‘Isi Yaannota Macciishsha’ Agurtinoonte

1-2. (a) Sasu Yesuusi soqqamaasine ma assitanno gede kulloonninsa? Insa ma assituyya? (b) Konni birxichira maa ronseemmo?

SOQQAMAASINCHU Pheexiroosi, Yaiqoobinna Yohaannisi 32 M.D., Faasiku Ayyaana ayirrinsihu gedensaanni maalaꞌlissanno ajuuja laꞌino. Mittu seedu ilaali aana heedheenna albansaanni Yesuusi dani soorrame wole ikki; kuni ilaali Hermooni Ilaala ikkikki digatino. “Albisino arrishshote gede xawi; uddanosino waajjo qoffe ikkite caabbichimma xabbu.” (Mat. 17:1-4) Ajuujate jeefora soqqamaasine Maganu togo yaanna macciishshitu: “Hagiirsiisannoehu, baxeemmohu Beettiꞌya konneeti; isi yaannota macciishshe!” (Mat. 17:5) Sasunku soqqamaasine Yesuusi yaannore macciishshitinota heedhino heeshshonni leellishshino. Ninkeno insa lawishsha harunsa hasiꞌneemmo.

² Sai birxichira Yesuusi yaannore macciishshate mito coye assa agura hasiissannonketa ronsoommo. Konni birxichira, Yesuusi assineemmo gede kulinonkeha lame coye ronseemmo.

“RUUKKASHSHO WAALCHO HIGGINE EꞌE!”

3. Maatewoosi 7:13, 14 kultanno garinni maa assa hasiissannonke?

³ Maatewoosi 7:13, 14 nabbawi. Yesuusi lame addi addi doogowa massannohu lamu waalchi noota kulinota wodanche; mittu “ruukkashshoho” mittu “halaꞌladoho.” Wole sayikki doogo dino. Hiittenne doogora haꞌneemmoro doodha hasiissannonke. Hegere heeshsho afiꞌneemmo woy hoongeemmo gede assannoha ikkino daafira kuni doorshi doodhineemmo doorsha baala rooreho.

4. “Halaꞌlado” doogo hiittoote?

⁴ Lamente doogo mereero noo badooshshe wodancha hasiissannonke. “Halaꞌlado” doogo haꞌrate qarrissannokkita ikkitino daafira lowo manni haꞌra doodhannote. Batinyu manni tenne doogora haꞌranna lowo manni assannore assa doodhino; tini dadillissannote! Insa mannu tenne doogora haꞌranno gede kakkayisannohu Sheexaane Daawuloosi ikkinotanna tini doogo baonniwa massitannota ikkitinota dihuwattino.—1 Qor. 6:9, 10; 1 Yoh. 5:19.

5. Mitu manni “ruukkashsho” doogo afiꞌratenna tenne doogora haꞌra hanafate maa assino?

⁵ Layinki doogo kayinni ‘ruukkashshote;’ Yesuusi tenne doogora haꞌranno manni shiima ikkinota kulino. Mayira? Yesuusi aante noo kiirora harunsaanosi kaphaano himanaano qorophitanno gede kulinonsa. (Mat. 7:15) Mitu manni lowo kume ikkitanno ammaꞌno noota coyiꞌranno; qoleno batinye ammaꞌno halaale rosiinseemmo yite coyidhanno. Lowo miliyoone ikkanno manni addi addi ammaꞌno batidhinohura hexxo mudhinonna gurchaawino daafira heeshshonniwa massitanno doogo hasiꞌrate nafa diwoꞌnaalanno. Kayinni heeshshonniwa massitanno doogo afiꞌra dandiinanni. Yesuusi togo yiino: “Rosiisoommoꞌne coye agadhitiniro halaalenka rosaanoꞌya ikkitinanni. Halaale affinanni; halaaluno borojjimmatenni fushshannoꞌne.” (Yoh. 8:31, 32) Ati kayinni batinyu manni hoode dihaꞌrootto; hatteentenni halaale hasiꞌrootto; tini hagiirsiissannote. Maganu maa assinammora hasiꞌrannoro afate Qaalesi seekkite xiinxalla hanafootto hattono Yesuusi rosiisino roso macciishshootto. Yihowa kaphu ammaꞌno rosiissanno rosonna Qullaawa Borro ledo sumuu yaannokki ayyaanansa woy assootensa gimbammora hasiꞌrannotano rosootto. Qoleno Yihowa assinammora hasiꞌrannore assanna iso hagiirsiisannokki rosicho agura shota ikkitinokkita huwatootto. (Mat. 10:34-36) Biddi assiꞌra hasiissannohe coye biddi assiꞌra shota ikkitinohekkiha ikkara dandaanno. Ikkirono iimi Annakki baxatto daafiranna iso hagiirsiisa hasiꞌratto daafira biddi assiꞌra hasiissannohere biddi assiꞌrootto. Tenne assakkinni isi lowo geeshsha hagiidhinoti dihuluullissannote!—Law. 27:11.

RUUKKASHSHO DOOGONNI FULLUMMOKKINNI HEEꞌRA DANDIINEEMMO GARA

6. Faarso 119:9, 10, 45, 133 kultanno garinni ruukkashsho doogonni fullummokkinni heeꞌneemmo gede kaaꞌlannonkeri maati?

⁶ Ruukkashsho doogora haꞌra hananfummohu gedensaanni tenne doogonni fullummokkinni heeꞌrate kaaꞌlankera dandaannori maati? Hanni mitto lawishsha laꞌno. Ilaalu qooxeessira heedhannote ruukkashsho doogora makeena oofanno mannira agarooshshe ikkanno gede doogote qaccera huxxa huxxinanni. Konne huxxa huxxinannihu makeenu quwa sae huxxunniwa gamba yaannokki gede woy doogotenni agure fule galchamannokki gede kaaꞌlateeti. Makeena oofanno manni kuni huxxi hasiꞌnummota ikkineemmokki gede hoolinonke yee coyiꞌramannokkiti egennantinote. Qullaawu Maxaafi giddo noohu Yihowa biddishshino konni huxxi gedeeti yaa dandiinanni. Isi biddishshi ruukkashsho doogonni fullummokki heeꞌneemmo gede kaaꞌlannonke.—Faarso 119:9, 10, 45, 133 nabbawi.

7. Wedellu ruukkashsho doogo ma garinni laꞌꞌa hasiissannonsa?

⁷ Wedella, mito woyite Yihowa biddishshi furro fuuqqo hoꞌlinoꞌnehu gede assitine heddinanni? Sheexaanu hatto yitine heddinara hasiꞌranno. Isi halaꞌlado doogora haꞌranno manni assannore illachishshinaranna insa hagiirraamma ikkitinohu gede assitine heddinara hasiꞌranno. Isi ledoꞌne rossannori woy interneetete widoonni laꞌinanni manni assannore heddine ‘lowori gate bainonke’ yitine heddinanni gede assate woꞌnaalanno. Sheexaanu, Yihowa biddishshi ‘woꞌmunni woꞌma hagiirraamma ikkineemmokki gede assinonke’ yitine heddinara hasiꞌranno.b Kayinni tenne qaagge: Sheexaanu isi doogo hadhannori jeefote mayi iillannonsaro affara dihasiꞌranno. Yihowa kayinni heeshshote doogonni fultukki heedhannorira qixxeessinore xawise kulinoꞌne.—Far. 37:29; Isa. 35:5, 6; 65:21-23.

8. Wedellu Olaafi lawishshinni maa rosanno?

⁸ Hanni mittu Olaafi yinanni wedellichi woꞌnaalshinni maa ronseemmoro laꞌno.c Iso ledosi rossannori amanyoote bainore assanno gede xixxiibbinosi. Isi Yihowa Farciꞌraasine Qullaawu Maxaafi biddishshi garinni heedhannota kulinsata, mitu ledosi rosanno seenni insa ledo fooranno gede roore xixxiiwinosi. Olaafi kayinni gara ikkinore assate murciꞌrino. Isira iillinosi fonqoli konne calla diꞌꞌikkino. Olaafi togo yiino: “Rosiisaanoꞌya yuniversite eꞌꞌe roseemmo gede ammansiissaera woꞌnaaltino; insa hatto assummoro mannu ayirrisannoeta kultinoe. Qoleno hatto assa hoogummoro qinaabbino heeshsho heeꞌra dandeemmokkita kultinoe.” Olaafi konne fonqolo gargadhanno gede kaaꞌlinosiri maati? Isi togo yiino: “Songote noo roduuwi ledo nooe jaaloomi lexxanno gede assiꞌroommo. Insa maateꞌya gede ikkitinoe. Qoleno Qullaawa Maxaafa seekke xiinxalla hanafoommo. Seekke xiinxallummo kiiro cuꞌmiꞌroommohu halaale ikkinota albinni roore buuxoommo. Hakko daafira Yihowara soqqamate murciꞌroommo.”

9. Ruukkashsho doogonni fultukkinni heeꞌra hasidhannori maa assa hasiissannonsa?

⁹ Sheexaanu heeshshote doogonni agurtine fultinanni gede assa hasiꞌranno. Isi, lowo manni haꞌrannota ‘baote widira massitanno’ doogo hadhinara hasiꞌranno. (Mat. 7:13) Ikkirono, Yesuusi yaannore macciishsha agura hoongummoronna tenne doogo agarooshshe ikkitannonkehu gede assine laꞌnummoro ruukkashsho doogonni fullummokki heeꞌra dandiineemmo. Hanni aanchine Yesuusi assineemmo gede kulinonkeha wole coye laꞌno.

RODIIKKI LEDO ARAARAMI

10. Maatewoosi 5:23, 24 kultanno garinni Yesuusi kulinonkehu assa hasiissannonke coyi maati?

¹⁰ Maatewoosi 5:23, 24 nabbawi. Yesuusi macciishshanni noosihu Yihudu mannira insa lowori gede asse laꞌꞌannohu magansiꞌrate amanyooti daafira coyiꞌranni no. Hanni mittu manchi qullaawa mine, kakkallanni saada abbe kakkalaanchoho aara qixxaawe no yine hendo. Hatte yannara kuni manchi rodiisira koffi yiinoti qulli yitusiro kakkalara abbino saada hakko wore agure ‘haꞌra’ hasiissannosi. Mayira? Yihowara kakkalo shiqishiꞌratenni roorannori nooni? Yesuusi “Balaxxe giwamootto rodiikki ledo araarami” yee xawise kulino.

11. Yaiqoobi Eesawu ledo araaramate assinore xawisi.

¹¹ Yaiqoobi xagge xiinxalline keere kalaqate daafira lowore ronseemmo. Yaiqoobi ilamino gobbanni xeertiꞌre haꞌre mito 20 diro keeshshihu gedensaanni, Maganu sokkaasinchu widoonni agure gobbasi higganno gede kulinosi. (Kal. 31:11, 13, 38) Kayinni mittu qarri no. Bayiru rodiisi Eesawu iso shaa hasiꞌrino. (Kal. 27:41) Yaiqoobi, Eesawu xaa geeshsha koma amaxxe nooha ikkara dandaanno yee hedino daafira ‘lowo geeshsha waajjino.’ (Kal. 32:7) Yaiqoobi rodiisi ledo araaramate maa assiyya? Umo isi tenne hajo Yihowara kule seekke huuccatto assiꞌrino. Hakkiinni, Eesawura afansha soyinosi. (Kal. 32:9-15) Jeefote lowo diro babbaxxite keeshshitino roduuwi xaadduta Yaiqoobi Eesawu ayirrisannota leellishino. Isi Eesawura lame sase hige calla ikkikkinni lamala hige kumbuulino! Yaiqoobi isonooto heeshshi asse hattono rodoosi ayirrise isi ledo araaramino.—Kal. 33:3, 4.

12. Yaiqoobi lawishshinni maa ronseemmo?

¹² Yaiqoobi rodiisi ledo xaadate assinorinninna iso shiqe hasaawisino garinni lowore ronseemmo. Yaiqoobi isonooto heeshshi asse Yihowa kaaꞌlannosi gede huucciꞌrino. Hakkiinni rodiisi ledo araaramate dandiire baala asse huuccattosi ledo sumuu yaannore assino. Yaiqoobi rodiisi ledo xaaditi bushu ayeti yee diheewisamino. Yaiqoobi mixo rodiisi ledo araaramate. Ninke isi lawishsha harunsa dandiineemmohu hiittoonniiti?

WOLOOTU LEDO KEERE KALAQA DANDIINANNI GARA

13-14. Ammanate rodoonke koffi assinummoro maa assa hasiissannonke?

¹³ Heeshshote doogora haꞌnanni heeꞌnoommore ikkinoommo daafira, roduuwinke ledo salaametenni heeꞌra hasiꞌneemmo. (Rom. 12:18) Ammanate rodoonke koffi assinoommoti leeltunkero maa assa hasiissannonke? Yaiqoobi gede Yihowa eeggifante huucciꞌra hasiissannonke. Rodiinke ledo araaramate assineemmore maassiꞌrannonke gede Yihowa huucciꞌra dandiineemmo.

¹⁴ Qoleno yanna gaaꞌmine ninkeneeto layiꞌra hasiissannonke. Ninkeneeto aante noo gedee xaꞌmuwa xaꞌma dandiineemmo: ‘Rodiiꞌya ledo araaramate aneneeto heeshshi asse soꞌroꞌya ammaneemmo? Rodiiꞌya ledo araaramate sharrameemmota laꞌanno woyite Yihowaranna Yesuusira mayi macciishshamannonsa?’ Tenne xaꞌmora qolleemmo dawaro Yesuusi yaannore macciishshineemmo gedenna rodiinke ledo araaramate ninkeneeto heeshshi assineemmo gede kakkayissannonke. Togo assate Yaiqoobi lawishsha harunsa dandiineemmo.

15. Efesooni Sokka 4:2, 3 noo amaale harunsanke rodiinke ledo araaramate kaaꞌlitannonkehu hiittoonniiti?

¹⁵ Yaiqoobi Eesawu ledo xaadi yannara isonooto heeshshi assa hoogoommero mayi kalaqamara dandaannoro hedi! Coyi horo bushara dandaanno. Rodiinke ledo kawa kaꞌaanni higinonke coye tirate hasaambeemmo woyite ninkeneeto heeshshi assa hasiissannonke. (Efesooni Sokka 4:2, 3 nabbawi.) Lawishsha 18:19, (NW) togo yitanno: “Miincoonni rodii qiinshoonni kataminni roore beꞌe yaannokkiho; kinchu huxxi cufani gede ikkite kaajjitino gibbono no.” Miincoonni rodii “kinchu huxxi” gedeeti. Ninkeneeto heeshshi assine maaro xaꞌmiꞌra togoo rodii ledo araaramate kaaꞌlitannonke.

16. Balanxe maa heda hasiissannonke? Mayira?

¹⁶ Qoleno rodoonke mayine hasaawinseemmoronna ma garinni hasaawinseemmoro balanxe seekkine heda hasiissannonke. Qixxaambummohu gedensaanni rodoonke isi ledo dancha aante heedhannonke gede assanno garinni hasaawisa hasiissannonke. Isi umi qara coyiꞌrannori baxisa hoogankera dandaanno. Togoo woyite hanqa woy soꞌnoommori ninke ikkinoommokkita kula rakkankera dandiitanno; kayinni tini rodiinke ledo araarammeemmo gede kaaꞌlitanno? Dikaaꞌlitanno. Bushu ayetiro kulantenni, roore hasiisanno coyi rodiinke ledo keere kalaqa ikkitinota qaaga hasiissannonke.—1 Qor. 6:7.

17. Gilberti lawishshinni maa rosootto?

¹⁷ Gilberti yinanni rodii keere kalaqate lowo geeshsha sharramino. Isi togo yiino: “Meya beettoꞌya ledo coyi kawa kaꞌaa hige keeshshinonke. Lame diro saꞌanno yanna, ise ledo keere kalaqate ise danchu garinni hasaawisate woꞌnaaloommo.” Gilberti wolere maa assino? Isi lede togo yiino: “Ise hasaawisammora albaanni, huuccatto assiꞌreemmo hattono gara ikkinokkire coyidhuro hanqeemmokki gede wodanaꞌya qixxeessiꞌreemmo. Gatona yaate qixxaawa hasiissinoe. Qoossoꞌya agadhate sharramantenni keeru heeꞌranno gede assate sharrama hasiissannoeta huwatoommo.” Tini mayi guma abbituyya? Gilberti togo yiino: “Xaa yannara maateꞌya miilla baalante ledo dancha aante nooe daafira giddoyidi keere afiꞌroommo.”

18-19. Mitto mancho koffi assinummoro maa assate murciꞌra hasiissannonke? Mayira?

¹⁸ Xaa geeshsha ronsummonte gede, mitto ammanate rodookki koffi assoottota huwatittoro maa assate murciꞌra hasiissannohe? Rodiikki ledo araaramate Yesuusi amaale harunsi. Tenne daafira Yihowa huucciꞌri hattono keere kalaqattoha ikkatto gede kaaꞌlahera qullaawa ayyaanasi addaxxi. Hatto assittoro hagiirraamo ikkatto hattono albinni roore Yesuusa macciishshitanni noottota leellishatto.—Mat. 5:9.

¹⁹ Yihowa “beetekiristaanete [woy songote] umo” ikkinoha Yesuusa horoonsiꞌre baxillunni biddishsha aanni noonke daafira lowo geeshsha galanteemmosi. (Efe. 5:23) Soqqamaasinchu Pheexiroosi, Yaiqoobinna Yohaannisi gede Yesuusi “yaannota” macciishshate murciꞌno. (Mat. 17:5) Koffi assinoommohu ammanate rodiinke ledo keere kalanqe tenne assa dandiineemmo gara ronsoommo. Togo assineemmohanna heeshshonniwa massitannote ruukkashsho doogonni fullummokki heeꞌneemmoha ikkiro xaa yannara lowo atoote, albillitte qole gawalo nookki hagiirre afiꞌneemmo.