Umiha Isiraeelete Nugusa Saaooli

SAAMUEELI manchu umira zayite dunanna lai. Hakkawaro mittu manchi nugusa ikkinota leellishate umoho zayite dunnanni. Yihowa Saamueeli Saaoolira umoho zayite dunanno gede kulinosi. Tini zayite lowo geeshsha suꞌniitannotenna baxxitinote.

Saaooli nugusa ikke afeemmo yee dihedino. Isi Saamueeli togo yii: ‘Ani Isiraeelete giddo shiimiidita ikkitino Biiniyaami gaꞌre widooti. Nugusa ikkatto yaattoehu mayiraati?’ Saaooli isonooto ayirradonna worba asse hedinokki daafira, Yihowa baxinosi. Nugusa ikkanno gede doorinosihuno iseraati.

Ikkollana Saaooli buxichcho woyi yara diꞌꞌikkino. Ilaminohu dureeyyete ayiiddinniiti; qoleno xumahonna hojjaameessaho. Hojjatenni Isiraeelete giddo baalanka rooranno! Lowo geeshsha doda dandaannohonna jawaataho. Yihowa Saaooli nugusa ikkanno gede doorino daafira Isiraeelete manni lowo geeshsha hagiidhi. Baalunku qoonqo gotti asse, ‘Nugusu hegerera heeꞌro!’ yii.

Isiraeelete diinna xaano bashshonte gede wolqaataammaho. Xaa geeshshano Isiraeelete manna lowo geeshsha mitiinsitanni no. Saaooli nugusa ikke lowo geeshsha keeshshikki, Amooni daga Isiraeele qassara daggu. Ikkollana Saaooli lowo wottaaddara gamba assire Amooni daga qeeli. Tenne assino daafira, Saaooli nugusa ikkasi Isiraeele hagiirsiissunsa.

Diru lexxanni haꞌri kiiro, Saaooli Isiraeele diinnansa duuchcha higge qeeltanno gede assi. Saaoolira Yoonaataani yinannihu worbu beetti noosi. Yoonaataanino Isiraeele duuchcha ola qeeltanno gede kaaꞌlino. Filisxeemete gosa xaano Isiraeelete qara diinnaati. Mitto barra lowo kume ikkitanno Filisxeeme Isiraeele qassara daggu.

Saamueeli, ‘Daye Yihowara kakkalo shiqishammo geeshsha agari’ yee Saaoolira kulisi. Ikkollana Saamueeli daanni doogote taxxi yii. Saaooli Filisxeeme ola hanaffanno yee waajje, balaxe mare kakkalo umisi shiqishi. Saamueeli dayiti Saaooli, Yihowara dihajajamootto yiisi. Qoleno, ‘Yihowa Isiraeelete nugusa ikkannoha wole dooranno’ yee kulisi.

Gedensaannino Saaooli layinkimeeshsho Yihowara hajajamikki gati. Konni daafira Saamueeli togo yee kulisi: ‘Yihowara hajajama, dooramino gerechcho isira kakkalo asse shiqishantenni roortanno. Yihowara hajajamoottokki daafira, Yihowa Isiraeelete nugusa ikkite heeꞌrattora difajjannohe.’

Tenne xaggenni dancha roso ronseemmo. Tini xagge, ayeewoteno Yihowara hajajama lowo geeshsha hasiissannota ikkase rosiissannonke. Qolteno, Saaoolinte gede danchu manchi soorrame busha mancho ikkara dandaannota leellishshanno. Ninke busha manna ikka horonta dihasiꞌneemmo; hasiꞌneemmoni?