Goofimarchoho Moohinoha Isiraeelenniha Dancha Nugusa

IYYOOSIYAASI lame wodiidi Isiraeelete gaꞌrera moohi wote sette dirolla ikkinosi. Settu diri nugusa ikkate lowo geeshsha shiimaho. Konni daafira Iyyoosiyaasi umi qara gosa gashshanno gede jajjabbu manni kaaꞌlinosi.

Iyyoosiyaasi nugusa ikkihunni lamalu dirinni kayise Yihowa seera harunsa hanafi. Isino Daawiti, Iyyoosaafixinna Hiziqiyaasiha dancha lawishsha haꞌrunsino. Hakkiinnino shiima beetto ikke heeꞌrenni, worbimmate coye assi.

Seeda yanna rooriidihu Isiraeelete manni bunshe assanni keeshshino. Kaphphu maganna magaꞌnino; misillateno sagadino. Konni daafira Iyyoosiyaasi mannasi adhe haꞌre, kaphphu magaꞌna gobbatenni huna hanafi. Batinynyu manni kaphpho magaꞌnanno daafira tenne assa lowo loosooti. Iyyoosiyaasinna mannisi kowiichcho misilla cancantanna lai.

Hakkunni gedensaanni Iyyoosiyaasi sase manna Yihowa mine gatamartanno gede doori. Mannuno woxe fushshe konni sasu mannira oyeenna, insano loonsanni loosira baattu. Maganu mine gatamarranni heeꞌneenna, kakkalaanote biili Kelqiyaasi hakkiichcho mitto muxxe ikkinore afi. Hakkuno Yihowa seeda yanna albaanni seerasi Muse borreessanno gede assi maxaafaati. Kuni maxaafi bae seeda diro keeshshino.

Hakko maxaafano Iyyoosiyaasiwa massini; isino nabbabbeꞌꞌe yii. Iyyoosiyaasi nabbambanna macciishshiti, mannu Yihowa seera ayirrisikki heeꞌrinota afi. Konni daafira lowo geeshsha dadilli; hakkiinnino koye misilete aana laꞌꞌattonte gede uddanosi dari. Qoleno togo yii: ‘Annuwanke konni maxaafira borreessinoonni seera agadhitinokki daafira, Yihowa ninkera hanqino.’

Iyyoosiyaasi Yihowa insa aana abbannore buuxanno gede kakkalaanote biilo Kelqiyaasi hajaji. Kelqiyaasino masaalaancho ikkitinota Hildaana yinanni mancho xaꞌmara haꞌri. Iseno Yihowawiinni dagginota togo yitanno sokka Iyyoosiyaasira kulanno gede kultusi: ‘Mannu duuchchunku kaphphu maganna magaꞌninohuranna uulla bunshetenni woꞌmitinohura Yerusaalamenna manna baalanka qorichchisheemmo. Ati Iyyoosiyaasi kayinni dancha ikkinore assootto daafira, ati lubbote heedheenna konne qorichcha diabbeemmo.’