‘Assate Heddinoonnire Wonshe’

1. Yihowa maa assineemmo gede fajjinonke?

YIHOWA heeshshonke giddo doorsha doodhineemmo gede fajjinonke. Isi dancha doorsha doodhineemmo gede rosiisannonke, hattono iso hagiirsiisanno doorsha doodhineemmo woyite hendoommori qinaannonke gede kaaꞌlannonke. (Far. 119:173) Maganu Qaali giddo noo hayyo harunsinummoro, roore dancha doorsha doodha dandiineemmo.—Ibi. 5:14.

2. Mitto coye doodhinummohu gedensaanni, mayi qarra ikkankera dandaanno?

² Dancha doorsha doodhinummoro nafa, hananfoommore umo fushsha qarrissankera dandiitanno. Hanni mito lawishsha laꞌno: Mittu wedellichu rodii, Qullaawa Maxaafa nabbawe gudate murciꞌrino. Isi boode lamala geeshsha dancha gede nabbawinoha ikkirono, mitu korkaatinni nabbawa agurino. Mitte rodoo, woꞌma yanna suwisaancho ikkate murcidhino; ikkollana, techo gaꞌa yitanni suwisaancho ikkitukki keeshshitino. Cimeeyyete bisi, songote giddo noo halashshaano albinni roore towaatate murino; ikkollana lowo aganna gedensaannino towaanyo dihanafino. Tini ikkito babbaxxitinota ikkiturono, mitto assannonsari no. Insa heddinore umo difushshitino. Umi xibbi dirira heedhinori Qorontoosi Kiristaanirano konne lawanno qarri iillinonsa. Insa lawishshinni maa ronseemmoro hanni laꞌno.

3. Qorontoosi Kiristaani maa assate murino? Ikkollana insa maa diassitino?

³ Qorontoosira heeꞌranno Kiristaani 55 M.D. balla mitto dancha coye assate murino. Insa Yerusaalametenna Yihudaho heedhanno roduuwa qarrunna buxima amaddinonsatanna wole songuwa kuri roduuwa kaaꞌlate woxe fushshitanni noota affino. Qorontoosira heedhanno Kiristaanino shaqqillunni kaꞌe roduuwansa kaaꞌlate heddino; konnira ma garinni kaaꞌlitannoro afate soqqamaasincho Phaawuloosi xaꞌmitino. Hakkiinni Phaawuloosi songote biddishsha soyino, hattono woxe gamba assa kaaꞌlanno gede Tiito shoomino. (1 Qor. 16:1; 2 Qor. 8:6) Boodu agani gedensaanni kayinni, Phaawuloosi Qorontoosi Kiristaani roduuwa kaaꞌlate woxe fushshitinokkita macciishshino. Insa fushshitanno woxi wole songuwa fushshitino woxi ledo Yerusaalame haaꞌre haꞌrate qixxaawinokkiha ikkara dandaanno.— 2 Qor. 9:4, 5.

4. Layinki Qorontoosi 8:7, 10, 11 kultanno garinni, Phaawuloosi Qorontoosi Kiristaana maa assanno gede jawaachishino?

⁴ Qorontoosi Kiristaani assate murinori danchareeti; qoleno Phaawuloosi insara kaajja ammana noonsahuranna shaqqille leellishate hasatto noonsa daafira galatinonsa. Hattono hanaffinore umo fushshitanno gede jawaachishinonsa. (2 Qorontoosi 8:7, 10, 11 nabbawi.) Insara tuncu yiinonsa coyinni, ammanamino Kiristaani nafa dancha coye assate muriro hakko coye wonsha qarra ikkitansara dandiitannota ronseemmo.

5. Hiikkuri xaꞌmuwara dawaro afiꞌneemmo?

⁵ Qorontoosi Kiristaani gede, ninkerano assate hendoommo coye umo fushsha qarra ikkitankera dandiitanno. Mayira? Korkaatuno, guuntete xeꞌne noonke daafira, techo gaꞌa yinanni badhera hingammora dandiineemmo. Woy hedeweelcho ikkito tuncu yite hendoommore wonshineemmokki gede guficho ikkitankera dandiitanno. (Ros. 9:11; Rom. 7:18) Doodhinoommo coye wirro layiꞌranna hasiisannoha ikkiro biddi assiꞌra dandiineemmohu hiittoonniiti? Hendoommore danchu garinni wonsha dandiineemmohu hiittoonniiti?

MITTO COYE DOODHANKERA ALBAANNI ASSA HASIISSANNONKERE

6. Doodhinoommo coye biddi assiꞌra hasiissannonkehu mayira ikkara dandaanno?

⁶ Mitu doorshi horo soorra hasiissannonkekkiho. Lawishshaho, Yihowara soqqamate doodhinoommo doorshinni kaajjine heeꞌranna galtenkera ammanamate eꞌnoommo qaale agadha hasiissannonke. (Mat. 16:24; 19:6) Wole doorsha kayinni biddi assiꞌra hasiissankera dandiitanno. Mayira? Korkaatuno mitu coyi soorramara dandaanno. Ikkina dancha doorsha doodhate kaaꞌlitannonke coyibba hiikkuriiti?

7. Maa afiꞌrate huucciꞌra hasiissannonke? Mayira?

⁷ Hayyo afiꞌrate huucciꞌri. Yaiqoobi qullaawu ayyaaninni togo yee borreessino: “Kiꞌne mereero hayyo ajjinosihu heeꞌriro, Magano marro marro hige huucciꞌro; korkaatuno Maganu mishikkinni baalunkura shaqqillunni aanno.” (Yai. 1:5) Ninke baalunkura mite doogonni ‘hayyo ajjannonke.’ Konnira, mitto coye doodhineemmo woyiteno ikko doodhinoommore wirro layiꞌneemmo woyite Yihowa addaxxa hasiissannonke. Hatto assinummoro, isi hayyotenni doodha dandiineemmo gede kaaꞌlannonke.

8. Mitto coye doodhinammora albaanni maa assa hasiissannonke?

⁸ Seekkite xiinxalli. Amaale afiꞌrate Maganu Qaale xiinxalli, Yihowa dirijjite qixxeessitino borro nabbawi, hattono ammanatto manna amaaꞌli. (Law. 20:18) Loosonke soorriꞌnammora, wolewa haꞌne heeꞌnammora, woy Yihowara soqqamate hasiisannonkere afiꞌneemmo gede kaaꞌlannonke roso doodhinammora albaanni kuri coyibba assa hasiissannonke.

9. Mitto coye assate kaꞌnoommohu mayiraatiro ammanamme layiꞌranke kaaꞌlitannonkehu hiittoonniiti?

⁹ Mitto coye doodhatto gede assinoheri maatiro hedi. Yihowa mitto coye assate kaꞌnoommohu mayiraatiro afa hasiꞌranno. (Law. 16:2) Isi baalunkurinni ammanammoommore ikkinammora hasiꞌranno. Hakko daafira, mitto doorsha doodhate kaꞌneemmo gede assinonkeri maatiro ammanamme layiꞌra hasiissannonke. Hatto assa hoongummoro, doodhinoommo doorshinni kaajje uurra qarra ikkitankera dandiitanno. Lawishshaho, mittu wedellichu rodii woꞌma yanna suwisaancho ikkate doodhara dandaanno. Ikkollana boode yanna gedensaanni isira suwisaano soqqantanno geeshshi saate soqqama qarra ikkitinosi; qoleno soqqanshosinni hagiirre hoogino. Isi ‘Suwisaancho ikkeemmo gede kakkayisinoehu qaru coyi Yihowa hagiirsiisate nooe hasattooti’ yee hedinoha ikkara dandaanno. Ikkollana isi suwisaancho ikkanno gede assinosihu qaru coyi, annasinna amasi woy wole baxanno mancho hagiirsiisate noosi hasattolla ikkita?

10. Mitto coye biddi assiꞌrate mayi kaaꞌlannonke?

¹⁰ Hanni mittu Qullaawu Maxaafi rosaanchi sijaara aga agurate murciꞌrino yine hendo. Isi umi qara ikkita ikke mitte woy lame lamala geeshsha sijaara agurinoha ikkirono, wirro agate higino. Jeefote kayinni isi sijaara woꞌmunni woꞌma agurino! Yihowara noosi baxillinna iso hagiirsiisate noosi hasatto konne busha rosicho qeeꞌlanno gede kaaꞌlitinosi.—Qol. 1:10; 3:23.

11. Mixo fushshiꞌra hasiissannonkehu mayiraati?

¹¹ Mixo fushshiꞌri. Mixo fushshiꞌrittoro, hanafoottore umo fushsha diqarrissannohe. Lawishshaho, Qullaawa Maxaafa barru baala nabbawate murciꞌroottoha ikkara dandaanno. Hatto assate pirogiraame fushshiꞌra hoogittoro kayinni, hedoottore wonsha qarra ikkitahera dandiitanno.b Woy songote cimeeyye hoshsha albinni roore ganyite towaatate murtinoha ikkara dandaanno; ikkollana insa yannate gedensaannino hatto assa dihanaffino. Cimeeyye heddinori qinaannonsa gede insaneeto aante noo xaꞌmuwa xaꞌma dandiitanno: “Roore towaanyo hasiissannonsa roduuwi ayeootiro bandoommo? Kuri roduuwa towaanteemmo barra murroommo?”

12. Maa assa hasiissannonkeha ikkara dandaanno? Mayira?

¹² Quwa saꞌooti. Hasiꞌrinore baala assate ikkitanno yanna, jajji, woy wolqa noosi manchi dino. Konnira quwa saꞌꞌattokkihanna dhukakki afoottoha ikki. Assate hedoottore umo fushsha dandaattokkita huwatittoro, doorshakki biddi assiꞌra hasiissannoheha ikkara dandaanno. (Ros. 3:6) Wole widoonni kayinni, doodhoottore taxxi yite hedde, biddi assiꞌra hasiissannoheri heeꞌriro biddi assidhe, hedoottore assate qixxaawattora dandaatto. Hanni hanafoottore umo fushshate kaaꞌlannoheha onte coye laꞌno.

HEDOOTTORE UMO FUSHSHATE KAAꞌLITANNOHE COYIBBA

13. Hendoommore umo fushshate wolqa afiꞌra dandiineemmohu hiittoonniiti?

¹³ Hedoottore wonshate jawaante afiꞌrate huuccatto assiꞌri. Maganu assate hedoottore umo fushshatto gede wolqa aahera dandaanno. (Fil. 2:13) Konnira Yihowa qullaawu ayyaanisi widoonni hasiissannohe wolqa aannohe gede huucciꞌri. Huuccattokkira bayichonko dawaro afiꞌroottokkiha lawihero nafa huucciꞌra agurtooti. Yesuusi yino garinni, qullaawa ayyaana ‘uyinannihe’ gede ganyite huucciꞌri.—Luq. 11:9, 13.

14. Lawishsha 21:5 noohu xintu seeri assate hendoommore umo fushshate kaaꞌlannonkehu hiittoonniiti?

¹⁴ Assattore balaxxe muri. (Lawishsha 21:5 nabbawi.) Hanafootto looso umo fushshate, balaxxe loosattore mura hasiissannohe. Hakkiinni murootto garinni loosokki loosa hasiissannohe. Hatteente gede, mitto coye assate murciꞌrittoro, hakko coye umo fushshate assa hasiissannohe coyibba borreessite amaxxi. Qoleno shota ikkinokki loosi heeꞌriro bebbeekke kaꞌe shiima shiima loosakki, mageeshsha loosoottoro afate kaaꞌlitannohe. Phaawuloosi, Qorontoosi Kiristaani isi dayi gedensaanni woxe fushshate kachaachamantenni, lamalate giddo umi umi barra fushshitanno gede jawaachishinonsa. (1 Qor. 16:2) Looso bebbeenke shiima shiima loosa, loosu wolqankera aleenni higino yine yaandeemmokki gedeno kaaꞌlitannonke.

15. Assattore muritto gedensaanni, maa assa dandaatto?

¹⁵ Assate hendoommore borreessine amaxxanke, hendoommore loosu aana hosiisate kaaꞌlitannonke. (1 Qor. 14:40) Lawishshaho cimeeyye gambooshshe assidhanno woyite insa giddo mittu cimeessi insa assate murtinore baala borreesse amadanno gede biddishsha uyinoonninsa; kuni rodii mitto looso loossanno gede worroonni roduuwi, loosonsa mamooti geeshsha loosse guddannorono borreessanno. Cimeeyye konne biddishsha harunsitannoha ikkiro, assate murtino coye roorenka umo fushsha dandiitanno. (1 Qor. 9:26) Ati umikki hajono konni garinni wonshiꞌra dandaatto. Lawishshaho, barru giddo assate hedoottorira pirogiraame fushshiꞌranna balaxxe loosate hedoottore umi adda borreessiꞌra dandaatto. Hatto assakki, hanafoottore umo fushshate calla ikkikkinni, shiima yanna giddo lowo looso loosateno kaaꞌlitannohe.

16. Hendoommore umo fushshate maa assa hasiissannonke? Roomu Sokka 12:11 tennera kaaꞌlitannonkehu hiittoonniiti?

¹⁶ Diinaggaabbe loosi. Hedoottore loosu aana hosiisatenna hanafoottore umo fushshate sharrama hasiissannohe. (Roomu Sokka 12:11 nabbawi.) Phaawuloosi, Ximootewoosi rosiisate dandoosi woyyeessiꞌrate sharramannonna ‘jaate’ loosanno gede kulinosi. Wole ayyaanaamittete mixo wonshiꞌrateno tenne amaale harunsa dandiineemmo.—1 Xim. 4:13, 16.

17. Efesooni Sokka 5:15, 16 hendoommo coye umo fushshate kaaꞌlitannonkehu hiittoonniiti?

¹⁷ Yannakki hayyotenni horoonsiꞌri. (Efesooni Sokka 5:15, 16 nabbawi.) Hedoottore loosu aana hosiisatto yanna doori; hakkiinni hedoottore murootto yannara loosi. Hedoottore wonshate baaluri injaahe geeshsha agadhitooti; korkaatuno baaluri injaa hoogahera dandaanno. (Ros. 11:4) Hakkeeshshi geeshsha hasiisannokki coyi, lowo geeshsha hasiisannore loosatto yannanna wolqa gudahera wodhitooti. (Fil. 1:10) Dandaamannoheha ikkiro, hedokki billaallisannori batiꞌrannokki saate doodhi. Wolootaho anga mitiiꞌmite noottota kuli. Silkekki cufanna sonkoonnihe sokka woy dagoomittete webisayite loosokki guditto gedensaanni laꞌꞌa dandaatto.c

18-19. Dancha doorsha doodhitto gedensaanni guficho ikkannore qeelate mayi kaaꞌlahera dandaanno?

¹⁸ Afiꞌratto guma illachishi. Mitto doorsha doodhinummo gedensaanni afiꞌneemmo gumi, doogo haꞌne iillineemmo base gedeeti. Hedoottowa iilla hasiꞌrittoro, doogo cunfoonniha ikkiro nafa, wole widoonni higge haꞌra hasiissannohe. Hatteente gede, mitto doorsha doodhinummoro afiꞌneemmo guma illachishanke, guficho ikkannori tuncu yaannonke woyite ranke hexxo mudhineemmokki gede kaaꞌlitannonke.—Gal. 6:9.

¹⁹ Dancha doorsha doodha shota diꞌꞌikkitino; doodhinoommo coye assano qarra ikkitankera dandiitanno. Ikkollana Yihowa irkonni, hanafoottore umo fushshate kaaꞌlitannohe hayyonna jawaante afiꞌra dandaatto.