Ruutinna Naaoomi

QULLAAWU MAXAAFI giddo Ruuti yinanni maxaafi no. Isiraeelete manna mesaafinte gashshitu waro mitte maate no; Ruuti maxaafi tenne maatere coyiꞌranno. Ruuti Moaabi gobba beettooti; Maganu daga yaano Isiraeelete manni gaꞌre diꞌꞌikkitino. Ikkollana Yihoware rossuti, iso lowo geeshsha baxxu. Ruutira Yihoware rosiissinoti Naaoomi yinanni jawa manchooti.

Naaoomi Isiraeelete manchooti. Isenna ayiddaannise, hattono lamu labballu oosonsa Isiraeelete gobbara mannu hudiꞌrita, Moaabi gobba hadhu. Hakkiinnino mitto barra Naaoomi ayiddaanni reyi. Gedensaannino lamu oosose, Ruutinna Orfa yinannire Moaabi seenne adhitu. Ikkollana 10 diri gedensaanni, lamunku Naaoomi ooso reyitu. Naaoominna lamenti seenni lowo geeshsha dadillino! Xa Naaoomi ma assitannokka?

Mitto barra Naaoomi mannisewa higate seeda doogo hadhara kaꞌu. Ruutinna Orfa ledose heeꞌra hasiꞌrino daafira, ledo haꞌri. Shiima geeshsha haꞌri gedensaanni Naaoomi lamenta beetto, ‘Qae higgine amuwiꞌne ledo heedhe’ yitunsa.

Naaoomi lamenta sunqite keerunni yitu. Insano wiꞌli; korkaatuno lamenti Naaoomi lowo geeshsha baxanno. Togono yii: ‘Deeꞌni! Ate ledo mannikkiwa haꞌneemmo.’ Naaoomi kayinni, ‘Oosoꞌya higge. Koye heedhiniro woyyannoꞌnena’ yitunsa. Konni daafira, Orfa qae higgu. Ruuti kayinni dihiggino.

Naaoomino Ruutiwa higge, ‘Orfa qae higgino. Atino ledose higi’ yituse. Ruuti kayinni, ‘Ate agure higeemma gede assate woꞌnaaltooti! Ledokki haꞌreemmana agurie. Haꞌrittawa haꞌreemma; heeꞌrittawa heeꞌreemma. Mannikki mannaꞌya ikkanno; Maganikki Maganoꞌya ikkanno. Reyittawa reemma; hakkono madaarameemma’ yituse. Ruuti hatto yituta, Naaoomi ise qae higganno gede huucca agurtu.

Gedensaannino lamenti Isiraeelete gobba iilli. Hakkono heeꞌra hanafi. Hatti yanna hayixe mindannita ikkitino daafira, Ruuti hakkawontenni fishshaho xinqira hanaffu. Booeezi yinanni manchi fishshisira xinqidhanno gede agurise. Booeezi ama ayeetiro afootto? Reaabi yinannite Iyyaarkote katami manchooti.

Mitto barra Booeezi Ruuti togo yiise: ‘Atere woꞌmankare macciishshoommo; Naaoomira assootta danchummano macciishshoommo. Annakkinna amakki, hattono gobbakki agurte egennoottakki manni ledo heeꞌrate dawootta garano afoommo. Yihowa maassiꞌrohe!’

Ruutino, ‘Mootichchaꞌya, ati anera danchare assoottoe. Dancha qaale coyidhe sheshifachchishoottoe’ yitusi. Booeezi ise lowo geeshsha baxi; shiima geeshsha keeshshe lamunku adhami. Tini Naaoomi lowo geeshsha hagiirsiissuse! Boeezinna Ruuti umi qaaqqonsa Iyyoobeedi ilita, Naaoomi roorenka hagiidhitu. Gedensaanni Iyyoobeedi Daawitira ahaaho ikkino; Daawitire albaange lowore ronseemmo.