Heeshshoꞌne Gari Soorramanno Woyite Giddiidi Keeriꞌne Baꞌꞌannokki Gede Agadhe

1, 2. (a) Mittu Kiristaanchira heeshshosi giddo hedeweelcho iillitasira dandiitannohu hiittoonniiti? (Hanafote noo misile lai.) (b) Faarso 131 kultanno garinni giddiidi keerinke baꞌꞌannokki gede mayi kaaꞌlannonke?

LOOYIDINNA Aleksaandira yinanni minaanninna minaama 25 saꞌꞌanno diro Beeteelete soqqami gedensaanni qanchoho soqqamanno gede kullinsata, umi qara dadillino. Looyidi togo yiino: “Beeteelete looseemmo looso lowo geeshsha baxeemmo daafira, wolewa soqqama horo dandeemmokkiha lawinoe. Qanchoho soqqammeemmo gede assinoonnita giwoommokkiha ikkirono, boode yanna geeshsha tunge agurroonnieha lawinoe. Mito woyite qancho hawallella sonkinke yee hedeemmo; wole woyite qole Beeteelete fulankenni baasa dadilleemmo.”

² Heeshshonke gari hedeweelcho soorramanno woyite, tini yaandeemmonna dadillineemmo gede assitankera dandiitanno. (Law. 12:25) Iillinonke coyi ledo sumuu yaa qarrissannonke woyite “harshammonna keere” afiꞌrate mayi kaaꞌlannonke? (Faarso 131:1-3 nabbawi.) Hanni Qullaawu Maxaafi giddo kulloonnirinna yannankera noori mite Maganu soqqamaano heeshshonsa gari soorramirono surrete keere afiꞌra dandiitinohu hiittoonniitiro laꞌno.

“MAGANU KEERI” KAAꞌLANNONKE GARA

3. Yooseefira mayi tuncu yiinosi?

³ Yooseefi roduuwisi borojjimmate hirtusi yannara 17 diri balla ikkannosi. Insa Yooseefi hirtinohu, annisi iso baxannosi daafira hinaasseeti. (Kal. 37:2-4, 23-28) Yooseefi mito 13 ikkanno diro Gibitsete borojjicho ikke hattono usurame keeshshino; qoleno Yooseefi baxannosi annisiwinni xeeritiꞌre heeꞌrino. Hatte yannara Yooseefi hexxo mudhannokkinna giiramannokki gede kaaꞌlinosiri maati?

4. (a) Yooseefi usuru mine heeꞌre mayi aana illachishino? (b) Yihowa Yooseefi huuccattora dawaro qolinohu hiittoonniiti?

⁴ Yooseefi usuru mine qarrame heeꞌre, Yihowa maassiꞌrinosi gara hedinoha ikkara dandaanno. (Kal. 39:21; Far. 105:17-19) Yooseefi wedellichu heeꞌre lainoti albillitte ikkannore leellishshanno ajuuja, Yihowa baxannosita huwatanno gede assitinosi. (Kal. 37:5-11) Qoleno isi duucha hige xissosi Yihowara kuꞌlinoha ikkara dandaanno. (Far. 145:18) Yihowa Yooseefi giddosinni huucciꞌrino huuccatto macciishshe aye geeshshi fonqoli iillisirono ‘ledosi noota’ kule jawaachishinosi.—Soq. 7:9, 10.a

5. “Maganu keeri” Yihowara soqqamate murciꞌneemmo gede kaaꞌlannonkehu hiittoonniiti?

⁵ Yannankerano fonqolo ikkannori iillinkero, “Maganu keeri” surrete salaame afiꞌneemmo gede kaaꞌlannonke. (Filiphisiyusi Sokka 4:6, 7 nabbawi.) Konnira, yaachishanno coyi iillannonke woyite Yihowa huucciꞌneemmoha ikkiro, Maganu keeri hexxo mudhinummokkinni isira soqqammeemmo gede assannonke. Hanni tenne leellishannoha mito yannanke lawishsha laꞌno.

WIRRO GIDDIIDI KEERE AANNOHE GEDE YIHOWA HUUCCIꞌRI

6, 7. Hasiisannonkere bande kulle huucciꞌra giddiidi keere afiꞌrate kaaꞌlitannonkehu hiittoonniiti? (Lawishsha kuli.)

⁶ Riyaananna Juuliyeeti baxxitino suwisaano ikkite soqqama agurtanno gede kullinsata lowo geeshsha dadillino. Riyaana togo yiino: “Tenne daafira Yihowara xawinse kuꞌlinoommo. Tini iso addaxxineemmota leellinsheemmo faro ikkitinota anfoommo. Songonkera batinyu haaruuddu roduuwi no; konnira Yihowa kuri roduuwira ammanatenni dancha lawishsha ikkineemmo gede kaaꞌlankera huucciꞌnoommo.”

⁷ Yihowa huuccattonsara dawaro qolinohu hiittoonniiti? Riyaana togo yiino: “Huuccatto assiꞌne kaꞌnanni heeꞌneenna, umi qara macciishshantinonketi gara ikkitinokki hedonna yaaddo hiikka higguro dianfoommo. Maganu keeri wodanankenna surrenke agarino. Gara ikkitino lao heedhunkero, Yihowa woꞌmante yannara horoonsiꞌrannonketa buunxoommo.”

8-10. (a) Maganu ayyaani yaachishannore dandee heeꞌrate kaaꞌlannonkehu hiittoonniiti? (b) Yihowara soqqamate aana illachinsheemmoha ikkiro, isi kaaꞌlannonkehu hiittoonniiti?

⁸ Maganu ayyaani harshammo afiꞌneemmonna heeshshonke giddo roore hasiisannori maatiro kultanno qummeeshshuwa aana illachinsheemmo gede kaaꞌlannonke. (Yohaannisi 14:26, 27 nabbawi.) Hanni Beeteelete 25 meddi yaanno diro soqqaminori Filippinna Meeri yinanni minaanninna minaama lawishsha laꞌno. Shoolu agani giddo lamunku amansanna fiixansa shiiꞌrino, hattono surrete dhibbi noosiha Meeri anna towaata hasiissinonsa.

⁹ Filippi togo yiino: “Hatte yannara cincoommoha lawinoeha ikkirono, xeinoeri no. Mitte Agarooshshu Shaera xiinxallote birxichi giddo Qolasiyaasi Sokka 1:11 laoommo. Hatte yannara cincoommoha ikkirono, hatto assoommohu woꞌmunni woꞌma diꞌꞌikkino. ‘Baalanka coye hagiirrunni dandaa’ hasiissinoe. Kuni qummeeshshi, hagiirriꞌya xintaminohu heeshshoꞌya gari aana ikkikkinni heeshshoꞌya giddo Maganu ayyaani loosanno gede assiꞌrate aana ikkinota huwateemmo gede kaaꞌlinoe.”

¹⁰ Filippinna Meeri Yihowara soqqamate aana illachishino daafira, Isi duucha doogonni maassiꞌrinonsa. Insa Beeteelete fulanni heeꞌre, lamalate giddo haammata higge xiinxalla hasidhannota worbuulle Qullaawu Maxaafi xiinxallo afiꞌrino. Meeri “Xiinxallo afiꞌranke hagiirraamma ikkineemmo gede kaaꞌlitinonke; qoleno Yihowa tenne doogonni tugannonkekkita kulanni noonke” yitino.

YIHOWA MAASSIꞌRANNORE ASSE

11, 12. (a) Yooseefi Yihowa maassiꞌranno coye assinohu hiittoonniiti? (b) Yihowa Yooseefi cincino daafira kiisinosihu hiittoonniiti?

¹¹ Heeshshonke giddo hendoommokki coyi tuncu yaannonke woyite, qarrinke daafira calla hendanni yaandeemmoha ikkara dandaanno. Ikkollana Yooseefi buutote qarri iillisi yannara, quwa sae yaada agure dandaamisire assino. Yooseefi Phoxifaari mine heeꞌre diinaggaawe loosinonte gede, usuru mine heeꞌreno usuru mini roorrichi hajajannosire baala loosino.—Kal. 39:21-23.

¹² Mitto barra Yooseefira, alba Feriooni mine lowo silxaane noonsa usuranyoota agaranno gede kulloonnisi. Insa Yooseefi shaqqado ikkinota wodanchitino daafira, qarransanna laꞌinota hibbo ikkitanno ajuuja kultinosi. (Kal. 40:5-8) Hakka woyitira Yooseefi wodanchinokkiha ikkirono, tini isi yannate gedensaanni wolapho afiꞌranno gede assitanno ikkitooti. Yooseefi hakkuyi gedensaanni usuru mine lame diro keeshshinoha ikkirono, yannate gedensaanni tidhamino, qoleno hakko barranni Gibitsete gobbara layinki gashshaancho ikkino.—Kal. 41:1, 14-16, 39-41.

13. Heeꞌnoommo gari ikkihano ikkiro, Yinowa maassiꞌranno coye assa dandiineemmohu hiittoonniiti?

¹³ Ninkerano Yooseefi gede wolqankera aleenni ikkino coyi iillankera dandaanno. Ikkollana kaajjine uurrinummoronna dandiinummore baala assinummoro Yihowa maassiꞌrannore assinanni heeꞌnoommo. (Far. 37:5) Mito woyite ‘garu baꞌꞌankera’ dandaanno; ikkirono Phaawuloosi xawisino garinni ‘hexxo dimudhineemmo.’ (2 Qor. 4:8) Hakko iso soqqanshonke aana illachinsheemmoha ikkiro, Yihowa ledonke ikkanno.

SOQQANSHOꞌNE AANA ILLACHISHSHE

14-16. Wongeelaawichu Filiphoosi heeshshosi gari soorraminoha ikkirono soqqanshosi aana illachishinohu hiittoonniiti?

¹⁴ Wongeelaawichu Filiphoosi heeshshosi gari soorraminoha ikkirono, soqqanshosi aana illachishino. Yerusaalamete, Isxifaanoosi shini gedensaanni Kiristaanaho buutote darti iillino.b Hatte yannara Filiphoosi haaro soqqanshote qoosso afiꞌre no. (Soq. 6:1-6) Ikkollana Kiristaanu darame wolewa haꞌri yannara Filiphoosi anga xaaxire diofollino. Hatteentenni isi sabbakara Samaariya haꞌrino; hakkiicho dancha duduwo macciishsha hasiissannonsahu batinyu manni no.—Mat. 10:5; Soq. 8:1, 5.

¹⁵ Filiphoosi Maganu ayyaani massagisiwa baalawa haꞌrate maahoyye yiino; konni daafira Yihowa danchu duduwi iillinokkiwa iillishate horoonsiꞌrinosi. Batinyu Yihudooti Samaariyu manna woffi assite laꞌanno, hattono beebba assidhannonsa; Filiphoosi kayinni Samaariyu manna mulla kae digiwinonsa; hatteentenni insara dancha duduwo hagiirrunni duduwino. Konnira Samaariyu manni “mittu wodaninni seekke macciishshisi.”—Soq. 8:6-8.

¹⁶ Hakkiinni Maganu ayyaani Filiphoosi Azoxoosinna Qiisaariya haaꞌre haꞌrinosi; kuri lamente katammara Yihudu wido ikkinokkihu batinyu manni no. (Soq. 8:39, 40) Filiphoosi Samaariyaho sabbakihunni mitu 20 diri gedensaanni xaano heeshshosi gari soorramino. Hatte yannara isi sabbakanno qoqqowira maate xintire heeꞌra hanafino. Filiphoosira heeshshosi gari soorraminoha ikkirono, soqqanshote aana illachishasinni Yihowa isono ikko maatesi maassiꞌrinonsa.—Soq. 21:8, 9.

17, 18. Heeshshonke gari soorramanno woyite soqqanshote aana illachisha kaaꞌlitannonkehu hiittoonniiti?

¹⁷ Batinye woꞌma yanna soqqamaano, heeshshonsa gari soorramirono, soqqanshote aana illachishansa hagiirrinsa baꞌꞌannokki gede kaaꞌlitinonsata coyidhino. Osiborninna Poliiti Wodiidi Afiriki Beeteelenni fuli yannara, bayichonko shiima saate calla loosanno loosonna mine afiꞌrannoha lawinonsa. Osiborni togo yiino: “Ninke hendoommo garinni looso mulenni diafiꞌnoommo.” Minaamasi Poliiti togo yitino: “Sasu agani geeshsha looso diafiꞌnoommo, qoleno suuqiꞌnoommo woxi dinonke. Hatte yannara baasa qarrammoommo.”

¹⁸ Insa konne qarra dandee saꞌꞌanno gede kaaꞌlinonsari maati? Osibornni togo yiino: “Songote ledo soqqamanke hedonke billaallitannokkinna gara ikkitino lao heedhannonke gede kaaꞌlitinonke. Qucuꞌmi yine yaada agurre, sabbakate loosi aana illachinshoommo; tini qolte lowo hagiirre afiꞌneemmo gede kaaꞌlitinonke. Looso hasiꞌnanni keeshshine, yannate gedensaanni afiꞌnoommo.”

CINCITINE YIHOWA AGADHE

19-21. (a) Giddiidi keerinke baꞌꞌannokki gede mayi kaaꞌlannonke? (b) Heeshshonke gari hedeweelcho soorramanno woyite, hakko garinni heeꞌrate sharramanke maaho kaaꞌlitannonke?

¹⁹ Kuri lawishshuwa leellishshannonte gede, dandiinummore baala assinummoronna Yihowa addaxxinummoro giddiidi keerinke baikkinni heeꞌra dandiineemmo. (Mikiyaasi 7:7 nabbawi.) Isinni yannate gedensaanni, heeshshonke biddi assiꞌranke Yihowa ledo noonke jaaloomi kaajjanno gede assitinota wodanchinamora dandiineemmo. Aleenni qummi assiniti Poliiti togo yitino: “Beeteeletenni fulle qanchoho soqqamanke, fonqolo ikkannori iillannonke woyite nafa Yihowa addaxxa roseemma gede kaaꞌlitinoe. Hattono Yihowa ledo nooe jaaloomi kaajjino.”

²⁰ Aleenni qummi assiniti Meeri suwisaancho ikkite heedhe geedhino annase towaaxxitanni no. Ise togo yitino: “Yaachishanno coyi iillannoe woyite, wodanaaꞌma, huuccatto assiꞌranna fooliishshiꞌra hasiissannoeta rosoomma. Baalunkunni roore duhaꞌya Yihowa aana tuqqa rosoomma; albillitteno hatto assa hasiissannoe.”

²¹ Hanafote kulliri Looyidinna Aleksaandira, heeshshonsa gari soorrami yannara ammanansa hedinokki garinni fonqolantinota xawisino. Ikkollana insa togo yiino: “Ammananke fonqolanno coyi ammananke kaajjadoteronna teꞌee leellishanno; ammananke qarru yannara sheshifachishshannonke geeshshita ikkitinota wodanchinoommo. Xa albinni roore dancha manna ikkinoommo.”

22. Heeshshonke gari soorramanno woyite dandiinummore baala assinummoro, maa addaxxa dandiineemmo?

²² Heeshshokki gari hedeweelcho soorramiro lawishshaho, soqqanshote qoossokki soorranturo, ordu fayyimma hoogittoro woy maatete giddo loosu lexxannohe woyite Yihowa towaatannohetanna kaaꞌlo hasiissannohe yannara kaaꞌlannoheta huluullantooti. (Ibi. 4:16; 1 Phe. 5:6, 7) Hattono konne tunceenya danchurira horoonsiꞌri. Huuccattotenni iimi Annikkiwa shiqi, woꞌmunni woꞌma iso addaxxa rosi. Hatto assittoro atino heeshshokki gari soorramirono giddiidi keerikki baikkinni heeꞌra dandaatto.