Yihowa Irkisannohe

1, 2. Mito wote mayine hendeemmo? Maganu hundi waro ma assino?

‘KONNI dhibbinni isi hureemmokka?’ yite yaadde egennootto? Qoleno, mini manni woy jaalikki xiwameenna hatto yite hedootto woti heeꞌrara dandaanno. Mittu manchi baasa xiwamanno wote hatto yine yaada nooreentilla. Masaalaano Eeliyaasinna Elsai waro, kuni coyi lame nugussa yaachishino. Akiaabinna Elzaabeeli beetti Nugusu Akaaziyaasi uwe lowo geeshsha gaꞌnino daafira, ‘Tini raanta fultannoekka?’ yee xaꞌmino. Gedensaanni Sooriyu Nugusi Beenihadaadi lowo geeshsha xiwamino daafira, “Konni dhibbinni hureemmokka?” yee xaꞌmino.—2 Neg. 1:2; 8:7, 8.

² Xiwammeemmo wote woy mannu xiwamannonke wote hurre halchineemmo. Ikkirono, batinyu manni hattoo wote Maganu kaaꞌlannonkehu hiittoonniiti yee hedanno. Aleenni kulli nugussa noo waro, Maganu sae sae xiwantinore maalaletenni hursino. Isi masaalaanosi horoonsiꞌre mito manna reyotenni kayisino woti nafa no. (1 Neg. 17:17-24; 2 Neg. 4:17-20, 32-35) Ikkina isi yannankerano togoore assanno yine agadha dandiineemmo?

3-5. Maganohonna Yesuusira maa assate wolqa noonsa? Aanchine hiittee xaꞌmuwara dawaro afiꞌneemmo?

³ Maganoho mitto mancho hursate woy dhibbunni ganate wolqa noosi. Qullaawu Maxaafi tenne buuxisanno. Mito manna, lawishshaho Abirahaami waro Feriooni, gedensoonni qole Muse rodoo Miiriyaami dhibbunni qorichishino. (Kal. 12:17; Zeh. 12:9, 10; 2 Sam. 24:15) Maganu, Isiraeele ammanantinore ikka hoogguro “duuchunku gari dhibbinni woy qoomaminni” ganannonsata kule qorowisiisinonsa. (Marro 28:58-61) Wole widoonni kayinni, Yihowa dhibba woy xisso hoola dandaanno. (Wol. 23:25; Marro 7:15) Qoleno, dhiwantinore hursa dandaannota leellishino. Iyyoobi baasa dhiwamino daafira reyo halchate geeshsha iillino; Maganu kayinni hursinosi!—Iyo. 2:7; 3:11-13; 42:10, 16.

⁴ Ee, Yihowara xiwamino manna hursate wolqa noositi dihuluullissannote. Beettisino hattonni dhiwantinore hursa dandaanno. Yesuusi dhiigu amadinore, hawwunaatu dhibbi noonsare, hattono balloota woy laanshaabbinore maalaletenni hursinota Qullaawu Maxaafi kulanno. (Maatewoosi 4:23, 24 nabbawi;a Yoh. 9:1-7) Yesuusi hakkawaro hursino hurre, albillitte haaro alamera uulla woꞌmate aana heedhanno hurrera malaate ikkitannota afanke lowo geeshsha jawaachishshannote. Hatte yannara “hakko heeꞌrannohu . . . ‘Xiwamoommo’ diyaanno.”—Isa. 33:24.

⁵ Ikkina Maganu woy Yesuusi xaa yannara maalaletenni hursitannonke yine agadha hasiissannonke? Qoleno, xagga doodhineemmo wote maa heda hasiissannonke?

XIWANTE DAALLASAHO HEEDHE YIHOWA IRKO AFIDHINO

6. Mitu hundi Kiristaanira noohu “hursate aamamooshshi” xa ma ikkino?

⁶ Maganu umi xibbi diro mito buuramino Kiristaana maalale loosanno gede assinota Qullaawu Maxaafi kulannonke. (Looso 3:2-7; 9:36-42) Hakkawaro ‘babbaxxinohu ayyaanu aamamooshshi’ giddo mittu ‘hursate aamamooshsheeti.’ (1 Qor. 12:4-11) Ikkollana, kurinna wolu aamamooshshi lawishshaho, lissaane coyiꞌranna masaalo coyiꞌra mulenni gattino. (1 Qor. 13:8) Kuni baalunku aamamooshshi yannankera dino. Hakko daafira, Maganu ninkeno ikko mininke manna woy jaallanke maalaletenni hursanno yine agadha didandiineemmo.

7. Faarso 41:3 jawaachishshannonkehu hiittoonniiti?

⁷ Ikkollana, hundiri Maganu soqqamaanonte gede xiwammeemmo wote shesho, hayyonna irko afiꞌrate Yihowa hexxa dandiineemmo. Nugusu Daawiti togo yee borreessino: “Qarraminoha mararanno manchi hagiirraamoho; Yihowa iso buutote qarri yannara gatisannosi. Yihowa agarannosi, hattono heeshshote heeꞌranno gede assannosi.” (Far. 41:1, 2) Daawiti waro qarraminoha mararanno manchi hegerira heeꞌrinokkita anfoommo. Hakko daafira Daawiti, togoo manchi maalaletenni heeshshote heeꞌranno, qoleno hakko garinni hegere heeshsho afiꞌranno yaasi diꞌꞌikkitino. Daawiti ayyaanunni borreessinohu kuni qaali, Maganu woloota mararannoha ammanamino mancho kaaꞌlannota leellishannoho. Hiittoonni kaaꞌlanno? Daawiti togo yee xawisino: “Xiwame goxinowa daallasaho Yihowa irkisannosi; xiwamanno yannara ati daallasasi gudisse soorratto.” (Far. 41:3) Ee, qarraminoha mararanno manchi isonna assinoha dancha coye Maganu hawannokkita addaxxa dandaanno. Qoleno Maganu, isonooto dhaawate wolqa afiꞌrino biso uyinosi daafira dhibbisinni beya afiꞌrara dandaanno.

8. Faarso 41:4 kultanno garinni, Daawiti Yihowa ma assannosi gede huucciꞌrino?

⁸ Daawiti heeshshosi giddo tuncu yiinosire hede togo yiino: “‘Yihowa, maaro soyie. Ate baddaloommona hursie’ yuummo.” (Far. 41:4) Daawiti hatto yee borreessinohu, isi dhiwame heeꞌreenna Abeseloomi mangistesi galchara woꞌnaali wote macciishshaminosire kulate ikkara dandaanno; hakkawote isi baasa dhiwamino daafira beettisi finqille hoola didandiino. Daawiti Maganu maarinosiha ikkirono, Bersaabe ledo loosino cubbonna hatti ikkitosi meꞌꞌere daaffinoro dihawino. (2 Sam. 12:7-14) Ikkirono, isi xiwame daallasaho noowa Maganu irkisannosita dihuluullamino. Ikkina Daawiti huucciꞌrinohu Maganu maalaletenni hursannosi gedenna diro ledannosi gedeeti?

9. (a) Yihowa Nugusu Hiziqiyaasira ma assino? (b) Daawiti Yihowa ma assannoe yee agadha dandaanno?

⁹ Yannate gedensaanni Maganu, “xiwame reyara kainoha” Nugusa Hiziqiyaasi hursino. Maganu dhiwantinore sae sae hursino yanna giddo mitte tenneeti. Hiziqiyaasi dhibbisinni hure wole 15 diro heeꞌrino. (2 Neg. 20:1-6) Daawiti kayinni huucciꞌrinohu Maganu maalaletenni hursannosi gede diꞌꞌikkino. Isi huucciꞌrinohu Yihowa qarraminoha mararanno mancho kaaꞌlanno garinni kaaꞌlannosi gede ikkinota qooxeessaho noo hedo leellishshanno. Maganu hattoo manchira assannori giddo mittu “xiwame goxinowa daallasaho” irkisate. Daawiti cubbisira maaro afiꞌrino daafira, Maganu sheshifachishannosinna irkisannosi gede, hattono mannimmasi woyyimma afidhanno gede huucciꞌra dandaanno. (Far. 103:3) Ninkeno hattoo irko afiꞌrate huucciꞌra dandiineemmo.

10. Xiroofimoosinna Afiroodiixu xagge maa rosiissannonke?

¹⁰ Maganu Daawiti maalaletenni huranno gedenna dirisi lexxanno gede assinokkinte gede, hawaariya Phaawuloosi ledo loosinoha Xiroofimoosino maalaletenni huranno gede diassino. Hatte yannara Phaawuloosira xiwantinore hursate wolqa noosita anfoommo. (Hawaariyaatete Looso 14:8-10 nabbawi.b) Lawishshaho, isi “biso iibbabbishannonna godowa gobbara qolanno dhibbi amadeenna goxinoha Pupiliyosi anna” hursino. Phaawuloosi “huuccatto assi, hattono anga aanaho wore hursisi.” (Looso 28:8) Ikkollana, Phaawuloosi misiyoone ikke soqqamanna ledosi haꞌrinoha Xiroofimoosi dihursino. (Looso 20:3-5, 22; 21:29) Xiroofimoosi xiwame ledosi haꞌra hoogita, woyyasi geeshsha iso Miliixini yinanniwa agure haꞌrino. (2 Xim. 4:20) Qoleno, Afiroodiixu lowo geeshsha “xiwame reyara kai yannara,” Phaawuloosi konne jaalasi maalaletenni hursinota kultanno taje dino.—Fil. 2:25-27, 30.

ADHA HASIISSANNONKE AMAALE HIITTOOTE?

11, 12. Luqaasi Phaawuloosi hiittoonni kaaꞌlinoha ikkara dandaanno? Luqaasi dandoo daafira mayyaa dandiinanni?

¹¹ Hawaariyaatete Loosi maxaafa borreessinohu ‘baxamino akimichi Luqaasino’ Phaawuloosi ledo duucha gobba haꞌrino. (Qol. 4:14; Looso 16:10-12; 20:5, 6) Luqaasi Phaawuloosira xaggate daafira amaale uyinotanna isonna ledosi misiyoone ikkite soqqantannore xagisino yine heda dandiineemmo. Luqaasi togoo kaaꞌlo aa hasiissinosihu mayiraati? Phaawuloosi umisi doogote aana heeꞌre xiwamino daafiraati. (Gal. 4:13) Yesuusi, “Akime hasiissannohu fayyu mannira ikkikkinni xiwantinoriraati” yiinonte gede, Luqaasi xagga aanni Phaawuloosinna miillasi kaaꞌlikki digatino.—Luq. 5:31.

¹² Luqaasi akimicha ikkate qajeelino yanna woy bayicho Qullaawu Maxaafi dikulanno. Phaawuloosi Qolasiyaasi heeꞌranno Kiristaanira Luqaasi akimicha ikkinota qummi assinohu insa iso egentino daafira ikkara dandaanno. Qoleno, Qolasiyaasira mule noohura Loodooqiyu katamira akime ikkitannori rossanno rosi mini no. Luqaasi mulla xaggate daafira amaala baxanno mancho ikkikkinni qajeelino akimichaati. Isi Wongeelisi giddonna Hawaariyaatete Loosi maxaafira akimete qaalla horoonsiꞌrasinna Yesuusi xiwantinore hursino gara hixamanye borreessasi tenne buuxissanno.

13. Xaggate daafira uyinanni amaale lainohunni maa qaaga hasiissannonke?

¹³ Heeꞌnoommo yanna ammanate roduuwinke “hursate aamamooshshe” afidhinota diꞌꞌikkitino. Ikkollana mitu roduuwinke kaaꞌlate hedde amaale xaꞌmininsakki xaggate daafira amaaltanno. Hige mitootu uyitanno amaale kaaꞌlitannota ikkitara dandiitanno. Phaawuloosi, Ximootewosi godowa xiwanni qarrisinosi daafira ma assa hasiissannosiro kulinosi; hakko qooxeessira noo wayi daafaminoha ikkara dandaanno.c (1 Ximootewosi 5:23 nabbawi.d) Ikkollana, mittu ammanate rodiinke kaaꞌla hooggara woy isinni gawajjitara dandiitannota baadi xagga, daro, woy mite sagale adhanno gede ammansiisate woꞌnaalanna Phaawuloosi assinori addi addiiti. Mitootu woloota togo yite amaaltanno: ‘Ewelono hatto asse xiweenna konne xagicho adhe hurino.’ Togoo amaale kaaꞌlate hende uyinannita ikkiturono, lowo manni horoonsiꞌranno xagga nafa gawajjo abbitara dandiitannota deꞌnoonke.—Lawishsha 27:12 nabbawi.e

QOROPHA HAYYOTE

14, 15. (a) Mitu manni wolootu xiwana maa afiꞌrate kaaꞌlitanno faro gede asse laꞌꞌanno? (b) Xaggate daafira amaallanninke wote Lawishsha 14:15 kaaꞌlitannonkehu hiittoonniiti?

¹⁴ Ninke Kiristaanu hagiirraame heeshsho heeꞌranna Maganoho woꞌma lubbonkenni soqqama hasiꞌneemmo daafira ordinke fayyo ikkara hasiꞌranke garankolla. Ikkollana, guuntete xeꞌne ragiꞌnoommo daafira xiwammammora dandiineemmo. Xiwanu amadannonke wote, addi addi gari xagichi woy xagisiꞌnanni ogimma heedhara dandiitanno. Mittu mittunku manchira hiittoo xagga adhannoro doodhate qoosso noosi. Ikkollana, tenne hafuuraame alame aana wolootu xiwana woxe afiꞌrate kaaꞌlitanno doogo gede asse laꞌꞌanno manni no. Mitu manni nookkire coyiꞌre woy mulla hedotenni hursanno yee “xagga” hiranno. Wolu manni woy dirijjitta qolte lowo tirfe afiꞌrate yite lowo woxinni hirranni xagga hidhinanni gede xixxiibbanno. Baasa xiwame beya afiꞌra woy lubbosi gatisiꞌra hasiꞌranno manchira togooti beebbate “hurre” adda labbasira dandiitanno. Ikkollana, Maganu Qaali togo yee amaalannota deꞌnoonke: “Balalu manchi kullisire baala ammananno; xiinxallu manchi kayinni qaafosi baalanta seekke layiꞌranno.”—Law. 14:15.

¹⁵ “Xiinxallu manchi” hakko iso ‘kulloonnisi’ coyi woy amaale gari qajeelsha adhinokki manchi uyinota ikkitanno wote roorenka qorophanno. “Xiinxallu manchi” togo yee hedanno: ‘Kuni manchi, tini viitaamine, xagga woy sagale alba wole manna hursitinota kuliena, tenne afinohu gari manni no? Qoleno mannu baalunku mitto diꞌꞌikkino. Kuni xagichi wole manna hursinoha ikkiro nafa, ane hursannoeta mayinni afeemmo? Konni xagichi daafira lede xiinxallokka? Woy tenne xagga daafira egenno nooha qajeelino manna amaaꞌlokka?’—Marro 17:6.

16. Adhineemmo xagga daafira kullanninke coye keenate hiitte xaꞌmuwa heda kaaꞌlitankera dandiitanno?

¹⁶ Maganu Qaali “tenne alame aana . . . xiinxalloota ikkine” heeꞌneemmo gede amaalannonke. (Tit. 2:12) Akimichu xibbinke mayimma laꞌꞌate woy xagisate hedino gari wosincho woy dahaawinoha ikkanno wote “xiinxalloota” ikka woy wodanaaꞌmine heda hasiissannonke. Hakku akimichi woy hattee ogimma egensiisanno manchi hatti ogimma loossanno gara seekke xawise afanno? Yiino coyi wosinchoho? Egenno noohu batinyu manni tenne ogimma garaho yaanno? (Law. 22:29) Kuni manchi, yiinore hedotenni harunsinammora xixxiiwanni noonkekka? Miteekke hatti ogimma wole xeerto gobbara hanafantinotanna yannanke akime affinokkita ikkitinota kulankera dandaanno. Ikkina togoo ogimma addinta noota buuxissanno taje no? Mite xagga woy xaginsanni ogimma, ‘mannaho dikullannite’ woy ‘mannu afinokki wolqanni loossannote’ yinankera dandiinanni. Hattoo wote lowo geeshsha qoropha hasiissannonke; korkaatuno Maganu “digintete coye” hattono wole hattoo wolqa horoonsiꞌnannita effire giwanno.—Isa. 1:13; Marro 18:10-12.

“FAYYIMMA OOꞌNE!”

17. Mannu oosora nooti gara ikkitino hasatto hiitteeti?

¹⁷ Umi xibbi diro, aliidi bisi songuwate lowo geeshsha hasiissino sokka soyino. Hatti sokka Kiristaanu xeertiꞌra hasiissannonsa coyibba kultu gedensaanni jeefote togo yitanno: “Umoꞌne tenne coyibbanni agadhitiniro, seyannoꞌne. Fayyimma ooꞌne!” (Looso 15:29) Tenne jeefote qaalla, “jawaatte” yineno tira dandiinanni. Bayiru Maganinkera soqqammeemmo wote jawaantenna “fayyimma” heedhankera hasiꞌneemmo.

18, 19. Haaro alamera maa afiꞌrate quqquxammeemmo?

¹⁸ Tini alame noo geeshshanna guuntete xeꞌne heedhunke geeshsha xiwana hooꞌla didandiineemmo. Xaa yannara Maganu maalaletenni hursankera diagadhineemmo. Ikkirono, Ajuuja 22:1, 2 guuta fayyimma afiꞌneemmo yanna daggannota kultanno. Hawaariya Yohaannisi ‘heeshshote wayi laganna’ “daga hursitanno” daro afidhinota “heeshshote haqqe” ajuujatenni laino. Hatto yaa xaano ikko haaro alamera xaginaateho kaaꞌlitanno yine uyinanni daro no yaa diꞌꞌikkitino. Hatteentenni, tini Yihowa hajajamanno mannira Yesuusi widoonni hegere heeshsho aara qixxeessino qixxaawooti; kuni addinta quqquxamme agadhinanni coyeeti.—Isa. 35:5, 6.

¹⁹ Hatti dhaggete yanna dagga geeshsha, Yihowa ninke mitto mittonka baxannonketanna xiwammeemmo wote xissonke leeltannosita anfoommo. Daawiti gede ninkeno, Maganinke xiwammummoro irkisannonketa dihuluullammeemmo. Qoleno isi gede togo yaa dandiineemmo: “Ani kayinni ammanamoommo daafira irkisattoe; qoleno albakkiinni hegerera worattoe.”—Far. 41:12.