Minshe Nookkire Ikkitine Heedhe!

1. Tenne gufora xawinsoonniri sasu Yihowa Farciꞌraasine isira ammanantinohu hiittoonniiti?

HANNI sase Yihowa Farciꞌraasinera tuncu yiinonsare hedi. (1) Mitto barra mitte beetto rosu mine rossanni heedheenna rosiisaanchu rosaano baalanti ayyaana ayirrissanno gede kulinsa. Ise kuni ayyaani Magano hagiirsiisannokkita affino daafira, konne ayyaana ayirrissannokkita rosiisaanchoho ayirrinyunni kultusi. (2) Mittu manna ille qase laꞌꞌa waajjanno wedellichi minunni mine haꞌranni soqqamanni no. Hakkiinni, aane noo mini ledosi rosanno beetti heeꞌrannoha ikkinota wodanchi; hakku beetti Yihowa Farciꞌraasine mishannoho. Ikkollana kuni wedellichi waajjikkinni hakko mine mare gangani. (3) Maatesira hasiisannore shiqishate diinaggaawe loosannoha mitto mancho, mitto barra loosiisaanchu ammanama xeꞌinore woy higge fajjitannokki coye assi yiisi. Isi loosiweelo gatara dandaannoha ikkirono, ammanamanna higgete hajajama hasiissannosita, hattono Maganu soqqamaasinesi togo assitara hasiꞌrannota loosiisannosi manchira xawise kulino.—Rom. 13:1-4; Ibi. 13:18.

2. Hiikkuri xaꞌmuwa xiinxallineemmo? Mayira?

² Kuri sasunku manni hiikkonne akata leellishshino? Haammata akatta, lawishshaho worbimmanna ammanama leellishshinota wodanchoottoha ikkara dandaanno. Ikkollana insa roorenkanni hasiisannoha mitto muxxe akata leellishshino; hakkuno minshe nookkire ikkine heeꞌrate. Insa sasunku Yihowara ammanantino. Mittu mittunku Maganu biddishsha diiga gibbino. Minshe nookkire ikkite heeꞌransa togo assitanno gede kakkayissinonsa. Yihowa insa konne akata leellishshino daafira lowo geeshsha hagiidhinoti egennantinote. Ninkeno iimi Annanke hagiirsiisa hasiꞌneemmo. Konni daafira hanni aantanno xaꞌmuwa xiinxallino: Minshe nookkire ikkate yaa mayyaate? Minshe nookkire ikkine heeꞌra hasiissannonkehu mayiraati? Tenne qarrissanno yanna giddo minshe nookkire ikkine heeꞌrate murciꞌra dandiineemmohu hiittoonniiti?

MINSHE NOOKKIRE IKKATE YAA MAYYAATE?

3. (a) Minshe nookkire ikkate yaa mayyaate? (b) Minshe nookkire ikkate yaa mayyaatero huwatate kaaꞌlannonke lawishshi hiikkonneeti?

³ Maganu soqqamaasine minshe nookkire ikkitinota leellisha dandiitannohu hiittoonniiti? Yihowa woꞌmu wodaninninna geedote baxillinni baxxe, hattono woꞌmante yannara isi fajjo assiteeti. Hanni Qullaawu Maxaafi giddo minshe nookkire ikka yaanno qaali mayi tiro afiꞌrinoro laꞌno. Minshe nookkire ikkate yaa, xalala, keeraancho woy xeꞌne nookkire ikkate yaate. Lawishshaho Muse Seeri, Yihowara kakkalo assine shiqinshanni saada keeraancho woy muso afidhinokkita ikka hasiissannota kulanno.b (Lew. 22:21, 22) Maganu manni naaffinota, macca taꞌinota woy ille baꞌinota, hattono dhiwantino saada kakkalo asse shiqishara difajjinanni. Yihowa isira kakkalo assine shiqinshanni saada xalala, keeraancho woy xeꞌne nookkita ikkitara hasiꞌranno. (Mil. 1:6-9) Yihowa keeraanchimma woy xalalle hasiꞌrasi dhagge diꞌꞌikkitannonke. Mayira? Dikkotenni mitore hidhineemmo woyite lawishshaho laalo, maxaafu woy wolu uduunni muso nooha woy gama wido dadhaminoha ikkiro hakkonne uduunne hidha dihasiꞌneemmo. Ninke baalunku xeꞌne nookkire hidha hasiꞌneemmo. Hatteente gede Yihowa, isira noonke baxillinna ammanama woꞌmanna xeꞌne nookkita ikkitara hasiꞌranno.

4. (a) Mittu manchi guuta ikka hoogirono minshe nookkiha ikka dandaanno yineemmohu mayiraati? (b) Faarso 103:12-14 yitanno garinni, Yihowa ninke maa assinammora hasiꞌranno?

⁴ Minshe nookkire ikkate guuta ikka hasiissannonke yine heda garaho? Soꞌneemmore ikkinoommo daafira, minshe nookkire ikka didandiineemmo yine hendeemmoha ikkara dandaanno. Minshe nookkire ikkate guuta ikka hasiissannokkita leellishannoha lame korkaata laꞌno. Umihunni, Yihowa soꞌronke aana diꞌꞌillachishanno. Qaalisi togo yaanno: “Cubbonke kiiroottoha ikkoommero, gatara dandaannohu ayeti?” (Far. 130:3) Isi guuntete xeꞌne noonketanna cubbaataamma ikkinoommota afino daafira, shaqqillunni maarannonke. (Far. 86:5) Layinkihunni, Yihowa dhukanke afino daafira wolqankera aleenni ikkino coye asse diyaannonke. (Faarso 103:12-14 nabbawi.) Ikkina isi albaanni keeraano, xalaloota woy xeꞌne nookkire ikka dandiineemmohu ma garinniiti?

5. Yihowa soqqamaasine minshe noonsakkire ikkate iso baxa hasiissannonsahu mayiraati?

⁵ Yihowa soqqamaasine minshe nookkire ikkitanno gede assannonsahu qaru akati baxilleho. Maganoho noonke baxillinna ammanama woꞌmanna guuta ikka hasiissannose. Baxillinke hattooha ikkiro, fonqolu iillannonke woyite nafa minshe nookkire ikkine heeꞌra dandiineemmo. (1 Dud. 28:9; Mat. 22:37) Hanni umo laꞌnummore sase Yihowa Farciꞌraasine hendo. Insa hatto assitinohu mayiraati? Wedellitte beetto rosu mine hagiirsiisannore assa giwisinoseni? Minunni mine haꞌre soqqamanno wedellichi minshasira hasiꞌrannoni? Qoleno maatete hasiisannore shiqishate sharramanni noo rodii loosu noosikkiha heeꞌra hasiꞌrannoni? Hatto diꞌꞌikkino. Hatteentenni insa Yihowa biddishshi qullaawa ikkinota affino; hattono iimi Annansa hagiirsiisate aana illachishshino. Insa iso baxxanno daafira, mitto coye doodhitara albaanni woꞌmanka woyite iso heddanno. Insa hatto assite minshe noonsakkire ikkitinota leellishshino.

MINSHE NOOKKIRE IKKA HASIISSANNONKEHU MAYIRAATI?

6. (a) Minshe nookkire ikka hasiissannonkehu mayiraati? (b) Addaaminna Heewani minshe noonsakkire ikkinota leellishikki gatinohu hiittoonniiti?

⁶ Ninke baalunku minshe nookkire ikka hasiissannonkehu mayiraati? Korkaatuno Sheexaanu Yihowano ikko ninke hettisino daafiraati. Kuni finqilu sokkaasinchi Edenete kaashshu basera isonooto soorre Sheexaane woy “Hettisamaancho” ikkino. Isi, Maganu bushaho, umosi calla baxannohonna ammanaminokki Gashshaanchooti yee Yihowa suꞌma hunino. Addaaminna Heewani Sheexaaneho halante Yihowara finqiltino; tini dadillissannote. (Kal. 3:1-6) Edenete heeꞌransa Yihowara noonsa baxille kaajjishiꞌrate lowo faro fantinonsa. Ikkollana insa Sheexaanu fonqolinsa yannara baxillinsa woꞌmanna guuta diꞌꞌikkino. Sheexaanu kayisinoti wole xaꞌmo tenneeti: Yihowara baxillunni ammaname heeꞌrannohu no? Wole yaattonni, mannu ooso minshe nookkire ikkite heeꞌra dandiitanno? Tini xaꞌmo kaꞌinohu Iyyoobira qarru iillisi yannaraati.

7. Iyyoobi 1:8-11 yitanno garinni, Yihowara Iyyoobi ammanama daafira hiittoo lao noosi? Sheexaanehona?

⁷ Iyyoobi heeꞌrinohu Israeelete manni Gibitsete noo yannaraati. Iyyoobi waro, isi geeshsha minshe nookkiha ikkinota leellishinohu wolu dino. Ninkente gede isirano guuntete xeꞌne noosi. Isi soꞌro loosino woyiti no. Ikkirono Yihowa Iyyoobi minshe nookkiha ikkino daafira baxinosi. Sheexaanu hakkuyira albaanni mannu ooso ammanama daafira xaꞌmo kayisikki digatino. Konni daafira Yihowa, Sheexaanu Iyyoobi wodana asse laꞌꞌanno gede assino. Korkaatuno Iyyoobi heeꞌranno heeshsho, Sheexaanu kaphaancho ikkinota leellishshannote! Sheexaanu Iyyoobi minshe noosikkiha ikkinotanna teꞌee afate fonqolara Yihowa xaꞌmino. Yihowa jaalasi Iyyoobi ammanannosi daafira, Sheexaanu fonqolasira fajjino.—Iyyoobi 1:8-11 nabbawi.

8. Sheexaanu Iyyoobi gawajjinosihu hiittoonniiti?

⁸ Sheexaanu kaajjadohonna lubbo shaannoho. Isi Iyyoobira noosi jajja baala goofanno gede assino, soqqamaasinesi shiino, hattono suꞌnaado suꞌmasi hunino. Sheexaanu Iyyoobita tonne ooso shee maatesi gawajjino. Hakkiinni Iyyoobira bisu umunni kayise lekkate qubbichi geeshsha madiꞌranno gede assino. Iyyoobi galte baasa xissiisidhinonna wolqa baꞌino daafira isi Maganoho ammanama agure iso xone reyanno gede xixxiibbinosi. Iyyoobi umisi reyo halchinoha ikkirono, minshe noosikkiha ikke heeꞌrino. Hakkiinni Sheexaanu wole doogonni iso gawajjate woꞌnaalino. Isi tenne assate Iyyoobita sase muli jaalla horoonsiꞌrino. Insa Iyyoobi duucha higge marte laꞌinosiha ikkirono, disheshifachishshinosi. Hatteentenni insa marartukki kaajjado qaale coyidhe ruffinosi. Insa ‘Konne qarra abbinohehu Maganoho; minshe nookkiha ikkite heeꞌrittorono isira assattori dino’ yitino. Jaallasi Iyyoobira kuni qarri iillinosihu isi busha mancho ikkino daafiraati yaate geeshsha nafa iillitino!—Iyo. 1:13-22; 2:7-11; 15:4, 5; 22:3-6; 25:4-6.

9. Iyyoobira qarru iillisirono, maa assa giwino?

⁹ Iyyoobi kuni qarri baalu iillisi yannara ma assiyya? Isi guuta diꞌꞌikkino. Isi suꞌmira sheshifachishshasira martino jaallasi hanqe rufinonsa; hattono umi qara coyiꞌrinori gara ikkinokkita ammanino. Isi Maganu keeraanchimma aana illachisha agure umisi keeraanchimma daafira calla hedino. (Iyo. 6:3; 13:4, 5; 32:2; 34:5) Ikkollana, Iyyoobi buutote qarri iillinosiha ikkirono, Maganu Yihowara badhe diwodhino. Qoleno isi kaphaano jaallasi coyidhino kapho diammanino. Isi togo yiino: “Kiꞌne coyidhinoonniha baala horonta halaaleho yee diadheemmo; reyammo geeshsha keeraanchimmaꞌya diagureemmo.” (Iyo. 27:5) Isi hatto yaasi baxi coyi iillisirono minshe nookkiha ikke heeꞌrate murciꞌrinota leellishshanno. Iyyoobi hexxo mudhannokki gede murciꞌrino; ninkeno hatto assa dandiineemmo.

10. Sheexaanu Iyyoobi aana kayisino kisse ateno laꞌannohu hiittoonniiti?

¹⁰ Sheexaanu ninke mitto mittonka kassasinonke. Tini kisse ateno laꞌannohu hiittoonniiti? Sheexaanu, ‘Magano Yihowa goowi alella baxatto; mittu qarri iillihero umokki gatisate yite isira soqqama aguratto; qoleno minshe nookkiha ikke heeꞌreemmo yaakki kaphoho’ yiinohu gedeeti! (Iyo. 2:4, 5; Aju. 12:10) Sheexaanu hatto yaasinni atera mayi macciishshamannohe? Tini lowo geeshsha xissiissannota diꞌꞌikkitino? Ikkirono hanni tenne hedi: Yihowa ammanannohe daafira isira ammanamoottota leellishatto faro faninohe. Yihowa, Sheexaanu ammanamakki jifanno gede fajjino. Yihowa, minshe noohekkiha ikkite Sheexaanu kaphaancho ikkinota leellisha dandaattota dihuluullamanno. Qoleno Isi kaaꞌlahera qaale eino. (Ibi. 13:6) Kalqete alame Gashshaanchi ammanannonkere ikkanke lowo ayirrinyeeti! Minshe nookkire ikke heeꞌra mageeshshi geeshsha hasiissannoro wodanchitto? Minshe nookkire ikkine heeꞌranke Sheexaanu kaphaancho ikkinota leellinsheemmo gede, Anninke suꞌmi ayirranno gedenna gashshootisi wido ikkineemmo gede assitannonke. Ikkina minshe nookkire ikkine heeꞌrate murciꞌra dandiineemmohu hiittoonniiti?

XAA YANNARA MINSHE NOOKKIRE IKKINE HEEꞌRATE MURCIꞌRA DANDIINEEMMO GARA

11. Iyyoobi xaggenni maa ronseemmo?

¹¹ Tenne qarru woꞌminote ‘goofimarchu yanna’ giddo Sheexaanu albinni roore Maganu manna gawajjanni no. (2 Xim. 3:1) Ikkina tenne qarrissanno yanna giddo minshe nookkire ikkine heeꞌrate murciꞌra dandiineemmohu hiittoonniiti? Xaano Iyyoobi xaggenni lowore ronseemmo. Isi fonqolu iillasira albaanni minshe nookkiha ikke heeꞌrate murciꞌrino. Hanni Iyyoobi xaggenni minshe nookkire ikkine heeꞌrate murciꞌra dandiineemmo gara rosate sase coye laꞌno.

12. (a) Iyyoobi 26:7, 8, 14 yitanno garinni, Iyyoobi Yihowara noosi diniqonna ayirrinyi lexxanno gede assiꞌrinohu hiittoonniiti? (b) Ninkeno Maganoho noonke ayirrinyi lexxanno gede assiꞌra dandiineemmohu hiittoonniiti?

¹² Iyyoobi Yihowara noosi diniqo lossiꞌre Maganoho noosi baxilli kaajjanno gede assiꞌrino. Iyyoobi yanna gaaꞌme dhagge ikkannoha Yihowa kalaqama hiincino. (Iyyoobi 26:7, 8, 14 nabbawi.) Isi uullate, gordu, gomichu hattono banqote daafira hedi woyite lowo geeshsha dhagge assiꞌrino; ikkollana isi batinyu kalaqami giddo shiima calla afinota huwatino. Qoleno Iyyoobi Yihowa coyiꞌrinore dhagge assiꞌrino. Isi Maganu coyiꞌrinori daafira kulanni, “Kulinoere baala wodaniꞌyara wodhoommo” yiino. (Iyo. 23:12) Iyyoobi Yihowa looso dhagge assiꞌrino; hattono iso lowo geeshsha ayirrisinosi. Isi Annasi baxanno daafira iso hagiirsiisa hasiꞌrino. Iyyoobi konne asse minshe nookkiha ikke heeꞌrate murciꞌrino. Ninkeno Iyyoobi assinore assa hasiissannonke. Iyyoobi yannara noo manninni roore ninke dhagge ikkannohu Maganu kalaqami daafira lowore anfoommo. Qoleno qullaawu ayyaaninni borreessinoonnihu Qullaawu Maxaafi Yihowa daafira seekkine anfeemmo gede kaaꞌlannonke. Kurinni ronseemmori baalu lowo geeshsha maalaꞌlineemmo gede assannonke. Yihowara noonke diniqonna ayirrinyi, iso banxeemmo gedenna hajajammeemmosi gede hattono minshe nookkire ikkine heeꞌrate murciꞌneemmo gede assannonke.—Iyo. 28:28.

13-14. (a) Iyyoobi 31:1 aana kulloonni garinni, Iyyoobi hajajamannoha ikkinota leellishinohu hiittoonniiti? (b) Ninke isi lawishsha harunsa dandiineemmohu ma garinniiti?

¹³ Iyyoobi woꞌmunku coyira Maganoho hajajamannoha ikkasi minshe nookkiha ikke heeꞌrate kaaꞌlitinosi. Iyyoobi, minshe nookkire ikkine heeꞌrate Yihowara hajajama hasiissannota afino. Yihowara hajajamate yine assineemmohu mittu mittunku coyi, woꞌmanka woyite minshe nookkire ikkine heeꞌrate kaaꞌlannonke. Iyyoobi barru baala Maganoho hajajamate murciꞌrino. Lawishshaho, isi galtesi ikkinokki meentiwa garimale diaananno. (Iyyoobi 31:1 nabbawi.) Iyyoobira umisi galte noosi daafira, galtesi ikkitinokki meyatera gara ikkinokki baxille leellisha soꞌro ikkitinota afino. Xaa yannara heeꞌnoommo alame amanyoote bainore assineemmo gede fonqoltannonke. Ninkeno Iyyoobinte gede galtenke ikkitinokkitera gara ikkinokki baxille leellisha gimbeemmo? Ayi garinnino shiqqinota teeda baꞌino misilla laꞌꞌa effiꞌne gimbeemmo? (Mat. 5:28) Konni garinni barru baala umonke eemadhineemmoha ikkiro, minshe nookkire ikkine heeꞌrate murciꞌnoommore ikkineemmo.

¹⁴ Iyyoobira maalaamittete coyira noosi laono isi Yihowa waajjannoha ikkinota leellishshanno. Iyyoobi maalaamittete coye addaxxannoha ikkiro, tini lowo soꞌro ikkitinotanna qorichishamannota afino. (Iyo. 31:24, 25, 28) Heeꞌnoommohu maalaamittete coye quwa sae baxanno manni woꞌmino alameraati. Qullaawu Maxaafi woxenna jiro lainohunni gara ikkitino lao heedhannonke gede aannonke biddishsha harunsinummoro, minshe nookkire ikkine heeꞌra dandiineemmo.—Law. 30:8, 9; Mat. 6:19-21.

15. (a) Iyyoobi minshe noosikkiha ikke heeꞌrate murciꞌranno gede kaaꞌlitinositi hiittenne hexxooti? (b) Yihowa uyinonke hexxo aana illachishanke kaaꞌlitankera dandiitannohu hiittoonniiti?

¹⁵ Iyyoobi Maganu albillitte aannosi atooti aana illachishe minshe nookkiha ikke heeꞌrino. Iyyoobi minshe nookkiha ikke heeꞌrasi Magano hagiirsiissannota huwatino. (Iyo. 31:6) Isi fonqolu iillisirono Yihowa gedensoonni baꞌraasannosita addaxxino. Isi konni garinni Yihowa addaxxasi, minshe nookkiha ikke heeꞌranno gede kaaꞌlitinosi. Yihowa, Iyyoobi minshe noosikkiha ikke heeꞌrino daafira, guuta ikka hoogirono lowo atoote uyinosi! (Iyo. 42:12-17; Yai. 5:11) Isinni Iyyoobi albillitte hakkiinni saino atoote afiꞌranno. Minshe noohekkiha ikkite heeꞌrittoro Yihowa maassiꞌrannoheta addaxxatto? Maganinke xaano disoorramino. (Mil. 3:6) Minshe nookkire ikkine Yihowa hagiirsiinsummoro, isi albillitte bae atoote aannonketa addaxxa dandiineemmo.—1 Tes. 5:8, 9.

16. Maa assate murciꞌra hasiissannonke?

¹⁶ Woꞌmanka woyite minshe noohekkiha ikkite heeꞌrate murciꞌri. Mito woyite minshe nookkiha ikkite heeꞌrate sharrantanni noottohu ate calla ikkoottoha lawahera dandaanno; ikkollana hatto diꞌꞌikkino. Ammaname minshe nookkire ikke heeꞌrannohu alame woꞌmate lowo miliyoone ikkanno manni no. Qoleno hunda heeshshonsa hoogganno gede assara dandaannori iillinsarono minshe nookkire ikkite heedhino labballinna meenti widira kiiramatto. (Ibi. 11:36-38; 12:1) Iyyoobi gede ninke baalunku minshe nookkire ikkine heeꞌrate murciꞌno; isi togo yiino: “Reyammo geeshsha keeraanchimmaꞌya diagureemmo.” Minshe nookkire ikkine heeꞌranke Yihowa hegerera ayirranno gede assitanno!