Lowo Geeshsha Kaaꞌlitannonketa Hundi Masaalo

1. Yihowa Addaaminna Heewani cubbo loossuhu gedensaanni mulenni maa assino? (Kalaqama 3:15)

YIHOWA Addaaminna Heewani cubbo loossuhu gedensaanni mulenni, mitte dhagge ikkitanno masaalo widoonni sirchinsara hexxo uyino. Isi kulinore Kalaqama 3:15 borreessinoonni.—Qummeeshsha nabbawi.

2. Kalaqama 3:15 noo masaalo lowo geeshsha hasiissannota ikkitinohu mayiraati?

² Tini masaalo noohu Qullaawu Maxaafihu umi maxaafiraati. Qoleno tini masaalo lowo geeshsha hasiissannote. Mayira? Korkaatuno Kalaqama 3:15 noo masaalo Qullaawu Maxaafite qara sokkaati. Qoleno wole Qullaawu Maxaafi maxaaffa tenne masaalo ledo xaadooshshe afidhinote. Tenne masaalora, mannu ooso gatisannohu hattono Daawuloosinna busha harunsaanosi hunannohu daannota kulloonni.b Tini masaalo woꞌmitanno woyite Yihowa magansiꞌranno manni baalu hagiirraamo ikkanno.

3. Konni birxichira maa xiinxallineemmo?

³ Konni birxichira Kalaqama 3:15 noo masaalo daafira aante noo xaꞌmuwara dawaro afiꞌneemmo: Masaalote giddo kulloonniri ayeooti? Masaalo woꞌmitinohu hiittoonniiti? Tini masaalo woꞌmase ninke kaaꞌlitannonkehu ma garinniiti?

MASAALOTE GIDDO KULLOONNIRI AYEOOTI?

4. ‘Hamashshoho’ yinihu ayeti? Tenne mayinni anfeemmo?

⁴ Kalaqama 3:14, 15 kulloonniri ‘hamashshoho, hamashshu sirchooti, manchotenna manchote sirchooti.’ Qullaawu Maxaafi kuri mittu mittunku ayimma anfeemmo gede kaaꞌlannonke.c Hanni balanxe ‘hamashshu’ ayetiro laꞌno. Addu hamashshi Yihowa Edeni Gannatete coyiꞌrinore huwata didandaanno. Hakko daafira Yihowa yoo yiinohu hedate dandoo noosi kalaqamira ikkinoti dihuluullissannote. Kuni kalaqami ayeti? Yohaannisi Ajuuja 12:9 ‘hamashshoho’ yinihu ayetiro xawisse kultanno. Qummeeshshu, ‘biꞌre albi hamashsho’ yinihu Sheexaane Daawuloosi ikkinota xawise kulanno. Ikkina hamashshu sirchi ayetiyya?

5. Hamashshu sircho ikkitinori ayeooti?

⁵ Mito woyite Qullaawu Maxaafi giddo “sircho” yaanno qaale horoonsiꞌnoonnihu wolu faale hadhe, fiidhe isi ikkaata ikkiteenna oososi gede assine kiirroonnire kulateeti. Hakko daafira hamashshu sirchi Sheexaanu gede Magano Yihowanna mannasi gibbannoreeti ammanantinokki sokkaasineetinna mannu oosooti. Nohi yannahu baote wayi waro iima noonsa bayicho agurtino sokkaasinenna anninsahu Daawuloosihu gedeehu bushu akati noonsa mannino hamashshu sirchi widooti.—Kal. 6:1, 2; Yoh. 8:44; 1 Yoh. 5:19; Yih. 6.

6. ‘Manchote’ yiniti Heewani diꞌꞌikkitino yineemmohu mayiraati?

⁶ Hanni aanchine ‘manchote’ yiniti ayetiro laꞌno. Tini mancho Heewani diꞌꞌikkitino. Mayira? Hanni mitto korkaata laꞌno. Masaalote giddo manchote sirchi hamashshu umo ‘cancanannota’ kulloonni. Aleenni ronsummonte gede hamashshu yaano Sheexaanu ayyaanu kalaqooti; hakko daafira guuta ikkinokkihu Heewani sirchi isi umo cancana didandaanno. Ikkina Sheexaanu baꞌꞌannohu hiittoonniiti?

7. Yohaannisi Ajuuja 12:1, 2, 5, 10 kultanno garinni, Kalaqama 3:15 kulloonni mancho ayeti?

⁷ Kalaqama 3:15 kulloonni mancho ayetiro, Qullaawu Maxaafihu jeefote maxaafira xawinsoonni. (Yohaannisi Ajuuja 12:1, 2, 5, 10 nabbawi.) Tini uullate aana noo mancho diꞌꞌikkitino! Ise lekkatenni agana kaxxite umoho 12 beeddahe baꞌlatto wodhitinota kulloonni. Tini mancho lowo geeshsha baxxino qaaqqo yaano Maganu Mangiste iltino. Tini Mangiste iimita ikkitino daafira manchono iimita ikkitinoti dihuluullissannote. Tini mancho ammanantinore ayyaanu kalaqo amaddinota Yihowa dirijjiteta iimiidi kifile riqibbanno.—Gal. 4:26.

8. Manchonnihu qaru sirchi ayeti? Manchote sircho ikkinohu mamooteeti? (Kalaqama 22:15-18)

⁸ Qoleno Qullaawu Maxaafi manchonnihu qaru sirchi ayimma bande anfeemmo gede kaaꞌlannonke. Isi Abirihaami sirchooti. (Kalaqama 22:15-18 nabbawi.) Masaalo kultanno garinni, Yesuusi dayinohu konni ammanamino manchi sirchinniiti. (Luq. 3:23, 34) Ikkollana kuni sirchi Sheexaane Daawuloosi cancane hunanno daafira mannunnita roortino wolqa noositi egennantinote. Yesuusi 30 diri balla heeꞌre qullaawu ayyaaninni buuraminoha mitto Maganu Beetto ikkino. Yesuusi buurami woyite manchonniha qara sircho ikkino. (Gal. 3:16) Yesuusi reye reyotenni kaihu gedensaanni, Maganu “ayirrinyunna galatu baꞌlatto” worinosi hattono “roorre baala gordohonna baattote” uyinosi; ‘Daawuloosi looso diigateno’ roorre uyinoonnisi.—Ibi. 2:7; Mat. 28:18; 1 Yoh. 3:8.

9-10. (a) Manchonniha layinki sircho ikkitinori ayeooti? Layinki sircho ikkitinohu mamooteeti? (b) Kawiinni aanchine maa laꞌneemmo?

⁹ Manchonniha layinki sircho ikkitannorino no. Soqqamaasinchu Phaawuloosi Ayihudenna Ayihude ikkinokkihu buuramino Kiristaani daafira coyiꞌri woyite layinki sircho ikkitannori ayeootiro xawisino. Isi togo yiino: “Kiꞌne Kiristoosinni heedhiniro, Abirihaami sirchooti; hexxote qaali garinnino ragidhinannireeti.” (Gal. 3:28, 29) Yihowa mitto Kiristaancho qullaawu ayyaaninni buuranno woyite hakku manchi manchote sirchi wido ikkanno. Hakko daafira manchote sircho ikkitinori Yesuusi Kiristoosaatinna ledosi gashshitannoreeti 144,000. (Aju. 14:1) Insa baalunku Anninsa Maganu Yihowa akata leellishshannoreeti.

¹⁰ Kalaqama 3:15 noo masaalora kulloonniri ayeootiro laꞌnoommo; hanni xa Yihowa tenne masaalo dirimu dirimunni wonshinohu ma garinniitironna tini masaalo kaaꞌlitannonkehu hiittoonniitiro haransine laꞌno.

TINI MASAALO WOꞌMITINOHU HIITTOONNIITI?

11. Manchote sirchi ‘gindi’ madiꞌrinohu ma garinniiti?

¹¹ Kalaqama 3:15 noo masaalo kultanno garinni hamashshu manchote sirchi ‘ginde’ qasanno. Sheexaanu Yihudunna Roomu manni Maganu Beetto shaanno gede assi yannara tini masaalo woꞌmitino. (Luq. 23:13, 20-24) Ginde madiꞌrino manchi mitu barri geeshsha qaafa dandaannokkinte gede, Yesuusino reye waammate giddo keeshshinohu sasu birri giddo mittore assa didandiino.—Mat. 16:21.

12. Hamashshu umi cancanamannohu hiittoonniiti? Mamoote?

¹² Kalaqama 3:15 noo masaalo woꞌmitannohu Yesuusi reyotenni kairooti. Mayira? Korkaatuno masaalo kultannonte gede manchote sirchi hamashshu umo cancananno. Hatto assate Yesuusiti gindu mada hura hasiissanno. Qoleno mada hurtino! Yesuusi sayikki barra reyannokkiha ayyaanu kalaqo ikke reyotenni kaino. Maganu hirqino yannara isi Sheexaanu umo cancane hunanno. (Ibi. 2:14) Kiristoosinna ledosi gashshitannori hamashshu sircho yaano uullate aana noore Maganu diinna baala coꞌo assite guddanno.—Aju. 17:14; 20:4, 10.d

TINI MASAALO KAAꞌLITANNI NOONKEHU HIITTOONNIITI?

13. Tini masaalo woꞌmase kaaꞌlitinonkehu hiittoonniiti?

¹³ Ati heeshshokki Maganoho sayisse ootto soqqamaanchootiro, tini masaalo woꞌmase kaaꞌlitanni noohe. Yesuusi mancho ikke uullara dayino. Isi Annisi akatta guutu garinni leellishino. (Yoh. 14:9) Hakko daafira isi widoonni Magano Yihowa afanna baxa dandiinoommo. Qoleno isi songote umo ikkino daafira xaa yannara rosiisannonke rosinninna aannonke biddishshinni horo afiꞌnoommo. Isi Yihowa hagiirsiisanno garinni heeꞌra dandiineemmo gara rosiisinonke. Qoleno ninke baalunku Yesuusi reyonni yaano gindisi madiꞌranni horo afiꞌnoommo. Hiittoonni? Yesuusi reyotenni kai woyite mundeesi waaga ‘cubbu baalunni keereensitannonketa’ guuta kakkalo asse shiqishino.—1 Yoh. 1:7.

14. Yihowa Edeni Gannatete coyiꞌrino masaalo bayichonko woꞌmitinokkita mayinni anfeemmo? Xawisi.

¹⁴ Yihowa Edeni Gannatete masaalo coyiꞌri woyite yiinori tini masaalo woꞌmitukki mite yanna geeshsha keeshshitannota leellishanno. Mancho daanno yinoonni sircho ilta geeshsha, Daawuloosi harunsaanosi gamba assiꞌra geeshsha hattono lamente gaamo mereero diinoomu kalaqama geeshsha yanna hasiissanno. Tenne masaalo daafira afanke kaaꞌlitannonke; mayira yiniro, tini masaalo Sheexaanu alame Yihowa magansidhannore gibbannota kulte qorowisiissannonke. Yesuusino yannate gedensaanni rosaanosira togoo qorowishsha kulino. (Maq. 13:13; Yoh. 17:14) Roorenkanni saihu xibbu diri giddo tini masaalo woꞌmitanna laꞌnoommo. Hiittoonni?

15. Alame albinni roore gibbinonkehu mayiraati? Ikkirono Sheexaane waajjineemmo gede assannonkeri dino yineemmohu mayiraati?

¹⁵ Yesuusi 1914nni buuramino moote ikkihunni shiima yanna gedensaanni Sheexaanu uullara tugamino. Xa isi uullate qooxeessira heeꞌre baꞌꞌanno yanna agadhe no. (Aju. 12:9, 12) Ikkirono isi disammi yee ofolle agadhe no. Sheexaanu lowo geeshsha hanqino daafira Maganu manna sianni no. (Aju. 12:13, 17) Hakko daafira alamete noo manni Maganu manna albinni roore giwanni haꞌrino. Ikkirono Sheexaanenna harunsaanosi waajjineemmo gede assannonkeri dino. Hatteentenni ninkeno soqqamaasinchu Phaawuloosi gede, “Maganu ninke ledo heeꞌriro, qeelankera dandaannohu ayeti?” yineemmo. (Rom. 8:31) Kageeshsha laꞌnummonte gede Kalaqama 3:15 kulloonni masaalo roore anga woꞌmitino; hakko daafira woꞌmunni woꞌma Yihowa addaxxa dandiineemmo.

16-18. Kertesi, Yursulanna Jesiika Kalaqama 3:15 noo masaalo wodanchansa kaaꞌlitinonsahu hiittoonniiti?

¹⁶ Yihowa Kalaqama 3:15 uyino hexxo iillannonke qarri ikkihano ikkiro dandiine saꞌneemmo gede kaaꞌlitannonke. Guwaami yinanniwa misiyoone ikke soqqamannohu Kertesi yinanni rodii togo yiino: “Yihowara ammanama qarra ikkitannoe gede assanno fonqoli iillinoe woyiti no. Kayinni Kalaqama 3:15 noo masaalo hiincaꞌya, iimi Annaꞌya addaxxa agureemmokki gede kaaꞌlitinoe.” Kertesi Yihowa qarranke baala hoolanno yanna quqquxame agadhanno.

¹⁷ Bavaariyaho heedhannoti Yursula yinanni rodoo Kalaqama 3:15 wodanchase Qullaawu Maxaafi Maganu ayyaani massaganna borreessinoonniha ikkinota ammantanno gede kaaꞌlitinoseta coyidhino. Ise wole baalanti masaalo tenne masaalo ledo xaadooshshe afidhino gara wodanchitino; tini lowo geeshsha dhagge ikkitinose. Qoleno ise togo yitino: “Mannu hexxo nookkiha gatannokki gede Yihowa bayichonkonni assinore wodanchummati dhagge assiꞌroomma.”

¹⁸ Mayikironeezhiyaho heedhannoti Jesiika yinanni rodoo togo yitino: “Umo halaale rosumma woyite macciishshaminoere xaa geeshsha qaageemma! Kalaqama 3:15 kulloonni masaalo woꞌmitanni no. Tini masaalo xa heeꞌnanni heeꞌnoommoti qarru batiꞌrino heeshsho Yihowa hedinota ikkitinokkita wodancheemma gede kaaꞌlitinoe. Qoleno tini masaalo Yihowara soqqamaꞌyanni xa dancha heeshsho, albillitte qole tennenni roortino heeshsho heeꞌreemmata albinni roore ammaneemma gede assitinoe.”

19. Masaalonnihu jeefote gafi woꞌmanno yine addaxxineemmo gede assannonkeri maati?

¹⁹ Kageeshsha laꞌnummonte gede Kalaqama 3:15 kulloonni masaalo woꞌmitanni no. Manchote sirchi ayimmanna hamashshu sirchi ayimma xabbe leeltino. Manchonniha qara sircho ikkinohu Yesuusira gindu mada hurtino; hattono isi xa ayirrinye adhinoha reyannokki Moote ikkino. Yihowa manchonnihu layinki sirchi wido ikkitinore doorate looso gudanni no. Masaalonnihu umi gafi woꞌmino daafira, jeefote gafino yaano hamashshu umi cancanamannota kultanno masaalono woꞌmitannota ammanneemmo gede assannonkehu ikkadu korkaati noonke. Sheexaanu baꞌꞌanno woyite ammanantinoti mannu ooso fooliishsho afidhanno! Hakka geeshsha kayinni hexxo mudhinoonke. Maganinke addaxxinanniho. Isi manchote sirchi widoonni ‘baattote aana heeꞌranno manni baalunkura’ falahino atoote abbanno.—Kal. 22:18.