Gashshaano Hooltunkerono Yihowa Magansiꞌra Agurroonke

1-2. (a) Gashshaano loosonke agabburo tini dhagge ikkitannonkekkihu mayiraati? (b) Konni birxichira maa xiinxallineemmo?

AYYAANAAMITTETE loosonke agamboonni woy woꞌmunni woꞌma hoolloonni gobbuwara heedhannoti halashshaanote kiiro 2018nni 223,000 saꞌanno. Tini dhagge diꞌꞌikkitannonke. Sai birxichira ronsummonte gede, addu Kiristaanira dartu iillannonsati egennantinote. (2 Xim. 3:12) Heeꞌneemmowi ikkiwanno ikkiro, gashshaano baxillaancho Maganonke Yihowa magansiꞌneemmokki gede hedeweelcho agabbankera dandiitanno.

² Heeꞌnoommo gobba gashshooti loosonke agambanni gede murinoha ikkiro, togo yine hendeemmoha ikkara dandaanno: ‘Dartu iillinonkehu Yihowa dadillinsoommo daafiraatini? Gashshaano loosonke agawansa Yihowa magansiꞌneemmota hooltannonke? Magano faajjetenni magansiꞌrate loosonke agamboonnikki gobba haꞌra hasiissannoe?’ Konni birxichira, kuri xaꞌmuwara dawaro afiꞌneemmo. Qoleno gashshaano loosonke agabbanno woyite Yihowa magansiꞌra agura hoogate assa hasiissannonkerenna hasiissannonkekkire ronseemmo.

DARTU IILLANNONKEHU YIHOWA DADILLINSOOMMO DAAFIRAATINI?

3. Layinki Qorontoosi 11:23-27 kultanno garinni, ammanamino soqqamaasinchi Phaawuloosira iillinosi darti maati?

³ Gashshaano loosonke agabburo, Magano hagiirsiisa hoongoommo yine hendeemmoha ikkara dandaanno; hatto yee heda kayinni soꞌrote. Dartu iillannonkehu Yihowa dadillinsoommo daafira diꞌꞌikkino. Hanni soqqamaasinchu Phaawuloosi lawishsha hedi. Isi Magano hagiirsiissinoti huluullissannota diꞌꞌikkitino. Phaawuloosi Giriikete Afiite Qullaawa Borro giddo 14 sokka borreessate qoosso afiꞌrino; qoleno isi dagate soqqamaanchooti. Ikkirono isira buutote darti iillinosi. (2 Qorontoosi 11:23-27 nabbawi.) Phaawuloosi lawishshinni, Yihowa ammanantino soqqamaasinesira dartu iillannonsa gede fajjanno woyiti noota ronseemmo.

4. Alame gibbannonkehu mayiraati?

⁴ Yesuusi dartu iillannonkehu mayiraatiro xawisino. Isi alamete wido ikkinoommokki daafira, gimbanninketa coyiꞌrino. (Yoh. 15:18, 19) Dartu iillannonkehu Yihowa atoote hoongoommo daafira diꞌꞌikkino. Hatteentenni, tini gara ikkino coye assinanni heeꞌnoommota leellishshanno.

GASHSHAANO LOOSONKE AGAWANSA YIHOWA MAGANSIꞌNEEMMOTA HOOLTANNONKE?

5. Mannu ooso Yihowa magansiꞌneemmota hooltankera dandiitanno? Xawisi.

⁵ Mannu ooso Woꞌmanka Dandaanno Magano Yihowa magansiꞌneemmota hooltankera didandiitanno. Batinyu manni hatto assate woꞌnaalinoha ikkirono diqiniinonsa. Hanni Layinkihu Alamete Oli yannara ikkinore hedi. Hatte yannara batinye gobbara gashshaano Maganu manna baasa xiibbino. Yihowa Farciꞌraasine looso agawinohu Jarmanete gobbahu Naazi gashshoote calla diꞌꞌikkino; Awustiraaliyu, Kanaadunna wole gobbuwa gashshootino hatto assino. Hatte yannara mayi ikkiyya? Olu 1939nni hanafi yannara, alamete doyichora noo halashshaano 72,475 ikkitanno. Ikkollana 1945nni olu uurri yannara, halashshaanote kiiro 156,299 ikkitino; tini Yihowa mannasi maassiꞌrinota leellishshanno. Halashshaanote kiiro erote aleenni lexxitino!

6. Dartu hiikkonne dancha guma abbara dandaanno? Lawishsha kuli.

⁶ Dartu waajjine qece yineemmo gede diassannonke; hatteentenni albinni roore Yihowara woꞌma giddonni soqqammeemmo gede assankera dandaanno. Hanni gashshaano loosonke agabbino gobbara heeꞌrinori mitto qaaqqo afiꞌrino minaanninna minaama lawishsha laꞌno. Kuri minaanninna minaama waajje badhera higa agure, woꞌma yanna suwisaano ikke soqqama hanafino. Minaama isinni woꞌma yanna suwisaancho ikke soqqamate yite lowo damooza baantannise looso facci assite agurtino. Minaanni, gashshaano loosonke hooltuta batinyu manni Yihowa Farciꞌraasine daafira afa hasiꞌrinota coyiꞌrino. Tini manna Qullaawu Maxaafi xiinxallo hanafisiisanno gede kaaꞌlitinosi. Qoleno gashshaano loosonke agawansa woleno dancha guma abbitino. Mittu hattee gobbankura heeꞌranno cimeessi, batinyu Yihowara soqqama agurino roduuwi wirro gambooshshe daanna sabbaka hanafinota coyiꞌrino.

7. (a) Leewaawoota 26:36, 37 maa ronseemmo? (b) Gashshaano loosonke agabbanno woyite maa assatto?

⁷ Diinnanke loosonke agabbannohu, waajjine Yihowa magansiꞌra agurreemmoha laweennansaati. Tenneno agurranna, insa ninke daafira totao naqqara, minenke qorqorranni gede assitara, yoote minira massitankera, wole agurina usursiissankera nafa dandiitanno. Hasattonsa mereerinkenni boode manna usurte ninke waajjine huxiꞌneemmo gede assate. Tini manse qece yineemmo gede assitankera wodhinummoro, Yihowara soqqama agurrammora dandiineemmo. Leewaawoota 26:36, 37te kulloonni manni gede ikka dihasiꞌneemmo. (Qummeeshsha nabbawi.) Waajjine ayyaanaamittete loosinkera diinaggaawa woy woꞌmunni woꞌma loosa diagurreemmo. Woꞌmunni woꞌma Yihowa addaxxineemmo, hattono waajjine dihuxiꞌneemmo. (Isa. 28:16) Biddishsha aannonke gede Yihowa huucciꞌneemmo. Yihowa ledonke noo daafira, lowo wolqa afidhino gashshaano nafa isira ammanamme soqqammeemmokki gede assitankera didandiitanno.—Ibi. 13:6.

WOLE GOBBA HAꞌRA HASIISSANNOE?

8-9. (a) Mittu mittunku maatete umi woy mittu mittunku manchi maa doodha hasiissannosi? (b) Loosonke agambanni woyite wole gobba haꞌra woy haꞌra hooga lainohunni dancha doorsha doodhate mayi kaaꞌlannonke?

⁸ Heeꞌratto gobba gashshooti loosonke agawanno woyite, ‘Yihowara faajjetenni soqqamate wole gobba haꞌronso hiikko?’ yite hedattoha ikkara dandaanno. Kuni ate doorsha ikkino daafira, ayi manchino haꞌri woy hadhooti yaahera didandaanno. Mitootu umi xibbi diro heeꞌrino Kiristaani dartu iillinsa yannara assinore xiinxallansa kaaꞌlitinonsa. Diinna Isxifaanoosi shitu gedensaanni, Yerusaalamete heedhanno rosaano Yihudanna Samaariya, hattono Finqe, Qophiroosinna Antsookiya hadhino. (Mat. 10:23; Soq. 8:1; 11:19) Ikkollana umi xibbi diri Kiristaanira wole yannara dartu iillinsa woyite, soqqamaasinchu Phaawuloosi hakko qooxeessinni agure dihaꞌrino. Isi shinasira nafa dandiinannita afinoha ikkirono, dancha duduwo duduwatenna buutote darti iillinonsa roduuwa jawaachishate yee hakko keeshshino.—Soq. 14:19-23.

⁹ Tenne xaggenni maa ronseemmo? Mittu mittunku maatete umi, wole gobba haꞌratenna haꞌra hoogate daafira mura hasiissannosi. Hatto assara albaanni, maatesi noo garanna wole gobba haꞌransa kaaꞌlitansara woy gawajjitansara dandiitannohu hiittoonniitiro huuccatto assiꞌre seekke heda hasiissannosi. Tenne hajo lainohunni mittu mittunku Kiristaanchi “umisi duha duqqa hasiissannosi.” (Gal. 6:5) Togoo woyite mannu doodhireno doodhiro, bushiisha dihasiissannonke.

LOOSONKE AGAMBANNI WOYITE YIHOWA MAGANSIꞌRA DANDIINEEMMOHU HIITTOONNIITI?

10. Sinu biironna cimeeyye songote mayi biddishsha uyitanno?

¹⁰ Gashshaano loosonke agabbanno woyite, Yihowa magansiꞌra agurreemmokki gede mayi kaaꞌlannonke? Sinu biiro songote cimeeyyera ayyaanaamittete sagale afiꞌnanni gara, gambooshshe assiꞌra dandiinanni garanna dancha duduwo duduwa dandiinanni gara kulanno biddishsha uyitanno. Sinu biiro cimeeyyete ledo xaada hoogguro, cimeeyye atino ikko baalanti songote miilla Yihowa magansiꞌra dandiitinanni gede kaaꞌlitannoꞌne. Insa Qullaawu Maxaafinna Kiristaanu borro aana xintamino biddishsha uyitanno.—Mat. 28:19, 20; Soq. 5:29; Ibi. 10:24, 25.

11. Ayyaanaamittete sagale hoogattokkita addaxxa dandaattohu mayiraati? Qullaawa Maxaafanna Kiristaanu borronke agadhate maa assa dandiineemmo?

¹¹ Yihowa soqqamaasinesira ammanansa kaajjishshannota ayyaanaamittete sagale aannota kule qaale eino. (Isa. 65:13, 14; Luq. 12:42-44) Hakko daafira, Yihowa dirijjite hasiissannonketa ayyaanaamittete jawaante uyitannonketa addaxxa dandiineemmo. Ikkina ati maa assa dandaatto? Loosonke agambanni woyite, Qullaawa Maxaafakkinna wole ayyaanaamittete sagale maaxiꞌrattoha dancha bayicho xaanni hedi. Attammoonnitano ikko elekitiroonikisetenni qixxeessinoonnita ayyaanaamittete sagale hawa gede assite wodhitooti! Ayyaanaamittetenni jawaate heeꞌrate, mittu mittunku dandiinummore assa hasiissannonke.

12. Songote cimeeyye gambooshshe gibbannonkeri affannokki garinni qineessa dandiitannohu hiittoonniiti?

¹² Hattee yannara lamalate gambooshshe ma garinni assiꞌneemmoyya? Songote cimeeyye, gibbannonkeri affannokki garinni gambooshshe assiꞌra dandiineemmo gede qineessitanno. Insa gambooshshe gaamo gaamo ikkitine, babbaxxitino saateranna basera assidhinanni gede kultaꞌnera dandiitanno. Gambooshshe hadhinanninna higginanni woyite huuroꞌne naggi assitinikki coyiꞌraꞌne, wolu roduuwi gawajjantannokki gede assitanno. Qoleno gambooshshe hadhinanni woyite holgi uddano uddiꞌra hoogginiro danchaho.

13. Alba Sooviyeti Yuniyenete heeꞌrino roduuwi lawishshinni maa ronseemmo?

¹³ Sabbankeemmo doogo qooxeessu qooxeessu garinni babbaxxitara dandiitanno. Ikkollana, Yihowa banxeemmohuranna Mangistesire mannaho kula hagiirsiissannonke daafira, sabbankeemmo faro hasiꞌneemmo. (Luq. 8:1; Soq. 4:29) Sooviyeti Yuniyenete gashshooti yannara Yihowa Farciꞌraasine sabbakkino gara lainohunni Emiliyii Bereni yinannihu xaggete borreessaanchi togo yiino: “Gashshaano Yihowa Farciꞌraasine sabbakkannota hooltu yannara, insa kayinni olliichinsara, ledonsa loossannoriranna jaallansa farciꞌra diagurtino. Konninni kainohunni wolqate looso loonsanni kaampe massininsata, insa hakkiichono ledonsa usuramino mannira sabbakkino.” Hakkawaro gashshaano loosonke hooltinoha ikkirono, Sooviyeti Yuniyenete heeꞌranno roduuwinke sabbaka diagurino. Ati heeꞌratto gobbarano gashshaano sabbakate loosonke hoolturo, hakko roduuwi lawishsha harunsate murciꞌri!

MAA QOROPHA HASIISSANNONKE?

14. Faarso 39:1 maa qorophineemmo gede kaaꞌlitannonke?

¹⁴ Wolootaho kulleemmore qorophino. Loosonke hoollanni woyite ‘sammi yaate yanna noota’ qaaga hasiissannonke. (Ros. 3:7) Shaaꞌꞌa ikkinokkire lawishshaho, roduuwinke suꞌma, gambooshshe assiꞌneemmo base, sabbankeemmo doogga, hattono ayyaanaamittete sagale afiꞌneemmo gara hawa gede kula dihasiissannonke. Konne coye gashshaanote, hattono ninke gobbara woy wole gobbara heedhanno jaallankera woy fiixinkera kula dihasiissannonke. Tini, roduuwinkera qarru iillannonsa gede assitara dandiitanno.—Faarso 39:1 nabbawi.

15. Sheexaanu maa assate woꞌnaalanno? Tenne woshshaado qoropha dandiineemmohu hiittoonniiti?

¹⁵ Tidhinokkiri mittimmanke hunara wodhinoonke. Sheexaanu, mittu mini manni mimmitu ledo giwamannoha ikkiro, billaallannota afino. (Maq. 3:24, 25) Isi mereeronke babbadooshshe kalaqate giidhe galanno. Sheexaanu hatto assannohu, isi ledo gaarama agurre mimmitu ledo gaarammammora hasiꞌranno daafiraati.

16. Rodoo Gertiruudi Potintsigeri dancha lawishsha ikkitinonkehu hiittoonniiti?

¹⁶ Ayyaanaamittetenni gikki yiino Kiristaani nafa, tini woshshaado amaddannonsakki gede qoropha hasiissannonsa. Hanni Gertiruudi Potintsigerinna Elfiriidi Leerii yinanniri buuramino roduuwi lawishsha laꞌno. Insa wolu roduuwi ledo Naazite usuranyu kaampera usuramino. Elfiriidi wolu meya roduuwira jawaachishshanno lallawo shiqishshino daafira, rodoo Gertiruudi hinaassino. Gedensoonni Gertiruudi saalu amadeennase Yihowa kaaꞌlannose gede huuccidhino. Ise “Wolu manni ninkenni roore worba ikkiro woy ninketenni roortino qoosso heedhunsaro tenne ammane adha rosa hasiissannonke” yite borreessitino. Ise hinaasa agurtanno gede mayi kaaꞌlinose? Gertiruudi, Elfiriidita dancha akatta illachishshino. Tini, jaaloominsa wirro kaajjanno gede assitino. Lamenti usuranyu kaampenni fule, uulla heeshshonsa jeefisa geeshsha Yihowara ammaname soqqamino. Roduuwinke ledo kawa kaꞌaa higinonke coye tirate sharrammeemmoha ikkiro, mittimmanke kaajjite heedhanno.—Qol. 3:13, 14.

17. Uyinanninke biddishsha harunsa hasiissannonkehu mayiraati?

¹⁷ Woꞌmante yannara biddishsha harunsino. Shoomantino roduuwi uyitannonke biddishsha harunsanke lowo qarra gatissanno. (1 Phe. 5:5) Lawishshaho, konni albaanni gashshaano loosonke hooltino gobbara shoomantino roduuwi halashshaano attammoonni borro eltannokki gede kultino. Ikkollana, mittu hattee gobbara heeꞌranno suwisaanchi konne biddishsha harunsa giwe borro elino. Tini mayi qarra abbituyya? Isinna wole halashshaano uminsa hajora fultino widoonni farcidhe higganni heedheenna polise amaddinonsa. Polise insa illaallissukki digattino, hattono polise kuri roduuwi eltino borro adhi mannuwiinni haadhino. Konni woꞌnaalshinni maa ronseemmo? Uyinoonninke biddishshi gara lawa hooginkero nafa, hajajama hasiissannonke. Yihowa mereeronke albisa ikkite soqqantara shoomino roduuwi ledo buusammeemmoha ikkiro, woꞌmante yannara maassiꞌrannonke.—Ibi. 13:7, 17.

18. Hasiissannokki wodho fushsha gara ikkitinokkihu mayiraati?

¹⁸ Hasiissannokki wodho fushshinoonke. Cimeeyye hasiissannokki wodho fushshitannoha ikkiro, mannaho duha leddanno. Yurayi Kaminiski yinanni rodii alba Chekosilovakiya yinanni gobbara loosonke hoolli yannara ikkinore xawisanni togo yiino: “Shoomantino roduuwanna batinye cimeeyye usurrita, songotenna woradaho albisa ikkite soqqantannori halashshaano konne asse konne assitinoonte yitanni hasiissannokki wodho fushshitino.” Manni hajo giddora eꞌne biddishsha fushshate Yihowa silxaane diuyinonke. Hasiissannokki wodho fushshanno manchi, rodoosi gawajjotenni agaranni nooha ikkikkinni, rodiisi ammana aana duha ledanni no.—2 Qor. 1:24.

YIHOWA MAGANSIꞌRA HORO AGURTINOONTE

19. Sheexaanu aye geeshsha sharramirono, 2 Duduwo 32:7, 8 kultanno garinni waajjineemmokki gede assannonkeri maati?

¹⁹ Buutaamu diininke Sheexaanu Daawuloosi, ammanantinoti Yihowa soqqamaasine darantanno gede assa diaguranno. (1 Phe. 5:8; Aju. 2:10) Sheexaanunna garosi Yihowa magansiꞌneemmota hoolate woꞌnaaltanno. Ikkirono, waajjine qece yineemmo gede assannonkeri dino! (Mar. 7:21) Yihowa ledonke no; qoleno isi loosonke hoolliro nafa ninke irkisa diaguranno.—2 Duduwo 32:7, 8 nabbawi.

20. Maa assate murciꞌrootto?

²⁰ Ninke baalunku umi xibbi diri Kiristaani faale haꞌrate murciꞌno; insa hatte yanna gashshaanora togo yitino: “Maganoho hajajama agurre kiꞌnera hajajama Maganu albaanni dancha coyetini? Hanni kiꞌnenni yiiyye.”—Soq. 4:19, 20.