Mitte Beetto Ayirrado Mancho Kaaꞌlitu

TINI shiima beetto mayitanni nooro afootto? Yihowa masaalaanchi Elsairenna isi Yihowa kaaꞌleennasi assinoha dancha coye manchote kultanni no. Mancho kayinni Isiraeelete manni wido ikkitinokki daafira, Yihoware diaffino. Tini shiima beetto manchote qae mayira martinoro hanni laꞌno.

Tini mancho Sooriyu manni widooti. Ayiddaannise Niꞌꞌimaani yinanniho; isi Sooriyu wottaaddari roorrichchaati. Sooriyu manni tenne shiima Isiraeelete beetto qafade, Niꞌꞌimaani galtera soqqamaancho ikkitara abbino.

Niꞌꞌimaani xiigaho yinannihu bushu xiwani amadisi. Kuni xiwani biso nafa tattayisannoho. Konni daafira beetto Niꞌꞌimaani galtera, ‘Mootichchiꞌya Isiraeelete gobbara heeꞌrannohu Yihowa masaalaanchiwa mayi haꞌralla. Xiigisinni hursannosina’ yite kultanni no. Gedensaannino manchote ayiddaannira tenne kullisi.

Niꞌꞌimaani xiwanisinni hurara lowo geeshsha hasiꞌrino daafira, Isiraeelete gobba haꞌrara kai. Hakkiira mariti, Elsai minira haꞌri. Elsaino Niꞌꞌimaani Yordaanoosi Lagira lamala hige hayishshiꞌranno gede kulasira soqqamaanchosi soyi. Konnira Niꞌꞌimaani lowo geeshsha hanqe, ‘Ninke gobbara noo lagga Isiraeelete nooha baalanka laga roortanno!’ yii. Tenne coyiꞌrihu gedensaanni, agure haꞌri.

Ikkollana soqqamaanosi giddonni mittu, ‘Mootichcha, Elsai roore ayirrannore assi yoommehero assatto. Hatto ikkina yiihente gede mayira hadhe dihayishshiꞌratto?’ yiisi. Niꞌꞌimaanino soqqamaanchisi yiinore macciishshe, Yordaanoosi Lagira mare lamala hige waa lixe fuli. Hatto assita, bisisi hure keeraancho ikki!

Niꞌꞌimaanino lowo geeshsha hagiidhi. Elsaiwa galagale mare, ‘Isiraeelete gobbara noo Magani, uullate aana isi calla halaalaancho Magano ikkinota xa afoommo. Konni daafira, tenne abboommohe elto adhi’ yii. Elsai kayinni, ‘Deeꞌni, diadheemmo’ yee qoli. Niꞌꞌimaani hursinohu Yihowa ikkino daafira, Elsai manchu abbinosi elto adha soꞌro ikkitinota afino. Ikkollana Elsai soqqamaanchi Giyaazi kayinni elto umisira adhara hasiꞌrino.

Konni daafira Giyaazi maa assiro afitto? Niꞌꞌimaani haꞌri gedensaanni, iso hordofanni haꞌri. Mare iilliti, ‘Elsai soyeennae dawoommo; abbittosi elto giddo gama xa dayino wosinira aara hasiꞌrinota kuli yiinoe’ yii. Togo yaasi kayinni kaphphoho. Niꞌꞌimaani Giyaazi kaphphanni noota diafino; konni daafira gama elto uyisi.

Giyaazi minira daanno wote, Elsai isi assinore afe no. Yihowa balaxe kule kainosi. Konni daafira, ‘Konne busha coye assoottohura, Niꞌꞌimaani xiigi atera higanno’ yiisi. Hakkawotenni xiigu Giyaazira higi!

Tenne baala xaggenni ma ronseemmo? Umi xaggenni, shiima beetto assitunte gede Yihoware mannaho kula hasiissannonketa ronseemmo. Togo assanke lowo geeshsha danchate. Layinkitenni, Niꞌꞌimaani umi qara ikki gede naaxxa hasiissannonkekkita ronseemmo; roorenkanni Maganu soqqamaanora hajajama hasiissannonke. Sayikkitenni, Giyaazi kaphphi gede ninke kaphpha hasiissannonkekkita ronseemmo. Qullaawa Maxaafa nabbawatenni lowo roso diafiꞌneemmo?