Dora Gananno Manchi Gede Yihowa Seekkannoꞌneta Huwatte

1. Yihowa taalamannohu noosikki Seekkaanchooti yineemmohu mayiraati?

BOCAASA 2010nni, Ingilizete Lendenete katamira 18kki sanira Chayinu gobbara dorunni loonsoonniha awawa wodhinanni uduunnicho caratunni 70 miliyoone doolaare meddi yaanno woxira hirroonni. Tini, dora gananno manchi base baalate noohunna hasiꞌni gede afiꞌnanni dorinni biifadonna lowo woxe hirannoha dancha uduunnicho seekka dandaannota leellishshanno. Ikkirono, Yihowa ledo taalama dandaannohu mittuno dora gananno manchi dino. Maganu leekkihu kalaqote barri jeefora “baattote aaninni busha haare” guuta mancho kalaqino, hattono konni manchira Kalaqaanchisi akatta leellishate dandoo uyinosi. (Kal. 2:7) Hakkonne bushshunni seekkinoonniha guuta mancho Addaami, “Maganunniho” yinoonni.—Luq. 3:38.

2, 3. Maaro einohu Israeelete mannira noonsa hedo harunsa dandiineemmohu hiittoonniiti?

² Ikkollana, Addaami Kalaqaanchisira finqile Maganu beetto ikkate qoossosi huꞌnino. Ikkirono, hundinni kayise Addaami sircho ikkinohu “batiꞌru gomichi” yaano ammanamino manni Maganu aliidimma irkisa doodhino. (Ibi. 12:1) Insa umonsa heeshshi asse Kalaqaanchinsara maahoyye yee gale, Annansanna Seekkaanchonsa ikkara hasiꞌrannohu Sheexaane ikkikkinni Magano ikkinota leellishino. (Yoh. 8:44) Insa konni garinni Maganoho ammanamansa, Isayaasi maaro einohu Israeelete manni daafira coyiꞌrinore qaagiissitannonke; insa togo yiino: “Kaaliiqa ati ninkera annankeeti; ninke bushshaho. Seekkoottonkehu ateeti; ati angakkinni kalaqoottonke.”—Isa. 64:8.

³ Hatteente gede, yannankerano Yihowa ayyaanunninna halaalunni magansiꞌranno manni baalu umonsa heeshshi assatenna isira maahoyye yee galate sharramanno. Insa Yihowa Annanke yite woshshanna iso Seekkaanchonsa assidhe isira maahoyye yite gala lowo ayirrinyi gede assite laꞌanno. Ikkina ateneeto, Yihowa dancha uduunnicho asse seekkannohu shaqqadu dori gede assite laꞌꞌatto? Ayyaanaamittete roduuwakkino Maganu seekkanni noori gede assite laꞌꞌatto? Hanni togoo lao heedhannonke gede kaaꞌlannonkeha Yihowa Seekkaancho ikke assannoha sase coye laꞌno; insano: Isi seekkanno manna dooranno gara, seekkanno gede assannosi korkaataatinna seekkanno garaati.

YIHOWA SEEKKANNO MANNA DOORANNO

4. Yihowa isiwa daanno manna doorannohu hiittoonniiti? Mito lawishsha kuli.

⁴ Yihowa mannu ooso laꞌꞌanno wote gobbayidi ayimma aana diꞌꞌillachishanno. Hatteentenni isi, wodana yaano giddiidi ayimma laꞌꞌanno. (1 Saamueeli 16:7b nabbawi.) Maganu Kiristaanu songo xinti yannara tini xabbe leeltino. Isi mannu illera mishamino manna isiwanna Beettisiwa daanno gede assino. (Yoh. 6:44) Hattoo manni giddo mittu Ferisaawichu Saawuliiti; isi alba ‘xonannoho, xiiwannohonna shollishannoho.’ (1 Xim. 1:13) Ikkollana, “wodana fonqole laꞌꞌanno” Magani Saawuli seeyannokki dori gede asse dilaino. (Law. 17:3) Hatteentenni Maganu Saawuli seekke biddi asse ‘dagate, mootoollatenna Israeelete mannira’ farciꞌrannoha ikkara dandaannohu gede asse laino. (Soq. 9:15) Maganu “ayirrado hajora horoonsiꞌnanni” uduunni gede asse lainori giddo wolootu alba dimbaasinete, amanyoote bainore assitannoreetinna moortannoreeti. (Rom. 9:21, NW; 1 Qor. 6:9-11) Insa Maganu Qaalita garu egenno afidhenna ammana noonsata leellishshe Yihowa seekkansara maahoyye yitino.

5, 6. Yihowa seekkannonkeha ikkinota afanke, (a) soqqammeemmo yannara xaandeemmo mannira, (b) ayyaanaamittete roduuwinkera gara ikkitino lao heedhannonke gede kaaꞌlitannonkehu hiittoonniiti?

⁵ Aleenni laꞌnummori kaaꞌlannonkehu hiittoonniiti? Yihowa mannu wodani giddo noore afatenna doorino manni isiwa daanno gede assate dandoo noosita afanke wolu mannira lawishshaho, soqqammeemmo yannara xaandeemmonna songonke giddo noo mannira gara ikkitino lao heedhannonke gede assitannonke. Hanni Mayikili yinanni manchi lawishsha laꞌno. Isi albita qaage togo yee coyiꞌrino: “Yihowa Farciꞌraasine dagge hasaawissannoe yannara dihasiꞌreemmo yee haꞌriseemmo, hattono cuqqi cuꞌruqqi yaa giweemmo. Ani hakkawaro naaxxaleessaho! Gedensoonni, wole wote amanyoote afidhino maate xaade dhagge assiꞌrummo. Mitto barra insa Yihowa Farciꞌraasine ikkitinota afummoti lowo geeshsha maalaꞌlummo. Insa danchu amanyooti noonsare ikkansa, mulla kae giweemmonsahu mayiraatiro aneneeto layiꞌreemmo gede kakkayissinoe. Shiima yanna gedensaanni, insara konni gari lao nooehu insa daafira gara ikkinore afoommohura ikkikkinni, afa hoogenna insa daafira coyiꞌnannihu gara ikkinokki totainni ikkinota huwatummo.” Mayikili gara ikkinore afate Qullaawa Maxaafa xiinxalla hanafino. Yannate gedensaanni, Yihowa Farciꞌraasincho ikke woꞌma yanna soqqansho eino.

⁶ Yihowa Seekkannonkeha ikkinota afanke, ayyaanaamittete roduuwinkera gara ikkitino lao heedhannonke gede assitannonke. Ayyaanaamittete roduuwakki Maganu seekke gudinokki uduunnichi gede assite laꞌꞌatto? Maganu mittu manchita giddiidi ayimma laꞌꞌanno, hattono isi ogeette angasinni seekke biddi assanno yannara hiittooha ikkannoro hedanno. Hakko daafira, Yihowa mannaho gara ikkitino lao noosi, hattono shiima yanna calla heedhannote guuntete xeꞌne aana diꞌꞌillachishanno. (Far. 130:3) Ninkeno, Maganu soqqamaanora gara ikkitino lao heedhannonke gede assiꞌne isi faale haꞌra dandiineemmo. Roduuwinke ayyaanaamittetenni lophate sharrantanno yannara kaaꞌlineemmonsaha ikkiro, Seekkaanchinke ledo loonsanni heeꞌnoommo yaate. (1 Tes. 5:14, 15) Songote cimeeyye, Maganu ‘aamamooshshe asse uyino manna’ ikkitinohura tennera albisa ikka hasiissannonsa.—Efe. 4:8, 11-13, NW.

YIHOWA SEEKKANNONKEHU MAYIRAATI?

7. Yihowa aannohe amaale naadatto gede assannoheri maati?

⁷ Mitu manni ‘Ani ooso ilammo geeshsha anniꞌyanna amaꞌya mayira amaalannoero xawe dileellinoe’ yaanna macciishshoottoha ikkara dandaanno. Gikki yinanni haꞌneemmo wote kayinni amaallanninke amaalera gara ikkitino lao heedhankera dandiitanno; hattono Yihowante gede amaale banxanninketa leellishannori gede assine laꞌneemmo. (Ibiraawoota 12:5, 6, 11 nabbawi.) Ee, Yihowa ninke oososi baxannonkehura ceeꞌmikkinni seekkannonke woy amaalannonke. Isi hayyootanna hagiirraamma ikkinammora, hattono banxammosira hasiꞌranno. (Law. 23:15) Isi qarru iillannonke yannara dihagiidhanno; hattono Addaamiwiinni ragiꞌnoommohu ‘Maganu hanqinni’ reyinammora dihasiꞌranno.—Efe. 2:2, 3.

8, 9. Xaa yannara Yihowa rosiisanni noonkehu hiittoonniiti? Albillitte kuni rosi lexxanni haꞌrannohu ma garinniiti?

⁸ Yihowa daafira ronsammora albaanni ninke giddo mitoho iso hagiirsiissannokkiti badda moyichite gedee akatta noonkereeti! Seekkannonke Magani Yihowa galatamona, xa kayinni soorramme geꞌreewu gedeere ikkinoommo. (Isa. 11:6-8; Qol. 3:9, 10) Yihowa xaa yannara seekkanni noonkehu ayyaanaamittete gannate giddooti; isi tenne ayyaanaamittete gannate seekke biddi assanni no. Heeꞌnoommo alame busha ikkiturono dimanseemmo, hattono beꞌe yinummokkinni heeꞌneemmo. Qoleno, tenne ayyaanaamittete gannate giddo, baxillu nookkinna sirnya afidhinokki maate giddo lophinoommori yannate gedensaanni addu baxille afiꞌnoommo. (Yoh. 13:35) Hattono, wolu mannira baxille leellisha dandiinanni gara ronsoommo. Baalunkunni roore, Yihowa daafira anfoommo, hattono xa isi annu gede asse baxannonketa huwantoommo.—Yai. 4:8.

⁹ Haaro alame giddo, ayyaanaamittete gannatera heeꞌranno atoote woꞌmunni woꞌma afiꞌneemmo. Hattono, Maganu Gashshooti uulla gannate ikkitanno gede assanno. Uulla woꞌma gannate ikkitanno yannarano, Yihowa hakkiicho heeꞌranno manna rosiise seekke biddi assa diaguranno; xaa yannara tenne assannohu hiittoonniitiro xawe leella hoogankera dandaanno. (Isa. 11:9) Qoleno, hatte yannara Maganu surrenkenna manninaatenke guuta assannohura, rosiisannonke roso adhineemmokkinna fajjosi assineemmokki gede guficho ikkannonkeri diheeꞌranno. Konnira, Yihowara maahoyye yine gala agurroonke; tenne assineemmoha ikkiro, isi seekke biddi assannonkehu baxannonkehura ikkinota huwantoommota leellinsheemmo.—Law. 3:11, 12.

YIHOWA SEEKKANNONKEHU HIITTOONNIITI?

10. Yesuusi taalamannohu noosikki Seekkaancho ikkinohu Yihowate gedee cincanna hayyo leellishinohu hiittoonniiti?

¹⁰ Doru uduunne ganate fullahino manchi gede, Yihowa angasi noo “dori” dananna orte yaano ewelummanke hedanni loowannonke. (Faarso 103:10-14 nabbawi.) Ee, Yihowa laanfenke, dandoonkenna ayyaanaamittete lophonke deerri mageeshshihoro hedanni anna anna loowannonke. Beettisi assinori isi soqqamaanosita guuntete xeꞌne ma garinni laꞌꞌannoro leellishanno. Hanni Yesuusi soqqamaasinesi soꞌro loossu yannara lawishshaho insa giddo roorannohu ayetiro afate heewisantu wote maa assinoro hedi. Ati Yesuusi soqqamaasine goolte heewisantanna macciishshoottoro, insa shooshaqootunna shaqqadu dori gede assite laꞌꞌatto? Yesuusi insa gara ikkitinokki doogonni dilaino. Isi, ammanantino soqqamaasinesi shaqqillunninna ceeꞌminikkinni amaallinsaro, hattono isi umosi heeshshi assanno gara laꞌuro biddi yitara dandiitannota afino. (Maq. 9:33-37; 10:37, 41-45; Luq. 22:24-27) Yesuusi soqqamaasine isi reyotenni kaihunna qullaawu ayyaani dirrinsahu gedensaanni, silxaanete woy maccaha ikkate aana illachisha agurte Yesuusi uyinonsa loosi aana illachishshino.—Soq. 5:42.

11. Daawiti shaqqadu dori gede ikkinota leellishinohu hiittoonniiti? Ati isi faale haꞌra dandaattohu ma garinniiti?

¹¹ Yannankera Yihowa soqqamaanosi seekkannohu Qaalisi, qullaawu ayyaanisinna Kiristaanu songo widoonniiti. Maganu Qaale haja assine nabbambeemmoha, hiincineemmohanna nabbamboommore loosunni leellinsheemmo gede kaaꞌlankera Yihowa huucciꞌneemmoha ikkiro Qaalisi seekke biddi assannonke. Daawiti togo yee borreessino: “Maꞌnaꞌyara heeꞌre qaageemmohe; hashsha woꞌma atere hedeemmo.” (Far. 63:6) Qoleno isi togo yee borreessino: “Amaalinoeha Kaaliiqa galaxxeemmo; wodaniꞌya hashsha nafa seejjannoe.” (Far. 16:7) Ee, Maganu Daawitira adhate shota ikkitinokki amaale uyinosi woti nooha ikkirono, Daawiti tini amaale wodanisi giddora eꞌe giddiidi hedosi seekkite biddi assitannosi gede assiꞌrino. (2 Sam. 12:1-13) Daawiti umosi heeshshi assasinna Maganoho maahoyye yee galasi ninkera dancha lawishshaati. Atino Maganu Qaale hiincite giddokkira eanno gede assiꞌratto? Tenne albinni roore assa hasiissannoheha lawannohe?—Far. 1:2, 3.

12, 13. Yihowa qullaawu ayyaanisinna Kiristaanu songo widoonni seekke biddi assannonkehu hiittoonniiti?

¹² Qullaawu ayyaani addi addi doogonni seekke biddi assankera dandaanno. Lawishshaho, qullaawu ayyaani Maganu ayyaani gumi akatta widira gaamantannota Kiristoosite gedee akatta lossiꞌrate kaaꞌlannonke. (Gal. 5:22, 23) Ayyaanu gumi akatta giddo mittu baxilleho. Maganu hajajubba duha ikkitinokkita anfoommohura iso banxeemmo, hattono isira hajajammeemmo; qoleno seekke biddi assankera hasiꞌneemmo. Qullaawu ayyaani alamete faale harunsineemmokki gedeno kaaꞌlannonke. (Efe. 2:2) Aju beetti noo waro Yihudu ammaꞌno marootiha naaxxate akata harunsannohu soqqamaasinchu Phaawuloosi togo yee borreessino: “Wolqa aannoehunni Kiristoosinni [“Maganunni,” NW] baalankare assa dandeemmo.” (Fil. 4:13) Konnira ninkeno Phaawuloosinte gede qullaawa ayyaana afiꞌrate huuccatto assiꞌra agurroonke. Yihowa suwashshu wodani noonsa manni huucciꞌranno huuccatto macciishshanno.—Far. 10:17.

¹³ Yihowa mitto mittonka mancho seekke biddi assate Kiristaanu songonna songote aliidi laꞌꞌaano horoonsiꞌranno. Lawishshaho, songote cimeeyye ayyaanaamittenke shoshshoggitinota affuro ninke kaaꞌlate sharrantanno; tenne assitannohu kayinni uminsa hayyonni diꞌꞌikkino. (Gal. 6:1) Hatteentenni, umonsa heeshshi assite Maganu wodanchanna hayyo aannonsa gede huuccatto assidhanno. Ninke heeꞌnoommo gara hedde Maganu Qaalenna Kiristaanu borruwanke seekkite xiinxallite huuccidhino huuccatto ledo sumuu yaannore assitanno. Tini, ninkera hasiisse noonke kaaꞌlo aate kaaꞌlitannonsa. Cimeeyye shaqqillunninna baxillunni kaaꞌlitahera lawishshaho uddiꞌratto gara biddi assiꞌratto gede kulte amaaltannohe amaale Maganu baxannoheta leellishannori gede assite laꞌꞌatto? Tenne assattoha ikkiro, Yihowa anga noohu loowate qarrisannokkihu shaqqadu dori gede ikkoottota leellishatto.

14. Yihowa dora gananno manchi gede ninke seekke biddi assate silxaane noosiha ikkirono xixxiiwannonkekkihu hiittoonniiti?

¹⁴ Maganu seekke biddi assanni noonke gara afanke ayyaanaamittete roduuwinke ledo noonke aantera kaaꞌlitannonke; hattono soqqammeemmo yannara xaandeemmonna Qullaawa Maxaafa xiinxallinseemmo mannira gara ikkitino lao heedhannonke gede assitannonke. Dora gananno manchi dora gamba asse hakkawontenni loowa dihanafanno. Balaxe kinnanna wole hasiissannokki coyibba hoolanno. Ayyaanaamittete yaattonnino, Maganu isi seekke biddi assansara hasiꞌranno manna kaaꞌlanno. Isi soorrante biddi yitanno gede dixixxiiwannonsa; ikkollana heeshshonsa xuru nookkita assidhannonna uminsanni mito coye biddi assidhanno gede xalala biddishshuwasi kulannonsa.

15, 16. Qullaawa Maxaafa xiinxallanno manni Yihowa seekke biddi assansara hasiꞌrannota leellisha dandaannohu hiittoonniiti? Lawishsha kuli.

¹⁵ Hanni Tese yinannite Awustiraaliyaho heedhanno rodoo lawishsha laꞌno. Xiinxallissuse rodoo togo yitino: “Tese Qullaawu Maxaafi halaale adhitinohu anga iimaati. Ikkollana, ise ayyaanaamittetenni gari geeshsha dilophitino; wole agurina Kiristaanu gambooshshe nafa dihadhanno! Tenne haja daafira huuccattotenni seekke hedumma gedensaanni, ise xiinxallisa agurate murciꞌrumma. Hakkiinni mittu dhagge ikkanno coyi ikki. Techo calla xiinxallise agureemma yee hede xiinxallisanni heeꞌreenna Tese wodanise giddo noore kultue. Ise qumaare gaꞌnitannohura rossinore loosunni leellisha hoogase dadillissinoseta kultue. Ikkollana, ise konne rosicho agurate murcidhino.”

¹⁶ Shiima yanna gedensaanni, Tese jaallase qacifattannoseha ikkirono songote gambooshshe haꞌranna Kiristaanu akatta leellisha hanaffu. Xiinxallissuse rodoo ledde togo yitino: “Yannate gedensaanni, Tese cuuantino; shiimmaaddu qaaqquulli nooseha ikkirono, woꞌma yanna suwisaancho ikkite soqqama hanaffino.” Ee, Qullaawa Maxaafa xiinxallanno manni Magano hagiirsiisate heeshshonsa xuru nookkita assiꞌranno yannara, isi insawa shiqanno; hattono seekke ayirradu uduunni gede assannonsa.

17. (a) Yihowa Seekkannohe gara hedatto wote baxisannohe coyi maati? (b) Aananno birxichira maa ronseemmo?

¹⁷ Hundinni kayise yannanke geeshsha doru uduunne gannannihu angatenniiti; konnira dora gananno manchi loosanno uduunne qorophe loosanno. Hatteente gede, Kalaqaanchinke amaalesinni qorophe seekkannonke; tenne yannara amaalesi macciishshineemmoronna teꞌee seekke harunsanno. (Faarso 32:8 nabbawi.) Heeshshokki giddo Yihowa ate daafira hedannoti leeltannohe? Isi dancha angasinni seekkanni noohehu gede assite hedatto? Hatto ikkiro, Yihowa angara loowamate qarrisannokkinna shaqqadu dori gede ikkate kaaꞌlitannoheti wole akatta hiikkuriiti? Kaajjadu dori gede ikkatto gede assitannoheta hiikkuri akatta hooꞌla hasiissannohe? Annuwunna amuuwu oosonsa seekke biddi assate Yihowa ledo buusama dandaannohu hiittoonniiti? Aananno birxichira tenne hajore ronseemmo.