Lawishsha Ikkannoha Hasaawu Bitima

Aganunnite Umi Qidaamera Qullaawu Maxaafi Xiinxallo Jammarsiisa

“Qachinke manni ledo danchu gashshootire hasaambanni heeꞌnoommo. Mannu gashshooti lowo geeshsha qarra ikkinore, lawishshaho finqillenna taashshote xeꞌne horo huna dandaannoha lawannohe?” Dawaro qola geeshsha agari. Yesuusi rosiisino huuccattora, rosaanosi tenne baala assitannoti Maganu Mangiste daggara huuccidhanno gede rosiisinota qaete annira qummi assi. Birra 1nnite Agarooshshu Shaera badhiidi qoolira noo birxicho leellishittosihu gedensaanni, umi xaꞌmo hunda noo assaawenna ajayi ajeenna mitte xiqise nabbabbine hasaabbe. Metseetta uyitesi kaꞌe, aante noo xaꞌmo hasaawate dinye amadi.

Agarooshshu Shae Birra 1

“Qooxeessinke manni ledo, Yesuusi rosiisino huuccattora nooha konne qaale kayinse haransine hasaambanni heeꞌnoommo. [Maatewoosi 6:9, 10 nabbawi.] Maganu Mangiste maatironna Yesuusi rosiisi yannara tenne Mangistere marro marro hige coyiꞌrinohu mayiraatiro afootto? [Dawaro qola geeshsha agari.] Tini metseete Qullaawu Maxaafi Maganu Mangiste daafira mayyaannoronna tini Mangiste uullate aana abbitanno atoote kultanno.”

Baqqi Yiiyye! Birra

“Techo kawaange dange tenne xaꞌmo dawaro mannaho kullanni heeꞌnoommo. [Metseetenniha aaniidi qoola leellishi.] Mittu manchi seekkino heeshsho heeꞌrate dureessa ikka hasiissannosiha lawannohe? [Dawaro qola geeshsha agari.] Qullaawu Maxaafi maalaamittete coyira quwa saꞌinokki hedo heedhannonke gede amaalanno. [Luqaasi 12:15 nabbawi.] Qullaawu Maxaafi yaanno garinni mannu baalunku seekkino heeshsho heeꞌra dandaanno. Tini metseete tenne hajore kultanno.”