Woloota Giwanno Manni Batiꞌrinohu Mayiraati?

Alamete aana mimmito giwanno manni batiꞌrinohu mayiraati? Tenne afate woloota giwate yaa mayyaatero, mannu woloota giwa hanafinohu mayiraatiro hattono woloota giwanno manni batiꞌrinohu hiittoonniitiro afa hasiissaanke.

Woloota Giwate Yaa Mayyaate?

Woloota giwate yaa wole mancho woy wole gaꞌre effiꞌre woy tiyyiꞌre giwate yaate. Woloota giwate yaa shiima yanna geya hanqe agura calla diꞌꞌikkitino.

MANNU MANNA GIWA HANAFINOHU MAYIRAATI?

Mannu manna giwa hanafanno gede assinohu batinyu korkaati no. Duucha woyite mannu woloota giwannohu assino coyinni ikkikkinni ayimmansanniiti. Mannu giwanno manna bushuullu gede, manna gawajjannohu gede, woy woyyaawa dandaannokkihu gede asse laꞌꞌara dandaanno. Qoleno togoo manna woffi asse laꞌꞌara, hattono qarra woy dano kalaqqaari gede asse laꞌꞌara dandaanno. Wolootu manna gibbannohu konni albaanni gawajjinoonninsa daafira, taashsho xeꞌinore assinoonninsa daafira woy wolu qarri iillinonsa daafira ikkara dandaanno.

WOLOOTA GIWANNO MANNI BATIꞌRANNOHU HIITTOONNIITI?

Mittu manchi xaade egenninokki mancho nafa giwara dandaanno. Lawishshaho mittu manchi baxannonna ayirrisanno manni woloota giwino daafira calla isino hedikkinni insa lawishsha harunse woloota giwara dandaanno. Konni garinni, woloota giwanno manni batiꞌrara dandaanno; hattono dagoomu giddo togoori halaꞌlara dandaanno.

Mannu woloota giwannohu hiittoonniitiro anfummoro, togoo manni batiꞌrinohu mayiraatiro huwanteemmo. Ikkirono alamete aana batidhinota manna giwate hedo hooꞌlate giwa hanaffinohu ma garinniitiro afa hasiissannonke. Qullaawu Maxaafi giwa hanaffino gara kulannonke.

QULLAAWU MAXAAFI GIWA HANAFFINO GARA KULANNONKE

Mimmitunniwa hige doyannohu lamu worbichi manna giwa batidhinota leellishanno. 1. Kaphu duduwo, wolootu coyidhannore, tuqu xaadooshshenna odoote kullannire. 2. Bude ammaˈnonna sircho afa hooga. 3. Mitiri soorramanno yine, mitore hoongeemmo yine hattono gaˈa mayi ikkakka yine waajja. 4. Manna giwa, manna mulla kae giwa, mallaadanna finqille.

UMO GIWA HANAFINOHU MANCHI BEETTO DIꞌꞌIKKINO. Giwa hanaffinohu gedensoonni Sheexaane Daawuloosi ikkino sokkaasinchi iima Maganoho finqili woyiteeti. Daawuloosi Maganoho finqili yannara ‘manna shiino.’ Isi kaphaanchohonna kaphu annaati; hundinni kayise mannu mimmito giwanno gedenna aaraawanno gede assa diagurino. (Yohaannisi 8:44; 1 Yohaannisi 3:11, 12) Qullaawu Maxaafi isi xagaraamo, hanqaaleessanna aaraawannoha ikkinota kulanno.—Iyyoobi 2:7; Yohaannisi Ajuuja 12:9, 12, 17.

CUBBAATAAMMA IKKITINOTE MANNU OOSORA MIMMITO GIWA RAKKANNONSA. Umi manchi Addaami Sheexaanu gede cubbu doogo haꞌrino. Konninni kainohunni, mannu cubbo ragiꞌre guuntete xeꞌne noonsare ikkino. (Roomu Sokka 5:12) Addaamihu bayiru beetti Qaayeeli Aabeeli giwino daafira shiino. (1 Yohaannisi 3:12) Hige batinyu manni woloota baxannohonna mararannoho. Kayinni guuntete xeꞌnenni kainohunni, rooru manni umosi calla baxannoho, dhiibbaataamohonna naaxxaleessaho; tini akatta mannu roore mimmito giwanno gede assitannote.—2 Ximootewoosi 3:1-5.

MANNU INSA GEDEEHA IKKINOKKI MANNA GIWARA DANDAANNO. Heeꞌnoommo alamera mannu kakkachanna haxawarra ikkino daafira, mimmito giwanno manni batiꞌranni no. Hanqaaleessu, manna mulla kae giwannohu, xonamannohu, waajjishiishannohu hattono finqilu manni batiꞌrinohu “tini gobba” woy alame “gudisante bushunni” yaano Sheexaanu Daawuloosinni ‘amadantinohuraati.’—1 Yohaannisi 5:19.

Ikkollana Qullaawu Maxaafi giwa hanaffinohu ma garinniitiro kule calla diaguranno. Hatteentenni tennera malu maatirono kulanno.