Maganu Ayeti?

Batinyu manni ‘Magano ammannoommo’ yaanno. Insa ‘Maganu ayeti?’ yine xaꞌminanninsa woyite kayinni babbaxxitino dawaro qoltanno. Mitootu ‘Maganu soꞌro xinqisiisiꞌranni qorichishannoho kaajjado daanyaati’ yitanno. Wolootu kayinni ‘Aye geeshshi soꞌro loonsummorono Maganu gatona yaannonke, hattono woꞌmante yannara baxannonke’ yite heddanno. ‘Maganu ninkewiinni xeertiꞌrinohonna dimararannoho’ yite heddannorino no. Maganu daafira coyiꞌnannihu kuni gurcheessanno coyi, batinyu manni ‘Maganu ayimma afa didandiinanni’ yee hedanno gede assino.

Maganu ayimma afa kaaꞌlitannori no? Ee no. Maganu daafira halaale ikkinore afakki, heeshshokki hagiirraame ikkitanno gede assitanno. (Soqqamaasinete Looso 17:26-28) Maganunniwa shiqqi yiitto kiiro, isino atewa shiqqi yaanno, hattono kaaꞌlannohe. (Yaiqoobi 4:8) Qoleno Maganu daafira gara ikkitino egenno afiꞌrakki, hegere heeshsho afiꞌratto gede kaaꞌlitannohe.—Yohaannisi 17:3.

Maganu daafira afa dandaattohu hiittoonniiti? Hanni seekkite egennoottoha lubbote jaalakki hedi. Togoo jaalooma xintiꞌroottohu hiittoonniiti? Suꞌmasi, akattasi, baxannorenna giwannore, konni albaanni assinore, konni kaꞌa assate hedinorenna wole isi ayimma xawisannore afoottoti egennantinote. Hakko manchiwa aanatto gede assitinoheti, isi daafira afakkiiti.

Hatteente gede, Maganu daafira afa dandaattohu isi daafira rosatenniiti; konnira aante noo xaꞌmuwara dawaro afiꞌra hasiissannohe:

• MAGANU SUꞌMI AYETI?

• MAGANOHO HIITTI AKATTA NOOSI?

• MAGANU KONNI ALBAANNI MAA ASSINO?

• MAGANU ALBILLITTE MAA ASSANNO?

• MAGANU DAAFIRA AFAKKI KAAꞌLITANNOHEHU HIITTOONNIITI?

Tini metseete, Qullaawu Maxaafi kuri xaꞌmuwara qolanno dawaro amaddino. Tenne metseete giddo noo birxichuwa, Maganu ayimma afatto gede calla ikkikkinni, isi ledo muli jaalooma kalaqiꞌra mayi hoꞌro afidhinoro huwatatto gede kaaꞌlitannohe.