Hayyo Seekkitine Cuꞌmidhinanni?

Mitto barra daaꞌꞌatara hakko qooxeessa marino manchi “Culkate saante birru saante ero ikkitannota diafootto?” yee xaꞌmisi. Hakku shiimu qaaqqi muushshi yee, “Afoommo” yii. Hakkiinni daaꞌꞌatara marino manchi “Ikkina birru saante mayira adhittoyya? Culkate saante adhoottoro ero woxi heeꞌrannohewe!” yii. Hakkiinni qaaqqu togo yii: “Culku saante adhummoro, mannu tenne godoꞌle ane ledo godoꞌla aguranno. Xaa geeshsha meꞌꞌe birru saante codhoommoro afootto?” Tenne maatto giddo qummi assinoonnihu shiimu qaaqqi, jajjabbu mannirano kaaꞌlanno akati yaano hayyo noosita leellishino.

Qullaawu Maxaafi togo yaano: “Egennonna [“hayyo”, NW] wodancha seekkite cuꞌmiꞌri. . . . Haꞌratto doogono keere ikkitannohe; horonta digufiꞌratto.” (Law. 3:21, 23) Konni daafira “hayyo” maatironna hayyo horoonsiꞌneemmo gara afanke danotenni agartannonke. Tini ‘gufiꞌneemmokki’ gede yaano ayyaanaamittetenni shoshshoggineemmokki gede kaaꞌlitannonke.

HAYYO MAATI?

Hayyo, egennotenna wodanchatenni baxxitanno. Egenno noosi manchi mittu coyi daafira afinoho woy mashalaqqe noosiho. Wodancha noosi manchi mittu coyi wolu coyi ledo xaado afiꞌranno gara huwatanno. Hayyo noosi manchi egennosinna wodanchasi horoonsiꞌranno; togoo manchi hayyo noosita leellishannore assanno.

Lawishshaho, mittu manchi shiima yanna giddo Qullaawu Maxaafi Addinta Mayyee Rosiisanno? yaanno maxaafa nabbawe huwatara dandaanno. Qullaawa Maxaafa xiinxallanno yannarano, dawaro garunni qolannoha ikkara dandaanno. Hattono, gambooshshe haꞌraranna gambooshshunniwa dawaro dancha gede asse qolara dandaanno. Tini baala isi ayyaanaamittetenni lophanni noota leellishshara dandiitanno; kayinni togo yaa isira hayyo noosi yaateni? Hatto yaa ikka hoogara dandaanno. Isira mitto coye rahe rosate dandoo noosiha ikkara dandaanno. Ikkollana isi egennosinna wodanchasi garunni horoonsiꞌre rosinore loosunni leellishannoha ikkiro hayyichaho yaa dandiinanni. Isi doodhanno doorshi dancha guma abbannohanna seekke hede doodhinota leellishannoha ikkiro, isira hayyo noosi yaa dandiinanni.

Maatewoosi 7:24-27 aana Yesuusi mine miꞌnitinori lamu manchi daafira coyiꞌrino lawishshi no. Insa giddo mittu ‘egennaamo’ ikkinota kulloonni. Hakku manchi albillitte ikkannore balaxe hede, minesi kinchu aana miꞌnino. Isi xeertise hedannohonna hayyichaho. Isi mine shaafu aana miꞌnummoro lowore diwocaaweemmo woy rahe gudeemmo yee dihedino. Isi assannori gale hose abbanno guma xeertise hede hayyicha ikkinota leellishino. Hakko daafira bubbe dagguta minisi diigamikki gatino. Ikkina, ninke konne kaajja akata yaano hayyo afiꞌranna seekkine cuꞌmiꞌra dandiineemmohu hiittoonniiti?

HAYYO AFIꞌRA DANDEEMMOHU HIITTOONNIITI?

Qullaawu Maxaafi togo yaanno: “Hayyo noonsari [Maganu] suꞌma waajjitanno.” (Mik. 6:9, NW) Yihowa suꞌma waajjate yaa Iso ayirrisate yaate. Togo yaa qole suꞌmasi riqiwannorira gara ikkino ayirrinye leellishate yaate; tenne assa dandiineemmo doogga giddo mitte biddishshasi ayirrisate. Mitto mancho ayirrisate hakku manchi hedanno gara afa hasiissannohe. Hedanno gara afittoro hakkonne mancho ammaꞌnatto; hattono isiha dancha lawishsha harunsatto. Mitto coye assinammora albaanni hakku coyi Yihowa ledo noonke jaalooma seekkannoronna hunannoro hendeemmoha, hattono mitto doorsha doodhineemmohu isi fushshino biddishshi garinni ikkiro hayyo noonketa leellinsheemmo.

Qoleno, Lawishsha 18:1 togo yitanno: “Baxxara hasiꞌrannohu umosi calla baxanno; halaalaancho coye baala [“hayyo”, NW] giwanno.” Qoropha hoongummoro Yihowawiinna dagasiwiinni xeertiꞌnammora dandiineemmo. Tenne hooꞌlate Yihowa baxxannori ledo yanna sayisanna Isi seera ayirrisa hasiissannonke. Konnira, dandiinummo deerrinni Kiristaanu gambooshshe assiꞌrate ganyine Mangistete Addaraashe haꞌra hasiissannonke. Gambooshshe haꞌneemmo yannara, rosiinsanniri widaninkera coanno gedenna loosoho kakkayisannonke gede assiꞌra hasiissannonke.

Hakkiinni saeno, huuccattotenni giddonketa Yihowara kuꞌlineemmoha ikkiro, albinni roore isiwa shinqeemmo. (Law. 3:5, 6) Qullaawa Maxaafanna Yihowa dirijjite qixxeessitanno borro nabbambeemmo wote roso afiꞌrate wodananke qixxeessiꞌneemmoha ikkiro, assineemmori gale hose abbanno guma hedanna dancha doorsha doodha dandiineemmo. Qoleno ayyaanaamittetenni gikki yitino roduuwi amaaltannonke amaale macciishsha hasiissannonke. (Law. 19:20) Hatto assineemmoha ikkiro, hayyo giwa agurre konne kaajja akata lossiꞌneemmo.

HAYYO MAATEꞌYA KAAꞌLITANNOHU HIITTOONNIITI?

Hayyo maatete agarooshshe ikkitara dandiitanno. Lawishshaho, Qullaawu Maxaafi, minaama minaannase lubbora ‘ayirrissanno’ gede amaalanno. (Efe. 5:33) Ikkina, minaanni minaamasi ayirrissannosi gede maa assa hasiissannosi? Minaamasi ayirrissasira yee gadadisannoseha woy isera hekki yaannoha ikkiro, ise hakka wotira ayirrissannosiha ikkara dandaanno. Ise isi ledo nyerri yaa gibbinohura calla, ledosi noo wote goowi alita ayirrissasira dandiitanno. Kayinni isi ledose nookki wote ayirrissannosiyya? Ayirrisa hooggasira dandiitanno. Konni daafira minaanni minaamasi duuchanka wote ayirrissannosi gede maa assa dandaannoro heda hasiissannosi. Isi ayyaanu guma laalannoha, lawishshaho, baxillaanchonna shaqqado ikkiro, ise godowinta ayirrissannosi gede assiꞌranno. Ikkollana, Kiristaancho ikkitino minaama, minaannise ayirrinsannisi gede assannore assirono assa hoogiro iso ayirrisa hasiissannose.—Gal. 5:22, 23.

Qullaawu Maxaafi minaannino minaamasi baxa hasiissannosita kulanno. (Efe. 5:28, 33) Minaama minaannise giwannosekki gede isi afa hasiissannosiha mitto gara ikkinokki coye maaxe saummaro woyyanno yite heddannoha ikkara dandaanno. Kayinni tini isera hayyo nooseta leellishshannoni? Gedensoonni hige minaannise hakkonne ise maaxxe saꞌinore afiꞌro coyi seyanno? Isi ise biꞌreesi gede baxannose? Tenne assa qarra ikkitasira dandiitanno. Ise hakkonne gara ikkinokki coye maaxa agurte tenne kulate maltino yanna hedde, shaqqillunni kultusiro kayinni, minaannise ise noore maaxxinokkihura galatasera dandaanno. Ise tenne assitannoha ikkiro, minaannise albinni roore baxannose.

Ooso annansanna amansa ayirrisa hasiissannonsa; annunna amano oosonsa Yihowa seerinni seejja hasiissannonsa. (Efe. 6:1, 4) Kayinni togo yaa annunna ama oosonsara mittu mittunku coyiꞌra biddishsha fushsha hasiissannonsa yaateni? Annunna ama oosonsara biddishsha fushshatenninna gara ikkinokkire assituro qorichishannonsata kulatenni sainore assa hasiissannonsa. Hayyo noonsa anninna ama oosonsa mittu coyiꞌra hajajama hasiissannonsahu mayiraatiro huwattanno gede assitanno.

Lawishshaho, hanni mittu qaaqqi annisira woy amasira kaajjishe coyiꞌrinohu gede assite hedi. Hatte yannara qaaqqo jajjarsa woy isi coyiꞌre qoꞌlikkinni qorichisha qaaqqu saalfatanno woy sammi yaanno gede assitasira dandiitanno. Kayinni isi sammi yoolla ikkinnina giddosiinni xissiisiꞌrara dandaanno; tini qolte annisiwiinninna amasiwiinni godowa xeertiꞌranno gede assitasira dandiitanno.

Hayyo noonsa anninna ama, qaaqquullensa seejjanno garanna tini qaaqquullensa seekkitannoronna huntannoro hedanno. Annunna ama qaaqqinsa gara ikkinokkire assinohura calla muddame qorichisha dihasiissannonsa. Insa gedensisi seyanno gede Yihowa annasinna amasi ayirrisara hasiꞌrannota callisi noowa shaqqillunninna baxillunni kulasira dandaanno. Qaaqqu annasinna amasi ayirrisannoha ikkiro, Yihowa ayyirrisanni noota huwatanno. (Efe. 6:2, 3) Annunna ama tenne assannoha ikkiro, qaaqqinsara coyi egemmamasira dandaanno. Annisinna amasi isi daafira hedannota huwatanno; hattono insa albinni roore ayirrisanno. Tini wole yannara qaaqqinsa shota ikkinokkiri tuncu yaannosi wote tenne insara amaaꞌlanno gede faro fantanno.

Mitu anninna ama miteekke qaaqqinsa koffi yaanno yee insa loossino soꞌro lashshi asse qaaqqonsa seejjannokkiha ikkara dandaanno. Hatto ikkiro, qaaqqu lophanno wote hiittooha ikkanno? Isi Yihowa waajjannoha ikkanno? Maganu seera harunsa hayyo ikkitinota huwatanno? Isi Yihowara hajajamannohanso, ayyaanaamittete coye lashshi assannoha ikkanno?—Law. 13:1; 29:21.

Mittu ogeessi seekka hasiꞌranno uduunne balaxe hedanno. Isi mulla afi gede asse boce danchare seekkeemmo yee heda dihasiissannosi. Hayyo noonsa anninna amano duucha wote Yihowa seera harunse suꞌmasi waajjannota leellisha hasiissannonsa. Togoo anninna ama Yihowanna dirijjitesi ledo quraanyame hayyo afiꞌranno; hattono tenne hayyo maatensa kaaꞌlate horoonsiꞌranno.

Baalunkura albillittete heeshshonke seekkara woy bushiishara dandaanno coyi tuncu yaannonke. Mitto coye muddamme gari-garimmo laꞌnummokkinni assantenni wodanaaꞌmine heda diwoyyitanno? Assatto coyi abbanno guma xeertisse hedi. Yihowa seera harunsi; hattono Isi hayyo nooheta leellishi. Tenne assattoha ikkiro hayyo seekkite cuꞌmiratto; tini hayyo qolte heeshsho afiꞌratto gede assitannohe.—Law. 3:21, 22.