Sijaara Angannita Maganu Baxanno?

Sai birxichira qummi assiniti Naaoko sijaaru araado qeela dandiitinota kultanni togo yitino: “Maganu akatinna alaamisi daafira halaale rosaꞌya heeshshoꞌya biddi assiꞌra dandeemma gede kaaꞌlitinoe.” Ise rossino halaali Qullaawu Maxaafi giddo nooho. Qullaawu Maxaafi giddo araddo yaanno qaali hoogirono, kuni Maxaafi Maganoho sijaara agate daafira noosi hedo huwatate kaaꞌlannonke.a Batinyu manni tenne egenno afiꞌransa, tenne gade gargadhate woy facci asse agurate kaaꞌlitinonsa. (2 Ximootewosi 3:16, 17) Hanni sijaara aga abbitannota sase rosantino gawajjonna Qullaawu Maxaafi tennera yaannore laꞌno.

SIJAARU BUUTOTE ARAADO AMADDANNO GEDE ASSANNO

Araddo lowo araado amaddanno gede assitannota nikootiine yinanni sabistaanse afidhino. Nikootiine surre baqqi assitanno woy jingilli assitanno. Sijaara aga nikootiine bayichonko hattono xaa xaa surre saꞌanno gede assitanno. Sijaara mitte hinge angiro nafa nikootiine surre saꞌe baqqi assitanno daafira, barrunni mitte paakko sijaara gudanno manchi mittu barrinni surresi mito 200 higge baqqi yitanno yaate; kageeshshi geeshsha surre kakkayissannoti wole sabistaanse dino. Nikootiine konni garinni xaa xaa surre saꞌanno daafira, wolu baalunkurinni roore araado amadisiissanno. Araado iillite amaddu gedensaanni, manchu nikootiine adha hoogiro xiwamanno.

Qullaawu Maxaafi tennera gara ikkitino lao heedhannonke gede kaaꞌlannonke; togo yaano: “Aye manchirano borojjichu gede ikkitine hajajamate kiꞌneneeto sayissine uyitiniro, hakkuyi hajajantinanni manchira borojjoota ikkitinoonnita diaffinoonni?” (Roomu Sokka 6:16) Mittu manchi araddote araadosi xixxiibbeennasi mitto coye hedannonna assannoha ikkiro, mulenni tenne shollado gadera borojjicho ikkanno. Suꞌmisi Yihowa ikkino Magani kayinni keeraaꞌminammora hasiꞌranno; isi bisonke gawajjitanno gadennino ikko ayyaananke yaano giddiidinke hedo daafanno rosichinni collooꞌminammora hasiꞌranno. (Faarso 83:18; 2 Qorontoosi 7:1) Konni daafira, mittu manchi Yihowara noosi diniqonna ayirrinyi lexxanni haꞌranno wote, Yihowara umo ikkinore aa hasiissannositanna shitanno gadera borojjicho ikke heeꞌre konne assa dandaannokkita huwatanno. Tenne huwatasi qolte busha yortora anga aannokki gede kaaꞌlitannosi.

Jarmanete gobbara heeꞌrannohu Olaafi yinanni manchi, 12 dirisinni jammarinotanna 16 diro woꞌma adhe heeꞌrinota sijaaru araado qeela dandiino. Isi sijaara aga jammari wote umi qara mittoreno ikkannokkiha lawinosi. Diru lexxanni haꞌrita kayinni kabbaade araado amaddusi. Togo yiino: “Mitte hige sijaaru goofe heeꞌreennae araado lowo geeshsha qarrissueta, sijaara xoyissinanni baccichira nooha sijaaru tattao gamba asse araddo giggishshummo gedensaanni gaazeexunni xaaxe agummo. Hakkawarita hedeemmo wote, hakko deerra maraꞌya saalfachishshannote.” Tenne shollishshanno gade qeela dandiinohu hiittoonniiti? Isi togo yiino: “Kaaꞌlinoehu waannu coyi Yihowa hagiirsiisate nooe hasattooti. Yihowara mannu oosora noosi baxillinna uyino hexxo tenne araado higge higgannokki garinni qeeleemmo gede wolqa ikkitinoe.”

ARADDO MANNIMMA GAWAJJITANNO

Ze Tobaako Atilaasi yinanni maxaafi, “Sijaara aga . . . mannimma gudisse gawajjitannota hattono xibbunna reyo lexxitanno gede assitannota sayinsetenni buunxoonni” yaanno. Sijaara aga taraawannokki dhibba lawishshaho kaansere, wodanunna shombu dhibba abbitannoti egennantinote. Ikkollana Alamennite Fayyimmate Uurrinsha taje, sijaara aga taraawanno xibbinni dagganno reyora lawishshaho shombu naqarsi abbanno reyora kaima ikkitinota leellishshanno.

Maganu Yihowa Qaalesi yaano Qullaawa Maxaafa horoonsiꞌre heeshshonkera, mannimmankera hattono surrenkera gara ikkitino lao heedhannonke gede rosiisannonke. Beettisi Yesuusi togo yiino: “Maganokki Yihowa woꞌmu wodanikkinni, woꞌma lubbokkinninna woꞌma surrekkinni baxi.” (Maatewoosi 22:37) Ee, Maganu heeshshonkenna mannimmanke dancha gede assine horoonsiꞌnammora hattono garunni amaxxinammora hasiꞌranno. Yihowanna alaamasi anfummoro, iso banxeemmo hattono assinonkere baalankare kaffi assine laꞌneemmo. Tini qolte mannimmanke batteessanno coyi baalunkuwiinni xeertiꞌneemmo gede assitannonke.

Hindete gobbara heeꞌrannohu Jevenzi yinanni dokiterichi 38 diro woꞌma sijaara agino. Isi togo yiino: “Sijaara aga abbitanno gawajjo daafira hikkiminnu metseetta aana nabbawoommo. Assootiꞌya gara ikkinokkitano afoommo; xiwame anewa daanno mannino tenne gadensa aguranno gede amaaloommo. Ani kayinni onte woy lee hige woꞌnaaloommoha ikkirono, agura didandoommo.” Gedensaanni aguranno gede kaaꞌlinosiri maatiyya? Togo yiino: “Sijaara aga aguroommohu Qullaawa Maxaafa xiinxalleeti. Yihowa hagiirsiisate nooe hasatto, tenne gade facci asse agureemmo gede assitinoe.”

ARADDO WOLE MANNANO GAWAJJITANNO

Sijaara aganno manniwiinnino ikko sijaaruwiinni fultanno wiliile hadho afidhino. Togoo wiliile bisinke giddora eꞌuro kaanserenna wole xibbano abbitara dandiitanno; diru dirunku sijaara agannokkihu 600,000 ikkanno manni konninni reyanno; kuri giddo rooriidi meentohonna qaaqquulleho. Alamenniti Fayyimmate Uurrinsha rippoorte, “Sijaarunniti shiima wiliile nafa gawajjitanno” yitanno.

Yesuusi, Magano banxeemmo gede uyinoonni hajajonni aantinoti olliichonke yaano mininke manna, jaallankenna wole manna banxeemmo gede uyinoonninke hajajo ikkitinota rosiisino. Togo yiino: “Olliichokki umikki gede assite baxi.” (Maatewoosi 22:39) Mulenke noo manna gawajjannore assineemmoha ikkiro, konne baxille dileellinshoommo. Addu baxilli heeꞌrinkero aante noota Qullaawu Maxaafi amaale harunsineemmo: “Mittu mittunku manchi umisi xiqime ikkikkinni wolu manchi xiqime haso.”—1 Qorontoosi 10:24.

Armeeniyaho heeꞌrannohu Armeni togo yiino: “Miniꞌya manni sijaara agaꞌya gawajjitanni noonsa daafira agureemmo gede huuccie. Ani kayinni tini gadeꞌya insa gawajjitanni noota ammana dihasiꞌroommo.” Hedosi soorriꞌranno gede kaaꞌlinosire kulanni togo yiino: “Qullaawu Maxaafi egenno afiꞌraꞌyanna Yihowara nooe baxilli, sijaara aga agureemmo gedenna ane calla ikkikkinni muleꞌya noo mannano gawajjannota ammaneemmo gede kaaꞌlinoe.”

SIJAARA AGA HEGERERA GATTANNO!

Olaafi, Jevenzinna Armeni Qullaawu Maxaafi egenno afiꞌransa insano ikko woloota gawajjitannote shollado gadenni keere fultanno gede kaaꞌlitinonsa. Insa kaaꞌlinohu sijaara aga gawajjitannota afansa calla ikkitukki Yihowara noonsa baxilleetinna iso hagiirsiisate noonsa hasattooti. Umi Yohaannisi 5:3 baxillu lowore assannota kultanni togo yitanno: “Magano baxate yaa hajajosi agadhate; hajajosi qolte qarrissannota diꞌꞌikkitino.” Hige Qullaawu Maxaafiha xintu seera harunsa ayewoteno shotate yaa diꞌꞌikkino; ikkirono, mittu manchi Magano lowo geeshsha baxannoha ikkiro hajajama duha diꞌꞌikkitannosi.

Maganu Yihowa manna alamete deerrinni rosiinsanni zamacha qixxeesse lowo miliyoone ikkanno manni araddote borojjimmanni keere fulanno gede kaaꞌlanni no. (1 Ximootewosi 2:3, 4) Yihowa muli yanna giddo Mangistesi yaano Beettisi Yesuusi Kiristoosi anga noo gashshootesi horoonsiꞌre, lowo miliyoone ikkanno manni araddote borojje ikkanno gede assitinota hafuuraame daddalu uurrinsha hunanno. Sijaara aga hegerera gattanno gede assanno; qoleno hajajamanno manni bisunnino ikko surretenni guuta ikkanno gede assanno.—Isayyaasi 33:24; Ajuuja 19:11, 15.

Sijaara agurate sharrantanni noottoha ikkiro hexxo mudhitooti. Yihowara baxillu heeꞌriheronna sijaara agate daafira isite gedee lao heedhuhero, atino tenne araado agurate jawaante afiꞌratto. Yihowa Farciꞌraasine Qullaawu Maxaafiha xintu seera loosu aana hosiisa dandaatto gara gilletenni rosiissannohe. Araddote araadokki qeeꞌlate Yihowa kaaꞌlo hasiꞌrattoha ikkiro, isi hasiissannohe wolqanna jawaante aannoheta huluullantooti.—Filiphisiyusi 4:13.