Kiristaanu Heeshshonna Soqqanshote Xiinxallote Maxaafichora Qummi Assinoonni Borro
MAAJA 4-10
MAGANU QAALI GIDDO NOOTA MUXXE JIRO | 2 SAAMUEELI 18-19
“Barzilayi Dhukasi Afe Dancha Lawishsha Ikkinonke”
w07 7/15 14 guf. 5
Barzilayi Dhukasi Afino Manchooti
Daawiti, Barzilayi kaaꞌlinositera lowo geya hagiidhinoti dihuluullissannote. Daawiti isira galata qoꞌlate woxe calla oye agura dihasiꞌrino. Barzilayi dureessa ikkino daafira togoo kaaꞌlo dihasiissannosi. Daawiti kuni geerchi dancha mancho ikkinota afino daafira, isi mootete mine heeꞌrara hasiꞌrinoha ikkara dandaanno. Barzilayi hakko heeꞌrasi mootete ledo jaalooꞌmanno gede faro fantannosi daafira, tini isira lowo ayirrinyeeti.
w07 7/15 14 guf. 7
Barzilayi Dhukasi Afino Manchooti
Barzilayi Daawiti ledo dihaꞌreemmo yaanno gede assinosihu mittu coyi, geedhimma ikkitara dandiitanno. Barzilayi hakkuyi gedensaanni lubbotenni lowo diro diheeꞌreemmo yee hedinoha ikkara dandaanno. (Faarso 90:10) Isi Daawiti kaaꞌlate dandiire baala assino; ikkirono geedhimmatenni kainohunni dhuku ajinositano afino. Barzilayi ayirradonna maccaha ikkate yee dhukasi dihawino. Isi Abeseloomi gede hagaagannoha diꞌꞌikkino. Hatteentenni dhukasi afinoha ikkinota leellishino.—Lawishsha 11:2.
w07 7/15 15 guf. 1-2
Barzilayi Dhukasi Afino Manchooti
Barzilayi xaggenni quwa saꞌꞌa hoogate daafira lowore ronseemmo. ‘Loosu batiꞌraera dihasiꞌreemmo’ woy ‘Ikkado diꞌꞌikkoommo’ yine, uyinanninketa soqqanshote qoosso giwa woy tenne qoosso afiꞌrate sharrama agura dihasiissannonke. Jawaantenna hayyo aannonke gede Magano hexxinummoro, xeinonkere isi wonshankera dandaanno.—Filiphisiyusi Sokka 4:13; Yaiqoobi 4:17; 1 Pheexiroosi 4:11.
Wole widoonni kayinni, dhukanke anfoommore ikka hasiissannonke. Lawishshaho, mittu Kiristaanchira wonanni lowohu Maganu loosi noosiha ikkara dandaanno. Isi songote giddo looso lendeennasi maahoyye yee adhiro, wole ayyaanaamittete qeechasi lawishshaho maatesi towaaxxa deara dandaannota afino. Togoo woyite isi uyinannisita wole qoosso yannate geya adha giwasi dhukasi afinohanna quwa saꞌꞌannokkiha ikkinota dileellishshanno?—Filiphisiyusi Sokka 4:5; 1 Ximootewoosi 5:8.
Maganu Qaalinni Ronseemmore
‘Goofimarchu Geeshsha Dodde’
19 Dhuku anje amaddinohehanna wolootaho qarriꞌya dileellinonsa yite hedattoha ikkiro Memfeboste lawishshi kaaꞌlahera dandaanno. (2 Sam. 4:4) Isira bisu xeꞌne noosi hattono Moote Daawiti miicinosi. Memfebostera qarru iillinosihu loosino soꞌronni diꞌꞌikkino. Ikkirono, isi tennera dicaaccaawino; hatteentenni noosiha dancha coye naadino. Memfeboste Daawiti alba shaqqillunni assinosirira galatino. (2 Sam. 9:6-10) Hakko daafira Daawiti miicisi woyite isi coye heeshshi gotti asse laino. Memfeboste Daawiti assinosirira dicaaccaawino. Qoleno, isi Daawiti assinosirira Yihowa busha diassino. Hatteentenni Memfeboste Yihowa buurino moote kaaꞌlate assa dandaannore hedino. (2 Sam. 16:1-4; 19:24-30) Yihowa Memfebostehu kaajju lawishshi kaaꞌlannonketa afino daafira Qaalisi giddo borreessinanni gede assino.—Rom. 15:4.
MAAJA 11-17
MAGANU QAALI GIDDO NOOTA MUXXE JIRO | 2 SAAMUEELI 20-21
“Yihowa Taashsho Baxanno Maganooti”
it-1 932 guf. 1
Gebaooni
Moote Saaooli Gebaooni manna gudate kainoha ikkirono, insa kayinni woꞌmunni woꞌma dibaꞌino. Ikkirono Gebaooni daga Yihowa halaale fushshansa geeshsha cincite agadhitino. Yihowa Daawiti gashshooti yannara sase diro hude ubbanno gede asse halaale fushshinonsa. Daawiti Yihowa mala xaꞌmiꞌrihu gedensaanni, hude ubbinohu mundeete shedinni ikkinota afino. Hakkiinni Daawiti Gebaooni manna, ‘Konni albaanni assinoonniꞌne beebbara maricho assoꞌne?’ yee xaꞌminonsa. Insano, ‘Kuni coyi birrunna culkunni gundanniha diꞌꞌikkino’ yite qoltino; hatto yaansa garankolla; korkaatuno Muse Seeri, lubbo shiino manchiwiinni ‘guma ita’ hasiissannokkita kulanno. (Ki 35:30, 31) Qoleno insa mitto manchono seerimale shaa dandiitannokkita affino. Hakko daafira insa, Saaoolita lamala ‘labballi’ ooso sayinse uyinanninsa gede xaꞌmidhinohu, Daawiti maa assinansara hasidhannoro lede xaꞌminsahu gedensaanniiti. Mundeete shedira, Saaoolinna minisi manni xaꞌmamannota kulloonni. Tini, albisa ikke shiishiinohu Saaooli ikkirono, ‘oososino’ tennera kaaꞌlantinota leellishshannota ikkitara dandiitanno. (2 Sa 21:1-9) Hatte yannara ooso shinoonnihu anninsa cubbira diꞌꞌikkino (Mar 24:16); hatto assinoonnihu, “lubbote darga lubbo” yaanno seeri garinni halaale fushshateeti.—Mar 19:21.
Maganu Qaalinni Ronseemmore
w13 1/15 31 guf. 14
Songote Cimeeyye ‘Hagiidhineemmo Gede Ledonke Loossannoreeti’
14 Sheexaanunna miillasi doogonkera guficho ikkannore worturono, alame woꞌmate heeꞌneemmori ninke Yihowa manni Maganinkera soqqama diagurroommo. Ninke giddo mitoho waajjishanno qarri tuncu yiinonke; kayinni Yihowa addaxxine konne Gooliyaadi gedee qarra qeelle saꞌꞌa dandiinoommo. Ikkirono mito woyite amadannonke qarri daafurreemmo gedenna hexxo mudhineemmo gede assankera dandaanno. Wole woyite ikkoommero qeelle saꞌneemmo qarri, togoo woyite kayi karankera dandaanno. Batinyu roduuwi huwattinonte gede, togoo woyite songote cimeeyye kaaꞌlitannonke kaaꞌlo wirro hagiirraamma ikkineemmo gedenna jawaante afiꞌneemmo gede kaaꞌlitankera dandiitanno. Mitte 60 diri balla ikkannoseti suwisaancho rodoo togo yitino: “Boode yannara albaanni seyinoekki daafira, soqqansho duha ikkitinoe. Mittu cimeessi wolqa baoommata lae shiqe hasaawisinoe. Isi Qullaawa Maxaafa horoonsiꞌre jawaachishinoe. Amaalinoe amaale harunsaꞌya lowo geya kaaꞌlitinoe.” Ise ledde togo yitino: “Kuni cimeessi daafuroommata lae ane kaaꞌlasi danchummasi leellishshanno!” Addanko, baxillunni kaaꞌlitannonkeri songote cimeeyye noonketa afanke lowo geya jawaachishshannonke; insa hundi waro heeꞌrinohu Abisi gede ninke kaaꞌlate qixxaabbinoreeti.
MAAJA 18-24
MAGANU QAALI GIDDO NOOTA MUXXE JIRO | 2 SAAMUEELI 22
“Kaaꞌlo Afiꞌrate Yihowa Addaxxe”
cl 19 guf. 11
‘Maganunniwa Shiqqi Yaa’ Dandaatto?
11 Qullaawu Maxaafi Yihowara “bayira wolqa” noosita kulanno. (Isayaasi 40:26) Hatteeno agurranna, Israeele Duumo Baara tayisse saꞌanno gede kaaꞌlinonsa garanna halalla insa 40 diro woꞌma towaatinonsa garano kulanno. Daadanni noo wayi lamewa badamino gara heda dandaatto. Hatte yannara haꞌranni noohu Israeelete manni sase miliyoone ikkara dandaanno; kuni manni kawanna kaꞌaanni girgiddu gede ikke uurrino wayi mereeroonni moola baatto kaxxe saino gara heda dandaatto. (Fulo 14:21; 15:8) Insa halalla hadhu yannarano Maganu agarinonsa. Kinchu giddonni waa fushshinonsa. Iiminnino menna yinanni sagale dirrisinonsa. (Fulo 16:31; Kiiro 20:11) Yihowa wolqa noosita leellishinoha calla ikkikkinni wolqasi mannasi gatisate horoonsiꞌrino. Huucciꞌneemmohu wolqaataamo Magano ikkinota afanke jawaachishshannota diꞌꞌikkitino? Isi “golonkeetinna wolqankeeti; qarru iillannonke yanna baalate kaaꞌlate qixxaawaho.”—Faarso 46:1.
w10 6/1 26 guf. 4-6
“Ati Ammanamoottoho”
Hanni Daawiti coyiꞌrinore seekkine laꞌno. “Ammanama” yitanno tiro afidhinoti Ibiraawootu Afii yaatto, “baxillunni kaꞌne danchumma assa” yineno tira dandiinannite. Ammanammanni gede assannohu baxilleho. Yihowa isira ammanantinorira woꞌmanka woyite mule no.
Qoleno ammanama, mulla hedotenni calla ikkikkinni loosunni leellinshanni coyeeti. Daawiti heeshshosinni lainonte gede Yihowa ammanamino Maganooti. Daawiti qarru qalxisi yannara Yihowa rahe iillinosi. Isi konne ammanamino moote agarinosi, hattono massaginosi. Daawiti, Yihowa ‘diinu baalu anganni gatisinosihura’ iso galaxxino.—2 Saamueeli 22:1.
Daawiti coyiꞌrinorinni maa ronseemmo? Yihowa horo disoorramanno. (Yaiqoobi 1:17) Isi fushshino biddishsha disoorranno hattono eino qaale wonshanno. Daawiti wole faarsora coyiꞌrino garinni, Yihowa “keeraano dihunanno.”—Faarso 37:28.
Maganu Qaalinni Ronseemmore
w12 11/15 17 guf. 7
Kiꞌneneeto Heeshshi Assitinannire Ikke
7 Maganu umosi heeshshi assannoha ikkasi faarsaasincho Daawiti lowo geya kaaꞌlitinosi. Isi Yihowara togo yee faarsiꞌrino: “Gatote wonqokki oottoe; umokki heeshshi assattoha ikkakki jawa assitinoe.” (2 Sam. 22:36, NW) Daawiti Israeelete giddo jawa coye assa dandiinohu, Yihowa umosi heeshshi asse towaatinosi daafira ikkinota huwatino. (Far. 113:5-7) Ninkeno dancha akatta, dandoonna qoosso afiꞌnoommohu Yihowa umosi heeshshi asse towaatinonke daafira diꞌꞌikkino? ‘Noonkere baala uyinonkehu’ Yihowa diꞌꞌikkino? (1 Qor. 4:7) Umosi heeshshi assanno manchi ‘rooriidiho’; mayira yiniro, Yihowa roore horoonsiꞌrannohu togoo soqqamaanosiiti. (Luq. 9:48) Hanni hatto yineemmohu mayiraatiro lende laꞌno.
Lallawo
w06 8/15 21 guf. 7-8
Iyyoobi Cincatenna Ammanamate Dancha Lawishsha Ikkanno Manchooti
7 Xaa yannara roore Kiristaana Iyyoobi amadino geeshshi qarri amadannonsakkiha ikkirono, insarano addi addihu mitiinsanno coyi tuncu yaannonsa. Insa giddo batinyeho dartu iillannonsa, hattono maatensa giddo qarru kalaqamanno. Angate anje woy dhibbuno qarrisansara dandaanno. Mitoota ammanansara yiteenna shinoonninsa. Hige iillannonkeha mitto mittonka qarra abbannohu Sheexaaneho yaa diꞌꞌikkino. Isinni mitu qarri iillannonkehu ninke uminke loonsoommo soꞌronni woy ragiꞌnoommo dhibbinni kainohunni ikkara dandaanno. (Galatiyu Sokka 6:7) Qoleno diru akkalle amaddankera woy kalaqamu dano iillitankera dandiitanno. Qullaawu Maxaafi Yihowa xaa yannara soqqamaanosira kuni qarri iillannonsakki gede maalaletenni golamannonsakkita kulanno.—Rosiisaancho 9:11.
8 Ikkirono Sheexaanu ammananke ciiggishate iillinonke qarra horoonsiꞌrara dandaanno. Soqqamaasinchu Phaawuloosi ‘utu gede qasanno qarri Sheexaanu sokkaancho ikke runkutanni’ qarrisinosita coyiꞌrino. (2 Qorontoosi 12:7) Kuni fayyimmate qarra lawishshaho, illete dhibba woy wolere ikkara dandaanno; isi, Sheexaanu amadinosi qarra horoonsiꞌre hagiirresinna ammanasi hunara dandaannota afino. (Lawishsha 24:10) Xaa yannara Sheexaanu Maganu manni daramanno gede assate mininsa manna, ledonsa rossannore, wole agurina kakkachoota gashshaasine nafa horoonsiꞌrara dandaanno.
MAAJA 25-31
MAGANU QAALI GIDDO NOOTA MUXXE JIRO | 2 SAAMUEELI 23-24
“Uyitanni Noottohu Umikki Horo Agurteeti?”
it-1 146
Oriina
Oriina, kakkallanni darga, saadanna haqqe mulla aate hedinoha ikkikki digatino; Daawiti kayi woxe baatummokki diadheemmo yee giwino. Layinki Saamueeli 24:24 kultanno garinni, Daawiti ayiddummenna saada 50 kinchu birrinni (110 doolaare) hidhino. Umi Duduwo 21:25 kayinni Daawiti ayiddumme 600 culkunni seekkinoonni womaashshinni (77,000 doolaare) hidhinota kultanno. Layinki Saamueeli maxaafi borreessaanchi xawisinohu kakkallanni darganna kakkallanni coye calla hidhate daafiraati; hakko daafira isi qummi assino woxi kuri coyibba calla hirroonniha ikkikki digatino. Umi Duduwi borreessaanchi kayi xawisinohu, yannate gedensoonni hakko bayicho minnoonnihu qullaawu mini ledo xaadooshshe afiꞌrino coyi daafiraati; isi coyiꞌranni noohu qullaawa mine minate hirroonniri daafiraati. (1Du 22:1-6; 2Du 3:1) Hakko daafira 600 culkunni seekkinoonni womaashsha fushshinoonnihu Daawiti seekkinoha shiima kakkalote darga hirate ikkikkinni qullaawa mine minate hasiisannoha halaꞌlado bayicho hirate ikkikki digatino.
w12 1/15 18 guf. 8
Xinta Ikkino Halaalinni Rosse
8 Mittu Israeelichi Yihowara galatu noosita leellishate woy iso hagiirsiisate kakkalo shiqishannohu umisi fajjonni ikki geeshsha, kakkalo asse shiqishannota maltino saada doora qarra ikkitannosikkiti dihuluullissannote. Togoo manchi Yihowara dooraminoha woy umo afiꞌrinoha hagiirrunni aanno. Xaa yannara Kiristaanu Muse Seerira kulloonni gedee kakkalo dishiqishanno; ikkirono insa yannansa, woxensanna wolqansa horoonsiꞌre Yihowara soqqamanno daafira, kakkalo shiqishiꞌranni no yaa dandiinanni. Soqqamaasinchu Phaawuloosi Maganu uyinonke hexxo duduwanna mannaho “dancha coye assa” Magano hagiirsiissanno kakkalo ikkitinota coyiꞌrino. (Ibi. 13:15, 16) Yihowa manni konne coye assannohu dancha giddonni ikkiro, isi uyinonsarira baalaho lowo galati noonsata leellishanni no. Yannankera heeꞌranno Kiristaani dancha giddonni kae soqqamanno soqqanshonna, hundi waro heeꞌrinohu Maganu manni uminsa fajjonni kae shiqishiꞌranno kakkalo mitto garaati.
Maganu Qaalinni Ronseemmore
w05 5/15 19 guf. 6
Layinki Saamueeli Maxaafita Luphi Yitino Hedo
23:15-17. Daawiti, Maganu heeshshotenna mundeete daafira uyino seera lowo geeshsha ayirrisanno; hakko daafira konne seera diiginota leellishannoha lawanno coye nafa assa qorophino. Ninkeno Maganu hajajo konni garinni ayirrisa hasiissannonke.
WOXAWAAJJE 1-7
MAGANU QAALI GIDDO NOOTA MUXXE JIRO | 1 MOOTOOLLA 1-2
“Soꞌroꞌnenni Rossinanni?”
it-2 987 guf. 4
Selemooni
Adooniyaasinna ledosi gano ganino manni, Giyooni noota muuziiqu huuronna mannu huuronsa naggi asse “Moote Selemooni hegerera moohi!” yaanna macciishshituti waajjite gara habbe xooqqino. Selemooni rabbisiꞌra giwe, gashshootisi giddo keeru heeꞌrara hasiꞌrannota leellishino. Moote ikkinohu Adooniyaasi ikkoommero Selemooni shaara dandaanno. Adooniyaasi xooqe qullaawa mine haꞌre maaxamino; hakkiinni Selemooni, Adooniyaasi woshshiishe isiwa abbisiisino. Selemooni, bunshe assinoha ikkiro ikkinnina, hakkuyi kaꞌa mittoreno assinannisikkita kule Adooniyaasi “minikkira haꞌri” yiinosi.—1Mo 1:41-53.
it-1 49
Adooniyaasi
Daawiti reyita, Adooniyaasi Bersaabehiwa mare ‘Selemooni alba Daawiti towaattannota Abishaagi galte ikkitannoe gede ooena xaꞌmie’ yiinose. Adooniyaasi dogayino ikkiro, Selemooni moote ikkanno gede assinohu Magano ikkinota coyiꞌrino; kayi “Mooha hasiissannoehu aneeti; konne coyeno Israeele hedde agarte no” yaasi Moote ikka hasiissannoeha hoꞌlinoonnie yee hedinota leellishshaate. (1Mo 2:13-21) Adooniyaasi tenne xaꞌmiꞌrinohu gashshoote hoogino daafira, tennera kiinsasira yee hede ikkara dandaanno; kayinni tini xaano isi silxaanete wojji yaa agurinokkita leellishshannote; korkaatuno hundi waro soojjaatoonni heeꞌranno manni budira, mittu moote reyiro galtesinna irkote galtesi adhannohu iso lekkisinoho. (2Sa 3:7; 16:21te ledo heewisiisi.) Selemooni, Adooniyaasi amasi widoonni xaꞌmiꞌrinohu tenne hede ikkinota afino daafira, Benaya iso shaanno gede hajajino; Benayano Adooniyaasi bayichonko shiino.—1Mo 2:22-25.
Maganu Qaalinni Ronseemmore
w05 7/1 30 guf. 1
Layinki Saamueeli Maxaafita Luphi Yitino Hedo
2:37, 41-46. Soro loose kae qorichunni gateemmo yee heda lowo qarrira tugganno. ‘Heeshshota widira massitannote ruukkashsho doogonni’ affanni heedhe fultannori, konni gowwimmate assootinsanni kainohunni qarru giddo ubbanno.—Maatewoosi 7:14.
WOXAWAAJJE 8-14
MAGANU QAALI GIDDO NOOTA MUXXE JIRO | 1 MOOTOOLLA 3-4
“Hayyo Afidhino Waaga”
w11 12/15 8 guf. 4-6
Selemooni Dancha Lawishshanso Qorowishshu Lawishsha Ikkannohe?
4 Selemooni moote ikki balla, Maganu haaqeetenni leelle hasiꞌrinore xaꞌmiꞌranno gede kulinosi. Selemooni egenno xeꞌinosita afino daafira, Maganu hayyo aannosi gede huucciꞌrino. (1 Mootoolla 3:5-9 nabbawi.) Selemooni jironna ayirrinye ikkikkinni hayyo xaꞌmiꞌrasi Magano hagiirsiissinosi daafira, Maganu isira “egennonna wodancha” hattono jiro uyinosi. (1 Mot. 3:10-14) Yesuusi, Selemooni hayyo hoola yinoonnita ikkitino daafira, Saaba mootitte tenne macciishshite illesenni laꞌara dagginota coyiꞌrino.—1 Mot. 10:1, 4-9.
5 Ninkerano Maganu maalaletenni hayyo aannonke yine dihendeemmo. Selemooni umisi, egenno woy hayyo “aannohu Kaaliiqaati” yee coyiꞌrinoha ikkirono, hayyo afiꞌrate ninke uminke sharrama hasiissannonketa borreessanni togo yiino: ‘Egennote [“hayyote,” NW] widira woxarati; wodanchano taxidhe woshshiꞌri. Egenno jawaatte hasiꞌri.’ (Law. 2:1-6) Addanko, hayyo afiꞌra dandiineemmo.
6 ‘Selemooni gede hayyo lowori gede asse laꞌꞌanni noommo?’ yine ninkeneeto xaꞌma hasiissannonke. Miinju qarri, batinyu manni woxenna looso illachishanno gede woy rosoho quwa saꞌꞌanno gede assinonsa. Atinna minikki mannina? Doodhitinanni doorshi Maganu hayyo lowori gede assitine laꞌinannitanna tenne hayyo harunsitinannita leellishannoho? Albinni roore Maganu hayyo afiꞌrate, illachishshinanni coye biddi assiꞌra dandiitinakka? Addanko, hayyo afiꞌranna tenne hayyo garinni heeꞌra gedensonke seekkitanno. Selemooni togo yee borreessino: “Hatte yannara gara ikkino coyi, halaalunna taashsha maatiro buuxatto, haꞌratto doogono badde afatto.”—Law. 2:9.
Maganu Qaalinni Ronseemmore
w98 2/1 11 guf. 15
Yihowa Eino Qaale Wonshanno Maganooti
15 Yihowa ammanate anni Abirihaamira eino qaali garinni, Muse seeri hunda qinaabbinota Israeelete daga maassiꞌrinonsa. Muse lekkisinohu Iyyaasu, 1473 K.A. Israeele Kanaꞌꞌaani gobba haaꞌre eessino. Israeelete gosa Kanaꞌꞌaani gobba beeqqitu yannara Yihowa tenne baatto Abirihaami sirchira eemmo yee eino gondoori woꞌmino. Israeele Yihowara ammanantanno woyite, isi diinnaꞌne qeeltinanni gede kaaꞌleemmoꞌne yee eino qaale wonshanno. Hakko iso Moote Daawiti gashshe noo yannara tini halaale ikkitinoti leeltino. Daawiti beetti Selemooni gashshooti yannara Yihowa Abirihaamira einohu sayikki qaali woꞌmino. “Yihudunna Israeelete manni baaru shaafi gede kiiro batiꞌraho. Kuni manni baalunku intannirinna anganniri xeinsakkinni woꞌmanka woyite qawaaxxiꞌre heeꞌri.”—1 Mot. 4:20.
WOXAWAAJJE 15-21
MAGANU QAALI GIDDO NOOTA MUXXE JIRO | 1 MOOTOOLLA 5-6
“Mannu Maganu Mine Diinaggaawe Woꞌmu Wodaninsanni Minino”
w11 2/1 15
Ati Tenne Afootto?
Libaanoosi daguwa, muuxate, biifadotenna tanni yite suꞌniitannote; hatteeno agurranna hawa gede difuguddannote. Selemooni qullaawa mine daguwatenni mininohu no yinoonni haqqa horoonsiꞌrate yeeti. Alba Libaanoosi ilaallara woꞌmitinoti tini daguwa, xa gooffanni daggino.
it-1 424
Daguwa
Qullaawa mine minate lowo daguwa horoonsiꞌnoonni daafira tenne haqqe karate, Mediteraaniyu baari qaccera nooha Xiroosi woy Sidooni katama massate, hattono haqqe gamba assine usurre wayi aana worre baaru qacce haaꞌre haꞌrate (haaꞌne haꞌnannihu Iyophe ikkara dandaanno) lowo loosaasine hasiissanno. Hakkiinni baattote aanaanni qolle Yerusaalamete katama massinanni. Konne looso loonsoonnihu Selemooninna Kiraami eꞌino sheemaati garinniiti. (1Mo 5:6-18; 2Du 2:3-10) Hakkunni gedensaannino daguwa gura agurroonnikki daafira, Selemooni gashshootisi giddo ‘daguwa base baalate fultino odahe gede assino’ yinoonni.—1Mo 10:27; Is 9:9, 10.
it-2 1077 guf. 1
Qullaawa Mine
Selemooni Israeelete giddonni 30,000 labballo doore, aganu kiiro 10,000 manna Libaanoosi soyanno; kuni manni qaensara keeshshannohu lame lame aganaati. (1Mo 5:13, 14) Qoleno Israeele ikkinokki manni giddonni, wolqate looso loossanno gede 70,000 manna, kinna boccanno gede qole 80,000 manna doorino. (1Mo 5:15; 9:20, 21; 2Du 2:2) Hakkiino sae looso loosiisannoha 550 labballo doorino; qoleno 3,300 manna lede worino; hatto assinohu insa kaaꞌlitanno gede ikkikki digatino. (1Mo 5:16; 9:22, 23) Insa giddo 250 Israeeloota, 3,600 qole wole gobba manna ikkitukki digattino.—2Du 2:17, 18.
Maganu Qaalinni Ronseemmore
g 5/12 17, saaxine
Qullaawu Maxaafi Kulanno Masaalo Addaxxinannite, Gafa 1
MASAALO WOꞌMITANNOHU YANNASERAATI
Qullaawu Maxaafi giddo kulloonniri yannasira woꞌmannota leellishanno lawishshi giddo mittu, 1 Mootoolla 6:1 noo hedooti; kuni qummeeshshi Moote Selemooni Yerusaalamete katamira Maganu mine minate looso hanafisiisino yannare kulanno. Togo yaanno: “Israeele Gibitsetenni fultuhunni 480 diri [479 woꞌma diro] gedensaanni, Selemooni Israeelete moohihunni shoolki diro, Ziifi yinannihura layinki aganira Qullaawa Mine mina hanafi.”
Qullaawu Maxaafite diru kiiro garinni Selemooni gashshootihu shoolki diri, 1034 K.A. hanafino. Hakko dirinni badhe hinge 479 woꞌma diro kiirrummoro, 1513 K.A. ikkanno; Israeele Gibitsetenni wolaphitinohu hakko dirooti.
WOXAWAAJJE 22-28
MAGANU QAALI GIDDO NOOTA MUXXE JIRO | 1 MOOTOOLLA 7
“Lame Mokkollo Daafira Kultanno Xaggenni Maa Ronseemmo?”
w13 12/1 13 guf. 3
‘Gaarratenni Duumo Siwiila Uꞌmitine Fushshidhinanni’
Moote Selemooni Yerusaalamete nooha qullaawa mine mini woyite, lowo camo horoonsiꞌrino. Tenne camo giddo roore Daawiti Sooriyu gobba qase qeeli woyite abbinote. (1 Duduwo 18:6-8) Kakkalaasine hayishshiꞌrate horoonsidhannoti “baaraho” yinanniti camotenni seekkinoonniti jawa gawate, 66,000 litire ikkanno waa haaꞌra dandiitannote; qoleno 30,000 kiilo ikkitara dandiitanno. (1 Mootoolla 7:23-26, 44-46) Qullaawa mine eꞌnanniwa camotenni seekkinoonniti lame mokkollo no. Tini mokkollo hojja 18 cigile ikkitanno. Qoleno hojja 5 cigile ikkitannota camote guuto afidhino. Tini mokkollo giddiido fanote; duꞌmille 7.5 sentimeetirenna baqo 1.7 meetire ikkitanno. (1 Mootoolla 7:15, 16; 2 Duduwo 4:17) Kuri uduunne baala seekkate horoonsiꞌnoonni camo lowo geya batiꞌra ikkitinoti dihuluullissannote!
it-1 348
Boeezi, 2
Selemooni mininohu ayirradu qullaawu minira barandaho camotenni seekkinoonnita lame jajjabba mokkollo worroonni; kuri mokkollo giddo aliyye ragaanni nooha Boeezi yinanni; hatto yaa “Jawaantetenni” yaa ikkitukki digattino. Wodiidi ragaanni uurrinsoonni mokkollicho qole Yakiini yinanni; hatto yaa “[Yihowa] Kaajjishe Uurriso” yaate. Hakko daafira mittu manchi soojjaatira hige uurre, qiniitinni gurara qole mitteenni nabbawiro, “[Yihowa Qullaawa Mine] jawaantetenni kaajjishe uurriso” yitanno tiro afiꞌrinoha ikkanno.—1Mo 7:15-21; MOKKOLLICHU GUUTO yaannoha lai.
Maganu Qaalinni Ronseemmore
it-1 263
Hayishshiꞌra
Yihowa qullaambetenni magansidhannori bisu keeraanchimmansa agadha hasiissannonsa. Xaadooshshu dunkaanirano ikko yannate gedensoonni qole qullaawu mini giddo assinanniri tenne leellishanno. Kakkalaanote Roorricha Aarooninna oososi buurri woyite, konne looso loonsanni yannara uddiꞌnanni uduunne uddidhara albaanni biso wayinni hayishshidhino. (Fu 29:4-9; 40:12-15; Le 8:6, 7) Kakkalaasine anganna lekka hayishshiꞌrate, xaadooshshu dunkaani giddo camotenni seekkinoonni gawatera noo waa horoonsidhanno; yannate gedensoonni qole Selemooni mininohu qullaawu mini giddo noota baaraho yinannite camote seekkinoonnite jawa gawatera noo waa horoonsidhanno. (Fu 30:18-21; 40:30-32; 2Du 4:2-6) Cubbo Agursiinsanni Barra kakkalaanote roorrichi biso lame hige hayishshiꞌranno. (Le 16:4, 23, 24) Azaazeeli meicho, saada kakkalo assine shiqinshanna gatino uullaasine, hattono kakkalo assine shiqinshannita duume saa qachu gobbaanni haaꞌre haꞌranno manchi wirro mannu heeꞌranno qacha higara albaanni bisonna uddanosi hayishshiꞌra hasiissannosi.—Le 16:26-28; Ki 19:2-10.
WOXAWAAJJE 29–WOCAWAARO 4
MAGANU QAALI GIDDO NOOTA MUXXE JIRO | 1 MOOTOOLLA 8
“Selemooni Shaqqillunninna Giddosinni Kae Mannu Albaanni Huuccino Huuccatto”
w09 11/15 9 guf. 9-10
Qullaawa Maxaafa Xiinxallite Huuccatto Assiꞌratto Gara Woyyeessiꞌri
9 Huuccattonke macciishshantanno gede giddonkenni kaꞌne huucciꞌra hasiissannonke. Layinki Mootoolla fooliishsho 8 kultanno garinni, 1026 K.A. Yihowaha qullaawa mine maassinsi yannara Selemooni Yerusaalamete gamba yiino manni albaanni giddosinni kae huuccatto assino. Gondooru taawoota Qullaawa Holge massine worrita qullaawa mine Yihowahu ayirrinyu gomichi woꞌmino; hatte yannara Selemooni huuccattotenni Magano galaxxino.
10 Selemooni huucciꞌrino huuccatto xiinxallatto woyite isi wodanu daafira coyiꞌrinore huwatate woꞌnaali. Selemooni manchu wodanita afinohu Yihowa calla ikkinota coyiꞌrino. (1 Mot. 8:38, 39) Qoleno Selemooni huucciꞌrino huuccatto cubbo loosino manchi ‘woꞌmu wodanisinni aagintaawe Maganunniwa higiro’ maaro afiꞌrara dandaannota leellishshanno. Diinu Maganu manna qafadeenna, Maganu manni woꞌmu wodaninsanni Isiwa higiro huuccatttonsa macciishshantanno. (1 Mot. 8:48, 58, 61) Hakko daafira, atino Magano wodaninni kaꞌe huucciꞌri!
w99 1/15 17 guf. 7-8
Umokki Heeshshi Assite Huucciꞌri
7 Callootinke heeꞌneno ikko mannu albaanni huuccatto assineemmo woyite, shaqqillunninna joongillunni assa hasiissannonke. (2 Duduwo 7:13, 14) Moote Selemooni Yerusaalamete minnoonniha Maganu mine massiinsi woyite mannu albaanni huuccatto assinohu joongillunna shaqqillunniiti. Selemooni Maganoho hoola yinoonni mine mininoha ikkirono, joongillunni togo yee huuccatto assino: “Magano Kaaliiqa, halaalinta ati uullate aana heeꞌrattoni? Gordoho aleenni noo gordi haaꞌrannohekkiha, kuni baattote aana noohu ani minoommo mini maminni ikkannohe?”—1 Mootoolla 8:27.
8 Selemooni gede ninkeno mannu albaanni huuccineemmo woyite, shaqqillunninna joongillunni huucca hasiissannonke. Huuccatto assineemmo woyite lawisiisate woꞌnaala hasiissannonkekkiha ikkirono, coyiꞌneemmo garinni joongille leellisha dandiineemmo. Joongillunni assinanni huuccatto mannu maalaꞌlanno gede assitannota diꞌꞌikkitino. Mannu ninke illachishanno gede ikkikkinni huucciꞌnanni heeꞌnoommo Magano illachishanno gede assa hasiissanno. (Maatewoosi 6:5) Huuccatto assineemmo woyite coyiꞌneemmorino shaqqillenna joongille leellishannoha ikka hasiissanno. Joongillu huuccinanni huuccatto Maganu mitto coye ninke hendoommo garinni assanno gede murrinsannita diꞌꞌikkitino. Hatteentenni Yihowa fajjosi ledo sumuu yaannore assanno gede eegama hasiissannonke. Faarsaasinchu huucciꞌrino huuccatto, Yihowa magarinni huucciꞌra hasiissannonkero leellishshannote. Isi togo yee huucciꞌrino: “Kaaliiqa ballo eeggatena gatisinke! Kaaliiqa ballo, assiꞌneemmore baala qineessinke.”—Faarso 118:25; Luqaasi 18:9-14.
Maganu Qaalinni Ronseemmore
it-1 1060 guf. 4
Gordo
Yerusaalamete qullaawa mine mininohu Selemooni, “gordoho aleenni noo gordi” Magano haaꞌra dandaannokkita coyiꞌrino. (1Mo 8:27) Woꞌmanka gordo kalaqinohu Yihowa ikkino daafira, isi heeꞌrannohu baalunku gordira aleenniiti; “suꞌmisi wole suꞌmuwanni rooranno; ayirrinyisino baattotenna gordoho aleenniiti.” (Fa 148:13) Mittu manchi mitto coye angasinni taakko gane bikkannonte gede, Yihowano gordo konni garinni bikka dandaanno. (Is 40:12) Selemooni coyiꞌrinori, Maganu heeꞌrannohu mittu bayichi nookkita leellishshaata diꞌꞌikkitino. Woy Maganu baalankawa no yaano diꞌꞌikkitino. Selemooni Yihowa daafira coyiꞌranni “gordoho noottowa heedhe” yaasi tenne leellishshanno; kuni gordi ayyaanu kalaqo heedhannowaati.—1Mo 8:30, 39.
Lallawo
km 5/10 2
Kiristaanu Huuccatto Assiꞌra Hasiissannonsa
1 Yihowara uminke wolqanni soqqama didandiineemmo. Isi loososi loonseemmo gede jawaante aannonke. (Fil. 4:13, NW) Suwashshu wodani noonsa manninni xaandeemmo gede sokkaasinesi widoonni kaaꞌlannonke. (Aju. 14:6, 7) Halaalu wixa winxeemmorinna waa hayikkinseemmori ninke ikkinummorono, lossannohu kayi Yihowaati. (1 Qor. 3:6, 9) Hakko daafira Kiristaanu iimi annansa Yihowa huucciꞌre iso addaxxannota leellisha lowo geya hasiissannote!
2 Ninkeneetira: Farciꞌneemmo yanna baalantera huuccatto assiꞌra hasiissannonke. (Efe. 6:18) Mayi daafira huucciꞌra dandiineemmo? Soqqammeemmo qoqqowi daafira dancha lao heedhannonke gedenna Yihowa worbimma aannonke gede huucciꞌra dandiineemmo. (Soq. 4:29) Qoleno suwashshu wodani noonsa manninni xaande insa Qullaawa Maxaafa xiinxallisa dandiineemmo gede kaaꞌlankera Yihowa huucciꞌra dandiineemmo. Hasaawinseemmo manchi xaꞌmo xaꞌminkero, dancha dawaro qola dandiineemmo gede kaaꞌlankera wodaninkenni harancho huuccatto assiꞌra dandiineemmo. (Neh. 2:4) Qoleno soqqansho balaxisiinseemmo gede hayyo aankera huucciꞌra dandiineemmo. (Yai. 1:5) Hatteeno agurranna, Yihowa soqqamaanosi asse ayirrisinonke daafira huuccattotenni galantummosiro hagiidhanno.—Qol. 3:15.
3 Wolootaho: Mimmitu daafirano huuccatto assa hasiissannonke; hasiisannoha ikkiro, mimmitu suꞌma ganne nafa huucca dandiineemmo. (Yai. 5:16; Soq. 12:5) Dhibbu albi geya soqqamattokki gede assinohe? Hatto ikkiro, fayyo ikkitino roduuwikki jawaatte soqqantanno gede huuccatto assi. Insa daafira assatto huuccatto lowo wolqa afidhinota deꞌooti! Hattono gashshaasine sabbakate loosinkera guficho ikkitannokki gede huucca hasiissannonke; konni garinni roduuwinke, ‘keerunni wodanaaꞌmite heeꞌra’ dandiitanno.—1 Xim. 2:1, 2, NW.
4 Sabbakate looso alame woꞌmate loosa shota diꞌꞌikkitino. ‘Jaante huucciꞌnummoro’ kayi konne looso Yihowa kaaꞌlonni umo fushsha dandiineemmo.—Rom. 12:12.