Olamaanchonna Mitte Shiima Qaaqqo

Sooriyu gobbara annise mininni xeertidhe heedhannoti mitte shiima Israeelawitte qaaqqo no. Sooriyu olanto ise ayiddisewiinni badde haadhe hadhino; hakkiinni ise Niꞌꞌimaani yinannihu olantote roorrichi galtera soqqantannota ikkitu. Hatti shiima qaaqqo heedhannohu Yihowa magansiꞌrannokki manni ledooti; ise kayinni Yihowa magansiꞌra diagurtino.

Niꞌꞌimaani gogu dhibbi amadinosi; kuni lowo geeshsha waadanno dhibbaati. Hatti shiima qaaqqo kayinni iso kaaꞌla hasidhino. Konni daafira Niꞌꞌimaani galtera togo yitu: ‘Minaannakki ayi hursannoro afoomma. Israeelete gobbara Elsai yinannihu Yihowa masaalaanchi no. Minaannikki isiwa haꞌriro huranno.’

Niꞌꞌimaani galte hatti qaaqqo yitinosere isira kultusi. Niꞌꞌimaani dhibbisinni hura hasiꞌrino daafira, Elsai noowa Israeelete gobba haꞌri. Niꞌꞌimaani, Elsai fule coyishiishannoe yee hedino. Elsai kayinni Niꞌꞌimaani keere haaꞌrara soqqamaanchosi soyi; qoleno Niꞌꞌimaanira togo yaanno gede kulinosi: ‘Yordaanoosi Lagira lamala higge lixxe fuli. Hakkiinni dhibbikkinni huratto.’

Hakkiinni Niꞌꞌimaani lowo geeshsha hanqi. Togo yii: ‘Kuni masaalaanchi Maganisi suꞌma woshshe xibbiꞌyara anga doyisse hursannoeha lawinoe. Isi kayinni Israeelete wayinni hayishshiꞌri yaannoe? Sooriyu gobbara noo wayi Israeelete noo waa dirooranno? Hakkira haꞌre dihayishshiꞌreemmo?’ Niꞌꞌimaani hanqe Elsai mininni fule haꞌri.

Soqqamaanosi kayinni Niꞌꞌimaani togo yite amaaltusi: ‘Dhibbikkinni hurate hakkiinni roorino coye assi yoommehero diassatto? Masaalaanchu dihadhe hayishshiꞌrilla yiinohe? Isi yiinohe gede mayira diassatto?’ Niꞌꞌimaani soqqamaanosi amaaltinosi amaale macciishshi. Niꞌꞌimaani Yordaanoosi Laga haꞌre wayi giddo lamala hige lixe fulino. Niꞌꞌimaani wayi giddo lamala hige lixe fuli gedensaanni, dhibbisinni huri. Hakkiinni isi lowo geeshsha hagiidhino daafira, Elsai galatara galagale higino. Niꞌꞌimaani Elsaira, ‘Yihowa halaalaancho Magano ikkinota xa afoommo’ yiino. Niꞌꞌimaani dhibbisinni hure higita, Israeelawitte qaaqqo mageeshshi geeshsha hagiidhitinoha lawannohe?