Iyosiyaasi Yihowa Seera Baxino

Iyosiyaasi settu dirihu heeꞌre Yihudu moote ikkino. Hatte yannara, mannu digintete looso loosanninna kaphu maganna magansiꞌranni no. Iyosiyaasi 16 diro ikkisita, Yihowa danchu garinni magansiꞌra dandiinannihu hiittoonniitiro rosa hasiꞌri. Isi 20 dirihu heeꞌre, Yihudu gobba baalate aaninni kaphu maganna huna hanafi. Iyosiyaasi 26 diro ikkisita, Yihowaha qullaawa mine gatamarate kai.

Hiliqiya yinannihu kakkalaasinete biili, qullaawu mini giddo Yihowa Seera borreessinoonni maxaafa afi; kuni maxaafi Muse borreessinoha ikkikki digatino. Mootete borreessaanchi Saafaani, seera borreessinoonni maxaafa Iyosiyaasiwa haaꞌre masse qoonqosi naggi assi nabbawisi. Iyosiyaasi maxaafu yaannore macciishshiti, mannu lowo diro Yihowara hajajama giwe keeshshinota afi. Moote Iyosiyaasi Hiliqiyara togo yii: ‘Yihowa lowo geeshsha hanqinonke. Xa hadhe maa assa hasiissannonkero Yihowa xaꞌminke.’ Yihowa masaalaancho Hildaana widoonni togo yii: ‘Yihudu manni ane agure wole maganna magansiꞌranni no. Konni daafira insa qorichisheemmo; kayinni Iyosiyaasi umosi heeshshi assino daafira, isi moote ikke heeꞌreenna diqorichisheemmo.’

Moote Iyosiyaasi Yihowa yiinore macciishshiti, qullaawu minira haꞌre Yihudu manna gamba assi. Hakkiinni isi manna baalaho qoonqosi naggi asse, Yihowa Seera nabbawinsa. Iyosiyaasinna Yihudu manni ‘Yihowara woꞌmu wodaninkenni hajajammeemmo’ yii.

Yihudu daga lowo diro Faasika diayirrissino. Iyosiyaasi ‘Faasika diru baala ayirrisa hasiissanno’ yaanno seera nabbawiti, mannaho togo yii: ‘Yihowara Faasiku ayyaana ayirrisa hasiissannonke.’ Hakkiinni Iyosiyaasi qullaawu miniwa kakkalo kakkallanni gede assi; hattono faarso faarsanno manna qixxeessi. Hakkiinni Faasiku ayyaana ayirrissu gedensaanni, Shiishinokki Timi Ayyaana lamala barra ayirrissu. Saamueeli warinni kayise hattoo Faasika ayirrinse diegenninoonni. Iyosiyaasi Yihowa Seera lowo geeshsha baxanno. Atino Yihowa daafira rosa baxatto?