naaoko sijaara aga agurtino. Araddote araadonni fula dandiinohu lowo miliyoone ikkanno manninte gede, iseno tenne gadese qeeꞌlitanno wolqa afidhino. Hattee wolqa afiꞌnannihu hiikkiinniiti? Tenne afate aananno birxicho nabbawi.
a Tennera assinoonniri giddo mitu: sijaara aga abbitanno gawajjo mannaho rosiisa, araddote daddalo ajisha, araddote qaraxo leda hattono sijaara aganno manni aguranno gede kaaꞌlitanno qixxaawo qixxeessa lawinoreeti.