Umiha Israeelete Moote

Yihowa Israeele massagganno daanyoota doorinonsa; insa kayinni moote moohisansara hasidhino. Insa Saamueeli togo yitu: ‘Wole gosa assidhannonte gede gashshannonke moote moohisinke.’ Saamueeli tini gara ikkitinokkita afino; konni daafira Yihowa huucciꞌri. Yihowa togo yiisi: ‘Insa anella mishshinona, ate dimishshino. Konni daafira yitinoheta macciishshite moote moohisinsa; kayinni mookkannonsa mootoolla assitannonsatano kulinsa.’ Mannu kayinni Saamueeli yiinota giwe ‘Deeꞌni, ninke moote hasiꞌneemmo!’ yii.

Yihowa Saamueelira Saaooli yinanni manchi Israeelete umi moote ikkanno gede kulisi. Saaooli Raama yinanniwa haꞌre Saamueelinni xaadi; hakkiicho Saamueeli Saaooli umira zayite dune moote assisi.

Hakkunni gedensaanni, Saamueeli Israeelete haaro mootensa leellishansara woshshinsa. Saaooli kayinni hiikka higiro hoongi. Higiwa hoongoonnihu mayiraatiro afootto? Korkaatuno isi uduunnu giddo maaxamino. Hakkiinni insa Saaooli maaxaminowiinni haadhe abbite, mannu albaanni uurrissu. Saaooli hakko noo manna baala hojja rooreho; qoleno isi lowo geeshsha xumaho. Saamueeli ‘Yihowa doorino manchi konneeti’ yiinsa. Hatte yannara mannu, “Moote hegerera moohi!” yee cance coyiꞌri.

Umi qara Moote Saaooli Saamueeliranna Yihowara hajajamino. Yannate gedensaanni kayinni hajajamannokkiha ikkino. Lawishshaho, hakkawaro moote kakkalo shiqisha dihasiissannosi. Mitte hige Saamueeli Saaoolira ‘Ani daammo geeshsha agari’ yiisi; Saamueeli kayinni rahe didayino. Konni daafira, Saaooli umisi kakkalo shiqishino. Tennera Saamueeli maa assinoro afootto? Isi Saaooli, ‘Maganikki Yihowara dihajajamootto’ yiino. Saaooli loosino soꞌronni rosiyya?

Yannate gedensaanni, Saaooli Amaaleeqi daga ledo olamara haꞌri woyite, Saamueeli ‘mittono gatisittokki shite gudi’ yiisi. Saaooli kayinni Amaaleeqi daga Moote Agaagi dishiino. Yihowa Saamueelira, ‘Saaooli anera hajajama giwino’ yii. Saamueeli lowo geeshsha dadille Saaoolira togo yii: ‘Ati Yihowara hajajama agurootto daafira, Isi wole moote dooranno.’ Saamueeli haꞌrara kaita, Saaooli uddanosi qacce amadi; hakkiinni Saamueeli uddano dadhantu. Saamueeli Saaoolira, ‘Yihowa Israeelete gashshoote dare ate anganni haaꞌre hoolino’ yiisi. Yihowa Israeelete gashshoote Iso baxannonna isira hajajamanno manchira aaraati.