Yihowa Isira Soqqamoommo Soqqansho Maassiꞌrinoe

ILAMOOMMOHU 1926nni Ohayo, Ameerikaho, Kiruukiswili yinanni qachiraati. Anninkenna amanke ammaꞌninore diꞌꞌikkino; ikkirono, ninke sette oosonsa beetekiristaane hadhe yaannonke. Ani Metodistete Beetekiristaane haꞌreemmo. Tonaa shoolu dirihu heeꞌre, mitto diro woꞌma Sambatu barra hosummokki beetekiristaane haꞌroommo daafira qeesichu baraarsha uyinoe.

Hatte taaera, qachinkera heedhannoti Margareeti Wokeri yinanniti Yihowa Farciꞌraasincho dagge amaꞌya hasaawisanna isera Qullaawu Maxaafire kula hanaffu. Mitto barra, ofolle macciishshate hedummo. Amaꞌya kayinni xiinxallitannota hooleemmoseha laweennase, gobbara fuli yitue. Ikkirono, insa hasaawanno wote macciishshate woꞌnaala diaguroommo. Margareeti lame sase higge daggu gedensaanni mitto barra, “Maganu suꞌmi ayetiro afootto?” yite xaꞌmitue. Ani qole, “Tenne afinokkihu ayi no? Suꞌmisi Maganoho” yuummo. Ise qolte “Hanni Qullaawa Maxaafakki fante Faarso 83:18 lai” yitue. Fane laummoti, Maganu suꞌmi Yihowa ikkinota huwatummo. Hakkiinni dodanni jaallaꞌyawa mare togo yuummo: “Hawarro minira martiniro, Qullaawu Maxaafi giddo Faarso 83:18 fantine Maganu suꞌmi ayetiro laꞌe.” Mannaho farciꞌra hanafoommohu bayichonkooti yaa dandiinanni.

Qullaawa Maxaafa xiinxalla hanafummo gedensaanni 1941nni cuuamummo. Hakkiinni bayichonko, songonnita maxaafu xiinxallo massageemmo gede worrie. Amaꞌyanna roduuwiꞌya gambooshshe daara jawaachishummo; insano gudisame ani xiinxallo massageemmowa daa hanafi. Anniꞌyara kayinni hasatto dinosi.

MINE IILLINOE QARRA

Songote giddo wole loosono lende uyinie; qoleno umiꞌyata tiokiraasete layibirere (maxaaffate mine) seekkiꞌrummo. Mitto barra anniꞌya maxaaffaꞌya noowa qole leellishanni togo yiie: “Kooꞌꞌo duunoottore mininni fushshie. Atino hasiꞌrittoro ledo fula dandaatto.” Hakko daafira, mininni fule qooxeessaho Zeniswili, Ohayo yinanniwa heeꞌra hanafummo; ikkirono maatenke jawaachishate duucha wote minira haꞌre higeemmo.

Anniꞌya, amaꞌya gambooshshe hadhannota hoolate lowo geeshsha woꞌnaalino. Mito wote, ise hadhanni noota doogonni hordofe minira qolanno. Ise kayinni wole xullo widoonni higge xooqqe gambooshshe hadhanno. Amaꞌya togo yuummose: “Bashshi yitooti. Atera hoode haꞌra daafursitusiro agurannona.” Gedensoonni, anniꞌya amaꞌya gambooshshe hadhannota hoola agureenna ise qarru nookkiha haꞌra dandiitino.

Songonkera 1943nni Tiokiraasennihu Soqqanshote Rosi Mini hanafita, rosaanote kifile shiqisha hanafummo. Kifile shiqishummo gedensaanni uyinannie amaale coyiꞌrate dandooꞌya woyyeessiꞌrate kaaꞌlitinoe.

OLU YANNARA ANGA WODHA HOOGA

Hatte yannara, mangistubba Layinkiha Alamete Ola olantanni no. Hakko daafira 1944nni, wottaaddara ikkammora woshshinie. Kolembesi, Ohayo giddo Forti Heezi yinannite olantote uurrinsha mare coyishiishummo, fayyimma laisiisiꞌrummo, hattono uyinoonnie forme wonshummo. Qoleno, wottaaddara ikkeemmokkita olantote roorrootira kulummo. Hakkiinni insa haꞌrammora fajjitue. Shiimu barri gedensaanni, mittu polisichi mini geeshsha daye, “Korwini Roobiseni, usurammohera hajanjeennae dayoommo” yiie.

Lame lamala gedensaanni yoote minira massinie; hakkiicho daanyu togo yiie: “Ane ikkoommoro, heeshshokki diro woꞌma usuramatto gede asseemmohe. Coyiꞌra hasiꞌrattori no?” Ani togo yee qolummo: “Ayirrado daanya, ane soqqamaanote gede assine laꞌꞌa hasiissanno.a Mittu mittunku manchi xullichi madirakeꞌyaati; Mangistenniha dancha duduwo batinyu mannira sabbakoommo.” Daanyu yoo yitara dagoomu giddonni doorantinore togo yii: “Kawira dagginoonnihu kuni beetti ammaꞌnote soqqamaanchootironna teꞌee bade kulate diꞌꞌikkino. Kawira dagginoonnihu isi wottaaddara ikkate maahoyye yiinoronna teꞌee badateeti.” Hakkuri doorantino mannooti sajjoo daqiiqa ikkitannokki yanna giddo, ane hunino yite yoo sayissu. Hakkiinni daanyu Ashilandi, Kentaakii yinanniwa onte diro usurameemmo gede yoo yii.

YIHOWA USURU MINE AGARINOE

Umita lame lamala Kolembesi, Ohayo usuru mine keeshshoommo; qoleno umi barra kifiletenni fulummokki hosummo. Hakko daafira togo yee Yihowa huucciꞌrummo: “Onte diro mitte kifilera cufame heeꞌre diafeemmo. Hiitto ikkeemmoro diafoommo.”

Layinki soodo, agartannori gobbara fulammora fajjitue. Milli yaanni mittu qote halaꞌlinohu hojjaameessu usuranyiwa marummo; hakkiinni lamunku maskootete mule uurrine gobbara hinge laꞌꞌa hananfummo. Isi, “Haranchicho, kawira ma assiteenna abbinoonnihe?” yee xaꞌmie. “Ani Yihowa Farciꞌraasinchooti” yee qolummo. Hakkiinni isi, “Adda yaattonso? Mayira usuramoottoyya?” yiie. Ani qole, “Yihowa Farciꞌraasine olaho digaaddanno, hattono manna dishitanno” yuummo. Hakkiinni isi togo yii: “Kiꞌne manna shitinannikki daafira usurtannoꞌne. Woloota kayinni manna shitanno daafira usurtanno. Kuni gurcheessanno coye diꞌꞌikkino?” Ani qole, “Halaale yootto” yuummo.

Hakkiinni isi togo yii: “Alba wolewa 15 diro usuramummo yannara mite borroꞌne nabbawoommo.” Hakkiinni, “Yihowa, konne mancho anera haꞌlanno gede kaaꞌlie” yee huucciꞌrummo. Hakkawote Pooli (hakko manchi suꞌmaati) togo yiie: “Konni manni giddo kisannohehu heeꞌriro, raari. Asseemmonsata ani afoommona.” Kayinni hakko noohu 50 usuranyi giddo mittuno diqarrisinoe.

Usuru mini gashshaano Ashilaandi yinanniwa haadhe hadhueta, hakkiicho ayyaanaamittetenni gikki yitinori batinyu roduuwi ledo xaadummo. Insa ledo gamba yine heeꞌranke aneno woloota roduuwano ayyaanaamittetenni daafurreemmokki gede kaaꞌlitinonke. Kuri roduuwi lamalate giddo Qullaawu Maxaafi niwaawe heedhanno gedenna gamba yine hasaambeemmo xaꞌmuwanna dawaro qixxeessineemmo gede assitu. Qoleno, qoqqowu soqqamaancho ikke loosara shoomamino rodii no. Ninke heeꞌnoommote lowo kifilera girgiddu mule dirantino daallassa no. Qoqqowu soqqamaanchi togo yaannoe: “Roobiseni, tini daallassa ate qeechaati. Konni daallasira goxara gaamamino manchi ate qoqqowooti. Fulara albaanni isira sabbaki.” Hatto assine qinaawino garinni sabbaka dandiinoommo.

USURU MININNI FULE AFIꞌROOMMORE

Layinkihu Alamete Oli 1945nni uurri; ikkirono, usuru mininni fulummokki mito geeshsha keeshshummo. Anniꞌya alba, “Atella fooliishshiꞌrummoro, kuꞌuri asseemmota afoommona” yiinoe daafira mininke manni daafira yaadummo. Usuru mininni fulummo gedensaanni, danchuri tuncu yiinoe. Anniꞌya qarrisa agurinokkiha ikkirono, mininke manni giddo lamalu gambooshshe haꞌranno; hattono mitte rodooꞌya cuuantino.

Hakkiinni 1950nni Ameeriku mangiste karsantinohu Kooriyu Oli kaita, wottaaddara ikkate Forti Heezi yinanni uurrinsha mareemmo gede layinkimeeshsho woshshinie. Ikkado ikkoommota buuxate fonqolo uyiniehu gedensaanni wottaaddaru roorrichi, “Gaamoꞌne giddo dancha guma abbitinori mereero mittu ateeti” yiie. Ani qole, “Hatti danchate, kayinni ani olaho dihaꞌreemmo” yuummo. Layinki Ximootewosi 2:3 yitannore qummi asse, “Ani Kiristoosi wottaaddarchooti” yuummo. Hakkiinni isi lowo yanna sammi yee keeshshi gedensaanni, “Haꞌrixa” yiie.

Hakkiinni bayichonko Sinsinaati, Ohayo yinanniwa lowo gambooshshiwa Beeteelete forme wonshitannorira qixxaawino gambooshshe beeqqummo. Hakko gambooshshiwa, Roduu Milteni Hensheeli mittu rodii Maganu Mangistera diinaggaawe loosa hasiꞌrannoha ikkiro dirijjite Beeteelete soqqamanno gede assitara dandiitanno yiinke. Beeteele eate forme wonshummo, hakkiinni woshshinie; Woxawaajje 1954nni Birukiliini Beeteele eummo. Hakkuyinku Beeteelete noommo.

Beeteelete looseemmore hooge diegennoommo. Lowo diro, borro attammanni maashinewanna biirote gimbe giddo noote waa iibbinshanni maashine ledo xaado afiꞌrino looso loosoommo; qoleno maashinenna qulfuwa seekkeemmo. Niwu Yoorki Sitiira noote Jajjabbu Gambooshshi Addaraasherano loosoommo.

Beeteelete nooti ayyaanaamittete qixxaawo hagiirsiissannoe; kuri giddo soodo magansiꞌra, maatennita Agarooshshu Shae Xiinxallo, hattono songote ledo soqqansho fula qummi assa dandeemmo. Heeshshi gotti assine hendeemmo wote, tini ayyaanaamittete coyibba mitte mittente Yihowa Farciꞌraasine maatera hasiissannote; qoleno kuni assa dandiinannireeti. Annuwanna amuuwu oosonsa ledo barru qummeeshsha nabbabbannoha, Maatete Magansiꞌra agurtukki assidhannoha, hattono songote gambooshshiranna dancha duduwo duduwate loosira diinaggaabbannoha ikkiro, maatete giddo baalunku ayyaanaamittetenni jawaattannoti egennantinote.

Beeteeleteno songote giddono batinye jaalla kalaqiꞌroommo. Insa giddo gamu buurantinoreeti; kuri iimira hadhe baraarshansa adhitino. Wolootu kayinni buurantinore diꞌꞌikkitino. Beeteelete noorino gattukki, Yihowa soqqamaano baalanti guuntete xeꞌne noonsareeti. Mittu rodii ledo kawa kaꞌaa higinonke coyi heeꞌranno wote, ayewoteno salaame kalaqate woꞌnaaleemmo. Maatewoosi 5:23, 24 yitannorenna mimmitoho koffi yineemmo wote ma assa hasiissannonkero hedeemmo. Maaro xaꞌmiꞌra shota diꞌꞌikkitino; ikkirono, maarie yuummo gedensaanni kayinni duucha wote, jaaliꞌya ledo xaada giwinonke coyi tidhamanno.

SOQQANSHOꞌYANNI AFIꞌROOMMOHA DANCHA GUMA

Geedhimma daggino daafira, xa minunni mine haꞌre soqqama shota diꞌꞌikkitinoe; ikkirono hexxo mudhe diaguroommo. Mandariini yinanniha boode Chayinu afoo rosoommo daafira doogote Chayinu manna coyishiisha baxeemmo. Mite soodo hasatto noo mannira 30 woy 40 metseete eleemmo.

Wole agurina Chayinu gobbara noo manna galagale hasaawisoommo woti no! Mitto barra, mitte faasiiqa wedellitte laalo hirranni uduunnicho egensiisate doogote woraqata beekkanni heedhe anewa higge muushshi yitu. Anino muushshi yee Chayinu afiinni qixxaabbinota Agarooshshu Shaenna Baqqi Yiiyye! yinanni metseetta uummose. Ise metseetta adhite kaꞌe suꞌmise Keeti ikkinota kultue. Hakkuyi gedensaanni, Keeti ane affanno wote shiqqe coyishiishshannoe. Anino isera addi addi laalonna akaakilte suꞌma Ingilizete afiinni mayinanniro rosiiseemmose; ise qolte ani yuummota yitanni rosiisidhanno. Qoleno Qullaawu Maxaafi qummeeshshuwa afidhino tiro xawise kuleemmose; hakkiinni Qullaawu Maxaafi Roso yinanni maxaafa uummose. Mite lamala gedensaanni kayinni Keeti higguwa afa hoogummo.

Mitu agani gedensaanni wole wedellitte beetto hattonni woraqata beekkanna afe metseetta uummo. Layinki lamalara hatti beetto, “Chayinu gobbanni bilbilinohe manni noona hiiꞌꞌi coyishiishi” yite silkese uyitue. Ani qole, “Chayinu gobbara afoommo manni dinowe” yuummo. Ise kayinni hiiꞌꞌilla yite gibbuta, silke haare “Halo, ani Roobiseniiti” yuummo. Bilbiltino beetto qoltannoti, “Roobi, ani Keetiiti. Agure Chayina haꞌroomma” yitue. Ani qole, “Chayina?” yuummo. Hakkiinni Keeti togo yitue: “Ee. Roobi, hatti silke uyituhe beetto rodooꞌyaati. Anera lowoha dancha coye rosiisoottoe. Iseno ballo ane rosiisittoe gede assite rosiisise.” Hakkiinni ani, “Keeti, danduummo geeshsha rosiiseemmose. Noottawa kuloottae daafira galateemmohe” yuummo. Hakkiinni Keeti rodoo hasaawisummo; kayinni iseno hakkunni gedensaanni higguwa hoogummo. Kuri lamenti seenni heeꞌriwano heeꞌriro, Yihowa daafira lede rosanno faro afiꞌranno yee hexxeemmo.

Yihowara 73 diro qullaawa soqqansho soqqamanni keeshshoommo. Isi usuru mine poletikaho anga wodheemmokki gedenna ammanamoommoha ikkeemmo gede kaaꞌlinoehura galaxxeemmosi. Qoleno, roduuwiꞌya alba anniꞌya qarrisannoe waro hexxo mudhummokki kaajje saꞌꞌaꞌya jawaante ikkitinonsata kultannoe. Gedensaanni amaꞌyanna lewu roduuwiꞌya cuuamino. Anniꞌyano bashsho gede qarrisa agurino; isinni mito gambooshshe haꞌra nafa hanafe heeꞌre reyino.

Maganu fajjo ikkiro, reyino fiixiꞌyanna jaallaꞌya haaro alamera kaꞌanno. Hatte yannara banxeemmo manni ledo hegerera Yihowa magansiꞌneemmo wote afiꞌneemmo hagiirre hanni hedde!b