Qullaawu Maxaafi Rosaanoꞌne Cuuantanno Gede Kaaꞌlensa

1. Umi xibbi diro Yerusaalamete gamba yiino manni maa assanno gede kulloonninsa?

BATINYE gobbanni dayinohu addi addi afoo coyiꞌrannohu lowo manni, Yerusaalamete katamira gamba yee no. Hakko barra hambannikki coyi ikkino. Mitu Yihudu manni hedeweelcho hakko manni coyiꞌrannoha addi addi afoo coyiꞌra hanafi! Gamba yiino manni tenne lae dhagge assiꞌri; Yihudu manni yiinonsarinna soqqamaasinchu Pheexiroosi baalunkura kulinonsari kayi roore dhagge ikkinonsa. Hakko gamba yiino mannira Yesuusi Kiristoosa ammaniro gatara dandaannotano kulloonninsa. Mannu macciishshino sokka wodanaho coꞌinonsa. Kuni manni lowo geya dhagge assiꞌrino daafira, “Xa ma assino?” yee xaꞌmino. Hakkiinni Pheexiroosi, “Mitti mittiꞌne . . . cuuamme” yee qolinonsa.—Soq. 2:37, 38.

2. Konni birxichira maa xiinxallineemmo? (Aaniidi qoolira noo misile lai.)

² Hakkiinni mittu maalaꞌlisanno coyi ikkino. Hakko barra 3,000 meddi yaanno manni cuuame Kiristoosi rosaano ikkino. Yesuusi, harunsaanosi manna rosaano assitanno gede uyinonsahu lowo loosi konni garinni hanafino. Konne looso yannanke geeshsha loonsanni heeꞌnoonni. Xaa yannara kayinni mittu manchi boode saate giddo cuuamanno gede kaaꞌla didandiineemmo. Mittu Qullaawu Maxaafi rosaanchi cuuamate lowo agani woy mittu diri woy hakkuyi ale ikkitanno yanna hasiissannosiha ikkara dandaanno. Xa Qullaawa Maxaafa xiinxallisatto manchi nooha ikkiro, manna rosaano assa lowo looso ikkitinota huwatittokki digatootto. Konni birxichira, Qullaawu Maxaafi rosaanchikki cuuamanno gede kaaꞌlate maa assa dandaattoro xiinxallineemmo.

QULLAAWU MAXAAFI ROSAANCHIꞌNE ROSANNI NOORE LOOSU AANA HOSIISANNO GEDE KAAꞌLESI

3. Maatewoosi 28:19, 20 kultanno garinni, Qullaawu Maxaafi rosaanchi cuuamate maa assa hasiissannosi?

³ Mittu Qullaawu Maxaafi rosaanchi cuuamara albaanni Qullaawu Maxaafi roso loosu aana hosiisa hasiissannosi. (Maatewoosi 28:19, 20 nabbawi.) Isi rosinore loosu aana hosiisannoha ikkiro, Yesuusi coyiꞌrino lawishshira kulloonniha seekke ume minesi kinchu aana miꞌninoha “egennaamo mancho” lawanno. (Mat. 7:24, 25; Luq. 6:47, 48) Qullaawu Maxaafi rosaanchi rosinore loosu aana hosiisanno gede kaaꞌla dandiineemmohu hiittoonniiti? Hanni tennera kaaꞌlitannonketa sase hedo laꞌno.

4. Qullaawu Maxaafi rosaanchinke cuuamate deerra iillate sharramanno gede kaaꞌla dandiineemmohu hiittoonniiti? (“Rosaanchiꞌne Mixo Fushshiꞌrannonna Mixosi Wonshiꞌranno Gede Kaaꞌlesi” yitanno saaxineno lai.)

⁴ Rosaanchikki mixo fushshiꞌranno gede kaaꞌlisi. Hatto assa hasiissannohehu mayiraati? Hanni mitto lawishsha laꞌno: Seeda doogo hadhanni heedhe doogote laꞌꞌate baxisannore lawishshaho ilaalanna fooncho afittoro taxxi yite daaꞌꞌatattoha ikkara dandaanno. Hatto assittoro hadhanni noottowa hedittokki iillatto. Hatteente gede Qullaawu Maxaafi rosaanchi shiima yanna giddo wonshiꞌra dandaanno mixo fushshiꞌrasi, cuuamate fushshiꞌrino mixono wonshiꞌra dandaannota huwatanno gede kaaꞌlitannosi. Rosaanchikki mixo fushshiꞌranno gede kaaꞌlate, Hegerera Hagiidhitanni Heeꞌra Dandaatto! yaanno maxaafira nooha “Mixokki” yaanno gafa horoonsiꞌri. Mitto mittonka roso xiinxallitine guddini kiiro, “Mixokki” yaanno gafi hunda noo hedo, rosaanchu rosinore loosu aana hosiisate kaaꞌlitannosi gara hasaabbe. Rosaanchikki wonshiꞌrara hedoottoti wole mixo nooha ikkiro, “Wolere” yaannohu hunda borreessi. Rosaanchikki harancho yanna giddono ikko seeda yanna giddo wonshiꞌra dandaanno mixo daafira isi ledo hasaawate konne gafa ganyite horoonsiꞌri.

5. Maarqoosi 10:17-22 kultanno garinni, Yesuusi dureessu manchi maa assanno gede kulinosi? Mayira?

⁵ Qullaawu Maxaafi rosaanchikki heeshshosi gara biddi assiꞌranno gede kaaꞌlisi. (Maarqoosi 10:17-22 nabbawi.) Yesuusi, dureessu manchira afiꞌrinore baala hira shota ikkitannosikkita afino. (Maq. 10:23) Ikkirono Yesuusi kuni manchi afiꞌrinore baala hiranno gede kulinosi. Isi hatto yiinosihu baxinosi daafiraati. Mito woyite Qullaawu Maxaafi rosaanchinke konne coye biddi assiꞌrate diqixxaawino yine hendeemmo daafira, rosanni noore loosu aana hosiisanno gede jawaachishate hobbi ruxxi yineemmoha ikkara dandaanno. Mannaho akkala mannimma fushshe hooꞌle haaro mannimma uddiꞌrate lowo yanna hasiissansara dandiitanno. (Qol. 3:9, 10) Kayinni Qullaawu Maxaafi rosaanchiꞌne biddi assiꞌra hasiissannosire bayichonko fantine hasaabbinanniha ikkiro, isino mulenni biddi assiꞌrara dandaanno. Konni garinni hasaabbinanniha ikkiro, baxxinannisita leellishshinanni.—Far. 141:5; Law. 27:17.

6. Rosaanchu giddosita fushshe coyiꞌranno gede assitanno xaꞌmo xaꞌma hasiissannonkehu mayiraati?

⁶ Rosaanchoho mitte hajo daafira mayi macciishshamannosiro afate, giddosita fushshe coyiꞌranno gede assitanno xaꞌmo xaꞌma dandiineemmo. Togoo xaꞌmo rosaanchikki rosinore huwatinoronna mayyee ammanannoro afate kaaꞌlitannohe. Ganyitine konni garinni hasaabbinanniha ikkiro, albillitte shota ikkitinokki hajo kayissine hasaawa diqarrissannoꞌne. Hegerera Hagiidhitanni Heeꞌra Dandaatto! yaanno maxaafira togooti duucha xaꞌmo no. Lawishshaho roso 4te, “Suꞌmasi woshshatto woyite Yihowara mayi macciishshamannosiha lawannohe?” yitanno xaꞌmo no. Roso 9te qole “Mayi mayi daafira huucciꞌra hasiꞌratto?” yitanno xaꞌmo no. Umi qara rosaanchikkira togoo xaꞌmuwara dawaro qola qarra ikkitasira dandiitanno. Rosaanchu maxaafu giddo kulloonni qummeeshshuwanna misilla horoonsiꞌre heeshshi gotti asse hedanno gede qajeelsite kaaꞌlattosira dandaatto.

7. Woꞌnaalshuwa danchu garinni horoonsiꞌra dandiineemmohu hiittoonniiti?

⁷ Rosaanchikki maa assa hasiissannosiro huwatihu gedensaanni, hakkoye coye assanno gede jawaachishate woꞌnaalsha horoonsiꞌri. Lawishshaho, rosaanchikkira gambooshshe haꞌra qarra ikkitinosiha ikkiro, roso 4te “Egenno Lexxi” yaannohu hunda noota Yihowa Towaatinoe yitanno viidiyo leellishattosira dandaatto. Hegerera Hagiidhitanni Heeꞌra Dandaatto! yaanno maxaafi giddo “Ledde Xiinxalli” woy “Egenno Lexxi” yaanno gafi hunda togoo woꞌnaalshuwa afiꞌra dandaatto.b “Isi hatto assa dandiiro atino assa dandaatto” yitanni rosaanchokki wolu ledo heewisiisattokki gede qorophi. Hatto yee heda hasiissannosihu rosaancho umosiiti. Hatteentenni viidiyote giddo kulloonni manchi Qullaawu Maxaafi roso loosu aana hosiisanno gede kaaꞌlinosire luphi assite xawisi. Viidiyote giddo qummi assinoonniha qara qummeeshsha woy viidiyote giddo noo manchi assinore luphi assite kula dandaatto. Hakko mancho Yihowa kaaꞌlinosi gara xawisi.

8. Rosaanchinke Yihowa baxanno gede kaaꞌla dandiineemmohu hiittoonniiti?

⁸ Rosaanchikki Yihowa baxanno gede kaaꞌlisi. Hatto assa dandaattohu hiittoonniiti? Rosaanchikki Yihowa akatta daafira roore huwatanno gede kaaꞌlatto faro hasiꞌri. Yihowa baxxannosire kaaꞌlannohanna hagiirraamo Magano ikkinota rosaanchikki huwatanno gede kaaꞌlisi. (1 Xim. 1:11, NW; Ibi. 11:6) Rosaanchikki rosinore loosu aana hosiisasi kaaꞌlitannositanna tini qolte Yihowa baxannosita leellishshaata ikkitinota xawisse kulisi. (Isa. 48:17, 18) Isi Yihowa albinni roore baxanni haꞌri kiiro, biddi assiꞌra hasiissannosire baala biddi assiꞌrate kaꞌꞌanno.—1 Yoh. 5:3.

ROSAANCHOKKI RODUUWU LEDO EGENSIISI

9. Maarqoosi 10:29, 30 kultanno garinni, mittu manchi cuuame rosaancho ikkate umisi horo aguranno gede mayi kaaꞌlasira dandaanno?

⁹ Qullaawu Maxaafi rosaanchi cuuamate deerra iillate, umisi horo agura hasiissannosi. Aleenni qummi assinihu dureessu manchi gede, mite rosaano maalaamittete coye agura hasiissannonsaha ikkara dandaanno. Loossanno loosi Qullaawu Maxaafihu xintu seeri ledo sumuu yaannokkiha ikkiro, wole looso hasiꞌra hasiissannonsaha ikkara dandaanno. Batinye rosaano, Yihowa baxxannokki jaallansa agura hasiissannonsaha ikkara dandaanno. Woloota qole Yihowa Farciꞌraasine baxannokkihu mininsa manni giwansara dandaanno. Yesuusi mitootaho togoo coyibba facci asse agura qarra ikkitansara dandiitannota coyiꞌrino. Ikkollana iso harunsitannori irraabbannokkita kule qaale eino. Yihowa baxillu woꞌminota ayyaanaamittete maate oye insa maassiꞌrannonsa. (Maarqoosi 10:29, 30 nabbawi.) Qullaawu Maxaafi rosaanchikki tenne elto afiꞌranno gede kaaꞌla dandaattohu hiittoonniiti?

10. Manueeli woꞌnaalshinni maa rosootto?

¹⁰ Rosaanchikkira jaala ikkisi. Rosaanchikkira hedattosita leellisha lowo geya hasiissannote. Mayira? Hanni Meksikote heeꞌrannohu Manueeli coyiꞌrinore laꞌno. Isi Qullaawa Maxaafa xiinxallanno yanna qaage togo yiino: “Rosiisaanchiꞌya xiinxallisa hanafaera albaanni woꞌmanka woyite hiitto noommoro xaꞌmannoe. Isi baalankare fane hasaaweemmo gede assannoe. Isi ane daafira addinta hedannota wodanchoommo.”

11. Rosaanonke ninke ledo yanna sayisansa kaaꞌlitannonsahu hiittoonniiti?

¹¹ Yesuusi harunsaanosi ledo yanna sayisinonte gede atino rosaanokki ledo yanna sayisi. (Yoh. 3:22) Hasiisannoha ikkiro, ayyaanaamittetenni lophanni nooha Qullaawu Maxaafi rosaanchokki minikkira bunaho woy sagalete woy JW Biroodikaaste laꞌꞌanno gede koyisisi. Rosaanchikki ayyaannate woggara callatara dandaanno daafira, tenne yannara koyisittosiro roore hagiidhara dandaanno. Kazibiiwe yinannihu Ugaandaho heeꞌranno rodii togo yiino: “Rosiisaanchiꞌya xiinxallisannoe woyite Yihowa daafira rosoommonte gede, isi ledo yanna sayiseemmo woyiteno Yihowa daafira lowore rosoommo. Yihowa mannasi mageeshshi geeshsha towaatannoronna mannisino lowo geya hagiirraamma ikkinota laoommo. Anino hattoo heeshsho heeꞌra hasiꞌroommo.”

12. Xiinxallinseemmo woyite addi addi roduuwa koyisa hasiissannonkehu mayiraati?

¹² Xiinxallisatto woyite addi addi roduuwa koyisi. Mito woyite callootinke woy mittu rodii ledo calla xiinxallisa hasiꞌneemmoha ikkara dandaanno. Hatto assa ninkera injiitannonkeha ikkara dandaanno; ikkirono yannate kiiro addi addi roduuwi ledo xiinxallisanke rosaanchonke kaaꞌlitasira dandiitanno. Moldoovaho heeꞌrannohu Dimitiri yinanni rodii togo yiino: “Xiinxallisaera daannohu mittu mittunku halashshaanchi mitto coye xawisannoehu baxxino garinniiti. Tini rosoommo roso duuchu garinni hedeemmo gede kaaꞌlitinoe. Balaxe lowo roduuwi ledo egennamoommo daafira, mite yee gambooshshe haꞌrummo woyiteno hakkeya diborsoommo.”

13. Rosaanchinke gambooshshe daanno gede kaaꞌla hasiissannonkehu mayiraati?

¹³ Rosaanchikki songote gambooshshe daanno gede kaaꞌlisi. Mayira? Korkaatuno Yihowa mannisi mitteenni gamba yaanno gede hajajino; Yihowa magansiꞌneemmo doogga giddo mitte gambooshshe haꞌrate. (Ibi. 10:24, 25) Qoleno ammanate roduuwinke ayyaanaamittete maatenkeeti. Roduuwinke ledo gambooshshe assiꞌra, maatenke ledo coommitanno sagale mitteenni itate gedeeti. Rosaanchikki gambooshshe daanno gede kaaꞌlattosiha ikkiro, cuuamate lowo geeshsha hasiisanno coyi giddo mitto assanno gede kaaꞌlitayi noottosi. Ikkirono hatto assa isira shota ikka hooggasira dandiitanno. Hegerera Hagiidhitanni Heeꞌra Dandaatto! yaanno maxaafi rosaanchikki gambooshshe daannokki gede guficho ikkasira dandaannore qeeꞌlate kaaꞌlannosihu hiittoonniiti?

14. Rosaanchinke gambooshshe daanno gede jawaachisha dandiineemmohu hiittoonniiti?

¹⁴ Rosaanchikki gambooshshe daanno gede jawaachishate Hegerera Hagiidhitanni Heeꞌra Dandaatto! yaanno maxaafa roso 10 horoonsiꞌri. Kuni maxaafi fulara albaanni woꞌnaalshu noonsa roduuwi 10^ki roso woꞌnaalte laꞌanno gede assinoonni; insa konne gafa horoonsidhe rosaanonsa gambooshshe dagganno gede kaaꞌla dandiitino. Ikkirono, rosaanchokki gambooshsheho koyisate roso 10 iilla geeshsha agara hasiissannohe yaa diꞌꞌikkino. Dandaamannoha ikkiro xiinxallo hanafanni heeꞌreenna koyisisi; hattono woꞌmanka woyite koyisa agurtooti. Guficho ikkannonsa coyi rosaanchu rosaanchu garinni babbaxxara dandaanno. Hakko daafira mittu mittunku rosaanchikkira hasiisannori maatiro seekkite wodanchi; hattono iso kaaꞌla dandaatto gara hedi. Rosaanchikki mite yanna geya gambooshshe daa hoogiro hexxo mudhitooti. Daa geeshsha cincilla, kayi koyisa agurtooti.

ROSAANCHIKKI WAAJJANNOKKI GEDE KAAꞌLISI

15. Rosaanchinke maa waajjara dandaanno?

¹⁵ Umi qara Yihowa Farciꞌraasincho ikka waajjootto? Waajjoottohu ‘Mannu albaanni sabbaka horo didandeemmo’ yite hedde ikkara dandaanno. Woy qole ‘Maateꞌya woy jaallaꞌya gibbannoe’ yite waajjoottoha ikkara dandaanno. Hatto ikkiro rosaanchikki qarri leellannohe. Yesuusi mitu manni waajjara dandaannota coyiꞌrino. Ikkirono isi harunsaanosi waajjite Yihowara soqqama agurtannokki gede jawaachishinonsa. (Mat. 10:16, 17, 27, 28) Yesuusi harunsaanosi waajjitannokki gede kaaꞌlinonsahu hiittoonniiti? Ati isi lawishsha harunsa dandaattohu ma garinniiti?

16. Rosaanchinke ammanannore wolootaho farciꞌranno gede qajeelsa dandiineemmohu hiittoonniiti?

¹⁶ Rosaanchikki sunu sununni ammanannore woleho kulanno gede qajeelsisi. Yesuusi sabbakkanno gede soyinsa woyite rosaanosi waajjitinoha ikkara dandaanno. Kayinni Yesuusi mama sabbakkannoronna mayite sabbakkannoro rosiise kaaꞌlinonsa. (Mat. 10:5-7) Ati Yesuusi lawishsha harunsa dandaattohu hiittoonniiti? Rosaanchikki ayeoora farciꞌra dandaannoro afanno gede kaaꞌlisi. Lawishshaho, ‘Konne Qullaawu Maxaafi roso macciishshoommero kaaꞌlannosi yite hedatto manchi no?’ yite xaꞌmi. Hakkiinni konne halaale dancha gede asse kula dandaannohu hiittoonniitiro leellishshe kaaꞌlisi. Hegerera Hagiidhitanni Heeꞌra Dandaatto! yaanno maxaafira nooha “Mitu Manni Togo Yaanno” hattono “Mitu Manni Togo Yee Xaꞌmara Dandaanno” yaanno gafa horoonsidhine isi ledo rosiisiꞌra dandiitinanni. Hatto assatto woyite, rosaanchikki Qullaawa Maxaafa horoonsiꞌre dawaro leellanno garinninna hayyotenni qolanno gede qajeelsisi.

17. Rosaanchinke Yihowa addaxxanno gede kaaꞌlineemmo woyite Maatewoosi 10:19, 20, 29-31te noo hedo horoonsiꞌra dandiineemmohu hiittoonniiti?

¹⁷ Rosaanchikki Yihowa addaxxanno gede kaaꞌlisi. Yesuusi rosaanosira Yihowa baxannonsa daafira kaaꞌlannonsata kulinonsa. (Maatewoosi 10:19, 20, 29-31 nabbawi.) Rosaanchikkira Yihowa isono kaaꞌlannosita kulisi. Mixosi wonshiꞌranno gede Yihowa kaaꞌlasira isi ledo huuccatto assidhe, Yihowa addaxxanno gede kaaꞌla dandaatto. Poolaandete heeꞌrannohu Firaansiziiki togo yiino: “Rosiisaanchiꞌya huuccatto assanno yannara duucha woyite mixoꞌya daafirano qummi assanno. Yihowa rosiisaanchiꞌya huuccattora dawaro qolinota laummoti, anino bayichonko huuccatto assiꞌra hanafummo. Songotenna qoqqowu gambooshshe haꞌreemmo gede loosu basera fajjinannie gede xaꞌmiꞌrummo yannara Yihowa kaaꞌlinoeta huwatoommo.”

18. Yihowa, manna rosiisate diinaggaambe assineemmore ma garinni laꞌꞌanno?

¹⁸ Yihowa Qullaawu Maxaafi rosaanonkera lowo geya hedanno. Isi, ninke mannu isiwa shiqanno gede kaaꞌlate diinaggaambe assineemmore naadanno; qoleno tennera baxannonke. (Isa. 52:7) Xa Qullaawa Maxaafa xiinxallisatto manchi noohekkiha ikkiro, wolootu xiinxallissanno woyite ledonsa xiinxallisse rosaano cuuamate deerra iillitanno gede kaaꞌla dandaatto.