Bayichonko Haꞌra Hasiissannonkehu Mayiraati?

Simirriitete gambooshshiwa roduuwinke ledo xaandeemmo wote insa ledo hasaawanke nooreentilla. Ikkirono, simirriitete gambooshshe jeefinsanni heeꞌneennanni ranke soqqammeemmo killile haꞌra hasiissannonke. Sabbakate loosinke wiinamme loonsanniho. (2 Xim. 4:2) Simirriitete gambooshshiwa keeshshinummo kiiro, soqqammeemmo yanna ajjanni hadhanno. Soqqammeemmo wote roduuwinke ledo dhaawannore hasaawate lowo faro afiꞌneemmo. Simirriitete gambooshshi bayicho keeshshinummokkinni ranke soqqanshote haꞌranke, loosoho diinaggaambeemmore, hattono Yihowanna Beettisi soqqamaasine ikkinoommota leellishshanno.—Rom. 12:11.